ལེ་ཚན་གཏོད་པའི་གཏམ།

འདི་ལོ་ནི་ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་པའི་རྒྱལ་ཁ་ཕུ་ཐག་གཅོད་པའི་དམིགས་ཚད་མངོན་འགྱུར་ལོ་དང་དབུལ་སྒྲོལ་འགག་སྒྲོལ་ལ་མཐའ་མའི་རྒྱལ་ཁ་ལེན་པའི་མཇུག་བསྡུའི་ལོ་ཡིན་པས། མིག་སྔར། དབུལ་སྒྲོལ་འགག་སྒྲོལ་ལས་དོན་དེ་མཐའ་མའི་རྒྱལ་ཁ་ལེན་པ་དང་ཕྱོགས་ཡོངས་ནས་མཇུག་བསྡུ་བའི་འགག་རྩའི་དུས་སུ་སླེབས་ཡོད། རང་རྒྱལ་གྱི་དབུལ་སྐྱོར་ཉིན་མོ་ཐེངས་བདུན་པ་འཆར་ལ་ཉེ་བའི་མཚམས་འདིར། འདི་ག་ཚགས་པར་གྱིས“ངས་བརྒྱུད་མྱོང་བའི་དབུལ་སྒྲོལ་འགག་སྒྲོལ་གྱི་གཏམ་རྒྱུད”ཅེས་པའི་ལེ་ཚན་བཏོད་ནས། གཞི་རིམ་གྱི་དབུལ་སྒྲོལ་ལག་ལེན་ལ་དམིགས་པ་དང་། དབུལ་སྒྲོལ་འཐབ་ས་དང་པོའི་མི་སེམས་འགུལ་བའི་གཏམ་རྒྱུད་ཤོད་པ། ཀུན་སེམས་གཅིག་སྒྲིལ་གྱིས་དབུལ་ཕོངས་ལས་སྒྲོལ་བའི་ཟུངས་ཤུགས་མངོན་པ་བཅས་བྱ་རྒྱུ་ཡིན་པས་ཀུན་གྱིས་དོ་སྣང་ཡོད་པ་ཞུ།

དིང་རི་རྫོང་བཀྲ་ཤིས་འཛོམས་ཤང་པ་གསུམ་གྲོང་ཚོ་ནི་ཇོ་མོ་གླང་མའི་སྒར་ས་ཆེ་མོ་དང་ཐག་ཉེ་ཤོས་ཀྱི་གྲོང་ཚོ་ཞིག་ཡིན་པས། ཀུན་གྱིས“ཇོ་མོ་གླང་མའི་འདབས་ཀྱི་གྲོང་ཚོ་དང་པོ”ཞེས་འབོད་ཀྱི་ཡོད། པ་གསུམ་གྲོང་ཚོ་ཡོངས་ལ་དུད་ཚང་54དང་མི་གྲངས་302ཡོད་པ་ལས་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་18དང་མི་གྲངས་75ཡོད་པ་རེད། ཇོ་མོ་གླང་མར་འགྲོ་བར་་ངེས་པར་དུ་པ་གསུམ་གྲོང་ཚོ་བརྒྱུད་དགོས་སྟབས། གྲོང་མི་ཚོས་ཁྱིམ་ཚང་མགྲོན་ཁང་གཉེར་ནས་དབུལ་སྒྲོལ་འགག་སྒྲོལ་བྱས་པ་རེད།

རྡོ་རྗེས་ལོ་28གོང་ནས་ཁྱིམ་ཚང་མགྲོན་ཁང་གཉེར་ཏེ་མིང་ལ“གཡག་མགོ་མགྲོན་ཁང”ཞེས་བཏགས་པ་རེད། “ང་གཞོན་ནུའི་སྐབས་ནོར་གནག་ཁ་ཤས་དང་ནས་ཞིང་མུའུ་ཁ་ཤས་ལས་ཡོང་འབབ་གཞན་མེད་པར་ཁྱིམ་ཚང་གི་ཆ་རྐྱེན་ཧ་ཅང་སྐྱོ་པོ་ཡིན་པས། ངས་ཁང་མིག་ལྷག་མ་དག་མགྲོན་ཁང་བཟོས་པ་ཡིན” སྐབས་དེ་དུས་ཇོ་མོ་གླང་མར་ཡུལ་སྐོར་དུ་ཡོང་མཁན་མང་པོ་དེ་འདྲ་མེད་པས་ལོ་རེར་ཡོང་འབབ་སྒོར་ཆིག་སྟོང་ཡས་མས་ཟིན་ན་ཡག་ཤོས་རེད་ཅེས་རྡོ་རྗེས་བཤད།

ཕྱིས་སུ། ཇོ་མོ་གླང་མར་ཡུལ་སྐོར་མྱུལ་དཔྱད་དུ་ཡོང་མཁན་ཇེ་མང་དུ་ཕྱིན་པས་རྡོ་རྗེས་གཉེར་སྐྱོང་གི་གཞི་ཁྱོན་ཆེ་རུ་བཏང་བ་རེད། མིག་སྔར། རྡོ་རྗེའི་མགྲོན་ཁང་ནང་དུ་ཉལ་ཁྲི་30ཡོད་ལ་ཉལ་ཁྲི་རེར་ཉིན་རེར་སྒོར་80དང་ཁ་ལག་རིན་པ་ད་དུང་ལོགས་སུ་བསྡུ་གི་ཡོད། ལོ་རེའི་ཟླ་ལྔ་པ་ནས་བཅུ་པའི་བར་ནི་ཇོ་མོ་གླང་མའི་མཛེས་ལྗོངས་ཁུལ་དུ་ཡུལ་སྐོར་བ་ཡོང་མང་ཤོས་ཀྱི་དུས་ཡིན། རྡོ་རྗེའི“གཡག་མགོ་མགྲོན་ཁང”གིས་ཟླ་རེར་ཡུལ་སྐོར་བ་སུམ་བརྒྱ་བཞི་བརྒྱར་སྣེ་ལེན་ཞུ་ཐུབ་པས་ལོའི་ཡོང་འབབ་སྒོར་ཁྲི་20ལྷག་ཙམ་ཟིན་གྱི་ཡོད་པ་རེད། རྡོ་རྗེས་མགྲོན་ཁང་གི་ཡོང་འབབ་ལ་བརྟེན་ནས་བུ་ཕྲུག་3གསོ་ཐུབ་པ་མ་ཟད་ད་དུང་ནང་མི་ཚང་མ་འབྱོར་འབྲིང་ལམ་དུའང་ཡང་བསྐྱོད་ཐུབ་ཡོད་པ་རེད།

ད་ཆ། འགྲིམ་འགྲུལ་ཆ་རྐྱེན་ལེགས་སུ་ཕྱིན་པ་དང་དགུན་ཁར་ཇོ་མོ་གླང་མར་ཡུལ་སྐོར་བྱེད་པའི་ཚ་རླབས་འཕྱུར་བ་དང་བསྟུན་ནས། པ་གསུམ་གྲོང་ཚོའི་མགྲོན་ཁང་གི་ཚོང་སྔར་བས་ཡག་པོ་ཡོད་པ་རེད། “རྒྱལ་ཁབ་ཀྱི་སྲིད་ཇུས་བཟང་པོ་ལས་གྲོང་ཚོ་ཧྲིལ་པོ་དབུལ་སྒྲོལ་ཐུབ་སྲིད”ཅེས་རྡོ་རྗེས་དགའ་སྤྲོའི་ངང་བཤད།

པ་གསུམ་གྲོང་ཚོ་ནས་ད་དུང་སྤྱི་ལེ་40ལྷག་བསྐྱོད་ན་ས་བབ་མཐོ་ཚད་སྨི་5200ཟིན་པའི་ཇོ་མོ་གླང་མའི་སྒར་ས་ཆེན་པོར་སླེབས། དེ་གར་དབྱར་གཞུང་ཡིན་ཡང་གྲང་རླུང་འུར་འུར་ལྡང་གི་ཡོད།

ཡིན་ནའང་། སྦྲ་གུར་ཨང་42པའི་ནང་དྲོ་སོབ་སོབ་ཞིག་ཡོད། སྦྲ་གུར་ཆེན་པོ་མེད་ཀྱང་མེ་ཐབ་དང་མདུན་ཅོག་སོགས་གྲལ་འགྲིག་ཅིང་གཙང་སྦྲ་དོད་པ་ཞིག་ཡོད།

“ངའི་སྦྲ་གུར་ནང་ཉལ་ཁྲི་10ཡོད་ལ་ཉལ་ཁྲི་རེར་ཉིན་རེར་སྒོར་80རེད། ད་དུང་ཁ་ལག་ཀྱང་སྟེར་གྱི་ཡོད”སྦྲ་གུར་མགྲོན་ཁང་གི་བདག་པོ་ཚེ་དབང་རིག་འཛིན་གྱིས་དེ་ལྟར་བཤད། ཁོང་ནི་རྡོ་རྗེའི་གྲོགས་པོ་རེད།

ཚེ་དབང་རིག་འཛིན་ནི་བཀྲ་ཤིས་འཛོམས་ཤང་ལྷ་བདུན་གྲོང་ཚོ་ནས་རེད། གྲོང་ཚོ་དེ་ནི་ཇོ་མོ་གླང་མ་དང་ཐག་ཉེ་པོ་ཡོད། ཉེ་བའི་ལོ་ཤས་རིང་། ཇོ་མོ་གླང་མར་ཡུལ་སྐོར་མྱུལ་དཔྱད་དུ་ཡོང་མཁན་ཇེ་མང་དུ་ཕྱིན་པ་དང་བསྟུན་ནས། ལྷ་བདུན་གྲོང་ཚོའི་གྲོང་མི་ཚོས་རང་གི་ཁྱིམ་དུ་མགྲོན་ཁང་བཟོས་པ་མ་ཟད། ད་དུང་ཇོ་མོ་གླང་མའི་འདབས་སུ་སྦྲ་གུར་ཕུབ་ནས་ཡུལ་སྐོར་བར་ཞག་སྡོད་བྱེད་ས་དང་ཁ་ལག་མཁོ་འདོན་བྱེད་ཀྱི་ཡོད། མིག་སྔའི་བར། ཇོ་མོ་གླང་མའི་འདབས་སུ་སྦྲ་གུར་མགྲོན་ཁང་59ཡོད་པ་རེད།

“2008ལོར་ང་ཚོས་འདི་གར་སྦྲ་གུར་མགྲོན་ཁང་ཐེངས་དང་པོ་གཉེར་བ་ཡིན། སྐབས་དེར་ལམ་བདེ་པོ་མེད་སྟབས་ཡུལ་སྐོར་བ་ཡང་མང་པོ་མེད། དེར་བརྟེན་ལོ་རེར་ཡོང་འབབ་སྒོར་ཁྲི་གཅིག་གཉིས་ལས་མི་འདུག ད་ཆ་ལོ་རེར་ཡོང་འབབ་སྒོར་ཁྲི་ཉི་ཤུ་སུམ་ཅུ་འདུག”ཅེས་ཚེ་དབང་རིག་འཛིན་གྱི་བཟའ་ཟླ་ཚེ་རིང་ལྷ་མོས་ཉལ་ཆས་འདིང་ཞོར་དེ་ལྟར་ངོ་སྤྲོད་བྱས།

ཇོ་མོ་གླང་མའི་འདབས་སུ་ས་བབ་མཐོ་ཞིང་གྲང་ངར་ཆེ་བ་ཞིག་ཡོད་ནའང་། དེ་གའི་མི་རྣམས་ཀྱིས་རང་ཉིད་ཀྱི་ལག་ཟུང་ལ་བརྟེན་ནས་བདེ་སྐྱིད་ཀྱི་འཚོ་བ་གཏོད་བཞིན་ཡོད།