ལྷོ་ཁ་གྲོང་ཁྱེར་ཟངས་རི་རྫོང་རོང་ཤང་འཕྲིན་པ་གྲོང་ཚོའི་ཉི་གཞོན་མུའུ་སྟོང་གི་སྡོང་ཕྲུག་དང་འབྲས་ཤིང་ར་བའི་རྟེན་གཞི་ཡར་ཀླུང་གཙང་འགྲམ་དུ་ཆགས་པ་དང་། ཁྱོན་མུའུ་1017ཡོད་པའི་རྟེན་གཞི་དེ་ནི་རྫོང་དེས་བཏོད་པའི་གཙོ་གནད་ལྗང་མདོག་དམངས་ཕྱུག་ཐོན་ལས་ཤིག་རེད། “དེ་སྔ་ས་ཆ་འདི་ནི་ཐང་རྒོད་ཅིག་རེད། རྗེས་སུ་ང་ཚོས་མ་དངུལ་སྒོར་ཁྲི་3000ལྷག་ཙམ་བཏང་ནས་སྒྱུར་བཀོད་དང་གསར་སྤེལ་བྱས་པ་བརྒྱུད་ད་ཆ་འདིར་སྔོ་འགྱུར་སྡོང་ཕྲུག་དང་། སྣོད་བཅུད་སྡོང་ཕྲུག དཔལ་འབྱོར་ནགས་ཤིང་དང་འབྲས་ཤིང་སྡོང་ཕྲུག་སོགས་སྣ་ཁ་48ཀྱི་སྡོང་ཕྲུག་རྐང་ཁྲི་88བཏབ་ཡོད། 2018ལོ་ཚུན་དུ་རྟེན་གཞིས་ཞིང་པར་གླ་ཆ་སྒོར་ཁྲི་600ལྷག་ཙམ་སྤྲད་དེ་དུད་ཚང་17གྱི་མི་64དབུལ་སྒྲོལ་བརྟན་པོ་ཡོང་རྒྱུར་སྣེ་ཁྲིད་བྱས་ཡོད”ཅེས་རྟེན་གཞིའི་འགན་འཁུར་བ་པ་སངས་ཟླ་བས་ངོ་སྤྲོད་བྱས་པ་རེད།

སྐྲ་བཟང་གི་ཁྱིམ་ནི་གྲོང་ཚོའི་ནང་གི་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་ཞིག་ཡིན་པ་དང་། ཉིན་ལྟར་རྟེན་གཞིར་ལས་ཀ་བྱེད་པར་འགྲོ་ཡི་ཡོད། སྐྲ་བཟང་གིས་ནས་དང་གྲོ་མུའུ་8བཏབ་པ་དང་ད་དུང་བ་གླང་9དང་ར་20ལྷག་ཙམ་གསོས་པས་ཞིང་འབྲོག་ལས་ཀྱི་ཡོང་འབབ་སྒོར་ཁྲི་2ཡོང་གི་ཡོད།ད་དུང་ཞིང་དལ་སྐབས་སུ་རྟེན་གཞིར་ཤིང་འཛུགས་དང་སྡོང་གསོ་བྱེད་རོགས་བྱས་པར་ཉིན་གཅིག་ལ་གླ་ཆ་སྒོར་150སྤྲོད་ཀྱི་ཡོད་པས་ལོ་གཅིག་ལ་བསྡོམས་ཡོང་འབབ་སྒོར་ཁྲི་6ལས་མི་ཉུང་བ་རག་གི་ཡོད།

ས་སྐྱེས་རྡོ་སྐྱེས་ཀྱི་འཕྲིན་པ་གྲོང་ཚོའི་གྲོང་མི་པ་སངས་ཟླ་བས་གསོ་སྦྱོང་སློབ་གྲྭ་དང་། ཨར་ལས་རུ་ཁག ཇ་ཁང་བཅས་གཉེར་སྐྱོང་བྱེད་མྱོང་ཡོད་ཀྱང་མཐར་ཁོང་གིས་སེམས་ཤུགས་དང་ལོ་མང་རིང་བསགས་པའི་མ་རྩ་ཚང་མ་ལྗང་མདོག་ཐོན་ལས་ཐད་བཏང་ཡོད། ཁོང་གིས“ལྗང་མདོག་ཐོན་ལས་ཀྱིས་བྱེ་འགོག་བྱེ་བཅོས་དང་སྣོད་བཅུད་སྲུང་སྐྱོང་ཐུབ་པ་མ་ཟད། ད་དུང་ཡུལ་མི་ཚོ་ཕྱུག་འགྱུར་སྣེ་ཁྲིད་ཐུབ་པས་འདི་ནི་འཕེལ་ཕྱོགས་ཤིག་རེད”ཅེས་བརྗོད།

འཆར་གཞི་བྱས་ན་རྟེན་གཞིས་འཚོང་བའི་སྣོད་བཅུད་སྡོང་ཕྲུག་ནི་ཤིང་འཛུགས་བྱེ་བཅོས་ཐད་སྤྱོད་རྒྱུ་དང་། འབྲས་ཤིང་སྡོང་ཕྲུག་གིས་མང་ཚོགས་ཕྱུག་འགྱུར་འབབ་འཕར་ཡོང་བ་བྱེད་པ། སྔོ་འགྱུར་སྡོང་ཕྲུག་དང་ཁམ་སྡོང་གཉིས་མཉམ་དུ་བཏབ་ཚེ་མཛེས་ལྗོངས་ཤིག་ཏུ་འགྱུར་གྱི་ཡོད། “དེའི་སྐབས་སུ་རྟེན་གཞིའི་རི་ལུང་གང་སར་མེ་ཏོག་གིས་ཁེངས་ངེས་རེད”ཅེས་དབང་འདུས་རྡོ་རྗེས་འབྱུང་འགྱུར་ལ་རེ་བས་ཁེངས་བཞིན་བཤད།

ཟླ་གསུམ་པའི་ཟླ་དཀྱིལ་ནས་བཟུང་ལྷོ་ཁའི་ས་གནས་ཁག་རིམ་བཞིན་ཤིང་འཛུགས་ནགས་བཟོའི་དུས་ཚིགས་སུ་སླེབས་ཡོད། འཆར་གཞི་ལྟར་འདི་ལོ་ལྷོ་ཁ་གྲོང་ཁྱེར་གྱིས་མུའུ་ཁྲི་4.68ལ་ཚེར་ཅན་ཚོས་སེར་སྡོང་པོ་དང་སྦྱར་ལྕང་སོགས་སྡོང་ཕྲུག་ཁྲི་98.56འཛུགས་རྒྱུ་ཡིན་པ་རེད།

ཕ་ཡུལ་གྱི་འགྱུར་ལྡོག་སྐོར་གླེང་སྐབས་གྲོང་མི་ཕུར་བུ་ཚེ་རིང་གིས“ལྗང་མདོག་ཐོན་ལས་འཕེལ་རྒྱས་ཕྱིན་ཚེ་རང་བྱུང་ཁོར་ཡུག་མཛེས་སུ་འགྲོ་བ་དང་ཕྱུག་འགྱུར་གྱི་ལམ་བུ་ཡངས་སུ་འགྲོ་ཐུབ”ཅེས་དགའ་ཚོར་ཆེན་པོས་བཤད།

“ཡར་ཀླུང་གཙང་འགྲམ་དུ་ཤིང་འཛུགས་བྱས་པ་དེས་ཐང་རྒོད་དང་བྱེ་དེའུ་ལྗང་མདོག་ཏུ་འགྱུར་ཡོད་ལ། ད་དུང་མི་སེར་ཕྱུག་པོའང་ཆགས་ཡོད”ཅེས་ལྷོ་ཁ་གྲོང་ཁྱེར་ནགས་ལས་དང་རྩྭ་ཐང་ཅུས་སྣོད་བཅུད་སྲུང་སྐྱོང་ཉམས་གསོ་ཁོའོ་ཡི་འགན་འཁུར་བ་བློ་བཟང་བསོད་ནམས་ཀྱིས་བརྗོད་ཅིང་། ཁོང་གིས། མིག་སྔར་གྲོང་ཁྱེར་ཡོངས་སུ་སྡོང་ཕྲུག་ར་བ་58ཡོད་པ་དེ་དག་གིས་ཉམས་མྱོང་ལྡན་པ་དང་། ལག་རྩལ་མཁས་པ། ལག་ལེན་ལ་མཐོང་ཆེན་བྱེད་པའི་ཞིང་པའི་བྱེ་བཅོས་དཔུང་ཁག་ཁག་གཅིག་གསོ་སྐྱོང་བྱས་ནས“སྔོ་འགྱུར་ནི་རྒྱུ་ནོར་ཡིན་པའི”འདུ་ཤེས་མི་སེམས་སུ་བརྟན་པོ་ཟུག་པ་བྱས་ཡོད་ཅེས་བརྗོད་པ་རེད།