ལྷ་ས་ནས་ཉིང་ཁྲི་བར་གྱི་ལྕགས་ལམ་གྱི་ཨར་སྐྲུན་ལམ་དུ་སྤྱི་ལེ་400ལྷག་ཙམ་སྐྱོད་སྐབས། ས་བབ་མཐོ་ཚད་སྨི་3500ཙམ་གྱི་ལྷོ་ཁ་དང་ས་བབ་མཐོ་ཚད་སྨི་3000ཙམ་གྱི་ཉིང་ཁྲི་གཉིས་ཀའི་ལམ་བར་དུ་གངས་མ་ཆར་འབབ་བཞིན་འདུག་ཀྱང་ས་མཐོའི་ལྕགས་ལམ་བཟོ་སྐྲུན་པ་ཚོ་སྔར་བཞིན་ལས་ལ་བྲེལ་བཞིན་འདུག

ཚེས་5ཉིན་གསར་འགོད་པ་ལྷོ་ཁ་གྲོང་ཁྱེར་ཟངས་རི་རྫོང་གི་རིང་ཚད་སྤྱི་ལེ་8.7ཡོད་པའི་གཙང་ཁ་ཕུག་ལམ་དུ་སྐྱོད་སྐབས་བྲག་རྡོ་གཏོར་བའི་རྫས་དྲི་སྣ་ངོར་འཐུལ་གྱིན་འདུག ཕྱི་རོལ་དུ་ཁ་བའི་འདབ་མ་ལྷབ་ལྷུབ་ཏུ་བབས་ཀྱང་ཕུག་ལམ་དུ་ཚ་ཚ་འུར་འུར་གྱི་ལས་བྲེལ་རྣམ་པས་ཁེངས་འདུག ཕུག་ལམ་དུ་བཞའ་ཚན་ཆེ་བས་ཨར་པོ་བ་ཚོས་ཉིན་གང་ཆུ་ལྷམ་གྱོན་དགོས་ཀྱི་ཡོད།

ཕུག་ལམ་འདི་ཏལ་འབིགས་གཏོང་སྐབས་གས་སྲུབས་རིམ་པ་བདུན་བརྒྱུད་དགོས་པས། བཞའ་ཚན་ཆེ་བའི་ས་ཆ་དང་། ཉིལ་སླ་བའི་བྲག་ངོས། འཁྱགས་གོང་གི་ས་ཆ་སོགས་ཉེན་ཁ་ཆེ་བའི་ས་གཤིས་བརྒྱུད་དགོས་ཀྱི་ཡོད། ཀྲུང་གོ་ལྕགས་ལམ་ཅུས་ལྔ་པའི་ཚོགས་པ་ལྷ་ཉིང་ལྕགས་ལམ་ལས་གྲྭ་བཀོད་འདོམས་པུའི་སྤྱི་ཁྱབ་བཟོ་བཀོད་པ་དབྱེང་ཙེང་གིས“ཨར་ལས་བྱེད་རིང་སྨི་960ཟིན་པའི་འཁྱགས་གོང་འཕྲད་སྐབས་ང་ཚོས་སྔོན་ལ་སྐྱོར་བཟོས་ནས་ཨར་འདམ་གྱིས་ལུགས་རྒྱག་ཐབས་སྤྱད་དེ་གཏན་འཇགས་བཟོས་རྗེས་གཞི་ནས་སྔོག་གི་ཡོད། ལོ་གཉིས་ལྷག་ཙམ་རིང་དཀའ་གནད་འདི་ལས་སྒྲོལ་ཐབས་བྱས་པ་ཡིན”ཞེས་བཤད།

ཚེས་7ཉིན་གྱི་སྔ་དྲོར། གཙང་ཁ་ཕུག་ལམ་དང་ཉིང་ཁྲི་གྲོང་ཁྱེར་གྱི་སྨན་གླིང་ཕུག་ལམ་སྔ་རྗེས་སུ་ཏལ་འབིགས་ཐུབ་རྗེས། ལྷ་ཉིང་ལྕགས་ལམ་གྱི་སྤྱི་ལེ་216.5ཡི་ལམ་ཐིག་ཧྲིལ་པོའི་ཕུག་ལམ་47ཚང་མ་ཏལ་འབིགས་ཐུབ་པ། དེ་ཐོག་ནས་2021ལོར་མེ་འཁོར་ཤར་གཏོང་ཐུབ་རྒྱུ་བར་ཐག་ཇེ་ཉེར་ཕྱིན་པ་མཚོན་ཐུབ།

ལྷ་ཉིང་ལྕགས་ལམ་གྱི་ལམ་རྒྱུད་ཀྱི་90%ཡན་ས་བབ་སྨི་3000ཡན་གྱི་ས་མཐོར་གནས་པ་དང་། ཡར་ཀླུང་གཙང་པོ་འཕྲེད་བཅད་ཐེངས་16གཏོང་དགོས་པས་ཨར་ལས་ཀྱི་དཀའ་ངལ་ཆེ་ཙམ་ཡོད། ཏོག་གསར་གློ་ཚད་རིམས་ནད་ཐོན་པ་ནས་བཟུང་། ཚན་པས་རིམས་ནད་སྔོན་འགོག་དང་ཚོད་འཛིན་དང་ཨར་ལས་འཛུགས་སྐྲུན་ལ་སྤྱི་འདོམས་བྱས་ནས་ལས་གྲྭའི་འཕེལ་རིམ་བདེ་བླག་ཡོང་ཐབས་བྱས།

ཕུག་ལམ་ཏལ་འབིགས་གཏོང་རིང་འཛུགས་སྐྲུན་པ་ཚོས་ཟི་ཆིང་རྫས་སོགས་མང་པོ་འདུས་པའི་དུག་རླངས་ཁྲོད་དུ་ལས་ཀ་བྱེད་དགོས་ཤིང་། སྨན་གླིང་ཕུག་ལམ་ཏལ་འབིགས་གཏོང་རིང་བདེ་འཇགས་ལྟ་སྐུལ་ཚོད་འཛིན་མ་ལག་གིས་ཕུག་ལམ་ནང་གི་ཟི་ཆིང་རྫས་དང་། ཀ་ཝན། དབྱང་གཅིག་ཐཱན་འགྱུར་སོགས་དུག་རླངས་ཀྱི་གར་ཚད་དང་བཞུར་ཚད་སོགས་ལ་ཉིན་མཚན་དབྱེར་མེད་དུ་རང་འགུལ་ལྟ་དཔྱད་ཚད་ལེན་གྱིས་ཉེན་བརྡ་གཏོང་གི་ཡོད། ད་དུང་རླུང་འགྲོའི་སྒྲིག་ཆས་ལེགས་སུ་བཏང་ནས་ཆུ་ཚོད་ཉེར་བཞི་ཡི་རིང་རླུང་འཁོར་ཤུགས་ཆེན་བཏང་ནས་དུག་རླངས་འབུད་ཐབས་བྱེད་ཀྱི་ཡོད།

སྨན་གླིང་ཕུག་ལམ་ནི་ལམ་ཐིག་ཧྲིལ་པོའི་ཨར་སྐྲུན་གྱི་དཀའ་ཚེགས་ཆེ་ཤོས་ཀྱི་རིང་ཚད་སྨི་ཆིག་ཁྲི་ཟིན་པའི་ཕུག་ལམ་རིང་ཤོས་དྲུག་གི་གྲས་ཡིན་ཞིང་། ཆ་སྙོམས་ས་བབ་མཐོ་ཚད་སྨི་3100ཟིན་པ་དང་། ལམ་ཐིག་ཧྲིལ་པོར་སྨི་11560ཟིན་པ། ཕུག་ལམ་གཏིང་རིང་ཤོས་སྨི་1200ཙམ་ཟིན་སྟབས། དཀའ་ཚེགས་ཧ་ཅང་ཆེན་པོ་ཡོད། ཚེས་7ཉིན་གྱི་སྔ་དྲོ་སྔར་བཞིན་ཆར་སིམ་འབབ་བཞིན་ཡོད་རུང་། ཕུག་ལམ་ཏལ་འབིགས་ཐུབ་པའི་ཁོང་ཚོའི་སྤྲོ་སེམས་གང་གིས་ཀྱང་འགོག་ཐབས་མེད། ཁོང་ཚོས་སྐད་གསང་མཐོན་པོས“གཞི་ནས་ཏལ་འབིགས་ཐུབ་སོང”ཞེས་དགའ་འབོད་བྱས།

ཀྲུང་གོ་ལྕགས་ལམ་ཅུས་བཅུ་དགུ་པའི་ཚོགས་པ་ལྷ་ཉིང་ལྕགས་ལམ་ལས་གྲྭ་བཀོད་འདོམས་པུའི་བཀོད་འདོམས་པ་ཧོ་ཤུས་ཀྱིས“སྨན་གླིང་ཕུག་ལམ་གྱི་བྲག་གོང་གཏོར་བའི་ལམ་དུམ་གྱི་རིང་ཚད་སྨི་7500ཡོད་པ་དེས་ཕུག་ལམ་གྱི་སྤྱིའི་རིང་ཚད་ཀྱི་65%ཟིན་པ་དང་བདེ་འཇགས་ཀྱི་ཉེན་ཁ་ཧ་ཅང་ཆེན་པོ་ཡོད། ལྷག་དོན་དུ་སྨི་5000ལྷག་ཙམ་གྱི་འབར་གཏོར་ཆེན་པོ་བྱེད་པའི་ཨར་སྐྲུན་བྱེད་རིང་། བྲག་རྡོ་དེ་དག་གཞུ་ལས་བྲལ་བའི་མདའ་མོ་ལྟར་གློ་བུར་དུ་ལྷུངས་སྲིད་པས་འཛུགས་སྐྲུན་པ་ཚོའི་སྲོག་ལ་ཉེན་ཁ་ཧ་ཅང་ཆེན་པོ་ཡོད”ཅེས་བཤད།

“གཅིག གཉིས། གསུམ། ལས་རོགས་ཚོ་ཡར་བཏེགས”ཞེས་པའི་སྐད་གསང་མཐོན་པོའི་སྐད་སྒྲ་ཕུག་ལམ་དུ་བྲག་ཅ་འཁོར་བཞིན་འདུག ངལ་རྩོལ་བཟོ་པའི་པན་ཀྲང་རེན་སྨིན་གྱིས་ལས་མི་གསུམ་ཁྲིད་ནས་ལྕགས་ཁེབས་བཤུ་བཞིན་འདུག ཨར་འདམ་ལུགས་རྒྱག་བྱེད་དུ་སྤྱོད་པའི་ལྕགས་ཤོག་དེའི་ལྗིད་ཚད་རྒྱ་མ་200ཙམ་ཟིན་ཞིང་། ཕུག་ལམ་ནང་དྲོད་ཚད་མཐོ་བས་ལུས་པོ་ཡོངས་རྔུལ་ཆུས་འཚོས།

ཨར་སྐྲུན་གྱི་ཉམས་མྱོང་ཕུན་སུམ་ཚོགས་པའི་ཀྲུང་གོ་ལྕགས་ལམ་ཅུས་བཅུ་བདུན་པའི་ཀུང་སི་ལྔ་པའི་ལས་ཡུལ་གྱི་འགན་འཁུར་བ་ཀྲང་རུའེ་ཡིས་ལས་རོགས་ཚོ་དང་ཨར་སྐྲུན་ཇུས་གཞི་ཡག་ཤོས་གྲོས་བསྡུར་བྱེད་བཞིན་འདུག ཏོག་གསར་གློ་ཚད་རིམས་ནད་ཀྱི་ཤུགས་རྐྱེན་ཕོག་པའི་དབང་གིས་ལས་ཡུལ་ལ་དེ་སྔ་དངོས་ཟོག་མཁོ་སྤྲོད་ཛ་དྲག་པའི་དཀའ་གནད་འཕྲད་མོད། མིག་སྔར་རྒྱུན་གཏན་བཞིན་ལས་འགོ་འཛུགས་ཐུབ་ཡོད། ཉེ་དུས་ལས་མི་139ཙམ་གྱིས་ཆུ་ཡུར་བཟོ་བ་དང་གློག་འཁྲིད་བཞིན་འདུག

ཟམ་པ་དང་ཕུག་ལམ་གཅིག་རྗེས་གཉིས་མཐུད་ངང་བསྐྲུན་ཟིན་པ་དང་བསྟུན་ལྷ་ས་ནས་ཉིང་ཁྲིའི་ཕྱོགས་སུ་ལམ་ལྕགས་འདིང་བཞིན་ཡོད། “ཉེ་དུས་ང་ཚོས་ལམ་ལྕགས་འདིང་བཞིན་ཡོད། ཆེད་ལས་ཀྱི་ལྕགས་ལམ་བདག་སྐྱོང་སྒྲིག་ཆས་ཆེ་གྲས་ལ་བརྟེན་ནས་བཏིང་ཟིན་པའི་ལམ་ལ་བདག་སྐྱོང་བྱེད་སྐབས། ཉིན་རེར་ཆ་སྙོམས་སྤྱི་ལེ་གཅིག་ཙམ་བདག་སྐྱོང་བྱེད་པ་དང་། ལམ་ལྕགས་ཐེངས་800ཙམ་འགྱོགས་དགོས”ཀྲུང་གོ་ལྕགས་ལམ་ཅུས་བཅུ་གཅིག་པའི་ཀུང་སི་གསུམ་པའི་ལྷ་ཉིང་ལྕགས་ལམ་རྣམ་གྲངས་པུའི་སྤྱི་ཁྱབ་བཟོ་བཀོད་པ་གཞོན་པ་ཀྲོའུ་ཀྲི་ཆང་གིས་2018ལོའི་ཟླ་10པ་ནས་ལམ་ལྕགས་འདིང་འགོ་བཙུགས་ཚུན། མིག་སྔར་སྤྱི་ལེ་124.8ལ་ལམ་ལྕགས་བཏིང་ཟིན་པ་དང་། ཁྱོན་ལྕགས་གདུང་1562ཙམ་བཙུགས་ཡོད་ཅེས་བརྗོད།

ལྷ་ཉིང་ལྕགས་ལམ་གྱི་ལམ་ཐག་ཧྲིལ་པོའི་ས་གཤིས་རྙོག་འཛིང་ཆེ་ལ། ཟམ་པ་དང་ཕུག་ལམ་གྱིས་ལམ་ཐིག་ཧྲིལ་པོའི་བརྒྱ་ཆ་75%ཙམ་བཟུང་གི་ཡོད་ཀྱང་ཨར་སྐྲུན་གྱི་འཕེལ་རིམ་དང་སྤྱི་ཡོངས་ཀྱི་ལས་ཡུན་ལ་ཤུགས་རྐྱེན་ཐེབས་མེད། བོད་ལྗོངས་ལྕགས་ལམ་འཛུགས་སྐྲུན་ཀུང་སིའི་སྤྱི་ཁྱབ་ཅིང་ལི་གཞོན་པ་ཀྲུའུ་ཅིན་ཐང་གིས། འཛུགས་སྐྲུན་ཚན་པ་ཁག་ལ་ཚན་རྩལ་གྱི་འགག་སྒྲོལ་བྱེད་ཤུགས་ཆེ་རུ་བཏང་བས། བྱེ་རླུང་ལྡང་བ་དང་། སའི་ལྡོག་ཤུགས་ཆེ་བ། འཁྱགས་གོང་རིམ་ངོས་སོགས་ཀྱི་འཛམ་གླིང་རིམ་པའི་ཕུག་ལམ་ཨར་སྐྲུན་གྱི་དཀའ་གནད་ལས་སྒྲོལ་བ་དང་། ཨར་སྐྲུན་ལག་རྩལ་དང་དོ་དམ་ཉམས་མྱོང་མང་པོ་ཞིག་བསགས་ནས་ཁེ་བེད་བདག་ཐོབ་32ཙམ་རག་ཡོད། དེས་ཁྲོན་བོད་ལྕགས་ལམ(གཡག་རྔ་ནས་ཉིང་ཁྲིའི་ལམ་དུམ་བར)གྱི་རྗེས་མཐུད་ལས་འགོ་འཛུགས་སྐྲུན་ལ་ཉམས་མྱོང་མཁོ་འདོན་བྱེད་ཐུབ་ཅེས་བརྗོད།

ལྷ་ཉིང་ལྕགས་ལམ་ནི་རྒྱལ་ཁབ་ཀྱི“ལོ་ལྔ་ཚན་བཅུ་གསུམ་པའི”འཆར་འགོད་ཀྱི་གཙོ་གནད་ལས་གྲྭའི་རྣམ་གྲངས་ཤིག་ཡིན་ཞིང་། ལམ་ཐིག་ཧྲིལ་པོར་སྤྱི་ལེ་435ཡོད་པ་དང་ཆུ་ཚོད་རེར་མྱུར་ཚད་སྤྱི་ལེ་160འཆར་འགོད་བྱས་ཡོད། དེ་ནི་བོད་ཀྱི་གློག་རླངས་ཅན་གྱི་ལྕགས་ལམ་ཐོག་མ་དེ་རེད། ཟླ་4ཚེས་7ཉིན་བར་ལམ་ཐིག་ཧྲིལ་པོའི་ཕུག་ལམ་47ཚང་མ་ཏལ་འབིགས་ཐུབ་པ་དང་། ཟམ་པ་120ཡི་ནང་ནས་ཟམ་པ་119བསྐྲུན་ཟིན་ཏེ་སྔོན་དཔག་ལྟར་ན་འདི་ལོའི་ལོ་མཇུག་གོང་ལམ་ཐག་ཧྲིལ་པོར་ལམ་ལྕགས་བཏིང་ཚར་རྒྱུ་རེད།