ཆབ་མདོ་ནི་བོད་རང་སྐྱོང་ལྗོངས་ཀྱི་ཤར་རྒྱུད་དུ་ཆགས་ཡོད། 2016ལོ་ཚུན་དུ། རིམ་རྩིས་བརྒྱབ་ན་དུད་ཚང་དབུལ་པོ་ཁྲི་3.84ཡི་མི་ཁྲི་19.46ཉུང་དུ་ཕྱིན་པ་དང་། གྲོང་ཚོ་དབུལ་པོ་1127དབུལ་སྒྲོལ་ཐུབ་ཡོད། 2016ལོ་ཚུན་དུ། ཆབ་མདོ་གྲོང་ཁྱེར་གྱིས་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་བྱ་ཡུལ་268གསར་པ་བསྐྲུན་ནས་སྡོད་ཁང་གི་གནད་དོན་གཅིག་སྡུད་ཐག་གཅོད་བྱས་པ་དང་ཆབས་ཅིག སློབ་གྲྭ་དང་། འཕྲོད་བསྟེན་ཁང་། དེ་བཞིན་ཆུ་དང་། གློག ལམ། དྲ་རྒྱ་སོགས་ལེ་ལག་ཚང་བའི་རྨང་གཞིའི་སྒྲིག་བཀོད་ཀྱང་ཡག་པོ་བསྐྲུན་པ་དང་། ཆབ་མདོ་གྲོང་ཁྱེར་གྱི་ཡིག་ཚགས་དང་གཱ་བཟོས་པའི་མང་ཚོགས་དབུལ་པོ་ཁྲི་9.9གཅིག་རྗེས་གཉིས་མཐུད་དུ་རི་ཁུལ་ནས་ཐོན་ནས་སྡོད་ཁང་གསར་པར་སྤོས་ཏེ་འཚོ་བ་གསར་པ་སྐྱེལ་བཞིན་ཡོད། 

གཡོན་གྱི་པར་འདི་ནི་ཆབ་མདོ་གྲོང་ཁྱེར་སྟེང་ཆེན་རྫོང་ཁྲི་རྡོ་གྲོང་རྡལ་འུག་པ་གྲོང་ཚོའི་གྲོང་མི་བསོད་ནམས་བདེ་སྐྱིད་ཀྱིས་ཁྲི་རྡོ་གྲོང་རྡལ་གྱི་སྒོ་རྩིས་ཚོང་ཁང་ཞིག་ཏུ་ལས་ཀ་བྱེད་པའི་རྣམ་པ་ཡིན་པ། གཡས་ཀྱི་པར་འདི་ནི་ཁྲི་རྡོ་གྲོང་རྡལ་གྱི་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་བྱ་ཡུལ་གྱི་ཟུར་ཞིག་ཡིན་པ། 2018ལོར། བསོད་ནམས་བདེ་སྐྱིད་དང་ཁོ་མོའི་ནང་མི་རྣམས་འུག་པ་གྲོང་ཚོ་ནས་ཁྲི་རྡོ་གྲོང་རྡལ་གྱི་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་བྱ་ཡུལ་གྱི་ཡངས་ཤིང་དཀར་ཆ་དོད་པའི་སྡོད་ཁང་གསར་པར་སྤོས་པ་དང་། བཀོད་སྒྲིག་བྱ་ཡུལ་དེར་སྒྲིག་བཀོད་ཆ་ཚང་ལ་འགྲིམ་འགྲུལ་སྟབས་བདེ་ཡོད་པ་རེད། བསོད་ནམས་བདེ་སྐྱིད་ཀྱིས་བཀོད་སྒྲིག་བྱ་ཡུལ་དེ་དང་ཐག་ཉེ་བའི་སྒོ་རྩིས་ཚོང་ཁང་ཞིག་ཏུ་ལས་ཀ་བྱེད་པར་ཟླ་རེར་གླ་ཕོགས་སྒོར་2000རེ་ཡོད་པ་རེད།

གཡོན་གྱི་པར་འདི་ནི་ཆབ་མདོ་གྲོང་ཁྱེར་སྨར་ཁམས་རྫོང་མཆོད་རྟེན་ཤང་མཆོད་རྟེན་གྲོང་ཚོའི་གྲོང་མི་རིན་ཆེན་དབང་རྒྱལ(གཡོན་གྱི་གཉིས་པ)དང་། བཟའ་ཟླ་ཕུན་ཚོགས་གཡུ་སྒྲོན(གཡས་ཀྱི་དང་པོ) བུ་སངས་རྒྱས་རྒྱ་མཚོ(གཡོན་གྱི་དང་པོ) བུ་མོ་སྐར་མ་གཡང་འཛོམས་བཅས་བཀོད་སྒྲིག་བྱ་ཡུལ་གྱི་ཐོག་ཁང་མདུན་དུ་ཡོད་པ། གཡས་ཀྱི་པར་འདི་ནི་སྨར་ཁམས་རྫོང་གི་བདེ་སྐྱིད་ཁང་གསར་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་བྱ་ཡུལ་གྱི་ཟུར་ཞིག་ཡིན་པ།2018ལོར་རིན་ཆེན་དབང་རྒྱལ་དང་ནང་མི་རྣམས་བདེ་སྐྱིད་ཁང་གསར་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་བྱ་ཡུལ་གྱི་སྨི་ངོས་གྲུ་120ཟིན་པའི་སྡོད་ཁང་གསར་པར་སྤོས་ཡོད། བཀོད་སྒྲིག་བྱ་ཡུལ་དུ་དམངས་ཕན་ཞབས་ཞུའི་ལྟེ་གནས་དང་། འཕྲོད་བསྟེན་ཁང་། བུ་བཅོལ་ཁང་། སློབ་ཆུང་སོགས་སྒྲིག་བཀོད་ཆ་ཚང་པོ་ཡོད་པས་རིན་ཆེན་དབང་རྒྱལ་གྱི་ནང་མིར་དེ་གར་བདེ་སྡོད་ལས་བརྩོན་གྱི་བདེ་སྐྱིད་ལྡན་པའི་འཚོ་བ་སྐྱེལ་རྒྱུ་བྱུང་ཡོད།

གཡོན་གྱི་པར་འདི་ནི་ཆབ་མདོ་གྲོང་ཁྱེར་འཇོ་མདའ་རྫོང་སྐམ་ཐོག་གྲོང་རྡལ་གྱི་གྲོང་མི་པད་མ་སྐམ་ཐོག་ཁྱད་ལྡན་གྲོང་རྡལ་ཆུང་ངུར་ཡོད་པ། གཡས་ཀྱི་པར་འདི་ནི་འཇོ་མདའ་རྫོང་སྐམ་ཐོག་ཁྱད་ལྡན་གྲོང་རྡལ་ཆུང་ངུའི་ཟུར་ཞིག་ཡིན་པ། 2017ལོར་པད་མ་དང་ནང་མི་དེ་སྔའི་སྡོད་ཁང་རྙིང་པ་ནས་སྐམ་ཐོག་ཁྱད་ལྡན་གྲོང་རྡལ་ཆུང་ངུའི་སྨི་ངོས་གྲུ་150ཟིན་པའི་སྡོད་ཁང་གསར་པར་སྤོས་པ་རེད། སྐམ་ཐོག་ཁྱད་ལྡན་གྲོང་རྡལ་ཆུང་ངུའི་འགྲིམ་འགྲུལ་སྟབས་བདེ་བས་པད་མའི་ཕྲུ་གུ་རྣམས་ཀྱང་ཐག་ཉེ་སར་ལས་ཀ་རག་པ་རེད།

གཡོན་གྱི་པར་འདི་ནི་ཆབ་མདོ་གྲོང་ཁྱེར་གོ་འཇོ་རྫོང་རྩེ་པ་ཤང་ཤ་རུ་གྲོང་ཚོའི་གྲོང་མི་པད་མ་ནོར་བུ་དང་བཟའ་ཟླ་སྒྲོལ་དཀར་ལྷ་མོ་བཀོད་སྒྲིག་བྱ་ཡུལ་གྱི་སྡོད་ཁང་གསར་པའི་ནང་ཡོད་པ། གཡས་ཀྱི་པར་འདི་ནི་རྫོང་གྲོང་དུ་ཡོད་པའི་གོ་འཇོ་རྫོང་གི་ཡུལ་གཞན་དུ་གནས་སྤོས་གནད་སྨིན་དབུལ་སྐྱོར་གྱི་བཀོད་སྒྲིག་བྱ་ཡུལ་དང་པོའི་ཟུར་ཞིག་ཡིན་པ། 2018ལོའི་ཟླ་11པར་པད་མ་ནོར་བུ་དང་ནང་མི་ཤ་རུ་གྲོང་ཚོ་ནས་བཀོད་སྒྲིག་བྱ་ཡུལ་གྱི་སྨི་ངོས་གྲུ་165.5ཡོད་པའི་སྡོད་ཁང་གསར་པར་སྤོས་ཡོད། བཀོད་སྒྲིག་བྱ་ཡུལ་གོ་འཇོ་རྫོང་གྲོང་དང་ཐག་ཉེ་བས་པད་མ་ནོར་བུའི་ཕྲུ་གུ་ཚོའང་རྫོང་གྲོང་དུ་ལས་ཀ་རག་པ་རེད།

གཡོན་གྱི་པར་འདི་ནི་ཆབ་མདོ་གྲོང་ཁྱེར་རི་བོ་ཆེ་རྫོང་ཁྲ་མོ་གླིང་ཤང་རྟ་གཞུང་གྲོང་ཚོའི་གྲོང་མི་ཨོ་རྒྱན(གཡས)དང་བཟའ་ཟླ་ཨ་བརྟན་བཀོད་སྒྲིག་བྱ་ཡུལ་གྱི་ཨོ་རྒྱན་སྔོ་ཚལ་ཚོང་ཁང་གི་མདུན་དུ་ཡོད་པ། གཡས་ཀྱི་པར་འདི་ནི་རི་བོ་ཆེ་རྫོང་ས་མདོ་དབུལ་སྐྱོར་གསར་སྤེལ་ཁུལ་གྱི་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་བྱ་ཡུལ་གྱི་ཟུར་ཞིག་ཡིན་པ། 2018ལོའི་ཟླ་12པར་ཨོ་རྒྱན་ཁྱིམ་རྟ་གཞུང་གྲོང་ཚོ་ནས་བཀོད་སྒྲིག་བྱ་ཡུལ་གྱི་སྨི་ངོས་གྲུ་100ཡོད་པའི་སྡོད་ཁང་གསར་པར་སྤོས་པ་རེད། ཨོ་རྒྱན་དང་བཟའ་ཟླ་ཨ་བརྟན་གྱིས་གྲོས་བསྡུར་བྱས་རྗེས་བཀོད་སྒྲིག་བྱ་ཡུལ་དུ་སྨི་ངོས་གྲུ་40ལྷག་ཙམ་ཡོད་པའི་ཚོང་ཁང་ཞིག་གླས་ནས་སྔོ་ཚལ་བཙོངས་པས་ཁྱིམ་གྱི་ཡོང་འབབ་བརྟན་པོ་ཡོད་པ་མ་ཟད་ཨོ་རྒྱན་ཁྱིམ་གྱི་འཚོ་བ་ཡང་ཉིན་བཞིན་ལེགས་སུ་ཕྱིན་ཡོད།

གཡོན་གྱི་པར་འདི་ནི་ཆབ་མདོ་གྲོང་ཁྱེར་རི་བོ་ཆེ་རྫོང་ལྔ་མདའ་གྲོང་ཚོའི་གྲོང་མི་སྨོན་ལམ་མཚོ་མོ(གཡས)དང་བུ་མོ་ཨོ་རྒྱན་དཔལ་མཚོ་སྡོད་ཁང་གསར་པའི་མདུན་དུ་ཡོད་པ། གཡས་ཀྱི་པར་འདི་ནི་རི་བོ་ཆེ་རྫོང་ལྔ་མདའ་གྲོང་ཚོའི་ཟུར་ཞིག་ཡིན་པ། 2018ལོར་སྨོན་ལམ་མཚོ་མོ་དང་ནང་མི་རྣམས་གྲོང་ཚོ་རྙིང་པ་ནས་གྲོང་ཚོ་གསར་པར་སྤོས་པ་དང་། གྲོང་ཚོ་གསར་པའི་སྒྲིག་བཀོད་ཆ་ཚང་ལ་འགྲིམ་འགྲུལ་སྟབས་བདེ་པོ་ཡོད། སྨོན་ལམ་མཚོ་མོ་ཁྱིམ་དང་འདྲ་བའི་གྲོང་ཚོ་རྙིང་པའི་གྲོང་མི་100ལྷག་ཙམ་སྡོད་ཁང་རྙིང་པ་ནས་རྒྱ་ཆེ་ལ་དཀར་ཆ་དོད་པའི་སྡོད་ཁང་གསར་པར་སྤོས་ཡོད་པ་རེད།