འདི་ནི་ཉི་མ་ཆོས་འཛོམས་ཀྱིས་2020ལོར་གྲོང་ཚོའི་ནང་ཚོད་འདེབས་བྱས་པའི་ནས་ནག་སྟོན་བཞིན་པ།

འདི་ནི་ཉི་མ་ཆོས་འཛོམས་ཀྱིས་ཀུང་སིའི་འཁོར་ཁང་ནང་ལས་ཀར་ཞིབ་བཤེར་བྱེད་བཞིན་པ།

ངའི་མིང་ལ་ཉི་མ་ཆོས་འཛོམས་ཟེར། ད་ལོ་ལོ་32ལ་སླེབས་ཀྱི་ཡོད། ཨ་མ་བསོད་ནམས་ཆོས་སྒྲོན་དང་། བུ་བློ་བཟང་འགྱུར་མེད། གཅུང་པོ་མཚེ་མ་བཅས་ནང་མི་ལྔ་དང་མཉམ་དུ་ལྷོ་ཁ་གྲོང་ཁྱེར་འཕྱོངས་རྒྱས་རྫོང་རྒྱ་མ་ཤང་བཀྲ་ཤིས་གྲོང་ཚོའི་ཚོགས་ཆུང་གཉིས་པར་འཚོ་བ་སྐྱེལ་གྱི་ཡོད།

ཆུང་དུས་ཁྱིམ་ནས་བྲལ་ཏེ་ལས་ཀ་འཚོལ་བར་ཕྱིན་པ།

1992ལོར་ལོ་བཞིར་སོན་མ་ཐག་པའི་ངས་ཆག་སྒོ་རང་ཁྱིམ་ལ་འཕྲད་སྲིད་པ་གཏན་ནས་སྙམ་མ་བྱུང་། སྐབས་དེ་དུས་ཕ་ལ་ནད་གཞི་ཚབས་ཆེན་ཞིག་ཕོག་ནས་ལྷོ་ཁ་གྲོང་ཁྱེར་མི་དམངས་སྨན་ཁང་དུ་ཉིན་བདུན་སྨན་བཅོས་བྱས་ཀྱང་སྔར་བཞིན་དྲག་སྐྱེད་བྱུང་མེད། ཕས་ཁྱིམ་གྱི་དཀའ་ངལ་ལ་བསམས་ཏེ། མཐར་སྨན་བཅོས་བྱེད་མཚམས་བཞག་ནས་ཁྱིམ་དུ་ལོག་པ་དང་། དེ་ནས་དུས་ཡུན་རིང་པོ་མ་སོང་བར་ཁོང་ཚེ་ལས་འདས།

ངག་རྒྱུན་དུ་དབུལ་པོའི་བུ་ཕྲུག་རང་མགོ་ཐོན་པ་སྔ་ཞེས་པ་ལྟར། ང་རང་ལོ་11ལ་སླེབས་སྐབས་ཕ་ཡུལ་ནས་བྲལ་འདོད་མེད་ཀྱང་ཨ་མས་ལྷ་སའི་ཞོལ་གྲོང་གསར་གྱི་ཁྱིམ་ཚང་ཞིག་ཏུ་བུ་རྫིར་བཏང་བྱུང་། དེ་དུས་ངའི་ལས་ཀ་ནི་ནང་ལ་གཙང་སྦྲ་བྱེད་པ་དང་། ཁ་ལག་བཟོ་བ། གོས་འཁྲུ་བ་སོགས་ལས་ཀ་ཙག་ཙིག་དག་རེད། 2004ལོར་ངས་བུ་རྫི་མ་བྱས་པར་རྩེད་ཐང་དང་ལྷ་ས་སོགས་སུ་ལས་ཀ་འཚོལ་བར་ཕྱིན་པ་ཡིན། ཟ་ཁང་དུ་གླ་པ་རྒྱུག་པར་ཟླ་རེར་གླ་ཆ་སྒོར་300ནས་ཨར་ལས་བྱ་ཡུལ་དུ་ཉིན་གཅིག་ལ་གླ་ཆ་སྒོར་25ཡི་བར་ལས་ཀ་མང་པོ་བརྗེས་ནས་ལོ་གཉིས་ཡུད་ཙམ་ཞིག་ལ་འདས་སོང་། འོན་ཀྱང་སྐབས་དེ་དུས་ཁྱིམ་ལ་དངུལ་དེ་ཙམ་བསྐུར་རྒྱུ་མ་བྱུང་། དེ་དུས་ཨ་མས“རང་ཕྱིར་ལས་ཀ་བྱས་པའི་གླ་ཆ་དེས་རང་ཁ་རང་གསོ་ཡང་ཐུབ་དཀའ་བས། དེ་ལས་ཁྱིམ་དུ་ལོག་ནས་ཞིང་ལས་བྱས་ན་བཟང”ཞེས་གསུངས་མྱོང་ཡོད། འོན་ཀྱང་དེ་དུས་ངས་འབྱུང་འགྱུར་རང་ཉིད་ཀྱི་འཚོ་བ་ཡག་པོ་ཞིག་སྐྱེལ་རྒྱུར་འབད་འཐབ་བྱེད་རྒྱུའི་སེམས་ཐག་བཅད་པ་ཡིན།

གོར་མོར་ལས་ཀར་ཕྱིན་པའི་ལོ་ཟླ།

2007ལོར་ང་ལོ་19ཡིན། མ་གཞི་སྐབས་དེ་དུས་ཁྲེང་ཏུར་ལས་ཀར་འགྲོ་འདོད་བྱུང་། འོན་ཀྱང་གྲོང་ཁྱེར་ནུབ་འདབས་འགྲུལ་སྐྱེལ་བབས་ཚུགས་ནས་རླངས་འཁོར་བསྡད་དེ་གོར་མོར་སྐྱོད་སྐབས་དངུལ་ཁུག་ནང་སྒོར་150ལས་ལྷག་མེད། དེས་ན་ཁྲེང་ཏུར་འགྲོ་རྒྱུ་ལྟ་ཅི། ཉིན་འགའ་ཤས་ཀྱི་ལྟོ་རིན་ཡང་འདང་གི་མེད། དེ་འདྲའི་གནས་ཚུལ་འོག་གོར་མོར་མ་བསྡད་ཀ་མེད་བྱུང་།

གོར་མོར་འབྱོར་བའི་ཉིན་དང་པོའི་ཕྱི་དྲོའི་ཆུ་ཚོད་4པ་ཙམ་དུ་ང་ཐང་ཆེན་ཞིག་ཏུ་བསྐོར་བར་འགྲོ་སྐབས་ཀུང་སི་ཞིག་གིས་ཆེད་མངགས་འདྲེ་ཚེར་མ་འཐོག་མཁན་བསྡུ་བ་མཐོང་བྱུང་བས། ངས་མྱུར་དུ་མི་ཚོགས་ཀྱི་གྲས་ནས་མདུན་དུ་སོང་སྟེ་ལས་མི་བསྡུ་མཁན་ལ“ཁྱེད་ཚོར་ལས་མི་དགོས་སམ། ངས་དཀའ་སྡུག་མྱངས་ཐུབ་པ་མ་ཟད། འདྲེ་ཚེར་མ་འཐོག་ཤེས་ཀྱི་ཡོད”ཅེས་སྐད་ཤུགས་ཆེན་པོས་བཤད་པས། གོར་མོ་ནས་ལས་ཀ་དང་པོ་དེ་རག་བྱུང་། ལས་ཀ་དེ་བྱས་ན་ཉིན་གཅིག་ལ་སྒོར་13ལས་སྤྲོད་ཀྱི་མེད་པས་ལྟོ་གོས་ཕྱིད་ཙམ་ལས་མི་འདུག རྗེས་སུ་ང་སླར་ཡང་ཀུང་སི་གཞན་ཞིག་ཏུ་འདྲེ་ཚེར་མ་འཐོག་པའི་ལས་ཀ་བྱེད་པར་སོང་བ་ཡིན། ས་ཆ་དེ་ནས་རྒྱ་མ་གང་རེར་སྒོར་ཟུར་ལྔ་སྤྲོད་ཀྱི་ཡོད་པས། ལས་ཀ་ཧུར་ཐག་བྱས་ན་ཉིན་གཅིག་ལ་སྒོར་180ལེན་ཐུབ་པ་མ་ཟད། སྦྱིན་བདག་གིས“ཁྱེད་ཀྱིས་བཏོག་པའི་འདྲེ་ཚེར་མ་གཙང་ལ། སྤུས་ཁའང་དག་པོ་འདུག སང་ལོར་མུ་མཐུད་ཤོག་དང་ངས་ཁྱེད་ལ་རྒྱ་མ་གང་རེར་སྒོར་ཟུར་6ནས་7བར་སྤྲད་ཆོག”ཅེས་གདེང་འཇོག་དང་ཁས་ལེན་བྱས།

ཟླ་བ་ཁ་ཤས་འབད་བརྩོན་བྱས་པ་བརྒྱུད་ངས་སྒོར་8000བསགས་ཐུབ་བྱུང་། འདྲེ་ཚེར་མ་འཐོག་པའི་ལས་ཀ་མཇུག་འགྲིལ་རྗེས། ངས་བབ་ལ་བསྟུན་ནས་དངུལ་དེ་དག་གིས་སེན་གཏུབ་དང་། རྐང་ཤུབས། སྐྲ་ཤད་སོགས་ཅ་དངོས་ཆུང་གྲས་ཉོས་ཏེ་གོར་མོ་མེ་འཁོར་བབས་ཚུགས་དང་ཁུ་ནུ་ཐང་ཆེན་སོགས་ཀྱི་ཁུག་ཀྱོག་གང་སར་ཁྲོམ་བཏོན་པ་ཡིན། ངས་ཉིན་དང་པོར་ཚོང་བཏོན་ནས་སྒོར་བདུན་རག་སྐབས་ཀྱི་སྤྲོ་སྣང་དེ་ད་དུང་ཡང་བརྗེད་ཀྱི་མི་འདུག རིམ་བཞིན་ཚོང་ཇེ་བཟང་དུ་སོང་བས་ཟླ་བ་གཉིས་ཀྱི་རྗེས་སུ་ཟླ་རེར་སྒོར་2000རག་གི་འདུག སྐབས་དེར་བོད་དུ་ཡོད་པའི་ཨ་མར་སྒོར་500བསྐུར་བ་ཡིན། ད་དུང་ཁ་པར་ཞའོ་ལིང་ཐུང་རྟགས་ཅན་ཞིག་ཉོས་པ་མ་ཟད། མནའ་མར་སོང་བའི་གཅེན་མོར་སྒོར་ཉིས་བརྒྱ་བསྐུར་བ་ཡིན། དངུལ་བསྐུར་ཏེ་སྦྲག་ཁང་ནས་ཕྱིར་ཐོན་རྗེས། ངའི་བསམ་པར་ད་གཟོད་འབྱོར་འཁོས་ཞན་པའི་ཁྱིམ་གྱི་ཁུར་པོ་ཡང་དུ་གཏོང་ཐུབ་པའི་སྣང་བ་ཞིག་སྐྱེས་ཏེ་དགའ་སྤྲོ་ཚད་མེད་བྱུང་།

ཕ་ཡུལ་དུ་ལོག་ནས་ལས་གཏོད་བྱས་པ།

2019ལོར་ང་ཕ་ཡུལ་དང་བྲལ་ནས་ལོ་20སོང་ཡོད། དེའི་རིང་། ངས་སྐད་འཕྲིན་ཚོང་ལས་དང་ཁོའེ་ཧྲོའུ་སོགས་ལས་སྟེགས་བརྒྱུད་ནས་སྨན་རྒྱུ་དང་ཡུལ་ཟོག་སོགས་ཀྱི་ཚོང་བརྒྱབ་པ་ཡིན། ཐེངས་ཤིག་ཨ་མས་ཁ་པར་ནང“བུ་མོ། ཁྱེད་ལོ་11ནས་ཕྱིར་བསྐྱོད་དེ་ད་བར་ལོ་20འགྲོ་གི་འདུག ད་ལྟ་ཏང་གི་སྲིད་ཇུས་ཇེ་ལེགས་ཇེ་ཡག་ཏུ་འགྲོ་བཞིན་ཡོད། རང་ཡུལ་དུ་བལྟ་ཙམ་བྱེད་པར་འོང་གི་མིན་ནམ”ཞེས་བཤད་པས་ཕ་ཡུལ་དྲན་པའི་འདུན་པ་འགོག་ཐབས་མེད་པར་གོར་མོའི་ལས་ཀ་ཐམས་ཅད་ཚར་རྗེས་ལོ་མང་བསགས་པའི་སྒོར་ཁྲི་14དེ་དག་ཁྱེར་ཏེ་ཡུན་རིང་ཁ་བྲལ་བའི་ཕ་ཡུལ་དུ་ལོག་པ་ཡིན།

ཨ་ཞང་གི་རྩམ་པ་འཐག་རྩལ་རྒྱུན་འཛིན་བྱ་ཆེད། ཕ་ཡུལ་དུ་ལོག་རྗེས་ངས་མུ་མཐུད་དྲ་རྒྱ་ནས་ཡུལ་ཟོག་ཕྱིར་ཚོང་གི་ཐབས་ལམ་ལ་བརྟེན་ཏེ་གྲོང་ཚོར་འཕྱོངས་རྒྱས་རྫོང་ཕིང་རུའོ་ཆུ་འཐག་ཚད་ཡོད་ཀུང་སི་བཙུགས་པ་ཡིན།

ཀུང་སི་བཙུགས་པའི་སྒོར་ཁྲི་80ལྷག་ཙམ་ནང་རང་ཉིད་དང་། ནང་མི། ཁྱོ་གའི་ཁྱིམ་བཅས་ཀྱིས་སྤྲད་པའི་དངུལ་དང་། ཤང་གིས་བཏང་བའི་དངུལ། ཤང་གི་ལས་གཉེར་ཁང་གིས་བཏང་བའི་དངུལ་བུན་བཅས་ཡོད། ང་ཚོའི་ཤང་ཏང་ཨུད་ཀྱི་ཧྲུའུ་ཅི་བསོད་ནམས་བག་བྲོས་ངར་ཀུང་སི་འཛུགས་པའི་ཐོག་མར་དངུལ་བུན་གཏོང་རོགས་དང་། བཟོ་ཁང་གི་གནས་ཡུལ་འདེམས་པ། ཆུ་དང་གློག་ཤར་གཏོང་། ཐོན་སྐྱེད་གཉེར་སྐྱོང་སོགས་ཐད་སེམས་རྩ་འཁོལ་པོས་རོགས་རམ་བྱས་པ་ངས་བརྗེད་མི་སྲིད། ཁོང་གིས་ང་ལ་བཤད་པའི“རང་གིས་ཡུལ་མི་ཚོ་མ་བརྗེད་པར་ཁོ་ཚོའི་སྣེ་ཁྲིད་དེ་ཕྱུག་འགྱུར་གྱིས་འབྱོར་འབྲིང་ཕྱོགས་སུ་བསྐྱོད་པས་ང་ཚོ་ཤང་ཏང་ཨུད་དང་སྲིད་གཞུང་གིས་ནུས་ཤུགས་ཡོད་རྒུས་རང་གི་ཀུང་སི་བདེ་བླག་ངང་གཉེར་རོགས་བྱ་རྒྱུ་ཡིན”ཞེས་པའི་མི་སེམས་དྲོ་བའི་སྐད་ཆ་དེ་དྲན་སྐབས་ངའི་སེམས་ཤུགས་ཀྱང་དེ་བས་ཆེ་རུ་ཕྱིན་སོང་།

2019ལོའི་ཟླ་7པར། གཙོ་བོ་རྡོ་འཐག་རྩམ་པ་དང་། སྲན་ནག་ཐུག་པ། ཕྱུར་བའི་ཏན་ཞིམ། ཕྱུར་བ་མངར་མོ་སོགས་ཐོན་སྐྱེད་བྱེད་མཁན་ཀུང་སི་ལས་གཉེར་བྱེད་འགོ་ཚུགས་པ་དང་། གྲོང་ཚོའི་ནང་གི་ཡིག་ཚགས་དང་གཱ་བཟོས་པའི་དུད་ཚང་དབུལ་པོའི་མི་སྣ་8གྲོང་ཚོ་ཨུ་ལྷན་གྱིས་གཅིག་གྱུར་ཐོག་ཀུང་སི་དེར་བཅུག་ཅིང་། ཟླ་རེར་ཆ་སྙོམས་གླ་ཕོགས་སྒོར་3000སྤྲད་ནས་ཁོང་ཚོ་དབུལ་པོའི་གནས་ལས་རིམ་བཞིན་སྒྲོལ་རོགས་བྱས་ཡོད།

2020ལོའི་ཟླ7པར། ཀུང་སི་ལས་གཉེར་ལམ་དུ་ཞུགས་རྗེས། ངས་སླར་ཡང་མ་དངུལ་སྒོར་ཁྲི་9བཏང་ནས་ཚོང་ཁང་ཞིག་བཙུགས་ནས་གཙོ་བོ་ཞོར་ཟས་དང་འཚོ་བའི་མཁོ་ཆས་སོགས་འཚོང་གི་ཡོད། ད་ལྟའི་འཚོ་བ་ཇེ་ལེགས་སུ་འགྲོ་བཞིན་ཡོད། ངས་སླད་ཕྱིན་ཀུང་སིའི་ཕྱིར་ཚོང་ཁྱབ་ཁོངས་དང་གཞི་ཁྱོན་ཆེ་རུ་བཏང་སྟེ་ཚགས་ཤ་སྐམ་པོ་དང་། ཕྱུར་བ། འདྲེ་ཚེར་དམར་པོ་དང་ནག་པོ། ཕྱུར་བའི་ཏན་ཞིམ། རྩམ་པའི་ཏན་ཞིམ་སོགས་ཕྱིར་ཚོང་ལས་སྟེགས་ཐོག་འཚོང་རྩིས་ཡོད། ཏང་གི་འགོ་ཁྲིད་འོག་ང་ཚོའི་འཚོ་བ་ཉིན་རེ་བཞིན་ཡག་ཏུ་འགྲོ་རྒྱུ་ཡིན་པ་ངར་ཡིད་ཆེས་བརྟན་པོ་ཡོད།