ཉིན་ཤས་རིང་གྲོ་མོ་རྫོང་དུད་སྣ་ཤང་རྒུ་རུ་གྲོང་ཚོའི་འབྲོག་པ་མང་ཚོགས་བྲེལ་འཚུབ་ཆེན་པོ་བྱུང་ཡོད་པ་རེད། གང་ཡིན་ཞེ་ན་ཁ་སྐྱིད་གམ་པའི་ལུག་གསོ་ཚགས་མཉམ་ལས་ཁང་ལ་ལོ་གཅིག་དུས་གཅིག་གི་ལུ་གུ་བཙའ་བའི་དུས་ལ་སླེབས་ཡོད།

2016ལོར་གྲོ་མོ་རྫོང་སྲིད་གཞུང་གིས་མ་དངུལ་སྒོར་ཁྲི་1200བཏང་ནས་རྒུ་རུ་གྲོང་ཚོར་གམ་པའི་ལུག་གསོ་ཚགས་རྟེན་གཞི་བཙུགས་པ་དང་འབྲེལ་ལོ་དེ་རང་ལ་ཁ་སྐྱིད་གམ་པའི་ལུག་གསོ་ཚགས་མཉམ་ལས་ཁང་ཐོ་འགོད་བྱས། ལོ་4ཙམ་རིང་གི་མཉམ་ལས་གསོ་ཚགས་བྱས་པ་བརྒྱུད་མིག་སྔར་མཉམ་ལས་ཁང་གི་གཞི་ཁྱོན་རགས་ཙམ་ཆགས་ཡོད།

མཉམ་ལས་ཁང་ཐོག་མར་འཛུགས་སྐབས་དཀའ་ངལ་མི་ཉུང་བ་ཞིག་ཕྲད་པ་སྟེ། ལུ་གུ་སྔ་ས་ནས་བཤས་བཏང་ན། གོང་འཚམ་པོ་ཞིག་རག་གི་རེད་དམ་ཞེས་གྲོང་མི་མང་པོས་དོགས་པ་བྱེད་ཀྱི་ཡོད།

“ཚང་མས་འཆར་གཞི་མེད་པར་ལུ་གུ་འཚོ་བས་རྩྭ་ཐང་ལ་གཏོར་བཤིག་ཆེན་པོ་བཏང་ཡོད་ལ། གྲོང་མིས་ལུག་གསོད་མི་ཕོད་པ་དང་འཚོང་མི་ཕོད་པའི་འདུ་ཤེས་གཏིང་ཟབ་པས། འབྲོག་ལས་རྒྱུན་མཐུད་འཕེལ་རྒྱས་ལའང་འགོག་རྐྱེན་བཟོས་ཡོད། ཕྱིས་སུ་རགས་གཉེར་ཅན་གྱི་གཉེར་སྐྱོང་ནས་ཞིབ་གཉེར་ཅན་གྱི་ཐོན་སྐྱེད་ལ་འགྱུར་བ་ནི་ལྡོག་མེད་ཀྱི་ལམ་བུ་ཞིག་རེད”ཅེས་ཉེ་འཁོར་མང་ཚོགས་ཀྱིས་དང་ཐོག་དོགས་པ་བྱེད་པའི་སྐབས་སུ་རྒུ་རུ་གྲོང་ཚོའི་ཏང་ཀྲི་པུའུ་ཧྲུའུ་ཅི་ལྷག་པ་ཕུན་ཚོགས་དང་གྲོང་ཚོའི“ཨུ་ལྷན་གཉིས”ཀྱི་ཚན་ཁག་གི་ཁོངས་མིས་གྲོང་ཚོའི་དུད་ཁྱིམ་ཁག་ཏུ་རེ་རེ་བཞིན་བསྐྱོད་དེ་ཁོ་ཚོར་སློབ་གསོ་བཏང་ཡོད།

ལྷག་པ་ཕུན་ཚོགས་ནི་ཁྱིམ་གྱི་ལུག་ཚང་མ་དངུལ་ལ་ཕབ་ནས་མ་རྐང་ལ་ཞུགས་ཏེ་མཉམ་ལས་ཁང་ལ་ཞུགས་མཁན་དུད་ཚང་ཨང་དང་པོ་དེ་རེད། གྲོང་ཚོའི་ལས་བྱེད་པ་དང་ཏང་ཡོན་གྱིས་གཅིག་རྗེས་གཉིས་མཐུད་ངང་འགོ་ཁྲིད་ནས་མཉམ་ལས་ཁང་ལ་ཞུགས་པས་རིམ་བཞིན་གྲོང་མི་ཚང་མ་དེར་ཞུགས་པ་རེད།

རྒུ་རུ་གྲོང་ཚོས་ལུག་དངུལ་ལ་ཕབ་ནས་མ་རྐང་ལ་ཞུགས་པའི་བྱེད་ཐབས་སྤྱད་ནས་གྲོང་ཚོ་ཡོངས་ཀྱི་ལུ་གུ་མཉམ་ལས་ཁང་གིས་གཅིག་སྡུད་དོ་དམ་དང་གཅིག་གྱུར་ཕྱིར་ཚོང་བྱས་ནས་སྲོལ་རྒྱུན་གྱི་གཞི་ཁྱོན་ཆུང་ལ་ཁ་ཐོར་བའི་གསོ་ཚགས་བྱེད་སྟངས་ལ་རྦད་དེ་འགྱུར་ལྡོག་བཏང་ཡོད། གྲོ་མོ་རྫོང་གི་ཞིང་ལས་གྲོང་གསེབ་ཅུས་ཀྱི་མི་ཐབས་རྩྭ་གསོའི་རྣམ་གྲངས་ལ་བརྟེན་ནས་མཉམ་ལས་ཁང་གིས་ལོ་ལྟར་མི་ཐབས་རྩྭ་གསོ་མུའུ་1000ལྷག་ཙམ་འདེབས་པས་མུའུ་རེ་ནས་རྩྭ་སོས་པ་ཐོན་ཚད་རྒྱ་མ་800ཟིན་ནས་དགུན་དུས་འབྲོག་རའི་གནོན་ཤུགས་ཞི་ལྷོད་དུ་ཕྱིན་པ་དང་གམ་པའི་ལུག་གི་དགུན་དུས་གྲང་ངར་འགོག་ནུས་ཀྱང་ཆེ་རུ་ཕྱིན་ཡོད།

དེ་དང་དུས་མཚུངས། མཉམ་ལས་ཁང་གིས་གྲོང་ཚོ་ནས་གསོ་ཚགས་འཇོན་ཐང་ལྡན་པའི་གྲོང་མི་བདམས་ཏེ་ལུག་ཁྱུ་གཅིག་སྡུད་འཚོ་རུ་བཅུག་ནས་ལོ་ལྟར་གླ་ཆ་སྒོར་ཁྲི་3.65སྤྲད་ཅིང་། རྒུ་རུ་གྲོང་ཚོའི“ཨུ་ལྷན་གཉིས”ཀྱིས་ངལ་ནུས་ལྷག་མར་དམིགས་ཏེ་གྲོང་མིར་ལས་གྲྭ་འཛུགས་སྐྲུན་སྣ་ཚོགས་འོས་སྦྱོར་བྱས་ནས་ཁོ་ཚོ་གླ་པ་བརྒྱུགས་ནས་འབབ་འཕར་ཡོང་བར་བྱས་ཡོད།

གཅིག་གྱུར་གསོ་ཚགས་དང་། གཅིག་གྱུར་རིམས་འགོག གཅིག་གྱུར་བཤའ་བ་བཅས་བྱས་པ་ལས་ལུ་གུ་སྡོམ་གསོས་ཀྱི་བརྒྱུད་རིམ་ཁྲོད་ནད་ཕོག་པའམ་ཡང་ན་ཤི་བའི་གནས་ཚུལ་ནུས་ལྡན་འགོག་ཐུབ་ལ། སྒོ་ཕྱུགས་བཤའ་ཚད་ཀྱང་ཆེ་རུ་ཕྱིན་ཡོད། 2019ལོར་ཁ་སྐྱིད་གམ་པའི་ལུག་གསོ་ཚགས་མཉམ་ལས་ཁང་གི་ཕྱིར་འཚོང་ཡོང་འབབ་སྒོར་ཁྲི་250ལྷག་ཙམ་ཟིན་ནས་ཞིང་འབྲོག་མང་ཚོགས་ལ་ཁེ་སྤོགས་སྒོར་ཁྲི་85བགོས་པ་དང་མཉམ་ལས་ཁང་གི་ལས་མིར་ཁེ་སྤོགས་སྒོར་2500སྤྲད་པ་རེད།

གྲོང་མི་དགྲ་འདུལ་མཉམ་ལས་ཁང་ལ་མ་ཞུགས་གོང་ཟླ་རེར་ཉིན་ཁ་ཤས་ལུག་འཚོ་བ་དང་ཉིན་ཁ་ཤས་གླ་པ་རྒྱུག་པར་འགྲོ་གི་ཡོད། དེ་ལྟར་བྱས་ཀྱང་ནང་དུ་ལོར་མི་རེར་ཆ་སྙོམས་ཡོང་འབབ་སྒོར་3000ལས་ཡོང་གི་མེད། 2017ལོར་དགྲ་འདུལ་གྱིས་རང་ཁྱིམ་གྱི་ལུ་གུ་15དངུལ་ལ་ཕབ་ནས་མ་རྐང་ལ་ཞུགས་ཏེ་བློ་གཅིག་སེམས་གཅིག་གིས་གླ་པ་རྒྱུག

“མཉམ་ལས་ཁང་ལ་ཞུགས་ན་རྙོག་དྲ་ཉུང་ལ་བློ་ཡང་བདེ་པོ་འདུག ང་དང་བཟའ་ཟླར་ཡང་ཕྱིར་གླ་པ་རྒྱུག་པའི་ཁོམ་པ་འདུག ན་ནིང་ལོར་མི་རེར་ཆ་སྙོམས་ཡོང་འབབ་ཁེ་གཙང་སྒོར་9000བྱུང་། འདི་ལོ་སླར་ཡང་ལུ་གུ་བཅུ་གྲངས་ཉོས་ནས་མཉམ་ལས་ཁང་ལ་ཞུགས་ཀྱི་ཡིན”ཞེས་དགྲ་འདུལ་གྱིས་བརྗོད།

མཉམ་ལས་ཁང་གི་གཞི་ཁྱོན་གྱི་ཕན་འབྲས་དེ་བས་འདོན་ཆེད། ན་ནིང་གྲོ་མོ་རྫོང་གིས“གཅིག་རོགས་བཅུའི”འཕེལ་རྒྱས་འཆར་གཞི་བཏོན་པ་སྟེ། རྒུ་རུ་གྲོང་ཚོའི་ཁ་སྐྱིད་གམ་པའི་ལུག་གསོ་ཚགས་མཉམ་ལས་ཁང་སྤྱི་ཁྱབ་མཉམ་ལས་ཁང་དུ་བྱས་ཏེ་དུད་སྣ་ཤང་དུད་སྣ་གྲོང་ཚོ་དང་། མདོ་ཆེན་གྲོང་ཚོ། ལྷ་ཁུད་གྲོང་ཚོ་སོགས་ཡན་ལག་ཁང་10བཙུགས། ཡན་ལག་ཁང་ཁག་གིས་སྤྱི་ཁྱབ་མཉམ་ལས་ཁང་གི་གྲུབ་འབྲས་ཐོབ་པའི་ཉམས་མྱོང་སློབ་སྦྱོང་དང་དཔྱད་གཞིར་འཛིན་པ་དང་། དུས་ཐུང་ནང་མཉམ་ལས་ཁང་གི་སྒྲིག་སྲོལ་ཚད་ལྡན་དུ་གཏོང་བ། སྤྱི་ཁྱབ་མཉམ་ལས་ཁང་ནས་ཉམས་མྱོང་ཕུན་སུམ་ཚོགས་པ་དང་ལག་རྩལ་བྱང་ཆུབ་པའི་ལག་རྩལ་དོ་དམ་པ་མངགས་ནས་ཡན་ལག་ཁང་གི་ལས་དོན་ལ་མཛུབ་ཁྲིད་བཅས་བྱས་མཐར་མཉམ་ལས་ཁང“ཚོགས་སྒྲིག་འཕེལ་རྒྱས”དང་། མཉམ་ཤུགས་ཆགས་ནས་རྒྱ་སྟོབས་ཆེ་རུ་སོང་བ་བཅས་ཀྱི་དམིགས་ཡུལ་དོན་གཉེར་ཐུབ་ཡོད།

“འདི་ལོ་མཉམ་ལས་ཁང་གི་སྔོན་གཏན་དམིགས་ཚད་ནི་ལུག་མགོ་གྲངས་ཁྲི་1བཤའ་རྒྱུ་དེ་རེད། སྔོན་དཔག་བྱས་ན། མཉམ་ལས་ཁང་གི་སྤྱིའི་ཡོང་འབབ་སྒོར་ཁྲི་350ཟིན་པ་དང་ལས་མིའི་ཁེ་སྤོགས་མི་རེར་ཆ་སྙོམས་ལྡབ་གཉིས་འཕར་ཐུབ་རེ་ཡོད”ཅེས་ལྷག་པ་ཕུན་ཚོགས་ཀྱིས་ཡིད་ཆེས་ཆེན་པོས་བརྗོད།