སྣ་དཀར་རྩེ་རྫོང་འཐུས་གྲོང་ཚོའི་མང་ཚོགས་ཚོས་གཅིག་ཕན་གཅིག་རོགས་བྱས་ཏེ་འབྱོར་འབྲིང་ཁང་པར་སྤོ་བ།
“སླར་ཡང་གླུ་ཞིག་བླངས་ནས་ཏང་ལ་འབུལ། བདེ་སྐྱིད་གླུ་དབྱངས་སྙན་མོ་ཁྱེད་ལ་ལེན” ཟླ་10ཚེས་13ཉིན《སླར་ཡང་གླུ་ཞིག་བླངས་ནས་ཏང་ལ་འབུལ》ཞེས་པའི་གླུ་དབྱངས་ཀྱི་ཁྲོད་དུ་སྣ་དཀར་རྩེ་རྫོང་སྟག་ལུང་གྲོང་རྡལ་འཐུས་གྲོང་ཚོའི་དུད་ཚང་37གྱི་མང་ཚོགས་144ཡིས་ཏང་དང་སྲིད་གཞུང་གི་བཀའ་དྲིན་ཡིད་ལ་འཆང་བཞིན་ཡུན་རིང་རེ་སྒུག་བྱས་པའི“འབྱོར་འབྲིང་ཁང་པར”སྤོས་ཏེ་འཚོ་བ་གསར་པ་སྐྱེལ་འགོ་ཚུགས་པ་རེད།
ཆ་སྙོམས་ས་བབ་མཐོ་ཚད་སྨི་5070ཟིན་པའི་འཐུས་གྲོང་ཚོར་འཛམ་གླིང་གི་ས་བབ་མཐོ་ཤོས་ཀྱི་སྲིད་འཛིན་གྲོང་ཚོ་ཞེས་འབོད་སྲོལ་ཡོད། མཐོ་ཞིང་གྲང་ངར་ཆེ་ལ་གསོ་རླུང་དཀོན་པར་བརྟེན། ས་གནས་དེ་གའི་མང་ཚོགས་ཀྱིས་སྡོད་ཁང་གི་ཆ་རྐྱེན་ལེགས་སུ་འགྲོ་བར་རེ་བ་ཆེན་པོ་འཆང་གི་ཡོད། “ལོ་ཤས་གོང་ཏང་དང་སྲིད་གཞུང་གི་ཐུགས་ཁུར་འོག གྲོང་ཚོའི་མང་ཚོགས‘བདེ་སྡོད་ཁང་པར’སྤོ་རྒྱུ་བྱུང་སོང་། ད་ཆ་ཏང་དང་སྲིད་གཞུང་གིས་ང་ཚོར་སླར་ཡང‘འབྱོར་འབྲིང་ཁང་པ’སྐྲུན་རོགས་གནང་བྱུང་། འབྱོར་འབྲིང་འཚོ་བ་སྐྱེལ་འདོད་ན་ཏང་ལ་བརྟེན་རྒྱུ་རང་ལས་མེད། ཏང་གི་བཀའ་དྲིན་བརྗེད་མི་རུང་། མི་རབས་ནས་མི་རབས་བར་ཏང་གི་རྗེས་སུ་འབྲང་རྒྱུ་ཡིན”ཞེས་ཚང་མས་བཤད།
གཙོ་འཛིན་གྱི་སྐུ་པར་མཐོན་པོར་བཏེགས་ནས“འབྱོར་འབྲིང་ཁང་པར”སྤོས་ཤིང་། སྡོད་ཁང་སྤོ་བའི་ཉིན་དེར་ས་གནས་དེ་གའི་མང་ཚོགས་ཀྱིས་དེ་སྔོན་གྱི་གནས་སྤོས་གོམས་གཤིས་བསྒྱུར་ཏེ། རང་འགུལ་ངང་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་བོད་ཀྱི་མི་རིགས་ཁག་གི་མི་དམངས་གཅིག་སེམས་གཅིག་ཏུ་འབྲེལ་བའི་སྐུ་པར་ཁྱིམ་གསར་པའི་མངོན་གསལ་དོད་སར་བཀལ་ནས་ཏང་གི་བཀའ་དྲིན་ཚོར་བར་བྱས་པ་རེད། “ཁང་པ་གསར་པ་འདིར་སྨི་ངོས་གྲུ་160ལྷག་ཙམ་འདུག ངས་དངུལ་སྒོར་ཁྲི་10ལྷག་ཙམ་ལས་གཏོང་དགོས་མ་བྱུང་། གུང་ཁྲན་ཏང་མེད་ན་ང་རང་ཁང་པ་སྐྱིད་པོ་འདི་འདྲར་སྡོད་རྒྱུ་ཡོང་ག་ལ་སྲིད། ཆུ་འཐུང་དུས་ཁྲོན་པ་འདྲུ་མཁན་མི་བརྗེད་པ་བཞིན་ཏང་གི་བཀའ་དྲིན་ང་ཚོས་ནམ་ཡང་བརྗེད་མི་རུང”ཞེས་ཡུལ་མི་མིག་དམར་ཚེ་རིང་གིས་སེམས་འགུལ་ཐེབས་བཞིན་བཤད།
མིག་དམར་ཚེ་རིང་གི་བློ་ལ་བབས་པའི་ཐོག་སོ་ཉིས་ལྡན་གྱི་བོད་ཁང་དེར། རྒྱ་ཆེ་བའི་སྒོ་ར་དང་། མཛེས་བཟོ་བྱས་པའི་ཚོམས་ཆེན། གཙང་ལ་གྲལ་འགྲིག་པའི་ཉལ་ཁང་བཅས་ཡོད་པ་གསར་འགོད་པས་མཐོང་བྱུང་། ཤེས་རྟོགས་བྱུང་བར་གཞིགས་ན། འཐུས་གྲོང་ཚོའི་མཐའ་མཚམས་འབྱོར་འབྲིང་གྲོང་ཚོ་འཛུགས་སྐྲུན་ལ་ཁྱོན་མ་དངུལ་སྒོར་ཁྲི་2754.22བཏང་བ་དང་། མང་ཚོགས་ཀྱིས་དངུལ་སྒོར་ཁྲི་340.44རང་གྲབས་བྱས་པ། སྤྱིའི་འཛུགས་སྐྲུན་རྒྱ་ཁྱོན་སྨི་ངོས་གྲུ་6832.67ཟིན་གྱི་ཡོད། གསར་དུ་བསྐྲུན་པའི“འབྱོར་འབྲིང་ཁང་པ”ཕུད། ད་དུང་གྲོང་ཚོར་འགྲོ་ལམ་དང་། ལམ་སྒྲོན། ཆུ་འགྲོ་དང་ཆུ་ཀ་ལ། གློག་རླངས་སོགས་ཞོར་གཏོགས་སྒྲིག་བཀོད་ཀྱང་རྟ་སྒ་ཆ་སྒྲིག་བྱས་ཡོད། ས་སྲོད་དུ་མིག་དམར་ཚེ་རིང་ཉི་ནུས་ལམ་སྒྲོན་འོག་ཨར་འདམ་ལམ་དུ་དལ་གྱིས་འཆམ་འཆམ་དུ་སྐྱོད་སྐབས་དགའ་ཚོར་བརྗོད་ཀྱིས་མི་ལང་བར“ད་ཆ་ང་ཚོའི་གྲོང་ཚོ་ཡང་གྲོང་ཁྱེར་ནང་ལྟར་ཆགས་འདུག”ཅེས་བཤད།
སྣ་དཀར་རྩེ་རྫོང་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ་སྟག་ལུང་གྲོང་རྡལ་གྱི་ཏང་ཨུད་ཀྱི་ཧྲུའུ་ཅི་ལི་ཞའོ་ཡུང་གིས་གསར་འགོད་པར“མཐའ་མཚམས་འབྱོར་འབྲིང་གྲོང་ཚོ་བསྐྲུན་པ་ནི་ཏང་གིས་མང་ཚོགས་ཀྱི་སྣེ་ཁྲིད་དེ་ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པའི་བྱ་ཐབས་གལ་ཆེན་ཞིག་རེད། གོམ་སྟབས་རྗེས་མར་ང་ཚོས་གྲོང་གསེབ་དར་རྒྱས་ལ་སྐུལ་འདེད་ཤུགས་ཆེན་བཏང་སྟེ། འཐུས་གྲོང་ཚོའི་མང་ཚོགས་ཀྱི་འཚོ་བ་ཕྱུག་ཏུ་དང་ཁོར་ཡུག་ལེགས་སུ་གཏོང་རོགས་བྱ་རྒྱུ་ཡིན”ཞེས་བཤད།