2019ལོའི་ཟླ་དང་པོར་ལོ་ན་24ལ་སླེབས་པའི་ཙོའུ་ཅི་མིང་རྩ་འཛུགས་ཀྱིས་བྲག་ཡིབ་ཆུས་སྨན་རི་ཤང་ཐོག་སྨད་གྲོང་ཚོར་ཏང་ཀྲི་པུའི་ཧྲུའུ་ཅི་ཨང་དང་པོ་བྱེད་པར་མངགས། ལོ་གཅིག་ལྷག་ཙམ་རིང་ཁོང་གིས་རང་འགུལ་ངང་དབུལ་སྐྱོར་གྱི་ལས་འགན་གསར་པ་ཕྲག་ཐོག་ཏུ་འཁུར་ནས་མང་ཚོགས་དང་གྲོགས་པོ་སྒྲིག་པ་དང་མཉམ་འདྲེས་དམ་ཟབ་བྱས་ཏེ་དབུལ་སྒྲོལ་བྱ་གཞག་ལ་སེམས་ནུས་ཡོད་ཚད་བཏོན་པས་མང་ཚོགས་ལ་ཞབས་འདེགས་ཞུ་མཁན་གྱི“སྙིང་ཉེ་བ”དང་དབུལ་སྒྲོལ་ཕྱུག་འགྱུར་གྱི“སྣེ་འཁྲིད་པར”འགྱུར་གང་ཐུབ་བྱས་ཡོད་པ་རེད།

མང་ཚོགས་ཀྱི་སྙིང་ཉེ་བ་བྱས་ནས་ལས་བྱེད་པ་དང་མང་ཚོགས་དབར་གྱི“སྦྲེལ་ཟམ”བཏོད་པ།

གྲོང་ཚོར་འབྱོར་མ་ཐག་པའི་ཉིན་གཉིས་པར་ཙོའུ་ཅི་མིང་དུད་ཚང་དབུལ་པོའི་ཁྱིམ་དུ་འཚམས་འདྲིར་བསྐྱོད། འགན་ལེན་ལྔའི་དུད་ཚང་དོན་གྲུབ་སྒྲོལ་མའི་སྡོད་གནས་ཀྱི་ཆ་རྐྱེན་བལྟོས་བཅས་ཞན་པོ་ཡིན་པས་ཁོ་མོར་གཅིག་སྡུད་བསྙེན་བཀུར་ལྟེ་གནས་སུ་འགྲོ་རྒྱུའི་ཁ་ཏ་བསླབ་བྱ་བྱས་ཀྱང་ཕན་འབྲས་ཐོན་མེད། ཙོའུ་ཅི་མིང་གིས་རྒན་མོའི་ཉལ་ཆས་རྙིང་རྐྱང་ཆགས་ཡོད་པ་མཐོང་སྐབས་སེམས་པ་མ་སྐྱིད་པར་གྱུར་ཏེ་འཕྲལ་མར་ཉལ་ཆས་གསུམ་ཉོས་ནས་ཁོ་མོར་སྤྲད་པ་དང་ཕྱོགས་མཚུངས་ད་དུང“ཉལ་ཆས་གཅིག་འོག་ཏུ་འདིང་བ་དང་གཉིས་གྱོན་ནས་གཉིད་སྐྱིད་པོ་ཁུག་པ་བྱེད་དགོས། ད་ནི་རྒན་རྒོན་སྐྱིད་པོ་བྱེད་པའི་དུས་ཚོད་ཡིན་པས་ད་དུང་དཀའ་སྡུག་མྱོང་ན་མི་འགྲིག”ཅེས་མངགས་བཅོལ་ཡང་ཡང་བྱས་ཡོད། ཙོའུ་ཅི་མིང་གིས་མི་ཞིག་གི་ངོས་ནས་བརྗོད་ན་ལྟོ་ཞིམ་པོ་ཟ་བ་དང་གཉིད་སྐྱིད་པོ་ཁུག་ཚེ་གཞི་ནས་བདེ་ཐང་གི་འཚོ་བ་སྐྱེལ་རྒྱུ་ཡོད་པ་དེ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བཏོན་གནང་བའི“སེམས་ཁྲལ་མེད་པ་གཉིས་དང་འགན་ལེན་གསུམ”གྱི་དམངས་སེམས་གཏད་ཕྱོགས་ཡིན་ལ། མི་དམངས་མང་ཚོགས་ཀྱི་དམངས་འཚོའི་འདུན་པ་ཚད་གཞི་ཆེ་ཤོས་ཀྱི་སྒོ་ནས་ཐག་གཅོད་བྱེད་པ་ཞིག་ཀྱང་ཡིན་པས་དེ་ནི་གུང་ཁྲན་ཏང་ཡོན་གྱི་ཐོག་མའི་བསམ་འདུན་དང་འགན་འཁྲིའང་རེད་ཅེས་བརྗོད་ཡོད།

བློ་སྐྱོར་རིག་སྐྱོར་བྱས་ནས་དབུལ་སྒྲོལ་གྱི“ནང་སྐྱེས་སྒུལ་ཤུགས”ཆེ་རུ་བཏང་བ།

དབུལ་སྐྱོར་བྱེད་པར་སྔོན་ལ་བློ་སྐྱོར་བྱེད་དགོས་པ་ནི་དབུལ་སྒྲོལ་འགག་སྒྲོལ་ལ་རྒྱལ་ཁ་ཕུ་ཐག་གཅོད་པའི་འགག་རྩ་ཡིན་པས་དེར་གཞི་རིམ་གྱི་ལས་བྱེད་པས་གཟེར་འདེབས་ཀྱི་སྙིང་སྟོབས་དར་སྤེལ་གཏོང་དགོས་པ་མ་ཟད། མང་ཚོགས་ཀྱི་བསམ་བློའི་ལས་དོན་རྒྱུན་དུ་ནས་བསྒྲུབས་ཏེ“སྒུག་བརྟེན་སློང་གསུམ”གྱི་བསམ་བློ་རིམ་པས་སེལ་དགོས།

དུད་ཚང་དབུལ་པོ་རིན་ཆེན་བཀྲ་ཤིས་ཀྱི་ཁྱིམ་ཆབ་མདོ་གྲོང་ཁྱེར་ནས་ཐོག་སྨད་དུ་གནས་སྤོ་བྱས་པ་ཞིག་ཡིན། རིག་གནས་དང་། ལག་རྩལ། ས་ཞིང་བཅས་མེད་པའི་དབང་གིས་འཚོ་བར་དཀའ་ངལ་འཕྲད་དེ“སྒུག་བརྟེན་སློང་གསུམ”གྱི་བསམ་བློ་ཤུགས་ཆེན་ལྡན་པ་མ་ཟད། ད་ཡོད་ཀྱི་གནས་སྟངས་ལ་བློ་ཡིད་ཚིམ་ནས་སྡོད་ཀྱི་ཡོད་པས་བསམ་བློའི་ལས་དོན་སྒྲུབ་པར་དཀའ་ངལ་ཆེན་པོ་འཕྲད་ཀྱི་ཡོད་པ་རེད།

རིན་ཆེན་བཀྲ་ཤིས་ཀྱི་ཕྲུ་གུ་རྡོ་རྗེ་ཚེ་རིང་དང་བཀྲ་ཤིས་ཆོས་མཚོ་གཉིས་གུང་གསེང་འཇོག་སྐབས་ཉིན་ལྟར་ཁྱིམ་དུ་རྩེད་མོ་རྩེ་ནས་སྡོད་པ་ལས་ཁྱིམ་སྦྱོང་གཏན་ནས་མི་འབྲི་བ་མཐོང་སྐབས་ཙོའུ་ཅི་མིང་གིས་རང་འགུལ་ངང་ཁོང་གཉིས་ལ་སློབ་ཚན་ཟུར་ཁྲིད་བྱེད་རོགས་དང་སློབ་གསེང་སྐབས་ཁོང་གཉིས་ལ་རྩེད་མོ་རྩེ་རོགས་ཀྱང་བྱེད་ཀྱི་ཡོད། དེ་ལྟར་ཙོའུ་ཅི་མིང་དང་རིན་ཆེན་བཀྲ་ཤིས་ཀྱི་ཁྱིམ་ཚང་འབྲེལ་བ་ཟབ་ཏུ་ཕྱིན་ནས་སྙིང་གཏམ་ཤོད་ཚད་ཀྱང་སྔར་བས་མང་དུ་ཕྱིན་ཡོད། “ཁྱེད་ཚོས་ཕྲུ་གུར་བསམ་བློ་མང་ཙམ་གཏོང་དགོས། ཕ་མ་ནི་ཕྲུ་གུའི་དགེ་རྒན་ཡག་ཤོས་ཡིན་པས་ཁྱེད་ཚོའི་གཏམ་སྤྱོད་གང་རུང་གིས་ཕྲུ་གུར་ཤུགས་རྐྱེན་ཐེབས་སྲིད་པས། ངེས་པར་དུ་ཕྲུ་གུར་རང་ཁ་རང་གསོ་བྱེད་པའི་མིག་དཔེ་སྟོན་དགོས”སྲིད་གཞུང་གིས་ཁྱེད་ཚོར་ཉ་འཛིན་ལག་ཆ་ཉོ་རོགས་བྱེད་པ་ལས་ཉིན་ལྟར་ཁྱེད་ཚོར་ཉ་སྤྲོད་མི་སྲིད་པ་ལྟར་ཁྱེད་ཚོ་སྔོན་ལ་སྔོ་ཚལ་རྟེན་གཞིར་གླ་པ་རྒྱུག་ན་གླ་ཕོགས་ཡོང་གི་རེད་ལ་ལག་རྩལ་ཡང་ཤེས་ཀྱི་རེད་ཅེས་བརྗོད།

ཙོའུ་ཅི་མིང་གི་ཁ་ཏ་བསླབ་བྱའི་འོག་རིན་ཆེན་བཀྲ་ཤིས་དང་བཟའ་ཟླ་ཉི་མ་འཛོམས་གཡང་གིས་གྲོང་ཚོའི་སྔོ་ཚལ་རྟེན་གཞིར་གླ་པ་རྒྱུག་པར་སོང་ཡོད། ཁོང་ཚོའི་ལས་ཀའི་ཧུར་སེམས་སྔར་བས་འཕེལ་བར་བྱ་ཆེད་ཙོའུ་ཅི་མིང་གིས་རང་འགུལ་ངང་སྔོ་ཚལ་རྟེན་གཞི་དང་དུད་ཚང་དབུལ་པོའི་དབར“མཐའ་ཚད་འགན་ལེན་གྱི་ཡོང་འབབ་བགོ་བཤའ་དང་ལས་ཀར་རྟག་འབྱོར་གྱི་བྱ་དགའ་ཟུང་དུ་སྦྲེལ་བའི”གྲོས་མཐུན་འཇོག་ཐབས་བྱས་པས་2019ལོར་རིན་ཆེན་བཀྲ་ཤིས་ཁྱིམ་ལ་སྔོ་ཚལ་རྟེན་གཞི་ནས་ཡོང་འབབ་སྒོར་ཁྲི་3ལྷག་ཙམ་བྱུང་ཡོད་པ་རེད།

ཏང་འཛུགས་སྐྱོང་གི་སྣེ་འཁྲིད་དེ་འབབ་འཕར་གྱི“ཐབས་ལམ་གསར་པ”རྒྱ་སྐྱེད་བཏང་བ།

གྲོང་ཚོའི་མཉམ་སྡེབ་དཔལ་འབྱོར་སྔར་བས་གོང་འཕེལ་གཏོང་ཆེད་ཙོའུ་ཅི་མིང་གིས་གྲོང་ཚོའི་དུད་ཚང་ཁག་གི་འཐུས་མི་སྒྲིག་འཛུགས་ཧུར་ཐག་བྱས་ནས་ཉེ་འགྲམ་གྱི་རྫོང་དང་ཆུས་སུ་ཀུ་ཤུ་འདེབས་འཛུགས་ཀྱི་ལག་རྩལ་སློབ་སྦྱོང་བྱེད་པར་བསྐྱོད་དེ་གྲོང་ཚོའི་མཉམ་སྡེབ་དཔལ་འབྱོར་གོང་འཕེལ་ཡོང་ཕྱིར་ལག་རྩལ་གྱི་འགན་ལེན་བྱས་པ་མ་ཟད། “ཀྲི་པུའུ་དང་། མཉམ་ལས་ཁང་། ཞིང་དུད་བཅས་ཟུང་དུ་སྦྲེལ་བའི”དོ་དམ་བྱ་ཐབས་ལག་ལེན་བསྟར་བ་དང་འབྲེལ་ཀུ་ཤུ་འདེབས་འཛུགས་གཡོག་བྱེད་ཚོགས་ཆུང་གིས་གཅིག་གྱུར་ཐོག་དོ་དམ་བྱས་པས་ཀུ་ཤུ་འདེབས་འཛུགས་ཀྱི་སྤུས་ཚད་འགན་ལེན་བྱུང་ཡོད། 2019ལོའི་སྐབས་དང་པོའི་བོད་ཀྱི་ཉིང་ཁྲིའི་ཀུ་ཤུ་འོས་སྦྱོར་འདུ་ཚོགས་གཉེར་ཏེ་ཐོག་སྨད་གྲོང་ཚོའི“ཉིང་ཁྲིའི་ཀུ་ཤུའི”ཞིང་ལས་ཐོན་རྫས་ཀྱི་ས་ཁམས་མཚོན་བྱེད་སྤུས་རྟགས་ཀྱི་ཤུགས་རྐྱེན་ཐེབས་ཚད་སྔར་བས་ཆེ་རུ་བཏང་ནས་མང་ཚོགས་ལ་འབབ་འཕར་ཡོང་ཆེད་རྨང་གཞི་བརྟན་པོ་བཏིང་ཡོད་པ་རེད།

གྲོང་ཚོར་བཅའ་སྡོད་ཧྲུའུ་ཅི་ཨང་དང་པོ་བྱས་རྗེས་ཙོའུ་ཅི་མིང་གྲོང་ཚོར་ཟ་སྡོད་བྱས་ནས་གྲོང་ཚོ་དང་དུད་ཚང་དུ་བསྐྱོད་རྒྱུར་དགའ་བའི་གྲོང་སྡོད་ཧྲུའུ་ཅི་ཨང་དང་པོར་གྱུར་པས་མ་ཚད། ད་དུང་ཡུལ་མི་ཚོའི་སྙིང་ཉེ་བ་ཞིག་ཏུའང་གྱུར་ཡོད་པ་རེད།