ས་ལེན་པ་དང་། བཅག་བཅག་བྱེད་པ། ཁོད་སྙོམས་པ་ལ་སོགས་ལྗིད་ཚད་ཆེ་བའི་འཕྲུལ་ཆས་དེ་ཁ་ལོ་བའི་བྱང་ཆུབ་པའི་བཀོལ་སྤྱོད་འོག་བདེ་རྩལ་འཁྱུག་པའི་ཚོར་སྣང་ཞིག་སྦྱིན། ཉི་འོད་འོག་བྲག་ཡིབ་ཆུས་སྦེ་པ་གྲོང་རྡལ་ཆང་དཀར་གྲོང་ཚོའི་བུད་མེད་འཇོན་ཐང་ཅན་ཟླ་པད་ཀྱིས་རང་ཉིད་ཀྱི་འདོན་འཇུག་འཕྲུལ་འཁོར་ཆུང་གྲས་བཏང་ནས་རང་ཁྱིམ་གྱི་སྒོ་ར་ཁོད་སྙོམས་པའི་ལས་ལ་བྲེལ་བཞིན་མཆིས།

ལོ་51གོང་ཟླ་པད་ཆང་དཀར་གྲོང་ཚོའི་ཁྱིམ་ཚང་དབུལ་པོ་ཞིག་དུ་སྐྱེས་པ་དང་ལྷན་སྐྱེས་ཀྱི་རྣ་བའི་དབང་པོའི་ཚོར་བ་ཉམས་ནས་སློབ་ཆུང་མ་ཐོན་པར་སློབ་མཚམས་བཞག་སྟེ་ཁྱིམ་དུ་ཞིང་ལས་བྱས། ཁོང་ལོ་21སྐབས་གཉེན་སྒྲིག་བྱས་པ་དང་བུ་སྐྱེས་ནས་ཡུན་རིང་མ་སོང་བར་བཟའ་ཟླས་ཁོང་མ་བུ་གཉིས་དབྱུགས་ཏེ་ཡུལ་གཞན་དུ་ཕྱིན་པ་ནས་བཟུང་གོ་རྒྱུ་ཐོས་རྒྱུ་བྱུང་མེད། འཚོ་བའི་ཁུར་པོ་ལྕི་པོ་དེ་གློ་བུར་དུ་ཟླ་པད་ཀྱི་ཕྲག་སྟེང་དུ་བབས་པས་འཚོ་བ་ལ་དཀའ་ངལ་ཆེན་པོ་འཕྲད།

“ང་སློབ་གྲྭར་དེ་ཙམ་འགྲོ་མྱོང་མེད་སྟབས་ད་ཆ་ཡིག་ངོ་ཤེས་ཁག་པོ་འདུག འོན་ཀྱང་ངས་སློབ་གྲྭར་ཕྱིན་ནས་ཤེས་ཡོན་སྦྱངས་ཚེ་གཞི་ནས་ཕྲུ་གུའི་མི་ཚེར་འགྱུར་ལྡོག་འགྲོ་བའི་གོ་སྐབས་རྙེད་སྲིད་པ་ཤེས་ཀྱི་ཡོད”མ་གཞི་ཟླ་པད་ལ་དེའི་རིང་དཀའ་ངལ་ཧ་ཅང་ཆེན་པོ་འཕྲད་མོད། འོན་ཀྱང་ཕྲུ་གུར་སློབ་གསོ་ཐོབ་པ་བྱ་རྒྱུ་གལ་འགངས་ཆེན་པོ་ཡིན་པ་ཁོང་གིས་ཤེས་ཀྱི་ཡོད། ཕྲུ་གུར་སློབ་གསོ་ཡག་པོ་ཞིག་ཐོབ་པ་བྱ་ཆེད་2008ལོར་སྲིད་གཞུང་གི་རོགས་རམ་དང་རང་ཉིད་ཀྱི་འབད་བརྩོན་འོག་ཟླ་པད་ཀྱིས་ཕྲུ་གུ་ཉིང་ཁྲི་གྲོང་ཁྱེར་སློབ་ཆུང་དང་པོར་བཏང་བ་དང་འབྲེལ་ཉེ་འགྲམ་དུ་ཁང་པ་ཞིག་གཡར་ནས་གླ་པ་རྒྱུག་གིན་ཕྲུ་གུར་ལྟ་རྟོག་བྱས། མཚན་མོ་ཕྱི་པོ་ཇི་ཙམ་འགོར་བ་དང་ངལ་དུབ་ཇི་ཙམ་ཆེ་རུང་ཁོང་གིས་ལོ་བདུན་བརྒྱད་ཙམ་ངལ་བ་ཁྱད་བསད་བྱས།

2016ལོར་སྦེ་པ་གྲོང་རྡལ་སྲིད་གཞུང་གིས་ཟླ་པད་ཁྱིམ་གྱི་དངོས་ཡོད་གནས་ཚུལ་ལ་དམིགས་ནས་ཁོང་ཡིག་ཚགས་དང་གཱ་བཟོས་པའི་དུད་ཚང་དབུལ་པོའི་གྲས་སུ་བཅུག དུས་དེ་ནས་བཟུང་ཕྲུ་གུ་སློབ་གྲྭར་འགྲོ་བར་འགན་ལེན་ཡོད་པའི་ཁར་ཁོང་ཡང་གྲོང་ཚོའི་དབུལ་སྐྱོར་ལས་གནས་ཐོག་བསྐྱོད་དེ་ལས་གནས་ཀྱི་ཡོང་འབབ་སྟེང་ད་དུང་ནགས་རྩྭའི་ཁ་གསབ་དང་རིམས་ཁག་རོགས་སྐྱོར་འཚམས་འདྲིའི་དངུལ་སྣ་ཚོགས་ལེན་རྒྱུ་ཡོད་པས་དཔལ་འབྱོར་ཁུར་པོ་ཡང་དུ་ཆེས་ཆེར་ཕྱིན་ཡོད།

2017ལོར་ཕྲུ་གུ་བདེ་བླག་ངང་སློབ་ཆེན་དུ་རྒྱུགས་འཕྲོད་དེ་གྲོང་ཚོའི་ནང་གི་མང་པོ་དེ་ཙམ་མེད་པའི་སློབ་ཆེན་སློབ་མའི་གྲས་སུ་གྱུར་བ་མ་ཟད་ཟླ་པད་ཀྱི་འཚོ་བར་ཡང་དེ་བས་ཕུགས་རེ་བྱུང་ཡོད།

“མ་གཞི་ཏང་དང་སྲིད་གཞུང་གི་ཐུགས་ཁུར་དང་རྒྱབ་སྐྱོར་ཡོད་མོད། འོན་ཀྱང་ཐོག་མཐའ་བར་གསུམ་དུ་གཞན་ལ་བརྟེན་རྐྱང་བྱེད་མི་རུང་བར་འཚོ་བ་ཡག་པོ་སྐྱེལ་དགོས་ཚེ་རང་ཉིད་ཀྱི་དཀའ་སྤྱད་འབད་བརྩོན་གྱི་ལག་གཉིས་ལ་བརྟེན་དགོས”ཞེས་ཟླ་པད་ཀྱིས་བཤད།

ཕྲུ་གུ་སློབ་གྲྭ་ཆེ་མོར་བསྐྱོད་རྗེས་བརྩོན་པ་ཆེ་བའི་ཟླ་པད་ལ་ལས་ཀ་བྱེད་པའི་ཁོམ་པ་དེ་བས་མང་བ་བྱུང་ཡོད། ལག་རྩལ་སྣ་གཅིག་ཁོང་དུ་ཆུད་པར་བྱ་ཆེད་ཁོང་གིས་ལས་ཡུལ་དུ་ལས་ཀ་བྱེད་པའི་བར་གསེང་སྤྱད་དེ་ཁེངས་སྐྱུང་ངང་འདོན་འཇུག་འཕྲུལ་འཁོར་གྱི་ཁ་ལོ་བའི་གམ་ནས་ཁ་ལོ་བའི་ལག་རྩལ་སྦྱངས་པ་དང་ལོ་གཅིག་འདས་རྗེས་སླར་ཡང་ལས་རིགས་རྩལ་ནུས་གསོ་སྦྱོང་ནང་ཞུགས་པ་བརྒྱུད་ཁ་ལོ་བའི་ལག་འཁྱེར་རག་པ་རེད།

ལག་རྩལ་ཡག་པོ་ཡོད་སྟབས་ཟླ་པད་ཀྱིས་ཕྱོགས་མང་པོའི་ཐད་ནས་མ་དངུལ་སྒོར་ཁྲི་10གྲབས་གསོག་བྱས་ཏེ་འདོན་འཇུག་འཕྲུལ་་འཁོར་གཅིག་ཉོས་ནས་རང་ཉིད་ཀྱི“ལས་གཏོད་ཕུགས་འདུན”སྒྲུབ་འགོ་ཚུགས། ལོ་གསུམ་རིང་འབད་བརྩོན་བྱས་པ་བརྒྱུད་ཟླ་པད་ཀྱིས་བུ་ལོན་ཚང་མ་འཇལ་ཟིན་པ་མ་ཟད་ད་དུང་སྒོར་ཁྲི་7ལྷག་ཙམ་རི་བའི་ཁྱིམ་སྤྱོད་རླངས་འཁོར་ཆུང་གྲས་ཤིག་ཀྱང་ཉོས་པ་རེད།

སྔོན་ཆད་ཕྱིར་དྲན་བྱེད་སྐབས་ཟླ་པད་ཀྱིས“ཏང་གི་སྲིད་ཇུས་ཡག་པོ་དེ་ལྟ་བུ་ཡོད་པས་རང་ཉིད་ཀྱིས་འབད་བརྩོན་བྱེད་ཕོད་ཚེ་འཚོ་བ་ཡག་པོ་སྐྱེལ་རྒྱུ་ཡོང་ངེས་རེད། བུ་སློབ་གྲྭ་ཐོན་ནས་ལས་ཀ་རག་རྗེས་སྲིད་གཞུང་ལ་བརྟེན་རྐྱང་བྱེད་མི་དགོས་པ་མ་ཟད་ད་དུང་རང་ཉིད་ཀྱི་འཇོན་ཐང་ལ་བརྟེན་ནས་མི་དེ་བས་མང་བར་རོགས་རམ་བྱེད་ཐུབ”ཅེས་ཟླ་པད་ཀྱིས་གད་མོ་དགོད་བཞིན“ད་དུང་དེ་བས་བདེ་སྐྱིད་ལྡན་པའི་འཚོ་བ་སྐྱེལ་རྒྱུ་ཡོད”ཅེས་བཤད།