འཛོམས་སྐྱིད་ནི་ཉིང་ཁྲི་གྲོང་ཁྱེར་བྲག་ཡིབ་ཆུས་སྨན་རི་ཤང་གླང་གནས་གྲོང་ཚོའི་ཡིག་ཚགས་དང་གཱ་བཟོས་པའི་དུད་ཚང་ལྔའི་གྲས་ཀྱི་གཅིག་རེད། ཉེ་བའི་ལོ་ཤས་རིང་། ཏང་གི་སྲིད་ཇུས་བཟང་པོའི་རོགས་རམ་ལ་བརྟེན་པ་དང་རང་ཉིད་ཀྱི་འབད་བརྩོན་ལྷོད་མེད་བརྒྱུད་འཛོམས་སྐྱིད་ཀྱི་ཁྱིམ་ཚང་དབུལ་སྒྲོལ་བྱུང་ཞིང་། “སེམས་ཁྲལ་མེད་པ་གཉིས”དང“འགན་ལེན་གསུམ”གྱི་ཚད་གཞིར་སླེབས་པ་རེད།

འཛོམས་སྐྱིད་ཁྱིམ་གྱི་དབུལ་སྒྲོལ་གཏམ་རྒྱུད་2015ལོ་ནས་གླེང་དགོས་ཏེ། ལོ་དེར་འཛོམས་སྐྱིད་ཀྱི་བཟའ་ཟླ་ཚེ་ལས་འདས་ཤིང་། པ་ཕ་ལོ་ན་མཐོ་བ་དང་། བུ་སློབ་གྲྭར་འགྲོ་བ། ཚ་མོ་ལོ་4ཡིན་པ་བཅས་ཀྱི་རྐྱེན་པས་ལས་ཀ་བྱེད་མཁན་ཁོང་དང་གཅུང་མོ་སྒོར་སྒོར་ལས་མེད་པ་རེད།

“ཏང་དང་སྲིད་གཞུང་ནི་ཐོག་མཐའ་བར་གསུམ་དུ་ཁྱེད་ཀྱི་རྒྱབ་རྟེན་བརྟན་པོ་འདི་རེད”སྨན་རི་ཤང་ཏང་ཨུད་སྲིད་གཞུང་དང་གླང་གནས་གྲོང་ཚོའི“ཨུ་ལྷན་གཉིས”ཀྱིས་འཛོམས་སྐྱིད་ཁྱིམ་གྱི་གནས་ཚུལ་ཤེས་རྟོགས་བྱུང་རྗེས། ལས་དོན་མི་སྣ་མངགས་ཏེ་སེམས་གསོ་བྱས་པ་དང་དབུལ་སྒྲོལ་བྱེད་རོགས་ཧུར་ཐག་བྱས་པ་རེད།

གནད་སྨིན་དབུལ་སྐྱོར་གྱི་གོ་སྐབས་ལ་བརྟེན་ནས་འཛོམས་སྐྱིད་ལ་རེ་བ་གསར་པ་རྙེད་པ་དང་། གྲོང་ཚོ་ཨུ་ལྷན་གྱི་བཀོད་སྒྲིག་འོག་གྲོང་ཚོའི་ཤིང་ཏོག་འདེབས་འཛུགས་དང་ཕག་གསོ་ར་བ་བསྐྲུན་པ་སོགས་ལ་ཞུགས་པར་བརྟེན། ལོ་དེར་ངལ་རྩོལ་གྱི་གླ་ཆ་སྒོར་15200དང་སྔོ་ཚལ་དང་། མར། འོ་མ། ཆུར་བ་བཅས་བཙོངས་པའི་ཡོང་འབབ་སྒོར་5800བྱུང་བ་དང་། ལོ་དེར་གཅུང་མོ་སྒོར་སྒོར་བཟའ་ཚོ་གཉིས་ཀྱིས་ལྷ་སར་ཟ་ཁང་ཞིག་བཙུགས་པར་ལོར་ཡོང་འབབ་སྒོར་ཁྲི་12ལྷག་ཙམ་བྱུང་།

“བོད་བྱའི་སྒོ་ང་བཙོངས་པར་ཡོང་འབབ་སྒོར་8000དང་། ཕྱིར་གླ་པ་རྒྱུག་པར་གླ་ཆ་སྒོར་18800 བེ་ཤ་བཙོངས་པར་ཡོང་འབབ་སྒོར་5000 ཤིང་འབྲས་ར་བ་ནས་བགོས་པའི་ཁེ་སྤོགས་སྒོར་600བཅས་ཀྱི་ཐོག སྲིད་ཇུས་རང་བཞིན་གྱི་ཁ་གསབ་སྣ་ཚོགས་དང་གཅུང་མོའི་ཡོང་འབབ་བསྣན་ཚེ། ན་ནིང་ང་ཚོའི་ནང་མི་6པོའི་མི་རེའི་ཆ་སྙོམས་ཡོང་འབབ་སྒོར་ཁྲི་3ཡན་ཟིན་འདུག”ཅེས་འཛོམས་སྐྱིད་ཀྱིས་གསར་འགོད་པར་བཤད།