ཆབ་མདོ་ནི་བོད་རང་སྐྱོང་ལྗོངས་ཀྱི་ཤར་རྒྱུད་དུ་ཆགས་ཡོད།　2016ལོ་ཚུན་དུ།　རིམ་རྩིས་བརྒྱབ་ན་དུད་ཚང་དབུལ་པོ་ཁྲི་3.84ཡི་མི་ཁྲི་19.46ཉུང་དུ་ཕྱིན་པ་དང་།　གྲོང་ཚོ་དབུལ་པོ་1127དབུལ་སྒྲོལ་ཐུབ་ཡོད།　2016ལོ་ཚུན་དུ།　ཆབ་མདོ་གྲོང་ཁྱེར་གྱིས་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་བྱ་ཡུལ་268གསར་པ་བསྐྲུན་ནས་སྡོད་ཁང་གི་གནད་དོན་གཅིག་སྡུད་ཐག་གཅོད་བྱས་པ་དང་ཆབས་ཅིག　སློབ་གྲྭ་དང་།　འཕྲོད་བསྟེན་ཁང་།　དེ་བཞིན་ཆུ་དང་།　གློག　ལམ།　དྲ་རྒྱ་སོགས་ལེ་ལག་ཚང་བའི་རྨང་གཞིའི་སྒྲིག་བཀོད་ཀྱང་ཡག་པོ་བསྐྲུན་པ་དང་།　ཆབ་མདོ་གྲོང་ཁྱེར་གྱི་ཡིག་ཚགས་དང་གཱ་བཟོས་པའི་མང་ཚོགས་དབུལ་པོ་ཁྲི་9.9གཅིག་རྗེས་གཉིས་མཐུད་དུ་རི་ཁུལ་ནས་ཐོན་ནས་སྡོད་ཁང་གསར་པར་སྤོས་ཏེ་འཚོ་བ་གསར་པ་སྐྱེལ་བཞིན་ཡོད།

　གཡོན་གྱི་པར་འདི་ནི་ཆབ་མདོ་གྲོང་ཁྱེར་སྨར་ཁམས་རྫོང་བྱིས་གྲོངས་ཤང་མཁར་པོ་གྲོང་ཚོའི་གྲོང་མི་ཚེ་རིང་དབང་འདུས（གཡས）དང་ཁོང་གི་ཨ་མ་མཚོ་མོ་བཀོད་སྒྲིག་བྱ་ཡུལ་ཐོག་ཁང་གི་མདུན་དུ་ཡོད་པ།　གཡས་ཀྱི་པར་འདི་ནི་སྨར་ཁམས་རྫོང་གི་བདེ་སྐྱིད་ཁང་གསར་ཡུལ་གཞན་དུ་གནས་སྤོས་དབུལ་སྐྱོར་བྱ་ཡུལ་གྱི་ཟུར་ཞིག་ཡིན་པ།　2018ལོར།　ཚེ་རིང་དབང་འདུས་ཀྱི་ཁྱིམ་མཁར་པོ་གྲོང་ཚོའི་སྡོད་ཁང་རྙིང་པ་ནས་བདེ་སྐྱིད་ཁང་གསར་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་བྱ་ཡུལ་གྱི་སྨི་ངོས་གྲུ་100ཡོད་པའི་སྡོད་ཁང་གསར་པར་སྤོས་པ་དང་།　བཀོད་སྒྲིག་བྱ་ཡུལ་དེ་སྨར་ཁམས་རྫོང་གྲོང་དང་ཐག་ཧ་ཅང་ཉེ་སྟབས།　ཚེ་རིང་དབང་འདུས་ལ་རྫོང་གྲོང་དུ་བདེ་སྲུང་བ་ཞིག་གི་ལས་ཀ་རག་ནས་ཟླ་རེར་གླ་ཕོགས་སྒོར་2100ཡོད།

གཡོན་གྱི་པར་འདི་ནི་ཆབ་མདོ་གྲོང་ཁྱེར་སྟེང་ཆེན་རྫོང་ཁྲི་རྡོ་གྲོང་རྡལ་བ་ལྡན་གྲོང་ཚོའི་གྲོང་མི་བྱམས་སྒྲོལ་གྱིས་ཁྲི་རྡོ་གྲོང་རྡལ་ཞིང་ཟོག་ཁྲོམ་རར་ཐོན་ཟོག་འཚོང་བཞིན་པ།　གཡས་ཀྱི་པར་འདི་ནི་ཁྲི་རྡོ་གྲོང་རྡལ་གྱི་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་བྱ་ཡུལ་གྱི་ཟུར་ཞིག་ཡིན་པ།　2018ལོར།　བྱམས་སྒྲོལ་དང་ཁོ་མོའི་ནང་མི་རྣམས་བ་ལྡན་གྲོང་ཚོ་ནས་སྨི་ངོས་གྲུ་150ཡོད་པའི་བོད་བཟོའི་ཐོག་བརྩེགས་ཉིས་ཅན་གྱི་ཐོག་ཁང་ཞིག་ཏུ་སྤོས་པ་དང་།　2018ལོའི་ལོ་མཇུག་ཏུ།　ཁྲི་རྡོ་གྲོང་རྡལ་གྱི་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་བྱ་ཡུལ་གྱི་ལེ་ལག་ཚང་བའི་ཐོན་ལས་ཤིག་ཡིན་པའི་ཆ་ནས།　སྒོར་ཁྲི་500བཏང་བའི་ཁྲི་རྡོ་གྲོང་རྡལ་ཞིང་འབྲོག་ཐོན་རྫས་ཟོག་འགྲེམས་ལྟེ་གནས་བསྐྲུན་པ་དང་།　ལྟེ་གནས་དེར་ཞིང་ཟོག་ཁྲོམ་ར་དང་སྒོ་རྩིས་ཚོང་ཁང་ཞིག་ཡོད།　བྱམས་སྒྲོལ་གྱིས་ཞིང་ཟོག་ཁྲོམ་ར་དེའི་ནང་སྨི་ངོས་གྲུ་10ལྷག་ཙམ་ཡོད་པའི་ཚོང་ཁང་ཞིག་བོགས་མར་བླངས་ཏེ་ཚོང་བརྒྱབ་པར་ཟླ་རེར་སྒོར་1000ལྷག་ཙམ་རག་གི་ཡོད་པའི་ཁར་སྲིད་ཇུས་རང་བཞིན་གྱི་ཁ་གསབ་ཀྱང་ཡོད་པས་བྱམས་སྒྲོལ་ཁྱིམ་གྱི་འཚོ་བ་ཇེ་ལེགས་ནས་ཇེ་ལེགས་ཡིན་པ་རེད།

　གཡོན་གྱི་པར་འདི་ནི་ཆབ་མདོ་གྲོང་ཁྱེར་རི་བོ་ཆེ་རྫོང་བསྡུས་བ་གྲོང་ཚོའི་གྲོང་མི་དགའ་རྡོ་དང་ཁོང་གི་བཟའ་ཟླ་སྒྲོལ་དཀར་བཀོད་སྒྲིག་བྱ་ཡུལ་གྱི་སྡོད་ཁང་གསར་པར་ཡོད་པ།　གཡས་ཀྱི་པར་འདི་ནི་རི་བོ་ཆེ་རྫོང་ས་མདོ་དབུལ་སྐྱོར་གསར་སྤེལ་ཁུལ་གྱི་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་བྱ་ཡུལ་གྱི་ཟུར་ཞིག་ཡིན་པ།　2018ལོར།　དགའ་རྡོའི་ཁྱིམ་ས་མདོ་དབུལ་སྐྱོར་གསར་སྤེལ་ཁུལ་གྱི་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་བྱ་ཡུལ་གྱི་སྨི་ངོས་གྲུ་120ཡོད་པའི་སྡོད་ཁང་གསར་པར་སྤོས་པ་དང་།　དགའ་རྡོའི་ཁྱིམ་དང་འདྲ་བར་རི་བོ་ཆེ་རྫོང་གི་ཁྲ་མོ་གླིང་ཤང་དང་།　གཡས་རུ་ཤང་།　རི་བོ་ཆེ་གྲོང་རྡལ་སོགས་ནས་སྤོས་པའི་མང་ཚོགས་3000ལྷག་ཙམ་གྱིས་དེ་གར་བདེ་སྡོད་ལས་བརྩོན་གྱི་བདེ་སྐྱིད་ལྡན་པའི་འཚོ་བ་སྐྱེལ་གྱི་ཡོད་པ་རེད།

　གཡོན་གྱི་པར་འདི་ནི་ཆབ་མདོ་གྲོང་ཁྱེར་གོ་འཇོ་རྫོང་རྩེ་པ་ཤང་འོད་ཐང་གྲོང་ཚོའི་གྲོང་མི་རིག་དགའ（གཡས）དང་ཁོང་གི་བཟའ་ཟླ་ཡེ་ཤེས（དཀྱིལ）　བུ་གུར་མགོན་ཏེ་ནང་མི་གསུམ་བཀོད་སྒྲིག་བྱ་ཡུལ་གྱི་ཐོག་ཁང་གི་མདུན་དུ་ཡོད་པ།　གཡས་ཀྱི་པར་འདི་ནི་རྫོང་གྲོང་དུ་ཡོད་པའི་གོ་འཇོ་རྫོང་གི་ཡུལ་གཞན་དུ་གནས་སྤོས་གནད་སྨིན་དབུལ་སྐྱོར་བཀོད་སྒྲིག་བྱ་ཡུལ་དང་པོའི་ཟུར་ཞིག་ཡིན་པ།　2018ལོར།　རིག་དགའི་ཁྱིམ་རྫོང་གྲོང་དུ་ཡོད་པའི་གོ་འཇོ་རྫོང་གི་ཡུལ་གཞན་དུ་གནས་སྤོས་གནད་སྨིན་དབུལ་སྐྱོར་བཀོད་སྒྲིག་བྱ་ཡུལ་དང་པོའི་སྨི་ངོས་གྲུ་82.5ཡོད་པའི་སྡོད་ཁང་གསར་པར་སྤོས་པ་དང་།　བཀོད་སྒྲིག་བྱ་ཡུལ་དེར་རིག་དགའི་ཁྱིམ་དང་འདྲ་བར་གོ་འཇོ་རྫོང་གི་འབོ་ལོ་གྲོང་རྡལ་དང་།　སྐྱ་འབེལ་ཤང་།　ལྷ་ཐོ་ཤང་སོགས་ནས་སྤོས་པའི་མང་ཚོགས་2000ལྷག་ཙམ་གྱིས་དེ་བས་བདེ་སྐྱིད་ལྡན་པའི་འཚོ་བ་སྐྱེལ་བཞིན་ཡོད་པ་རེད།

　གཡོན་གྱི་པར་འདི་ནི་ཆབ་མདོ་གྲོང་ཁྱེར་འཇོ་མདའ་རྫོང་སྐམ་ཐོག་གྲོང་རྡལ་གྱི་གྲོང་མི་བསོད་ནམས་རབ་རྒྱས་སྐམ་ཐོག་ཁྱད་ལྡན་གྲོང་རྡལ་ཆུང་ངུར་ཡོད་པ།　གཡས་ཀྱི་པར་འདི་ནི་འཇོ་མདའ་རྫོང་སྐམ་ཐོག་ཁྱད་ལྡན་གྲོང་རྡལ་ཆུང་ངུའི་ཟུར་ཞིག་ཡིན་པ།　2018ལོར།　བསོད་ནམས་རབ་རྒྱས་དང་ཁོང་གི་ནང་མི་རྣམས་སྐམ་ཐོག་ཁྱད་ལྡན་གྲོང་རྡལ་ཆུང་ངུའི་སྨི་ངོས་གྲུ་150ཡོད་པའི་སྡོད་ཁང་གསར་པར་སྤོས་པ་དང་།　2019ལོར།　སྐམ་ཐོག་ཁྱད་ལྡན་གྲོང་རྡལ་ཆུང་ངུར།　བསོད་ནམས་རབ་རྒྱས་ཀྱིས་ཚོང་ཁང་ཆུང་ཆུང་ཞིག་གཉེར་བར་ཡོང་འབབ་བརྟན་པོ་རག་ནས་འཚོ་བ་ཇེ་ལེགས་སུ་ཕྱིན་ཡོད།　དེའི་གོང་དུ།　བསོད་ནམས་རབ་རྒྱས་ཀྱིས་རྫོང་གྲོང་དུ་ལས་ཀ་ཙག་ཙིག་བྱས་ནས་འཚོ་བ་སྐྱེལ་གྱི་ཡོད་པ་རེད།

　གཡོན་གྱི་པར་འདི་ནི་ཆབ་མདོ་གྲོང་ཁྱེར་རི་བོ་ཆེ་རྫོང་རི་བོ་ཆེ་གྲོང་རྡལ་གནམ་བཀྲ་གྲོང་ཚོའི་གྲོང་མི་དཔལ་ཆོས་བཀོད་སྒྲིག་བྱ་ཡུལ་གྱི་ཐོག་ཁང་མདུན་དུ་ཡོད་པ།　གཡས་ཀྱི་པར་འདི་ནི་རི་བོ་ཆེ་རྫོང་གི་ས་མདོ་དབུལ་སྐྱོར་གསར་སྤེལ་ཁུལ་གྱི་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་བྱ་ཡུལ་གྱི་ཟུར་ཞིག་ཡིན་པ།　2018ལོའི་ཟླ་བཅུ་གཉིས་པར།　དཔལ་ཆོས་དང་ཁོ་མོའི་ནང་མི་རྣམས་བཀོད་སྒྲིག་བྱ་ཡུལ་གྱི་སྨི་ངོས་གྲུ་100ཡོད་པའི་སྡོད་ཁང་གསར་པར་སྤོས་པ་དང་།　2019ལོར།　བཀོད་སྒྲིག་བྱ་ཡུལ་གྱི་ལས་དོན་མི་སྣའི་ངོ་སྤྲོད་བརྒྱུད།　དཔལ་ཆོས་ཡུལ་དེ་གའི་ཀུང་སི་ཞིག་ཏུ་གླ་པ་བྱེད་པར་ཟླ་རེར་གླ་ཆ་སྒོར་3000ཡོད་པ་རེད།