ཉེ་ཆར། གསར་འགོད་པ་བོད་ཀྱི་དབུལ་སྒྲོལ་འགག་སྒྲོལ་ཐོན་ལས་ཀྱི་དབུལ་སྐྱོར་གྲུབ་འབྲས་འགྲེམས་སྟོན་ལྷ་སའི་འགྲེམས་ཁང་དུ་སླེབས་བྱུང་། ཡུལ་སྐོར་རིག་གནས་ཐོན་རྫས་དང་། ས་མཐོའི་ཁྱད་ལྡན་ཤིང་འབྲས་དང་སྔོ་ཚལ། ཞིང་ཞོར་ཐོན་རྫས། མི་རིགས་གྱོན་ཆས། སྤོས། ཚགས་ཤའི་ཐོན་རྫས། ནས་ཀྱི་ཐོན་རྫས་སོགས་སྤུས་ལེགས་ཀྱི་དབུལ་སྐྱོར་ཞིང་ལས་ཐོན་རྫས་འབོར་ཆེན་ཞིག་གཅིག་སྡུད་ཐོག་འགྲེམས་སྟོན་བྱས་འདུག ཤེས་རྟོགས་བྱུང་བར་གཞིགས་ན། དབུལ་སྐྱོར་ཞིང་ལས་ཐོན་རྫས་དེ་དག་ཚང་མ་ལྷ་ས་གྲོང་ཁྱེར་གྱི་རྫོང(ཆུས)ཁག་གི་ཁེ་ལས་དང་ཞིང་འབྲོག་པའི་མཉམ་ལས་ཁང་ནས་ཡིན་པ་དང་ཐོན་རྫས་སྣ་ཁ་360ལྷག་ཙམ་ཡོད་པས་མང་ཚོགས་མི་ཉུང་བ་ཞིག་ལྟ་སྐོར་དང་ཉོ་སྒྲུབ་བྱེད་པར་ཡོང་རྒྱུའི་ཡིད་དབང་བཀུག་ཡོད།
“ང་ཚོའི་འགྲེམས་ཁུལ་དུ་ཚོང་ཟོག་སྣ་ཁ་40ལྷག་ཙམ་ཡོད། དེ་རིང་ཚོང་ཧ་ཅང་ཡག་པོ་འདུག ཆ་སྙོམས་ཉིན་རེའི་ཕྱིར་ཚོང་གྲངས་འབོར་སྒོར་ཁྲི་གཅིག་ནས་གཉིས་བར་ཟིན་གྱི་འདུག ལྷ་སའི་མཱ་ག་ཨ་རག་དང་། མི་རིགས་ལག་ཤེས་བཟོ་རྩལ་ཐོན་རྫས། ནས་ཀྱི་ཏན་ཞིམ་སོགས་ཐོན་རྫས་ལ་ཧ་ཅང་དགའ་པོ་བྱེད་ཀྱི་འདུག ས་ཆ་དངོས་སུ་ཉོ་མཁན་མང་པོ་ཡོད་པ་ཕུད། ད་དུང་མངགས་ཐོའང་མང་པོ་རག་བྱུང་། ད་རེས་འཛད་སྤྱོད་དབུལ་སྐྱོར་གྱི་གྲུབ་འབྲས་འགྲེམས་སྟོན་ནང་ཞུཌ་ནས་ང་ཚོའི་ཐོན་རྫས་མང་པོ་བཙོང་ཐུབ་བྱུང་། ཕྱིས་སུ་ང་ཚོའི་ཐོན་རྫས་ལ་སྐུ་མགྲོན་དེ་བས་མང་བའི་ཁས་ལེན་ཐོབ་རྒྱུའི་རེ་བ་ཡོད”ཅེས་ཆུ་ཤུར་ས་གཙང་ཐོན་ལས་མ་འཇོག་གསར་སྤེལ་ཚད་ཡོད་ཀུང་སིའི་ལས་དོན་མི་སྣ་ཕུར་བུ་ཡིས་དགའ་ཚོར་ཆེན་པོས་བཤད།
“ད་ལྟའི་ལས་ཀར་ང་བློ་ཡིད་ཚིམ་པོ་འདུག ལོ་གཉིས་གོང་སློབ་གྲྭ་ནས་ཐོན་རྗེས་ལྷ་ས་མཚུར་ཕུ་རིག་གནས་ཁྱབ་སྤེལ་ཚད་ཡོད་ཀུང་སིར་ཞུགས་པ་ཡིན། ཟླ་རེར་གླ་ཕོགས་དང་ཆ་བགོས་བསྡོམས་ན་སྒོར་7000ལྷག་ཙམ་ཡོད་པ་དང་ཀུང་སིས་ད་དུང་ང་ཚོར་གཅིག་གྱུར་ཐོག་རྒན་གསོ་འགན་བཅོལ་དང་སྨན་བཅོས་འགན་བཅོལ་སོགས་ཉོས་ནས་ང་ཚོའི་རྒྱབ་ཕྱོགས་ཀྱི་སེམས་ཁྲལ་བསལ་བྱུང་། ད་ཐེངས་ཀྱི་འགྲེམས་སྟོན་ཐོག་ང་ཚོའི་ཀུང་སིས་དམིགས་སུ་བཀར་ནས་བཟོས་པའི་དངུལ་གྱི་དཀར་ཡོལ་ཆ་ཚང་ལ་རྒྱ་ཆེའི་འཛད་སྤྱོད་པ་རྣམས་ཀྱིས་དགའ་པོ་བྱེད་ཀྱི་འདུག་པས། ཉིན་རེའི་ཕྱིར་འཚོང་གྲངས་འབོར་སྒོར་2000ནས་4000བར་ཟིན་གྱི་འདུག”ཅེས་ཀུང་སི་དེའི་ལས་མི་ཕུན་ཚོགས་རྡོ་རྗེས་དགའ་ཚོར་ཆེན་པོས་གསར་འགོད་པར་བཤད་བྱུང་། ལྷ་ས་མཚུར་ཕུ་རིག་གནས་ཁྱབ་སྤེལ་ཚད་ཡོད་ཀུང་སིའི་འཕེལ་རྒྱས་ཀྱི་བརྒྱུད་རིམ་ཁྲོད། རྒྱལ་ཁབ་ཀྱི་གནད་སྨིན་དབུལ་སྐྱོར་སྲིད་ཇུས་དང་ལེན་ཧུར་ཐག་བྱས་ནས་ས་གནས་དེ་གའི་དུད་ཚང་དབུལ་པོ་དང་མཐོ་སློབ་སློབ་ཐོན་སློབ་མར་ལས་ཞུགས་ལས་གནས་30མཁོ་འདོན་བྱས་ཡོད།
“ང་ཚོའི་ཀུང་སིས་ཞིབ་སྤེལ་བྱས་པའི་ཚགས་ཤ་སྐམ་པོ་དང་། ཤ་རྗེན། ནས་ཀྱི་འཐེན་ཐུག་སོགས་ཐོན་རྫས་ཀྱི་བྲོ་བ་ཞིམ་ལ་རིན་གོང་ཡང་ཁེ་པོ་ཡོད་པས། ད་ཐེངས་ཀྱི་ཐོན་ལས་དབུལ་སྐྱོར་གྲུབ་འབྲས་འགྲེམས་སྟོན་ནང་གྲོང་མི་ཚོས་ཧ་ཅང་དགའ་པོ་བྱེད་ཀྱི་འདུག”ཅེས་ལྷུན་གྲུབ་རྫོང་ས་གཙང་ཀུང་སིའི་ལས་དོན་མི་སྣ་ཕུན་ཚོགས་ཀྱིས་ངོ་སྤྲོད་བྱས།
ཉེ་བའི་ལོ་ཤས་རིང་ལྷུན་གྲུབ་རྫོང་ས་གཙང་ཀུང་སིས་སྤྱི་ཚོགས་ཀྱི་ལས་འགན་ཧུར་ཐག་བསྒྲུབས་ནས་ས་གནས་དེ་གའི་སློབ་ཆེན་གྱི་སློབ་ཐོན་སློབ་མ་40ཡི་ལས་ཞུགས་གནད་དོན་ཐག་གཅོད་བྱས་ཏེ་བྱ་སྤྱོད་དངོས་ལ་བརྟེན་ནས་མང་ཚོགས་འབབ་འཕར་ལ་སྐུལ་འདེད་བཏང་ཡོད།
ད་ཐེངས་ཀྱི་དབུལ་སྒྲོལ་འགག་སྒྲོལ་ཐོན་ལས་ཀྱི་དབུལ་སྐྱོར་གྲུབ་འབྲས་འགྲེམས་སྟོན་ནི་ལྷ་ས་གྲོང་ཁྱེར་གྱི་ཐོན་ལས་དབུལ་སྐྱོར་ཕན་འབྲས་ཀྱི་བསྡུས་རིས་ཤིག་རེད། ཤེས་རྟོགས་བྱུང་བར་གཞིགས་ན། 2016ལོ་ནས་2020ལོ་བར། ལྷ་ས་གྲོང་ཁྱེར་གྱིས་ཐོན་ལས་རྣམ་གྲངས་470ལག་བསྟར་བྱས་པའི་ནང་382ལེགས་གྲུབ་ཟིན་ཏེ། མི་ཁྲི་1.2ལ་འབབ་འཕར་ཡོང་རྒྱུར་ཐད་ཀར་སྐུལ་ཁྲིད་བྱས་ཡོད། ཡིག་ཚགས་དང་གཱ་བཟོས་པའི་མང་ཚོགས་དབུལ་པོ་མི་ཐེངས་ཁྲི་1.7ལྷག་ཙམ་ལ་གསོ་སྦྱོང་བྱས་པ་དང་བྱ་ཐབས་སྣ་ཚོགས་ལ་བརྟེན་ནས་མི་ཐེངས་ཁྲི་1.3ལས་ཞུགས་གཞན་སྒྱུར་བྱས་པས་ཐོན་ལས་དབུལ་སྐྱོར་དེ་ལྷ་ས་གྲོང་ཁྱེར་གྱི་དབུལ་སྒྲོལ་འགག་སྒྲོལ་གྱི་སྒུལ་ཤུགས་ནུས་ལྡན་ཞིག་ཏུ་གྱུར་ཡོད།