ཉེ་བའི་ལོ་ཤས་རིང་། མངའ་རིས་ས་ཁུལ་སྒེར་རྩེ་རྫོང་གིས་འབྲོག་ཁུལ་སྒྱུར་བཅོས་ལ་བརྟེན་ནས་གྲོང་གསེབ་ཀྱི་ཐོན་ལས་འཕེལ་རྒྱས་ལ་གཅིག་འདོམས་བྱེད་པའི་ལམ་བུ་ཞིག་འཚོལ་ཞིབ་ཧུར་ཐག་བྱས་ནས་དམངས་འཚོའི་བྱ་གཞག་འཕེལ་རྒྱས་ལ་སྐུལ་འདེད་ནུས་ལྡན་བཏང་ཞིང་། འདི་ནི་གསར་དུ་སྐྲུན་པའི་སྨོན་གྲུབ་གྲོང་གསར་གྱི་ཟུར་ཞིག་ཡིན་པ།

འདི་ནི་སྒེར་རྩེ་རྫོང་གྲོང་གི་རྣམ་པ་ཡིན་པ།

ཉེ་བའི་ལོ་ཤས་རིང་། མངའ་རིས་ས་ཁུལ་སྒེར་རྩེ་རྫོང་གིས་གྲོང་གསེབ་དར་རྒྱས་དང་དབུལ་སྒྲོལ་འགག་སྒྲོལ་གཉིས་འབྲེལ་མཐུད་དམ་ཟབ་བྱས་ཏེ། འབྲོག་ཁུལ་སྒྱུར་བཅོས་ལ་བརྟེན་ནས་གྲོང་གསེབ་ཀྱི་ཐོན་ལས་འཕེལ་རྒྱས་ལ་གཅིག་འདོམས་དང་། གྲོང་གསེབ་ཀྱི་ཤེས་དཔལ་ལ་སྐུལ་འདེད། མང་ཚོགས་དབུལ་པོ་དབུལ་སྒྲོལ་ཐུབ་པའི་ནང་སྐྱེས་སྒུལ་ཤུགས་འདོན་སྤེལ། མང་ཚོགས་དབུལ་པོའི་ཡོང་འབབ་བརྟན་པོའི་ངང་འཕར་བ་བཅས་ཀྱི་ས་བབ་མཐོ་ལ་ཐག་རིང་ལུང་ཁུག་གྲོང་གསེབ་སྒྱུར་བཅོས་ཀྱིས་དབུལ་སྒྲོལ་ལ་སྐུལ་འདེད་ཀྱི་ལམ་བུ་གསར་པ་ཞིག་འཚོལ་ཞིབ་ཧུར་ཐག་བྱས་ཡོད།

2015ལོར་སྒེར་རྩེ་རྫོང་གིས་འོ་མ་ཤང་འཆམ་གུག་གྲོང་ཚོ་འབྲོག་ཁུལ་སྒྱུར་བཅོས་ཀྱི་ཚོད་ལྟའི་ས་ཚིགས་སུ་བྱས་ཏེ་མཉམ་ལས་ཁང་གི་འཕེལ་རྒྱས་ཚད་ལྡན་དང་། མཉམ་ལས་ཁང་གི་ཕན་འབྲས་ཆེར་གཏོང་། འབྲོག་པའི་ཐོན་སྐྱེད་ཀྱི་མ་གནས་ཉུང་གཏོང་། མང་ཚོགས་ལ་འབབ་འཕར་ཕྱུག་འགྱུར་ཡོང་རོགས་བཅས་བྱ་རྒྱུ་འགོ་འཛུགས་སར་བྱེད་པ་དང་། སྔོན་ཆད་ཀྱི་ཁེར་རྐྱང་རྣམ་པའི་འབྲོག་པའི་མཉམ་ལས་ཁང་གི་གཞི་ཁྱོན་ཆུང་བ་དང་། གཉེར་སྐྱོང་སྟབས་བདེ་བ། ཁྲོམ་རའི་ཉེན་ཁར་ཁ་གཏད་བཅོག་པའི་ནུས་པ་ཞན་པ། སྣེ་ཁྲིད་ཀྱི་ནུས་པ་ཞན་པ་སོགས་ཀྱི་གནད་དོན་ལ་དམིགས་ཏེ། གྲོང་ཚོ་ཡོངས་ཀྱི་ཁ་ཐོར་རྣམ་པའི་འབྲོག་པའི་ཆེད་ལས་མཉམ་ལས་རྩ་འཛུགས་བསྡུ་སྒྲིལ་གྱིས་འཆམ་གུག་གྲོང་ཚོའི་འབྲོག་པའི་མཉམ་སྡེབ་དཔལ་འབྱོར་མཉམ་ལས་ཁང་བཙུགས་ནས་གྲོང་ཚོ་ཡོངས་ཀྱི་དུད་ཚང་71གི་མི་256མཉམ་ལས་ཁང་གི་ལས་མིར་བསྡུས་ཡོད། དེ་དང་ཆབས་ཅིག མཉམ་ལས་ཁང་གི་སྒྲིག་སྲོལ་ལམ་སྲོལ་ཁག་འཛུགས་པ་དང་འཐུས་སྒོ་ཚང་དུ་བཏང་སྟེ་སྒྲིག་འཛུགས་བྱེད་སྟངས་དང་། ལས་མིའི་འོས་འགན། དབང་ཆ་སོགས་ཁ་གསལ་བཟོ་བ་དང་། ནང་ངོས་གཉེར་སྐྱོང་དོ་དམ་ལམ་སྲོལ་སྔར་བས་ཚད་ལྡན་དུ་གཏོང་བ། མཉམ་ལས་ཁང་གི་ཤེས་ལྡན་མི་སྣའི་དོ་དམ་གསོ་སྐྱོང་ལ་ཤུགས་སྣོན་རྒྱག་པ། རྩ་འཛུགས་ཅན་གྱི་དོ་དམ་ཆུ་ཚད་གོང་མཐོར་གཏོང་བ་བཅས་བྱས་ཏེ་མཉམ་ལས་ཁང་གི་ནུས་པ་འདོན་སྤེལ་ཐུབ་རྒྱུའི་འགན་ལེན་བྱས་ཡོད།

མཉམ་ལས་ཁང་གིས་མང་ཚོགས་ཀྱི་རང་མོས་གཙོ་བོར་བྱས་ཏེ་སྲིད་གཞུང་གིས་ཁྲིད་སྟོན་དང་། གྲོང་ཚོའི“ཨུ་ལྷན་གཉིས”ཀྱི་ཚན་ཁག་གིས་གྲོས་བསྡུར། གྲོང་མིའི་ཚོགས་ཆེན་འཚོགས་ཏེ་གྲོས་འཆམ་བྱེད་པ་བཅས་ཀྱི་བྱེད་ཐབས་སྤྱད་དེ་མང་ཚོགས་ཚོར་སྒོ་ཕྱུགས་མ་རྐང་ལ་ཞུགས་པ་དང་། ངལ་ནུས་མ་རྐང་ལ་ཞུགས་པ། དུད་སྦྲེལ་ཕྱུགས་འཚོ། རྩྭ་ར་བརྒྱུད་བཤུག་བཅས་ཀྱི་བྱེད་ཐབས་བརྒྱུད་མཉམ་ལས་ཁང་གི་གཉེར་སྐྱོང་ནང་ཞུགས་རྒྱུར་སྐུལ་ལྕག་དང་ཁྲིད་སྟོན་བྱས་ཡོད། མཉམ་ལས་ཁང་གིས“ངལ་ནུས་གཅིག་གྱུར་བཀོད་སྒྲིག་དང་། རྩྭ་ར་གཅིག་གྱུར་དོ་དམ། འབྲོག་ལས་ཐོན་ཟོག་གཅིག་གྱུར་ཉོ་ཚོང་། ཚོང་གཉེར་ཡོང་འབབ་གཅིག་གྱུར་བགོ་འགྲེམས། ངལ་ནུས་མེད་པ་དང་མི་ཧྲེང་རྒན་རྒོན་ལ་གཅིག་གྱུར་བསྙེན་བཀུར། སློབ་གྲྭར་འགྲོ་མུས་ཀྱི་སློབ་མར་གཅིག་གྱུར་སྐར་ཐོ་འགོད་པ”(“གཅིག་གྱུར་དྲུག”ཅེས་བསྡུ་རྒྱུ)བཅས་ཀྱི་གཉེར་སྐྱོང་བྱེད་སྟངས་གཞིར་བཟུང་། སྲོལ་རྒྱུན་གྱི་སྟབས་བདེའི་འབྲོག་ལས་ཐོན་སྐྱེད་བྱེད་སྟངས་ནས་ཚན་རིག་དང་མཐུན་པའི་ལེགས་བསྡུས་ཞིབ་གཉེར་དང་གཞི་ཁྱོན་ཅན་གྱི་ཕྱོགས་སུ་སྒྱུར་རྒྱུར་སྐུལ་འདེད་བཏང་ཡོད། དོ་དམ་དང་འབྲེལ་གཏུག་བྱེད་བདེ་རུ་གཏོང་ཆེད། གྲོང་ཚོའི“ཨུ་ལྷན་གཉིས”ཀྱིས་མཉམ་སྡེབ་དཔལ་འབྱོར་མཉམ་ལས་ཁང་གི་ཚོང་གཉེར་ཁྱབ་ཁོངས་ལ་གཞིགས་ཏེ། ཏང་ཚོགས་ཆུང་མང་པོ་བཙུགས་ནས་ཏང་ཡོན་གྱི་གདོང་ལེན་དཔེ་བཟང་གི་ནུས་པ་འདོན་སྤེལ་གང་ལེགས་བྱེད་པ་དང་། ཏང་ཡོན་དང་མང་ཚོགས་མཉམ་དུ་ངལ་རྩོལ་བྱས་པ། ངལ་རྩོལ་གྱི་སྤྲོ་སྣང་དང་ལོ་ལེགས་ཀྱི་འབྲས་བུ་མཉམ་སྤྱོད་བཅས་བྱས་ནས་ཏང་ཡོན་དང་མང་ཚོགས། ལས་བྱེད་པ་དང་མང་ཚོགས་དབར་གྱི་འབྲེལ་བ་སྔར་བས་ཟབ་ཏུ་བཏང་ཡོད།

དེ་དང་ཆབས་ཅིག་རུ་ཐོག་རྫོང་གིས་ཞིང་འབྲེལ་རྣམ་གྲངས་ཀྱི་མ་དངུལ་བེད་སྤྱོད་བྱེད་སྟངས་གསར་གཏོད་བྱས་ཏེ“འཆར་འགོད་ལ་བརྟེན་ནས་ས་གནས་ལ་སྤྱི་འདོམས་དང་། ས་གནས་ལ་བརྟེན་ནས་རྣམ་གྲངས་ལ་སྤྱི་འདོམས། རྣམ་གྲངས་ལ་བརྟེན་ནས་མ་དངུལ་ལ་སྤྱི་འདོམས”བཅས་ཀྱི་རྩ་དོན་མཐའ་འཁྱོངས་ཀྱིས་འཆར་འགོད་སྒྲིག་བཟོ་དང་རྣམ་གྲངས་རེ་ཞུ་བྱས་ནས་མ་དངུལ་བེད་སྤྱོད་བར་གྱི་བརྒྱུད་རིམ་ཧྲིལ་པོའི་བསྡུ་སྒྲིལ་ལམ་སྲོལ་བཙུགས་ཡོད། ཉེ་བའི་ལོ་3རིང་། ཞིང་འབྲོག་དང་། ཆུ་བེད། དབུལ་སྐྱོར་སོགས་ཀྱི་ཞིང་འབྲེལ་རྣམ་གྲངས་མ་དངུལ་ཁྱོན་བསྡོམས་སྒོར་ཁྲི་1000ལྷག་ཙམ་བསྡུ་སྒྲིལ་བྱས་པ་དེ་དག་ཚད་ལྡན་ཅན་གྱི་ཕྱུགས་ར་དང་། ལུག་ར། མི་ཐབས་ལ་བརྟེན་ནས་རྩྭ་འདེབས་སོགས་འབྲོག་ལས་ཀྱི་རྨང་གཞིའི་སྒྲིག་བཀོད་རྣམ་གྲངས་འཛུགས་སྐྲུན་བྱ་རྒྱུའི་ཐད་སྤྱད་ཡོད། འབྲོག་ཁུལ་གྱི་དངུལ་རྩའི་ཞབས་ཞུ་འཐུས་སྒོ་ཚང་དུ་བཏང་སྟེ་རྫོང་སྲིད་གཞུང་གིས་དངུལ་རྩའི་སྡེ་ཚན་དང་སྦྲེལ་མཐུད་མཐུན་སྦྱོར་བྱེད་པ་དང་། ས་གནས་ནོར་སྲིད་ཀྱིས་མ་དངུལ་བཏོན་ནས་འགན་ལེན་བྱས་པ་བརྒྱུད་མཉམ་ལས་ཁང་གི་དངུལ་བུན་གཡར་ཚད་ཇེ་མཐོར་ཕྱིན་ཡོད། དམངས་ཁྲོད་མ་རྩའི་ནུས་པ་འདོན་སྤེལ་བྱས་ཏེ་འཆམ་གུག་གྲོང་ཚོའི་མཉམ་སྡེབ་དཔལ་འབྱོར་མཉམ་ལས་ཁང་གིས་རྩྭ་ཐང་སྣོད་བཅུད་སྲུང་སྐྱོང་གི་ཁ་གསབ་མ་དངུལ་སྒོར་ཁྲི་30ཙམ་བསྡུ་སྒྲིལ་བྱས་ནས་བྱེ་རྡོ་ར་བ་བཙུགས་ཡོད། ཞང་ཞུང་གི་བལ་རྒྱུ་ཅུང་འཇམ་པའི་ལུག་གི་རྒྱུད་པ་གསར་པའི་དཔེ་སྟོན་ཁྱབ་གདལ་རྣམ་གྲངས་ལག་བསྟར་བྱས་ཏེ་ཁྱོན་མ་དངུལ་སྒོར་ཁྲི་80བཏང་ནས་བལ་རྒྱུ་འཇམ་པའི་ལུག་700ནང་འདྲེན་བྱས་ཤིང་། མིག་སྔར་ཞང་ཞུང་གི་བལ་རྒྱུ་འཇམ་པའི་ལུག་1016གསོ་ཚགས་བྱས་ཡོད།

འབྲོག་ཁུལ་སྒྱུར་བཅོས་ཀྱིས་དབུལ་སྒྲོལ་འགག་སྒྲོལ་ལ་ཁྲིད་སྟོན་བྱེད་པའི་བྱེད་ཐབས་རབ་དང་རིམ་པ་དོན་འཁྱོལ་བྱས་པ་བརྒྱུད་འཆམ་གུག་གྲོང་ཚོའི་མཉམ་སྡེབ་དཔལ་འབྱོར་ཡོང་འབབ་མངོན་གསལ་དོད་པོས་མང་དུ་ཕྱིན་ནས། གྲོང་ཚོ་འདིའི་མཉམ་ལས་ཁང་ལ་ཞུགས་པའི་འབྲོག་པ་མི་རེར་ལོ་རེར་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་15547བྱུང་ནས་ལོ་རེར་ཆ་སྙོམས15.4%འཕར་ཡོད། གྲོང་ཚོའི་མཉམ་སྡེབ་གཉེར་སྐྱོང་གི་གཞི་ཁྱོན་ཟམ་མི་ཆད་པར་ཆེ་རུ་སོང་སྟེ་གྲོང་ཚོའི་གསོ་ཚགས་རྟེན་གཞིའི་འབྲི་གཡག་གསོ་ཚགས་བྱེད་ཚད་2012ལོའི་འབྲི་གཡག་74ནས་341བར་འཕར་བ་དང་། ཞང་ཞུང་གི་བལ་རྒྱུ་ཅུང་འཇམ་པའི་ལུག་གསོ་ཚགས་བྱེད་ཚད་403ནས་1016བར་འཕར་བ། གྲོང་ཚོའི་མཉམ་སྡེབ་ཚོང་ཁང་གི་འཁོར་རྒྱུག་མ་དངུལ་2014ལོའི་སྒོར་ཁྲི་15ནས་སྒོར་ཁྲི་50བར་འཕར་བ། མི་ཐབས་ལ་བརྟེན་ནས་རྩྭ་འདེབས་པའི་རྒྱ་ཁྱོན་2014ལོའི་མུའུ་200ནས་མུའུ་1000ལྷག་ཙམ་བར་འཕར་ཡོད། ངལ་ནུས་ལྷག་མར་བཅིངས་འགྲོལ་ཐོབ་ཅིང་། ངལ་ནུས་ལྡན་པའི་མི་86ཁེར་རྐྱང་རྣམ་པའི་འབྲོག་ལས་ཐོན་སྐྱེད་ནས་བཅིངས་འགྲོལ་ཐོབ་སྟེ་ཐག་ཉེ་ས་དང་སྟབས་བདེ་སའི་འཛུགས་སྐྲུན་ལས་རིགས་དང་ཞབས་ཞུའི་ལས་རིགས་སོགས་སུ་ལས་ཞུགས་ཐུབ་པ་དང་། ཡོང་འབབ་རྐྱང་པ་ནས་སྣ་མང་ཅན་ལ་སྒྱུར་ཏེ་ངལ་ནུས་གཞན་སྒྱུར་བྱས་པར་ལོར་འབབ་འཕར་སྒོར་ཁྲི་127.8བྱུང་ཡོད། མང་ཚོགས་ཀྱི་འབབ་འཕར་འདུ་ཤེས་མངོན་གསལ་དོད་པོས་ཟབ་ཏུ་ཕྱིན་ཞིང་། རྩོལ་བསྟུན་ཐོབ་སྤྲོད་བྱས་པ་བརྒྱུད་རྒྱ་ཆེའི་འབྲོག་པ་མང་ཚོགས་ཀྱི་ངལ་རྩོལ་བྱེད་སེམས་ཆེ་རུ་དང་འབབ་འཕར་འདུ་ཤེས་ཟབ་ཏུ་སོང་ནས། སྔོན་ཆད་ཀྱི“སྒུག་བརྟེན་སློང”གསུམ་གྱི་བསམ་བློར་གཞི་རྩའི་ཆ་ནས་འགྱུར་ལྡོག་བྱུང་བ་དང་། འདྲ་མཉམ་དང་། གཉིས་ཕན། གཉིས་ཁེ་བཅས་ཀྱི་ཞི་མཐུན་གྱི་རྣམ་པ་ཞིག་གྲུབ་པ་མ་ཟད། མ་རྐང་ལ་ཞུགས་མཁན་ཚོར་ངལ་རྩོལ་གྱི་ཐོབ་ཆ་བརྒྱུད་ལོ་རེར་དུད་ཚང་རེར་ཆ་སྙོམས་ཁེ་སྤོགས་སྒོར་59856བགོ་བཤའ་རག་པ་དང་། ཁེ་སྤོགས་བགོ་བཤའ་མང་ཤོས་ལ་སྒོར་97892དང་ཉུང་ཤོས་ལ་སྒོར་19275རག་ཡོད།

རྒན་གསོ་དང་བྱིས་པའི་སློབ་གསོའི་འདུ་ཤེས་ཟབ་ཏུ་སོང་ཞིང་། “གཅིག་གྱུར་དྲུག”གི་གཉེར་སྐྱོང་བྱེད་སྟངས་གཞིར་བཟུང་། མི་ཧྲེང་རྒན་རྒོན་གཅིག་གྱུར་ཐོག་བསྙེན་བཀུར་དང་སློབ་གྲྭར་འགྲོ་མུས་ཀྱི་སློབ་མར་གཅིག་གྱུར་ཐོག་སྐར་ཐོ་འགོད་པའི་བྱེད་ཐབས་ལག་བསྟར་བྱས་ཏེ། གྲོང་ཚོ་ཡོངས་ཀྱི་མི་ཧྲེང་རྒན་རྒོན་ལ་ལོ་རེར་མི་རེར་ཆ་སྙོམས་སྒོར་6088བགོ་བཤའ་བརྒྱབ་པ་དང་། སློབ་གྲྭར་འགྲོ་མུས་ཀྱི་སློབ་མ་66ལ་ལོ་རེར་མི་རེར་ཆ་སྙོམས་སྒོར་1600བགོ་བཤའ་བརྒྱབ་པས“རྒས་དུས་འཚོ་རྟེན་ཡོད་པ་དང་བྱིས་པར་སློབ་མཁན་ཡོད་པ”བྱུང་ཡོད། རྩྭ་ར་བརྒྱུད་བཤུག་བཏང་བས“གཉིས་ཕན”མངོན་འགྱུར་བྱུང་ཞིང་། རྩྭ་ར་བརྒྱུད་བཤུག་བྱས་པ་བརྒྱུད་རྩྭ་ར་བེད་སྤྱོད་སྲུང་སྐྱོང་དང་འཛུགས་སྐྲུན་གྱི་འགན་འཁྲི་ཁ་གསལ་བཏོན་ཏེ་བེད་མེད་རྩྭ་ར་བེད་སྤྱོད་ནུས་ལྡན་ཐུབ་རྒྱུར་སྐུལ་འདེད་དང་། འབྲོག་ལས་ཐོན་སྐྱེད་ཀྱི་ཕན་འབྲས་ཆེ་རུ་ཤུགས་ཆེན་ཕྱིན་པ། བརྒྱུད་བཤུག་གཏོང་ཡུལ་དུད་ཚང་གི་དངུལ་སྨར་ཡོང་འབབ་མང་དུ་ཕྱིན་ནས་གྲོང་ཚོ་ཡོངས་སུ་རྩྭ་ར་བརྒྱུད་བཤུག་བཏང་བའི་ཡོང་འབབ་སྒོར་47935བྱུང་ནས་ལོ་རེར་དུད་ཚང་རེར་ཆ་སྙོམས་ཁེ་སྤོགས་སྒོར་3195.67རག་པ་དང་། སྒྱུར་བཅོས་ཀྱི་ཁེ་སྤོགས་མང་དུ་སོང་ནས་འབྲོག་པར་རྒྱུན་མཐུད་བརྟན་པོའི་ངང་འབབ་འཕར་བྱུང་ནས་དབུལ་སྒྲོལ་ཐུབ་ཡོད།