ལོ་4ཡི་གོང་གི་ས་དགའ་རྫོང་ནི་ཆ་སྙོམས་ས་བབ་མཐོ་ཚད་སྨི་4600ལྷག་ཙམ་ཟིན་པའི་འཚོ་གནས་ཁོར་ཡུག་ཞན་པ་དང་ཐོན་ལས་དཔལ་འབྱོར་འཕེལ་རྒྱས་འགྲོ་འགོར་བས། དབུལ་སྒྲོལ་འགག་སྒྲོལ་གྱི་ལས་དོན་སྤེལ་འགོ་ཚུགས་མ་ཐག“དབུལ་པོ་དབུལ་རྐྱང་ཚད་མཐོ་བ་དང་དབུལ་སྐྱོར་ལས་འགན་ལྕི་བ”དང“དབུལ་སྐྱོར་མ་གནས་མཐོ་བ་དང་དབུལ་སྒྲོལ་དཀའ་ཚེགས་ཆེ་བའི”དཀའ་གནད་འཕྲད་ཡོད་པ་རེད།

ཐོན་ལས་ལ་སྐུལ་འདེད་གཏོང་བ་དང་ལས་རིགས་བསྒྱུར་ནས་ཐོན་ལས་འཕེལ་རྒྱས་ལ་དམ་འཛིན་ཏན་ཏིག་བྱས་པ།

2020ལོའི་དཔྱིད་ཀར། ས་དགའ་རྫོང་གི་ས་ཞིང་མུའུ་ཁྲི་2.1གི་ཐོག་མི་ཐབས་ལ་བརྟེན་ནས་བཏབ་པའི་གཟན་རྩྭ་སྐྱེ་འཚར་ཤིན་ཏུ་ལེགས། ས་དགའ་རྫོང་གིས་མ་དངུལ་གྱི་དཀའ་གནད་སེལ་བ་དང་། བསམ་བློ་དང་འདུ་ཤེས་ཀྱི་བཀག་རྒྱ་ལས་གྲོལ་ནས“མི་ཐབས་ལ་བརྟེན་ནས་གཟན་རྩྭ་འདེབས་པ་དང་ཁེ་ལས་ཟུང་འབྲེལ”གྱི་འདེབས་འཛུགས་བྱ་ཐབས་འཚོལ་ཞིབ་ཧུར་ཐག་བྱས་པ་དང་འབྲེལ། མི་ཐབས་ལ་བརྟེན་ནས་གཟན་རྩྭ་འདེབས་པའི“རྩ་དོན་ཆེན་པོ་གསུམ”གཏན་འཁེལ་བྱས་པ་དང་། གྲམ་ཐང་དང་ཐང་རྒོད་སྤྱད་ནས་དེ་སྔའི་རྩྭ་རར་གཏོར་སྐྱོན་མི་ཐེབས་པ་བྱས་ཤིང་། ཆུ་ཡག་པོ་འདྲེན་པ་དང་གཟན་རྩྭ་འདེབས་པའི་མ་གནས་དམའ་རུ་བཏང་བས་མང་ཚོགས་བློ་ཡིད་ཚིམ་པོ་བྱུང་ནས་དེའི་ནང་ཧུར་ཐག་ཞུགས་པ་དང་རྒྱབ་སྐྱོར་མཐའ་གཅིག་ཏུ་བྱས་ཡོད་པ་རེད།

གཟན་རྩྭའི་གནད་དོན་ཐག་གཅོད་ཐུབ་པས་སྣོད་བཅུད་སྲུང་སྐྱོང་དང་ཧོར་པའི་ལུག་ཁྱད་ལྡན་གསོ་ཚགས་ལས་རིགས་འཕེལ་རྒྱས་དང་། མང་ཚོགས་ལ་འབབ་འཕར། གེགས་སེལ་གཟན་རྩྭ་དང་རྒྱུ་ཆ་བཅས་འགན་ལེན་གྱི་གཉིས་ཁེའི་རྣམ་པ་བཏོད་ཡོད་པ་རེད།

2019ལོར། ས་དགའ་རྫོང་གི་ཞིང་འབྲོག་མང་ཚོགས་ཀྱི་ཡོང་འབབ་མང་དུ་མངོན་གསལ་དོད་པོ་ཕྱིན་པ་དང་། “ཧོར་པའི་ལུག་གི་ཐོན་ལས་འཁོར་འབྲེལ”གྱི་དབུལ་སྐྱོར་ཐོན་ལས་ཀྱི་སྐུལ་ཁྲིད་ནུས་པ་རྒྱུན་ཆད་མེད་པར་མངོན་གསལ་དོད་དུ་ཕྱིན་ནས། ཐོན་ལས་ཀྱི་ཁེ་སྤོགས་སྒོར་ཁྲི་38ཟིན་ཏེ། མང་ཚོགས་དུད་ཚང་1038ལ་མུ་མཐུད་འབབ་འཕར་དང་ཡུན་རིང་ཕན་འབྲས་ཐོན་རྒྱུར་སྐུལ་ཁྲིད་ཐུབ་ཡོད་པ་རེད།

མཉམ་ཤུགས་གཅིག་སྒྲིལ་དང་ཕན་འབྲས་ཆེ་རུ་བཏང་ནས་ཆེད་ལས་མཉམ་ལས་ཁང་རྩ་འཛུགས་ལ་དམ་འཛིན་ཏན་ཏིག་བྱས་པ།

འདི་ལོ་ཚུན་དུ། ས་དགའ་རྫོང་འཕྲང་སྒོ་ཤང་དུ་མཉམ་ལས་ཁང་འཕེལ་རྒྱས་དང་རྒྱ་སྟོབས་ཆེ་རུ་གཏོང་བའི་ཚ་རླབས་ཤིག་འཕྱུར་ཡོད་པ་རེད།

ཉེ་ལམ་ལོ་ཤས་རིང་། ས་དགའ་རྫོང་གིས་ཞིང་འབྲོག་མང་ཚོགས་རྩ་འཛུགས་ཅན་གྱི་ཚད་གཞི་དམའ་བ་དང་། གྲོང་ཚོ་རིམ་པའི་མཉམ་སྡེབ་དཔལ་འབྱོར་ཞན་པ་སོགས་ཀྱི་གནད་དོན་ལ་དམ་པོར་དམིགས་ནས། ཏང་འཛུགས་སྐྱོང་ལ་བརྟེན་ནས་གྲོང་ཚོ་རིམ་པའི་མཉམ་ལས་ཁང་ཁྱོན་ཡོངས་ལ་ཁྱབ་པ་བྱས་པ་དང་འབྲེལ། གྲོང་ཚོ་རིམ་པའི་མཉམ་ལས་ཁང་ཚད་གཞི་ཅན་དང་ཚད་ལྡན་ཅན་གྱི་འཛུགས་སྐྱོང་ལ་སྐུལ་འདེད་ཧུར་ཐག་བཏང་ཞིང་། 2019ལོའི་ལོ་མཇུག་བར། ས་དགའ་རྫོང་གི་ཞིང་འབྲོག་པའི་ཆེད་ལས་མཉམ་ལས་རྩ་འཛུགས་131བར་འཕེལ་རྒྱས་ཕྱིན་ནས། ཐོ་འགོད་མ་དངུལ་སྒོར་ཁྲི་4313དང་། མ་རྐང་ནང་ཞུགས་མཁན་མང་ཚོགས་མི་ཐེངས་22910ཟིན་པ་དང་། གྲོང་ཚོ་ཨུ་ལྷན་གཉིས་ཀྱི་ཚན་ཁག་དང་། ཞིང་འབྲོག་པ་ཏང་ཡོན། མང་ཚོགས་དབུལ་པོ། མཐར་ལུས་མང་ཚོགས་དབུལ་པོ་བཅས་མ་རྐང་ནང་ཞུགས་ཚད་100%ཟིན་ནས། མང་ཚོགས་སྒོ་འགྲམ་དུ་ལས་ཞུགས་ཐུབ་ནས་འབབ་འཕར་བྱུང་བ་དང་། མི་ཚང་མར་ལས་ཀ་ཡོད་པ། གྲོང་ཚོ་ཚང་མར་ཡོང་འབབ་ཡོད་པ་བཅས་ཀྱི་དམིགས་ཚད་མངོན་འགྱུར་ཐུབ་ཡོད་པ་རེད།

རྩལ་ནུས་ཆེ་རུ་གཏོང་བ་དང་། ལས་ཀར་སྐུལ་འདེད་བཏང་ནས་ལས་ཞུགས་དབུལ་སྐྱོར་ལ་དམ་འཛིན་ཏན་ཏིག་བྱས་པ།

ཉེ་ལམ་ལོ་ཤས་རིང་། ས་དགའ་རྫོང་གིས་གསོ་སྦྱོང་བྱེད་ཤུགས་ཆེ་རུ་གཏོང་བ་དང་། ལས་ཞུགས་གཞན་སྒྱུར་ལ་སྐུལ་འདེད་བཏང་ནས་འདེབས་འཛུགས་གསོ་ཚགས་དང་། འཛུགས་སྐྲུན་ཨར་ལས། འཁོར་རིགས་གཏོང་སྟངས། ལག་ཤེས་འཁལ་འཐག ཞིང་འཕྲུལ་ཉམས་བཟོ། མ་བྱན་གཡོས་སྦྱོར་སོགས་ཀྱི་རྩལ་ནུས་གསོ་སྦྱོང་བྱས་ཏེ། ཡིག་ཚགས་དང་གཱ་བཟོས་པའི་ཁྱིམ་ཚང་དབུལ་པོའི་ནང་ནས་ཉུང་མཐར་ཡང་མི་1གསོ་སྦྱོང་ལ་ཞུགས་ཐུབ་པའི་བརྩོན་ལེན་བྱས་ཡོད་པ་རེད།

དེ་དང་དུས་མཚུངས། ས་དགའ་རྫོང་གིས“གྲོང་གསེབ་ཀྱི་ངལ་རྩོལ་ནུས་ཤུགས་ལས་ཞུགས་གཞན་སྒྱུར་ཐུབ་པ་དང་། མང་ཚོགས་ཀྱི་དཔལ་འབྱོར་ཡོང་འབབ་མང་དུ་གཏོང་རྒྱུ”དེ་ཞིང་འབྲོག་པར་འབབ་འཕར་ཡོང་བའི་ཐབས་ལམ་གཙོ་བོ་ཞིག་ལ་བརྩིས་ནས། རྫོང་རིམ་པའི་ངལ་ནུས་ཞབས་ཞུ་ཀུང་སི་1དང་། ཤང་དང་གྲོང་རྡལ་གྱི་ངལ་ནུས་ཞབས་ཞུའི་ཡན་ལག་ཀུང་སི་8 གྲོང་ཚོ་རིམ་པའི་ངལ་ནུས་ཕྱིར་གཏོང་ཆེད་ལས་མཉམ་ལས་ཁང་38བཅས་བཙུགས་ནས། གྲོང་ཚོ་རིམ་པའི་ངལ་ནུས་བར་ཁེ་བ་38གསོ་སྐྱོང་བྱས་ཏེ། ཞིང་འབྲོག་མང་ཚོགས་ལ་ལས་ཞུགས་ལས་གནས་འབོར་ཆེན་མཁོ་འདོན་བྱས་པ་རེད།

ད་ཆ་ས་དགའ་རྫོང་གི་མང་ཚོགས་དུད་ཚང་1038ཀྱི་མི་3719ཚང་མ་དབུལ་སྒྲོལ་ཐུབ་ནས། དབུལ་པོར་འགྱུར་ཚད་དེ་སྔའི་20.98%ནས་ད་ལྟ་གཅིག་ཀྱང་མེད་པར་གྱུར་ཡོད་པ་རེད།