བོད་ལྗོངས་ཆབ་མདོ་གྲོང་ཁྱེར་མཛོ་སྒང་རྫོང་གིས་ཐེམ་ཐོག་གྲོང་རྡལ་སྲིད་གཞུང་ཉེ་འགྲམ་གྱི་རྒྱལ་ལམ་318དུ་ཡུལ་གཞན་དུ་གནས་སྤོས་དབུལ་སྐྱོར་བྱ་ཡུལ་བསྐྲུན་པ་དང་། སྲིད་འཛིན་གྲོང་ཚོ་13གྱི་ཡིག་ཚགས་དང་གཱ་བཟོས་པའི་མང་ཚོགས་དུད་ཚང་དབུལ་པོ133དེ་གར་སྤོས་པས“གནས་སྤོ་ཐུབ་པ་དང་། གཞིས་ཆགས་ཐུབ་པ། ལས་ཀ་བྱེད་རྒྱུ་ཡོད་པ། ཕྱུག་འགྱུར་ཐུབ་པ”བཅས་མངོན་འགྱུར་བྱུང་ཡོད།

གྲོང་ཚོ་གསར་པར་རྒྱུན་སྡོད་མི་འབོར་1000ཙམ་ཡོད་པའི་ཁར་དེ་སྔའི་མི་འབོར་བསྣན་ཚེ། རྒྱུན་སྡོད་མི་འབོར་5000ཙམ་ཟིན་གྱི་ཡོད།

ཐོག་སོ་གཉིས་པའི་ཁྲོམ་གཞུང་དང་ཉེ་བའི་ཁང་པ་གསར་པའི་ནང་ལོ་46ལ་སླེབས་པའི་བསྟན་འཛིན་ཉི་མས་རང་ཁྱིམ་གྱི་འཚེམ་བཟོ་ཁང་དུ་གྱོན་ཆས་བཟོ་བཞིན་མཆིས།

བསྟན་འཛིན་ཉི་མ་ནི་བོད་ལྗོངས་ཆབ་མདོ་གྲོང་ཁྱེར་མཛོ་སྒང་རྫོང་ཐེམ་ཐོག་གྲོང་རྡལ་ཡར་གྲོང་བདེ་སྐྱིད་གྲོང་གསར་གྱི“ཡུལ་མི་གསར་པ”ཞིག་ཡིན་ལ་2017ལོའི་གོང་ཁོང་ནི་ཐེམ་ཐོག་གྲོང་རྡལ་ཡར་གྲོང་གྲོང་ཚོའི་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་ཞིག་རེད།

“སྐབས་དེར་ངའི་གཟུགས་པོ་ཐང་པོ་མེད་པས་སོ་ནམ་ཡག་པོ་བྱེད་མི་ཐུབ་ལ་ཁྱིམ་གྱི་འབྱོར་འཁོས་ཀྱང་ཧ་ཅང་སྐྱོ་པོ་ཡོད”བསྟན་འཛིན་ཉི་མར་2008ལོར་ཁྲག་ཤེད་མཐོ་བའི་ནད་ཕོག་ནས་ཁྲག་ཤེད་གཅོག་པའི་སྨན་ཡུན་རིང་ཟོས། “མ་གཞི་རི་མོ་སྦྱོང་འདོད་ཡོད་ཀྱང་རྟག་པར་མགོ་ན་བས་འགྲོ་ཐུབ་མ་སོང”ཞེས་བཤད།

བསྟན་འཛིན་ཉི་མ་དང་བཟའ་ཟླ་དཔལ་འཛོམས་ལ་ཕྲུ་གུ་གཉིས་ཡོད་ཅིང་། ནད་ཀྱིས་རྐྱེན་པས་དབུལ་པོར་གྱུར་པའི་ཁྱིམ་ཚང་ཞིག་རེད། ཕྱིར་གླ་པ་རྒྱུག་མི་ཐུབ་པའི་ཁར། ལོ་འཁོར་མོ་ཡུག་ཏུ་སྨན་བཟས་ནས་ནད་བཅོས་བྱེད་དགོས་ཤིང་། བུ་ལོན་ཡང་སྒོར་ཁྲི་10ལྷག་ཟུག་ཡོད། “དངུལ་དེ་དག་ནི་གཡར་བ་ཡིན་ལ་རྗེས་སུ་གཡར་མཁན་ཡང་རག་གི་མི་འདུག”དེ་སྔའི་དབུལ་ཕོངས་ཀྱི་སྐོར་གླེང་སྐབས་ཁོ་རང་ཅུང་ཤོད་མི་བདེ་བ་ཡོང་གི་ཡོད།

གནད་སྨིན་དབུལ་སྒྲོལ་བྱས་ཚུན། མཛོ་སྒང་རྫོང་གིས་ཐེམ་ཐོག་གྲོང་རྡལ་སྲིད་གཞུང་ཉེ་འགྲམ་གྱི་རྒྱལ་ལམ་318དུ་ཡུལ་གཞན་དུ་གནས་སྤོས་དབུལ་སྐྱོར་བྱ་ཡུལ་བསྐྲུན་པ་དང་། སྲིད་འཛིན་གྲོང་ཚོ་13གྱི་ཡིག་ཚགས་དང་གཱ་བཟོས་པའི་མང་ཚོགས་དུད་ཚང་དབུལ་པོ133དེ་གར་སྤོས་པས“གནས་སྤོ་ཐུབ་པ་དང་། གཞིས་ཆགས་ཐུབ་པ། ལས་ཀ་བྱེད་རྒྱུ་ཡོད་པ། ཕྱུག་འགྱུར་ཐུབ་པ”བཅས་མངོན་འགྱུར་བྱུང་ཡོད།

ཡུལ་གཞན་དུ་གནས་སྤོས་དབུལ་སྐྱོར་ལ་བརྟེན་ནས་བསྟན་འཛིན་ཉི་མ་དང་ནང་མི་དག་ཁང་པ་གསར་པའི་ནང་སྡོད་རྒྱུ་བྱུང་བ་དང་། སྲིད་ཇུས་ཀྱི་རོགས་སྐྱོར་དེ་བས་མང་བ་ལོངས་སྤྱོད་ཐུབ་པ་མ་ཟད། དབུལ་སྒྲོལ་ཕྱུག་འགྱུར་གྱི་ཐབས་ལམ་ཡང་རྟོགས་ཡོད། རྫོང་དུ་ལག་རྩལ་གསོ་སྦྱོང་བྱེད་སྐབས་བསྟན་འཛིན་ཉི་མས་ཕྱུ་པ་འཚེམ་བཟོ་བྱེད་སྟངས་ཤེས་པར་བརྟེན། ཕྱིས་སུ་དངུལ་བུན་སྒོར་ཁྲི་5གཡར་ནས་རས་ཆ་ཉོས་པ་དང་རང་ཁྱིམ་དུ་འཚེམ་བཟོ་ཁང་བཙུགས་ནས་འཚོ་བ་གསར་པ་སྐྱེལ་འགོ་ཚུགས་པ་རེད།

“ལོ་གསར་དང་དུས་ཆེན་དེ་བཞིན་དབྱར་ཁའི་གླིང་ཁ་གཏོང་རིམ་བཞིན་ཕྱུ་པ་བཟོ་བར་ཡོང་མཁན་མང་དུ་ཕྱིན་པས། ལོ་གཅིག་རིང་ཡོང་འབབ་སྒོར་ཁྲི་2གསོག་ཐུབ་ཀྱི་འདུག”ཅེས་བསྟན་འཛིན་ཉི་མས་བཤད། ད་ཆ་ཁོང་གིས་བུ་ལོན་འཇལ་ཚར་བ་མ་ཟད་། ད་དུང་བཅོལ་དངུལ་ཡང་སྒོར་ཁྲི་གཉིས་ཡོད།

བསྟན་འཛིན་ཉི་མའི་རང་ཁྱིམ་གྱི་བཟོ་ཁང་དང་མི་འདྲ་བ་ཞིག་ལ། ཚོང་གཉེར་གྱི་ཀླད་པ་ཡོད་པའི་དགའ་ལྷ་མོས་ཁྲོམ་གཞུང་དང་ཐག་ཉེ་བའི་ཚོང་ཁང་སྨི་ངོས་གྲུ་40ལྷག་ཟིན་པ་བོགས་མར་བླངས་ནས་རྒྱན་ཆས་ཚོང་ཁང་གཉེར་བས་བྲིན་པོ་བྱུང་ཡོད། 

དགའ་ལྷ་མོ་ནི་དེ་སྔ་ཐེམ་ཐོག་གྲོང་རྡལ་རྭ་ཉེ་གྲོང་ཚོའི་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་ཞིག་ཡིན། གནས་སྤོས་མ་བྱས་གོང་སི་ཁྲོན་གྱི་ཁྲེང་ཏུའུ་དང་མཛོ་སྒང་རྫོང་སོགས་སུ་ཁོང་སྔ་ཕྱིར་གླ་པ་བརྒྱུགས་མྱོང་བ་དང་། ཁོང་རང་གཅིག་པུས་ཕྲུ་གུ་གཉིས་སྐྱོང་དགོས་པས་འཚོ་བ་དཀའ་ལས་ཁག་པོ་ཡོད།

2017ལོར་མཛོ་སྒང་རྫོང་གིས་བསྐྲུན་ཚར་བའི་བཀོད་སྒྲིག་ཁང་པའི་ནང་རིན་མི་དགོས་པར་དུད་ཚང་དབུལ་པོ་རྣམས་སྡོད་དུ་བཅུག་ཁར་ཁྱིམ་རེར་བརྙན་འཕྲིན་དང་། ཅོག་ཙེ། ཁ་གདན་ཉལ་ཁྲི་སོགས་རིན་ཐང་སྒོར་ཁྲི་1ལྷག་རི་བའི་ཉེར་མཁོའི་དངོས་ཟོག་མཁོ་འདོན་བྱས་ཡོད། གྲོང་ཚོ་གསར་པའི་ནང་སྤོས་རྗེས་དགའ་ལྷ་མོས་ཁྲོམ་རའི་རིན་གོང་དང་བསྡུར་ན་ཧ་ཅང་ཁེ་བའི་ཚོང་ཁང་གཅིག་གླས་པ་རེད།

“གཅུང་མོ་དང་ཁོ་མོའི་བཟའ་ཟླས་ལྷ་སར་ཚོང་རྒྱག་གི་ཡོད། ཁོང་ཚོས་ང་ལ་ལྷ་ས་ནས་ཚོང་ཟོག་འདྲེན་རོགས་བྱས་པས་ངའི་ཚོང་ཁང་ནང་དཔེ་གསར་གྱི་ཚོང་ཟོག་སླེབས་མགྱོགས་ཤོས་རེད། ཚོང་ཡང་ཡག་པོ་འདུག”ཁོང་གིས་གྱོན་ཆས་བཤམ་ཞོར“ཚོང་སྒོ་ཕྱེ་སྐབས་ངས་གཅུང་མོ་བཟའ་ཚོ་གཉིས་ཀྱི་ལག་ནས་སྒོར་ཁྲི་གཉིས་གཡར་ཡང་ལོ་དེ་རང་ལ་བུ་ལོན་སྤྲོད་ཐུབ་བྱུང”ཞེས་གསར་འགོད་པར་བཤད།

བསྟན་འཛིན་ཉི་མ་དང་དགའ་ལྷ་མོ་བཞིན་ཡར་གྲོང་བདེ་སྐྱིད་གྲོང་གསར་དུ་མང་ཚོགས་དུད་ཚང་དབུལ་པོ་133གྱིས་ཡུལ་གཞན་དུ་གནས་སྤོས་དབུལ་སྐྱོར་བྱས་པར་བརྟེན་ནས་ལས་དབང་ལ་འགྱུར་ལྡོག་ཆེན་པོ་བྱུང་ཡོད།

གསར་འགོད་པས་ཐེམ་ཐོག་གྲོང་རྡལ་སྲིད་གཞུང་ནས་ཤེས་རྟོགས་བྱས་པ་ལྟར་ན། ཡར་གྲོང་བདེ་སྐྱིད་གྲོང་ཚོར་སློབ་གསོ་དང་། སྨན་བཅོས། སྦྲག་སྲིད། དངུལ་རྩ་སོགས་ཀྱི་སྤྱི་པའི་ཞབས་ཞུ་ཡོད་ཅིང་། ལེ་ལག་ཚང་བའི་ཆུ་གློག་ལམ་དྲ་སོགས་ཀྱི་རྨང་གཞིའི་སྒྲིག་བཀོད་འཐུས་སྒོ་ཚང་དུ་སོང་ཁར་གཞི་རིམ་གྱི་རྩ་འཛུགས་བྱེད་སྒོ་ཁང་དང་། སྲིད་དོན་ཞབས་ཞུ་ཚོམས་ཆེན། གསོ་སྦྱོང་ལས་ཞུགས་ཞབས་ཞུ་ཚོམས་ཆེན། ཞིང་ཞོར་ཁྲོམ་ར་སོགས་གསར་དུ་བསྐྲུན་ཡོད། མ་འཇོག་ཚོང་ཁང་ཕུད་ཆ་རྐྱེན་ཡོད་པའི་མང་ཚོགས་ཀྱིས་ཐེམ་ཐོག་གྲོང་ཚོའི་བྱེ་རྡོ་ར་བ་དང་། ཕྱེད་རང་འགུལ་གྱི་སོ་ཕག་བཟོ་གྲྭ། ཡར་གྲོང་གྲོང་ཚོའི་བྱེ་རྡོ་ར་བ། ཡུལ་དེ་གའི་མགྲོན་ཁང་དང་ཟ་ཁང་སོགས་སུ་ལས་ཀ་བྱེད་ཐུབ་པར་བརྟེན། “ཞིང་འབྲོག་པ”ནས“གྲོང་ཁྱེར་དང་གྲོང་རྡལ་གྱི་ཡུལ་མིར”གྱུར་ཡོད།

གྲོང་ཚོ་གསར་པར་བསྐྱོད་པ་ན། བོད་ཤར་གྱི་ཁང་པའི་བཟོ་བཀོད་ཁྱད་ཆོས་ལྡན་པའི་ཐོག་སོ་བཞི་ལྡན་གྱི་ལས་ཤག་ཐོག་ཁང་སྟར་པ་9རྒྱལ་ལམ་318ཀྱི་གཞོགས་གཉིས་སུ་གྲལ་སྟར་འགྲིག་ཅིང་། ཁྲོམ་གཞུང་དང་ཐག་ཉེ་བའི་ཚོང་ཁང་གི་མདུན་དུ་ཕྱོགས་བཞི་མཚམས་བརྒྱད་ནས་ཡོང་བའི་ཡུལ་སྐོར་འཁོར་རིགས་བཞག་ཡོད་པ་དང་། མི་རྣམས་ཀྱིས་གནས་དེར་ཉོ་ཆ་རྒྱག་པ་དང་ངལ་གསོའི་ལོངས་སྤྱོད་ལ་རོལ་བཞིན་འདུག དེ་ལྟར་གསོན་ཤུགས་ཀྱི་དཔལ་འབར་བའི་གྲོང་རྡལ་ཆུང་ངུ་ཞིག་ཏུ་གྱུར།

ཐེམ་ཐོག་གྲོང་རྡལ་ཏང་ཨུད་ཀྱི་དྲིལ་བསྒྲགས་ཨུ་ཡོན་ལི་ཧའོ་རན་གྱིས། གྲོང་ཚོ་གསར་པར་རྒྱུན་སྡོད་མི་འབོར་1000ཙམ་ཡོད་པའི་ཁར་དེ་སྔའི་མི་འབོར་བསྣན་ཚེ། རྒྱུན་སྡོད་མི་འབོར་5000ཙམ་ཟིན་གྱི་ཡོད། སྡོམ་རྩིས་རགས་ཙམ་བརྒྱབ་པ་ལྟར་ན། ཡུལ་སྐོར་བ་མང་དུས་སུ་འདི་གར་ཆ་སྙོམས་ཉིན་རེར་ཡུལ་སྐོར་བ་མི་ཐེངས་2000ལྷག་ཙམ་ལ་སྣེ་ལེན་ཞུ་བཞིན་ཡོད་ཅེས་བརྗོད།

བསྟན་འཛིན་ཉི་མའི་ཁྱིམ་ནས་ཕྱིར་ལོག་གྲབས་བྱེད་སྐབས། ཁོང་གིས་གཟི་བརྗིད་མཚན་སྙན་དཔང་ཡིག་ཅིག་བསྟན་པ་ནི་ཁོང་གི་བུ་བློ་བཟང་སྟོབས་ལྡན“མཛོ་སྒང་རྫོང་གི་2018ལོའི་དབུལ་སྒྲོལ་འགག་སྒྲོལ་ལ་སྐུལ་འདེད་གཏོང་བའི་བྱ་སྤྱོད་ཀྱི་སློབ་ཆུང་སློབ་མའི་སྒྲུང་བཤད་འགྲན་བསྡུར”ནང་བྱ་དགའ་ཨང་དང་པོ་ཐོབ་པ་དེ་རེད་འདུག

གཟུགས་བྱད་རིད་པོའི་མི་དར་མ་དེས་བུའི་དཔང་ཡིག་སྟོན་བཞིན་དུ“གལ་ཏེ་ད་ཆའི་སྲིད་ཇུས་བཟང་པོའི་བཀའ་དྲིན་མིན་ན། ང་ཚོ་འཚོ་བ་སྐྱིད་པོ་འདི་འདྲ་གང་ནས་སྐྱེལ་ཐུབ”ཅེས་བཤད།