ཤིན་ཧྭ་གསར་འགྱུར་ཁང་པེ་ཅིང་ནས་ཟླ་10ཚེས་17ཉིན་གློག་འཕྲིན་འབྱོར་གསལ། རྒྱལ་ཡོངས་ཀྱི་སྒྱུ་རྩལ་ལས་རིགས་ཀྱིས་དབུལ་སྒྲོལ་འགག་སྒྲོལ་ལ་རམ་འདེགས་བྱེད་པའི་རྣམ་པ་བཟང་པོ་གཅིག་སྡུད་ཐོག་མངོན་པར་བྱེད་པ་དང་། ཕུལ་བྱུང་གི་གསར་རྩོམ་གྲུབ་འབྲས་ལ་བརྟེན་ནས་མི་དམངས་མང་ཚོགས་ཀྱི་བསམ་པའི་རིག་གནས་འཚོ་བ་ཕུན་སུམ་ཚོགས་སུ་བཏང་སྟེ། ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པའི་རྒྱལ་ཁ་ཕུ་ཐག་གཅོད་པ་དང་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ལེན་པའི་སྤྱི་ཚོགས་ཀྱི་རྣམ་པ་ཟབ་མོ་ཞིག་གཏོད་ཆེད། ཀྲུང་གུང་ཀྲུང་དབྱང་དྲིལ་བསྒྲགས་པུའུ་དང་། རིག་གནས་ཡུལ་སྐོར་པུའུ། ཀྲུང་གོ་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས། རྒྱལ་སྲིད་སྤྱི་ཁྱབ་ཁང་དབུལ་སྐྱོར་གསར་སྤེལ་འགོ་ཁྲིད་ཚོགས་ཆུང་གཞུང་དོན་ཁང་བཅས་ཀྱིས་ཐུན་མོང་ཐོག་གཙོ་གཉེར་བྱས་པའི་རྒྱལ་ཡོངས་ཀྱི་དབུལ་སྒྲོལ་འགག་སྒྲོལ་བརྗོད་དོན་དུ་བྱས་པའི་གར་སྟེགས་སྒྱུ་རྩལ་གྱི་ཕུལ་བྱུང་ཟློས་གར་ཟླ་10ཚེས་17ཉིན་པེ་ཅིང་དུ་འཁྲབ་སྟོན་འགོ་ཚུགས་པ་རེད།

ད་རེས་ཀྱི་འཁྲབ་སྟོན་དེ་ཟླ་བ་གཉིས་རིང་རྒྱུན་མཐུད་དེ་བྱ་རྒྱུ་དང་། དབུལ་སྒྲོལ་འགག་སྒྲོལ་གྱི་རྒྱལ་ཁ་ཕུ་ཐག་གཅོད་པ་དང་ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པའི་བརྗོད་དོན་གཙོ་བོར་དམིགས་ཏེ། སྒྱུ་རྩལ་གྱི་རྣམ་པའི་ཐོག་ནས་དབུལ་སྒྲོལ་འགག་སྒྲོལ་ལ་ཐོབ་པའི་གྲུབ་འབྲས་གལ་ཆེན་དང་དེ་བཞིན་མི་དམངས་མང་ཚོགས་ཀྱི་བདེ་སྐྱིད་ལྡན་པའི་འཚོ་བ་དྲིལ་བསྒྲགས་དང་འགྲེམས་སྟོན་བྱ་རྒྱུ་རེད། འཁྲབ་སྟོན་ནང་། ཞུགས་པའི་གར་སྟེགས་སྒྱུ་རྩལ་གྱི་བརྩམས་ཆོས་67ཡོད་པའི་ནང་། ཟློས་གར་དང་། གཏམ་བརྗོད་ཟློས་གར། གླུ་གར། ཞབས་བྲོ། རོལ་དབྱངས་འདུ་ཚོགས་སོགས་གར་སྟེགས་སྒྱུ་རྩལ་གྱི་རྣམ་པ་མང་པོ་ཚུད་པ་དེར་བསམ་བློའི་རང་བཞིན་དང་སྒྱུ་རྩལ་གྱི་རང་བཞིན་ཅུང་ཆེན་པོ་ལྡན་ཡོད།

ད་རེས་ཀྱི་འཁྲབ་སྟོན་བྱེད་སྒོར་སྤྱི་ཕན་དམངས་ཕན་གྱི་རྩ་དོན་མཐའ་འཁྱོངས་བྱས་ཏེ། དྲ་ཕྱིའི་ཟློས་གར་འཁྲབ་སྟོན་དང་། དྲ་ཐོག་གི་ཐད་གཏོང་། འཁྲབ་སྟོན་དང་ཐད་གཏོང་ཟུང་དུ་འབྲེལ་བ་བཅས་ཀྱི་རྣམ་པའི་ཐོག་ནས། རྒྱ་ཆེའི་ལྟད་མོ་བ་ཚོར་དེ་བས་རྒྱ་ཁྱབ་དང་སྟབས་བདེའི་ངང་ཞབས་འདེགས་ཞུ་རྒྱུ་རེད།