དབུལ་སྒྲོལ་འགག་སྒྲོལ་གྱི་དམག་འཐབ་བརྒྱབ་ཚུན། རང་ལྗོངས་ཀྱིས་དབུལ་སྐྱོར་ལས་དོན་དང་བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་ལག་བསྟར་དོན་འཁྱོལ་གཏིང་ཟབ་བྱས་པ་དང་། བོད་ཀྱི་དམིགས་བསལ་ཐོན་ཁུངས་ཀྱི་ལེགས་ཆ་དང་ཐོན་ལས་འཕེལ་རྒྱས་ཀྱི་ཁྱད་ཆོས་དང་ཟུང་འབྲེལ་དམ་ཟབ་ཀྱིས་ཐོན་ལས་དབུལ་སྐྱོར་གྱི་ཐོན་ཚོང་འབྲེལ་མཐུད་བྱེད་ཤུགས་རྒྱུན་ཆད་མེད་པར་ཆེ་རུ་བཏང་བ་དང་། དབུལ་སྒྲོལ་གྱི་ཁེ་ཕན་ཟུང་འབྲེལ་ལམ་སྲོལ་འཐུས་སྒོ་ཚང་དུ་གཏོང་རྒྱུ་འཚོལ་ཞིབ་ཀྱིས་ཐོན་ཚོང་གི་ཐབས་ལམ་རྒྱ་སྐྱེད་ཧུར་ཐག་བཏང་བ་མ་ཟད། ལྗོངས་ཡོངས་ཀྱི་སྟོབས་ཤུགས་བཏོན་ནས་དབུལ་སྐྱོར་ལས་དོན་ལ་སྐུལ་འདེད་བཏང་སྟེ་མང་ཚོགས་དབུལ་པོ་འབབ་འཕར་ཕྱུག་འགྱུར་ཡོང་བར་རམ་འདེགས་ཀྱང་བྱས་པ་རེད།

རྩེ་རིམ་ཇུས་འགོད་ལ་ཤུགས་སྣོན་བརྒྱབ་ནས་ཐོན་ལས་དབུལ་སྐྱོར་ཐད་གཡས་གཞོགས་གཡོན་འདེགས་བྱས་པ།

རང་ལྗོངས་ཀྱིས“ཞིང་ལས་འཚམ་སར་ཞིང་ལས་དང་། འབྲོག་ལས་འཚམ་སར་འབྲོག་ལས། ཤིང་འཛུགས་འཚམ་སར་ཤིང་འཛུགས། ཨར་སྐྲུན་འཚམ་སར་ཨར་སྐྲུན། ཚོང་ལས་འཚམ་སར་ཚོང་ལས། ཡུལ་སྐོར་འཚམ་སར་ཡུལ་སྐོར་བཅས་གཉེར་བའི”རྩ་དོན་མཐའ་འཁྱོངས་བྱས་ཏེ་འདེབས་འཛུགས་ལས་རིགས་དང་། གསོ་ཚགས་ལས་རིགས། ལས་སྣོན་ལས་རིགས། ཚོང་དོན་འཁོར་རྒྱུག་ལས་རིགས། རིག་གནས་ཡུལ་སྐོར་ལས་རིགས། ཐོན་ཁུངས་གསར་སྤེལ་བེད་སྤྱོད་བཅས“ཐོན་ལས་ཆེན་པོ་དྲུག”གཙོ་གནད་ཐོག་འཕེལ་རྒྱས་བཏང་ཞིང་། ནས་དང་འབྲི་གཡག་གིས་གཙོས་པའི་ཞིང་འབྲོག་ལས་ཁྱད་ལྡན་ཐོན་ལས་ལ་རོགས་སྐྱོར་ཧུར་ཐག་བྱས་ཡོད། ཁ་གཏད་བོད་སྐྱོར་གྱི་ལེགས་ཆ་འདོན་སྤེལ་གང་ལེགས་ཀྱིས་བསྟུད་མར་ལོ་5ཡི་རིང་ཤིན་ཏུ་དབུལ་བའི་ས་ཁུལ་གྱི་དབུལ་སྒྲོལ་འགག་སྒྲོལ་གྱི་ཡུལ་དངོས་ཀྱི་སྐུལ་སྤེལ་ཚོགས་འདུ་དང་ཁ་གཏད་བོད་སྐྱོར་གྱི་དབུལ་སྐྱོར་ལས་དོན་ཟབ་ཏུ་གཏོང་བའི་ལས་དོན་ཚོགས་འདུ་འཚོགས་ཡོད། 2020ལོའི་ཟླ་6པར་བོད་སྐྱོར་ཞིང་ཆེན་དང་གྲོང་ཁྱེར་དང་། བོད་སྐྱོར་ཀྲུང་དབྱང་ཁེ་ལས་བཅས་19དང་དབུལ་སྐྱོར་ཐོན་ལས་དང་། ལས་ཞུགས། འཛད་སྤྱོད་དབུལ་སྐྱོར་གྱི་ཁེ་ལས་བཅས་སྐོར་གྱི་མཉམ་ལས་གྲོས་མཐུན་བཞག་པ་དེ་རོགས་སྐྱོར་རྣམ་གྲངས་31དང་འབྲེལ་བ་དང་རྣམ་གྲངས་ཀྱི་མ་དངུལ་སྒོར་དུང་ཕྱུར་159བཏང་ཡོད། “ཕུལ་བྱུང་ཐོན་ལས་ཆེན་པོ་བཅུ”དང“དབུལ་སྐྱོར་ཐད་བྱས་རྗེས་ཆེ་བའི་མི་སྣ་བཅུ”སོགས་འདེམས་པའི་བྱེད་སྒོ་ཧུར་ཐག་སྤེལ་ནས་དབུལ་སྒྲོལ་འགག་སྒྲོལ་གྱི་ཉམས་མྱོང་སྤེལ་རེས་འགྲེམས་སྟོན་དང་དབུལ་སྐྱོར་དྲིལ་བསྒྲགས་སོགས་ཀྱི་ལས་དོན་དང་ཟུང་འབྲེལ་གྱིས་ཐོན་ལས་དབུལ་སྐྱོར་ཁྱབ་ཁོངས་ཀྱི་སྔོན་ཐོན་དཔེ་མཚོན་ཁག་གཅིག་བཏོད་པ་རེད། དབུལ་སྐྱོར་ཐོན་རྫས་ཕྱིར་ཚོང་གི་ཐབས་ལམ་རྒྱ་སྐྱེད་བཏང་ནས་ལྗོངས་དང་། གྲོང་ཁྱེར། རྫོང་བཅས་ཀྱི་དབུལ་སྐྱོར་ཁེ་ལས་དང་ཞིང་འབྲོག་པའི་ཆེད་ལས་མཉམ་ལས་རྩ་འཛུགས་སྒྲིག་འཛུགས་བྱས་ཏེ་བོད་ལྗོངས་འགྲེམས་ཚོགས་དང་ཞིང་ལས་ཐོན་རྫས་ཀྱི་ཚོང་འདུས་སོགས་ཀྱི་བྱེད་སྒོའི་ནང་ཞུགས་ཡོད། 

མིག་སྔར་2020ལོའི་བོད་ལྗོངས་དབུལ་སྒྲོལ་འགག་སྒྲོལ་ཐོན་ལས་ཀྱི་དབུལ་སྐྱོར་གྲུབ་འབྲས་འགྲེམས་སྟོན་གཉེར་བཞིན་ཡོད་པ་དང་། ཐོན་ལས་དབུལ་སྐྱོར་ལ་ཐོབ་པའི་གཡུར་དུ་ཟ་བའི་གྲུབ་འབྲས་ཕྱོགས་ཡོངས་ནས་འགྲེམས་སྟོན་བྱས་ཏེ་དབུལ་སྒྲོལ་གྱི་སྒུལ་ནུས་སྔར་བས་ཆེ་རུ་གཏོང་བཞིན་ཡོད།

ཐོན་ཚོང་གི་འབྲེལ་མཐུད་ལ་ཤུགས་སྣོན་བརྒྱབ་ནས་ཁེ་ཕན་སྦྲེལ་མཐུད་ལམ་སྲོལ་འཚོལ་ཞིབ་བྱས་པ།

གཞིས་རྩེ་གྲོང་ཁྱེར་ཇོ་མོ་གླང་མ་ཞིང་ལས་མ་འཇོག་པའེ་ཡ་ཁྲེང་ཞིང་ཞོར་ཐོན་ཟོག་ཚོང་དོན་ཚད་ཡོད་ཀུང་སི་ནི་གསོ་ཚགས་དང་། གཟན་ཆག་ཐོན་སྐྱེད། ཚགས་ཤ་ལུག་ཤ་ལས་སྣོན་ཕྱིར་ཚོང་བཅས་གཅིག་ཏུ་འདུས་པའི་ཐོན་ལས་འཁོར་འབྲེལ་ཆ་ཚང་གི་དེང་རབས་འབྲོག་ལས་ཀུང་སི་ཆེ་གྲས་ཤིག་ཡིན་པ་དང་། མཉམ་ལས་ཁང་གིས་གཅིག་གྱུར་ཉོ་སྒྲུབ་དང་དེ་བཞིན་ནོར་ལུག་རྒྱགས་གསོ་བྱས་ནས་སྲོལ་རྒྱུན་འབྲོག་ལས་ཐར་ཐོར་གཉེར་སྐྱོང་གི་གཞི་ཁྱོན་ཆུང་བ་དང་། གྲུབ་ཆ་ལུགས་དང་མ་མཐུན་པ། དུས་ཡུན་རིང་བ་བཅས་ཀྱི་དཀའ་ངལ་ཐག་གཅོད་བྱས་ནས་ཡུལ་དེ་གའི་མང་ཚོགས་ཀྱི་ཡོང་འབབ་འཕར་རྒྱུར་སྐུལ་ཁྲིད་བྱས་ཡོད། མིག་སྔར་ཀུང་སི་དེས་འབྲོག་ལས་མཉམ་ལས་ཁང་789དང་ཞིང་འབྲོག་མང་ཚོགས་ཁྲི་11.18ལ་སྐུལ་ཁྲིད་བྱས་པའི་ནང་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་ཁྲི་1.8ཀྱི་མི་གྲངས་ཁྲི་7.1ཡོད་པར་མི་རེར་ལོ་རེར་ཆ་སྙོམས་ཡོང་འབབ་སྒོར་4000ནས་6000ལྷག་ཙམ་བར་རག་ཡོད། ཇོ་མོ་གླང་མའི་ནོར་ལུག་ཚོང་ཟོག་ལ་འགྱུར་ཚད་70%ཡན་ཟིན་པ་དེ་2015ལོ་དང་བསྡུར་ན་བརྒྱ་ཆའི་གྲངས་40འཕར་ཡོད།

ཉེ་བའི་ལོ་ཤས་རིང་། རང་སྐྱོང་ལྗོངས་ཀྱིས་སྐྱེད་སྲིང་བྱས་ཏེ་རྒྱ་སྟོབས་ཆེ་རུ་སོང་བའི་ཆེད་ལས་མཉམ་ལས་རྩ་འཛུགས་དང་ཞིང་འབྲོག་པའི་ཆེད་ལས་མཉམ་ལས་ཁང་ཁྲི་1.37ཟིན་པ་དང་། རྒྱལ་ཡོངས་ཀྱི“གྲོང་ཚོ་རེར་སྤུས་རྟགས་རེའི”དཔེ་སྟོན་གྲོང་ཚོ་དང་གྲོང་རྡལ་35དང་། ཀྲུང་གོའི་མཛེས་སྡུག་ལྡན་པའི་སྤྲོ་གསེང་གྲོང་གསེབ་13 རྒྱལ་ཡོངས་ཀྱི་སྤྲོ་གསེང་ཞིང་ལས་དང་གྲོང་གསེབ་ཡུལ་སྐོར་གྱི་དཔེ་སྟོན་རྫོང་7 དཔེ་སྟོན་ས་ཚིགས་9 ཀྲུང་གོའི་ཡིད་དབང་འཕྲོག་ཤོས་ཀྱི་སྤྲོ་གསེང་གྲོང་ཚོ་1བཅས་འཕེལ་རྒྱས་བཏང་ཞིང་། རྒྱལ་ཡོངས་ཀྱི་གྲོང་གསེབ་ཀྱི་ཐོན་ལས་དང་པོ་དང་། གཉིས་པ། གསུམ་པ་བཅས་མཉམ་འདྲེས་འཕེལ་རྒྱས་ཀྱི་སྔོན་ཁྲིད་ཁུལ་2བཏོད་ཡོད།

མིག་སྔའི་བར། ལྗོངས་ཡོངས་སུ་ཐོན་ལས་སྣ་ཚོགས་ཀྱི་དབུལ་སྐྱོར་ཁྲོམ་རའི་བྱེད་པོ་5600ལྷག་ཙམ་དང་དབུལ་སྐྱོར་ཐོན་ལས་གླིང་82ཡོད་པ་དང་། དབུལ་སྐྱོར་ཐོན་ལས་ཀྱི་ཐོན་རྫས་སྤུས་རྟགས་400ཙམ་དང་ཐོན་ལས་ཀྱི་དབུལ་སྐྱོར་དྲ་ཐོག་ཚོང་དོན་ལས་སྟེགས་50སྐྱེད་སྲིང་བྱས་ཤིང་། མི་ཁྲི་6.96ལས་ཞུགས་བརྟན་པོ་ཐུབ་ནས་ས་ཁུལ་དབུལ་པོའི་འཕེལ་རྒྱས་ཀྱི་གསོན་ཤུགས་ནུས་ལྡན་འཕེལ་ཡོད།

མིག་སྔར། ནས་དང་། འབྲི་གཡག ཡུལ་ལུག་གིས་གཙོས་པའི་ས་མཐོའི་ཁྱད་ལྡན་ཞིང་འབྲོག་ལས་ཀྱི་ཐོན་ནུས་རྒྱུན་མཐུད་ལེགས་སྒྱུར་རིམ་སྤོར་བྱས་པ་དང་། ཐོན་ཁུངས་ཀྱི་ལེགས་ཆ་དེ་དཔལ་འབྱོར་གྱི་ཕན་འབྲས་སུ་འགྱུར་བཞིན་ཡོད་ཅིང་། བོད་མི་དམངས་ཕྱུག་འགྱུར་འབྱོར་འབྲིང་གི་ཕྱོགས་སུ་མགྱོགས་མྱུར་བསྐྱོད་རྒྱུར་སྣེ་ཁྲིད་བྱས་ཡོད།

རྣམ་པ་དང་བྱེད་ཐབས་གསར་གཏོད་ཀྱིས་ཚོང་ལམ་རྒྱ་སྐྱེད་བཏང་བ།

ཁྱད་ལྡན་ཐོན་ལས་ཀྱི་གཞི་ཁྱོན་ཆེ་རུ་ཕྱིན་པ་དང་ཐོན་སྐྱེད་འཕེལ་རྒྱས་བྱུང་ཡང་གལ་ཏེ་ཁྲོམ་རའི་བྲིན་ཚོང་གི་རྗེས་མི་ཟིན་པར་ཐོན་རྫས་བྲིན་ཁ་རྒྱུག་པོ་མ་བྱུང་ཚེ་ཐོན་ལས་དབུལ་སྒྲོལ་དང་ཐ་ན་དབུལ་སྒྲོལ་འགག་སྒྲོལ་གྱི་སྤྱི་ཡོངས་ལ་ཤུགས་རྐྱེན་ཐེབས་སྲིད།

ཉེ་བའི་ལོ་ཤས་རིང་། རང་སྐྱོང་ལྗོངས་ཀྱིས་དབུལ་སྐྱོར་ཐོན་རྫས་ལས་ཁུངས་དང་། ཚོང་ར། མཐོ་སློབ། མཛེས་ལྗོངས་ཁུལ། གསོལ་མགྲོན་ཁང་། གནམ་ཐང་། བབས་ཚུགས་བཅས་སུ་ཁྱབ་གདལ་གཏོང་བའི“ཁྱབ་གདལ་བདུན”གྱི་བྱེད་སྒོ་སྤེལ་བ་དང་། ཁ་གཏད་བོད་སྐྱོར་ཞིང་ཆེན་དང་གྲོང་ཁྱེར་གྱི་ལེགས་ཆའི་ཐོན་ཁུངས་གང་ལེགས་སྤྱད་དེ་ལོ་5བསྟུད་མར་བོད་ཀྱི་ཤིན་ཏུ་དབུལ་བའི་ས་ཁུལ་གྱི་དབུལ་སྒྲོལ་འགག་སྒྲོལ་གྱི་ཡུལ་དངོས་ཀྱི་སྐུལ་སྤེལ་དང་ཁ་གཏད་བོད་སྐྱོར་གྱི་དབུལ་སྐྱོར་ལས་དོན་གཏིང་ཟབ་ཏུ་གཏོང་བའི་ཚོགས་འདུ་འཚོགས་ནས་ཁ་གཏད་རོགས་སྐྱོར་ཞིང་ཆེན་དང་གྲོང་ཁྱེར་དང་ཀྲུང་དབྱང་ཁེ་ལས་དང་རོགས་སྐྱོར་བྱ་ཡུལ་དབར་དགོས་མཁོ་སྦྲེལ་མཐུད་དང་གྲོས་མཐུན་ལ་མིང་རྟགས་འགོད་རྒྱུར་སྐུལ་འདེད་བཏང་ཡོད། “དབུལ་སྐྱོར་832”ཀྱི་བྲིན་ཚོང་ལས་སྟེགས་ལ་བརྟེན་ནས་འཛད་སྤྱོད་དབུལ་སྐྱོར་ཟླ་བའི་བྱེད་སྒོ་སྤེལ་ཡོད། དབུལ་སྐྱོར་ཐོན་རྫས་ཉོ་སྒྲུབ་ཁས་ལེན་འདུ་འཚོགས་དང་ཁྱད་ལྡན་ཐོན་རྫས་ཀྱི་གྲུབ་འབྲས་འགྲེམས་སྟོན་བྱས་ཏེ“དྲ་ཐོག་ཚོང་དོན་དང་། བྲིན་ཚོང་དང་དབུལ་སྐྱོར་གཞི་གཅིག་ཁྲོམ་གཞུང”ཧུར་ཐག་བཏོད་ཡོད། དྲ་རྒྱའི་ཐད་གཏོང་བརྒྱུད་ནས་ཚོང་ཟོག་བཙོངས་པ་དང་། ཚགས་པར་དང་། བརྙན་འཕྲིན། LEDབརྙན་ཤེལ། སྐད་འཕྲིན་སྤྱི་རྟགས་སོགས་གཞི་རྟེན་བརྒྱུད་དྲིལ་བསྒྲགས་ཡག་པོ་བྱས་ཏེ་ཐབས་མང་མཉམ་སྤྱོད་ཀྱིས་འཛད་སྤྱོད་དབུལ་སྐྱོར་ལ་སྐུལ་འདེད་བཏང་ཡོད། མཛེས་ལྗོངས་ཁུལ་དང་། གསོལ་མགྲོན་ཁང་། མེ་འཁོར་བབས་ཚུགས། གནམ་ཐང་བཅས་སུ་འཛད་སྤྱོད་དབུལ་སྐྱོར་གྱི“ཆེད་དོན་གསུམ”གྱི་འཛུགས་སྐྱོང་ལ་སྐུལ་འདེད་བཏང་ཡོད། གྲོང་ཁྱེར་དང་ས་ཁུལ་ཁག་གིས་དབུལ་སྐྱོར་ཐོན་རྫས་མཁོ་འདོན་ཚོང་པ་སྒྲིག་འཛུགས་བྱས་ནས་སྤྱི་ཚོགས་དབུལ་སྐྱོར་དྲ་བ་དང་། ཀྲུང་གོ་དངུལ་ཁང་ལས་རིགས་མཉམ་འབྲེལ་ལྷན་ཚོགས་ཀྱི“སྤྲིན་རྩིས་མྱུར་སྤྲོད”ཀྱི་APPདང“བོད་ལྗོངས་ཡུལ་སྐོར”གྱི་རིག་ནུས་ཡུལ་སྐོར་སོགས་ཀྱི་ལས་སྟེགས་ནང་ཞུགས་སུ་བཅུག་སྟེ་རྒྱུན་མཐུད་བརྟན་ལྷིང་དང་། འཁོར་སྐྱོད་བདེ་བླག ཐོན་ཚོང་འབྲེལ་མཐུད་བཅས་ཀྱི་ལས་སྟེགས་མང་བའི་ལམ་སྲོལ་ཆགས་རྒྱུར་སྐུལ་འདེད་བཏང་ནས་དབུལ་སྐྱོར་ཐོན་རྫས་ཕྱིར་ཚོང་ཐབས་ལམ་རྒྱུན་ཆད་མེད་པར་རྒྱ་སྐྱེད་བཏང་སྟེ་མང་ཚོགས་ལ་འབབ་འཕར་ཡོང་རྒྱུར་རོགས་རམ་བྱས་ཡོད།