ལྷ་ས་གྲོང་ཁྱེར་གྱི་སྣེ་འདྲེན་ཁེ་ལས་བོད་ལྗོངས་ཧྲེང་ཤིན་བཟོ་ཚོང་ཚད་ཡོད་ཀུང་སི་ནི་བོད་ཀྱི་ཁུ་ལུའི་རིག་གནས་གཉེར་སྐྱོང་ཁྱབ་གདལ་གཏོང་བ་དང་བོད་ནས་ཐོན་པའི་བལ་དང་། འབྲི་གཡག་དང་ལུག་གི་ཁུ་ལུ་ཉོ་སྒྲུབ་དང་། ཞིབ་སྤེལ། ལས་སྣོན་ཞིབ་ཚགས། ཕྱིར་ཚོང་བཅས་བྱེད་མཁན་གྱི་ཁྱད་ལྡན་ཐོན་ལས་ཀུང་སི་ཞིག་རེད། ཀུང་སི་དེས་ཞིང་འབྲོག་པའི་ཆེད་ལས་མཉམ་ལས་རྩ་འཛུགས་དང་དེ་བཞིན་ཕྱུག་འགྱུར་སྣེ་ཁྲིད་པ་དང“ཚད་བཀག་མི་བཟོ་བ་དང་ཉོ་སྒྲུབ་ཀྱི་མ་མཐའི་ཚད་གཞི་སྲུང་བའི”ཉོ་སྒྲུབ་ཀྱི་གྲོས་མཐུན་བཞག་ནས་ཞིང་འབྲོག་པའི་གཏན་འཇགས་ཡོང་འབབ་ནུས་ལྡན་འཕར་བར་བྱས་ཡོད། གཞན་ཡང་ཁུ་ལུ་ལས་སྣོན་རྣམ་གྲངས་བརྒྱུད་ཡུལ་གཞན་དུ་གནས་སྤོས་དབུལ་སྐྱོར་དུད་ཚང་300ལ་ལོ་ལྟར་མི་རེར་སྒོར་3000བགོ་བཤའ་རྒྱག་གི་ཡོད་པ་དང་ལོ་5བསྟུད་མར་བགོ་བཤའ་བརྒྱབ་ཡོད་པ་རེད། དེ་དང་དུས་མཚུངས་ཞིང་འབྲོག་པ་39ལས་ཀར་བཅུག་པ་དང་མི་རེར་ཟླ་རེར་ཆ་སྙོམས་གླ་ཆ་སྒོར་3900ཡོད་པ་རེད།

ཉེ་བའི་ལོ་ཤས་རིང་སྟག་རྩེ་ཆུས་ཀྱིས་ས་གནས་དེ་གའི་ཞིང་འབྲོག་པའི་ཐོན་ཁུངས་ཀྱི་ལེགས་ཆར་གཞི་ཚུགས་ནས་ཁྱད་ལྡན་ཐོན་ལས་ཀྱི་སྣེ་ཁྲིད་ནུས་པ་གང་ལེགས་བཏོན་པ་དང“ཞིང་ལས་དབུལ་སྐྱོར་ཐོན་ལས་གླིང+སྣེ་འདྲེན་ཁེ་ལས+ཞིང་དུད”བཅས་ཀྱི་ཐོན་ལས་དབུལ་སྐྱོར་རྣམ་པར་བརྟེན་ནས་ཁྱད་ལྡན་ཐོན་ལས་དབུལ་སྐྱོར་རྣམ་གྲངས་འཕེལ་རྒྱས་ཤུགས་ཆེན་བཏང་བས། ས་གནས་དེ་གའི་ཞིང་འབྲོག་ལས་ཀྱི་སྤུས་ཚད་དང་ཕན་འབྲས་ལེགས་སུ་འགྲོ་བར་སྐུལ་མ་ཐེབས་པ་མ་ཟད། ད་དུང་ས་གནས་དེ་གའི་ཞིང་འབྲོག་མང་ཚོགས་དེ་བས་མང་བ་ཐོན་ལས་བཟོ་པར་འགྱུར་བར་ཆ་རྐྱེན་བསྐྲུན་ཡོད་པ་རེད།

སྟག་རྩེ་ཆུས་ཀྱི་བཟོ་ལས་གླིང་དུ་ཁྱོན་དངོས་ཚན་ཁེ་ལས་62ཡོད་པ་དང་ཐོན་སྐྱེད་རྣམ་པའི་ཁེ་ལས་26ཡོད་པ་རེད། ཉེ་བའི་ལོ་ཤས་རིང་གླིང་ཁུལ་གྱི་ཁེ་ལས་ཀྱིས་ས་ཞིང་ནང་བཤུག་གཏོང་བ་དང་། མ་བཅོས་རྒྱུ་ཆ་ཉོ་སྒྲུབ། ལས་ཞུགས་སོགས་ཐབས་ལམ་སྣ་ཚོགས་ལ་བརྟེན་ནས་མང་ཚོགས་ཀྱི་འབབ་འཕར་ཕྱུག་འགྱུར་ལ་སྐུལ་ཁྲིད་བྱས་པས། མི་ཐེངས་5892ལ་དངུལ་སྒོར་ཁྲི་1349.55བགོས་ཡོད། སྟག་རྩེ་ཆུས་སུ་ད་ཆ་ཡིག་ཚགས་དང་གཱ་བཟོས་པའི་ངལ་ནུས་དབུལ་པོ་1751ཡོད་པ་དང་མི་1080ལས་ཞུགས་ཐུབ་པ་ལས་ཡུལ་གཞན་དུ་གནས་སྤོས་དབུལ་སྐྱོར་དུད་ཚང་གི་མི་792ཡོད་པ་རེད།

སྟག་རྩེ་ཆུས་ཐང་དཀར་ཤང་ལོ་ཕུ་གྲོང་ཚོར་ཡོད་པའི་བོད་ལྗོངས་ཐའེ་ཁྲེང་དཀར་ཆུའི་ལས་རིགས་ཀུང་སི་ནི་སྟག་རྩེ་ཆུས་ཀྱི་གནད་སྨིན་དབུལ་སྐྱོར་གྱི་གཙོ་གནད་རྣམ་གྲངས་དང་ཐོན་ལས་དབུལ་སྐྱོར་ཀྱི་སྣེ་འདྲེན་ཁེ་ལས་ཀྱི་ངོས་ནས་བསྡོམས་མ་དངུལ་སྒོར་དུང་ཕྱུར་1.2བཏང་བ་རེད། འདི་ལོ་ལོ་28ལ་སླེབས་པའི་ཐང་དཀར་ཤང་ལོ་ཕུ་གྲོང་ཚོའི་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་ལྷག་སྒྲོལ་མ་བཞོ་ཁང་དུ་བཞོན་མར་ལྟོ་སྟེར་བ་དང་འོ་མ་བཞོ་བ་སོགས་ཀྱི་ལས་ལ་བྲེལ་བཞིན་འདུག ལྷག་སྒྲོལ་མས་ཉིན་ལྟར་བཞོན་མ་40ལྷག་ཙམ་ལ་རང་འགུལ་ཅན་དང་རྒྱུན་མཐུད་ལས་རིམ་མང་དག་ཅིག་སྒྲུབ་དགོས་པས་ཁོང་གི་མིག་རྒྱང་རིང་དུ་སོང་ཡོད་པ་རེད།

“ངའི་ནང་ནས་བཟོ་གྲྭའི་བར་རྐང་ཐང་མར་སྐར་མ་ཁ་ཤས་ལ་སླེབས་ཀྱི་འདུག ཟླ་རེར་གླ་ཆ་སྒོར་3000ལྷག་ཙམ་ཡོད་པས་འཚོ་བར་རེ་བས་ཁེངས་སོང”ཞེས་ལྷག་སྒྲོལ་མས་མིག་སྔའི་ལས་ཀར་བློ་ཡིད་ཚིམ་པོ་བྱེད་ཀྱི་ཡོད་པ་རེད། ཀུང་སིས་བཙུགས་པའི་ཞིང་འབྲོག་པའི་ལག་རྩལ་གསོ་སྦྱོང་འཛིན་གྲྭ་ནས་ལྷག་སྒྲོལ་མས་བཞོན་མ་གསོ་ཚགས་ཀྱི་ཤེས་བྱ་མང་པོ་ཤེས་ཡོད། མིག་སྔར་ལྷག་སྒྲོལ་མ་ལྟར་གྱི་ཡིག་ཚགས་དང་གཱ་བཟོས་པའི་དུད་ཚང་དབུལ་པོའི་མི་17བོད་ལྗོངས་ཐའེ་ཁྲེང་དཀར་ཆུའི་ལས་རིགས་ཀུང་སིར་ལས་ཀ་བྱེད་བཞིན་ཡོད་པ་རེད།

དབུལ་ཞྭ་ཕུད་པ་ནི་མཇུག་འགྲིལ་བ་ཞིག་མ་ཡིན་པར་འཚོ་བ་གསར་པ་དང་འབད་འཐབ་གསར་པ་འགོ་ཚུགས་མ་ཐག་རེད། སྟག་རྩེ་ཆུས་ཀྱིས་མཐའ་མའི་རྒྱལ་ཁ་ལེན་པ་དང་འགག་སྒྲོལ་གྱི་རྣམ་པ་དང་ཐོན་ལས་སྐུལ་ཁྲིད་དམ་འཛིན་བྱ་གཞི་གལ་ཆེན་དུ་བྱས་ཏེ་དབུལ་སྒྲོལ་འགག་སྒྲོལ་གྱི་ཕྱོགས་ཡོངས་ཀྱི་རྒྱལ་ཁར་རམ་འདེམས་དང་གྲོང་གསེབ་དར་རྒྱས་ཀྱི་འཐབ་ཇུས་ཕྱོགས་ཡོངས་ནས་འདིང་བར་སྐུལ་འདེད་གཏོང་ངེས་རེད།