ལྷོ་ཁ་གྲོང་ཁྱེར་མཚོ་སྨད་རྫོང་གྲི་གུ་གྲོང་རྡལ་བྲག་རྩྭ་གྲོང་ཚོར་སྐྱོད་སྐབས་གཞུང་ལམ་ཡངས་ཤིང་རྒྱ་ཆེ་བ་དང་། གཡས་གཡོན་དུ་་གསར་དུ་བརྒྱབ་པའི་བོད་བཟོའི་ཁང་པ་དང་། སྔོ་ཐིང་ཐིང་གི་སྤང་ཐང་བཅས་མིག་ལམ་དུ་འཆར་འོང་།

ཀུན་བཟང་སྒྲོལ་དཀར་ཁྱིམ་མི་དེ་སྔོན་བྲག་རྩྭ་གྲོང་ཚོའི་བྱང་རྒྱུད་ཀྱི་རི་སྟེང་དུ་གནས་པ་དང་། འདི་ལོའི་ཟླ་5ཚེས་31ཉིན་ཁོང་གི་ནང་མི་ཚང་མ་བྲག་རྩྭ་གྲོང་ཚོའི་ཡུལ་གཞན་དུ་གནས་སྤོས་དབུལ་སྐྱོར་གྱི་བཀོད་སྒྲིག་བྱ་ཡུལ་དུ་སྤོས་ཏེ་ཐོག་སོ་གཉིས་ལྡན་གྱི་ཁང་པ་གསར་པར་སྡོད་རྒྱུ་བྱུང་བ་རེད། བཀོད་སྒྲིག་བྱ་ཡུལ་དུ་ཁང་པ་169ཡོད་པའི་ཁྲོད་དུད་ཚང་79ནི་ཀུན་བཟང་སྒྲོལ་དཀར་དང་འདྲ་བའི་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་རེད།

ཀུན་བཟང་སྒྲོལ་དཀར་གྱི་ཁང་པ་གསར་པའི་ནང་མཛེས་བཟོ་བྱས་མ་ཐག་པའི་ཚོམས་ཆེན་དང་ཐབ་ཚང་གཙང་སྦྲ་དོད་ཅིང་གྲལ་འགྲིག་པ། གོས་འཁྲུད་འཕྲུལ་ཆས་དང་། འཁྱགས་སྒམ། བརྙན་འཕྲིན་འཕྲུལ་ཆས་སོགས་ཁྱིམ་ཆས་ཆ་ཚང་པོ་འདུག“དེ་སྔོན་གྱི་ཁང་པའི་ནང་ལོ་20ལྷག་ཙམ་བསྡད་པ་དང་། ཆར་པ་འབབ་རིམ་བཞིན་ཆར་ཐིགས་རྒྱག་པ་དང་། ཚལ་ཉོ་བ་དང་། སྨན་ཁང་དུ་འགྲོ་བ། ཕྲུ་གུ་སློབ་གྲྭར་སྐྱེལ་སྐབས་སྟབས་བདེ་པོ་མེད”ཅེས་བརྗོད། དཀར་ཆ་དོད་པའི་ཚོམས་ཆེན་ནང་ཀུན་བཟང་སྒྲོལ་མས་གསར་འགོད་པར“གནས་སྤོས་རྗེས་འཚོ་བ་སྟབས་བདེ་རུ་ཕྱིན་སོང་། ཚོང་ཁང་དང་། གྲོང་ཚོ་ཨུ་ལྷན། སློབ་གྲྭ་ཚང་མ་ཉེ་འགྲམ་དུ་ཡོད་པས་རྐང་ཐང་དུ་སྐྱོད་ན་སྐར་མ་ཁ་ཤས་ལས་འགོར་གྱི་མེད”ཅེས་ད་ཆའི་འཚོ་བའི་སྐོར་བརྗོད།

བྲག་རྩྭ་གྲོང་ཚོའི་ཏང་སྤྱི་ཁྱབ་ཀྲི་པུའི་ཧྲུའུ་ཅི་བཀྲ་ཤིས་ཕུན་ཚོགས་ཀྱིས་ངོ་སྤྲོད་བྱས་པར་གཞིགས་ན། དེ་སྔའི་བྲག་རྩྭ་གྲོང་ཚོ་དེ་གཡང་གཟར་དུ་གནས་པ་དང་། ལམ་གུ་དོག་ལ་གུག་ཆ་མང་བ། སྡོད་ཁང་གི་བཀོད་པ་ཟང་ཟིང་ཡིན་པ། རང་བྱུང་ཁོར་ཡུག་ཞན་པ། ཐོན་སྐྱེད་དང་འཚོ་བ་རྗེས་སུ་ལུས་པ་བཅས་རེད། 2018ལོར་བྲག་རྩྭ་གྲོང་ཚོའི་གནས་སྤོས་བཀོད་སྒྲིག་བྱ་ཡུལ་གྱི་རྣམ་གྲངས་ལེགས་གྲུབ་ཟིན་ནས་དུད་ཚང་169ཡི་མི་788གནས་སྤོས་བྱས་པའི་ནང་ཡིག་ཚགས་དང་གཱ་བཟོས་པའི་དུད་ཚང་79ཡི་མི་290ཡོད་པ་རེད།

“ལོ་མང་འདི་གར་གནས་སྡོད་བྱས་པས་རི་རྩེའི་འཚོ་བར་གོམས་ཡོད། གློ་བུར་དུ་གནས་སྤོ་དགོས་པས་ང་ཚོ་བློ་བདེ་པོ་དེ་ཙམ་མ་བྱུང་། དེས་མ་ཟད། རང་ཉིད་ཀྱིས་སྒོར་ཁྲི་1བཏོན་ཚེ་སྨི་ངོས་གྲུ་170ཟིན་པའི་ཐོག་སོ་གཉིས་ལྡན་གྱི་ཐོག་ཁང་ནང་སྡོད་ཐུབ་ཀྱི་ཡོད་པ་ཤེས་རྗེས་ཡིད་ཆེས་གཏན་ནས་མ་བྱུང”ཞེས་གནས་མ་སྤོས་གོང་ཀུན་བཟང་སྒྲོལ་དཀར་ལ་སེམས་ཁྲལ་བྱུང་མོད། འོན་ཀྱང་ད་ཆ་ཁོང་གིས་དང་ཐོག་གནས་སྤོ་རྒྱུའི་སེམས་ཐག་བཅད་པ་དེ་ཡང་དག་པའི་གདམ་ག་ཞིག་རེད་བརྗོད་ཀྱི་འདུག

མིག་སྔར། བྲག་རྩྭ་གྲོང་ཚོའི་ཡུལ་གཞན་དུ་གནས་སྤོས་དབུལ་སྐྱོར་ས་ཚིགས་སུ་ཆུ་དང་། གློག ལམ། འཕྲིན་གཏོང་། དྲ་རྒྱ་སོགས་སྒྲིག་བཀོད་ཀྱི་ལེ་ལག་ཆ་ཚང་ཞིང་། དུད་ཚང་གི་འགྲོ་ལམ་དང་གཞུང་ལམ་ཕན་ཚུན་སྦྲེལ་ཡོད་པ་དང་འབྲེལ་བཙོག་ཆུ་གཙང་གསིང་ས་ཚིགས་1དང་རིག་གནས་སྤྲོ་གསེང་ཐང་ཆེན་1བརྒྱབ་ཡོད་པ་དང་། ལམ་སྒྲོན་195བསྒར་ཡོད་ལ་སྔོ་ཁེབས་སྨི་ངོས་གྲུ་ཁྲི་1ལྷག་ཙམ་བཏིང་ནས་2020ལོའི་ཟླ་6པར་མང་ཚོགས་ཚང་མ་ཁང་པ་གསར་པར་གནས་སྤོས་པ་རེད།

“དུད་ཚང་དབུལ་པོ་གནས་སྤོས་རྗེས་ང་ཚོས་སྔར་བཞིན་སྲོལ་རྒྱུན་གྱི་འབྲོག་ལས་འཕེལ་རྒྱས་གཙོ་བོར་བྱས་པ་མ་ཟད། ངལ་རྩོལ་ནུས་ཤུགས་ཡོད་པའི་བུད་མེད་ཀྱི་སྣེ་ཁྲིད་དེ་གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་ལ་ཞུགས་ཏེ་ཡོང་འབབ་གསོག་གི་ཡོད”

བཀྲ་ཤིས་ཕུན་ཚོགས་ཀྱིས་ངོ་སྤྲོད་བྱས་པར་གཞིགས་ན། མང་ཚོགས་ཀྱི་ཡོང་འབབ་མང་དུ་གཏོང་ཆེད་བྲག་རྩྭ་གྲོང་ཚོའི་ཏང་སྤྱི་ཁྱབ་ཀྲི་པུས་ཀྲི་པུའུ་ཨུ་ལྷན་དང་ཏང་ཡོན་ཚོགས་ཆེན་འཚོགས་ཏེ་བསམ་བློའི་སློབ་གསོའི་ལས་དོན་སྤེལ་ནས་མང་ཚོགས་ཕྱུག་འགྱུར་གྱི་ལམ་བུ་རྒྱ་ཆེར་བཏང་བ་དང་། དྲོད་ཁང་ཆེ་མོ་དང་། བལ་ལས་སྣོན། ལས་གྲྭ་འཛུགས་སྐྲུན། འཕྲུལ་འཁོར་བོགས་གཏོང་སོགས་རྣམ་གྲངས་གཉེར་ཏེ། གྲོང་ཚོ་རིམ་པའི་རྩ་འཛུགས་དེ་གཞན་བརྟེན་ནས་རང་བརྟེན་དུ་བསྒྱུར་བ་རེད། མིག་སྔར། བྲག་རྩྭ་གྲོང་ཚོའི་མི་400ལྷག་ཙམ་ལྷ་ས་དང་། གཞིས་རྩེ། ལྷོ་ཁ་སོགས་སུ་གླ་པ་རྒྱུག་ནས་མི་རེའི་ཉིན་རེའི་ཡོང་འབབ་སྒོར་300ཟིན་གྱི་ཡོད་པ་རེད།

བྲག་རྩྭ་གྲོང་ཚོའི་གྲོང་མདའི་ས་སྟོང་དུ་གསར་འགོད་པས་ཐང་ཁྲོམ་གཤོམ་བཞིན་པའི་མཚོ་མོ་མཐོང་བྱུང་། ཁོང་གི་ཐང་ཁྲོམ་མདུན་དུ་ཚོང་ཟོག་ཉོ་མཁན་མང་པོ་འདུག

“ཚོང་ཟོག་ཚང་མ་གྱོན་གོས་དང་། བཟའ་བཅའ། རྒྱུན་མཁོའི་དངོས་ཟོག་སོགས་ཡིན་པས་ཡུད་ཙམ་རིང་མང་པོ་བྲིན་གྱི་འདུག”ཅེས་མཚོ་མོས་གསར་འགོད་པར་བརྗོད་པ་དང་། ཁོང་ནི་བྲག་རྩྭ་གྲོང་ཚོ་དེ་རང་ནས་ཡིན་པ་དང་གཟའ་འཁོར་རེར་ཁོང་དང་ནང་མི་ལྷ་སར་དངོས་ཟོག་འཐེན་པར་འགྲོ་ཡི་ཡོད་ཅིང་། དངོས་ཟོག་འཐེན་ཐེངས་རེར་ཡོང་འབབ་སྒོར་དྲུག་བརྒྱ་ནས་བདུན་བརྒྱ་ཟིན་གྱི་འདུག་ཅེས་བརྗོད།

གྲོང་མི་ཚོར་གོམས་གཤིས་ཡག་པོ་འཇགས་ཆེད་བཀྲ་ཤིས་ཕུན་ཚོགས་ཀྱིས་བསམ་བློ་བཞི་གསུམ་བཅུ་གཉིས་བཏང་བ་དང་། བསམ་འཆར་དང་གྲོས་འགོ་རྒྱ་ཁྱབ་ངང་ཉན་རྗེས་བཀྲ་ཤིས་ཕུན་ཚོགས་ཀྱིས་སྔར་ཡོད་ཀྱི་གྲོང་སྲོལ་དམངས་ཆིངས་ཀྱི་རྨང་གཞིའི་ཐོག་གྲོང་ཚོ་དེ་གའི་གཉེན་སྒྲིག་རྩོད་གཞི་དང་། ར་བཟི་འཁྲུག་སློང་། གོམས་སྲོལ་ངན་པ་སོགས་ཀྱི་མངོན་གསལ་དོད་པའི་གནད་དོན་ལ་དམིགས་ནས་གྲོང་སྲོལ་དམངས་ཆིངས་གསར་པ་བཟོས་པ་རེད།

ད་ཆ། བྲག་རྩྭ་གྲོང་ཚོར་ཕྱོགས་ཡོངས་ནས་འབྱོར་འབྲིང་སྐྲུན་པར་རྒྱལ་ཁ་ཕུ་ཐག་གཅོད་པ་དང་དབུལ་སྒྲོལ་འགག་སྒྲོལ་ལ་མཐའ་མའི་རྒྱལ་ཁ་ལེན་པ་ནི་རྨི་ལམ་ཙམ་མ་ཡིན་པར་དབུལ་སྒྲོལ་ལམ་བུའི་ཐོག“མི་གཅིག་ཀྱང་མ་ལུས་པ་དང་དུད་ཚང་གཅིག་ཀྱང་མ་ལུས་པའི”དམ་བཅའ་དངོས་སུ་ལག་ལེན་བྱས་ཏེ་མཛེས་སྡུག་ལྡན་པའི་འཚོ་བའི་འཆར་གཞི་གསར་པ་ཞིག་གྲི་གུ་རྩྭ་ཐང་དུ་འདིང་བཞིན་ཡོད་པ་རེད།