སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱིས་སྤྱི་ཚོགས་ཡོངས་ལ་དབུལ་སྒྲོལ་འགག་སྒྲོལ་གྱི་བཀའ་རྒྱ་བཏང་ཡོད། “སྤྱི་ཁྱབ་ཧྲུའུ་ཅིའི་གསུང་བཤད་གལ་ཆེན་གྱིས་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ལ་སྐུལ་མ་ཆེན་པོ་ཐེབས་ཡོད”ཉིན་ཤས་རིང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དབུལ་སྒྲོལ་འགག་སྒྲོལ་དམག་འཐབ་ཀྱི་རྒྱལ་ཁ་ཕུ་ཐག་གཅོད་པའི་བཞུགས་མོལ་ཚོགས་འདུའི་ཐོག་གནང་བའི་གསུང་བཤད་གལ་ཆེན་ལ་རང་ལྗོངས་དང་ལྷག་པར་དུ་རྒྱ་ཆེའི་གཞི་རིམ་ལས་བྱེད་པའི་ཁྲོད་ཚུར་སྣང་ལན་ཆ་ཤུགས་ཆེན་བྱུང་ཞིང་། “སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱིས་དབུལ་སྒྲོལ་འགག་སྒྲོལ་གྱི་འཐབ་ས་དང་པོར་འབད་འཐབ་བྱེད་བཞིན་པའི་ང་ཚོ་གཞི་རིམ་གྱི་ལས་བྱེད་པར་སྐུལ་མ་ཤུགས་ཆེན་ཐེབས་བྱུང་། དབུལ་སྒྲོལ་བྱུང་བ་དེ་ཕྱུག་པ་ཆགས་པ་ཞིག་མིན་པ་དང་། དེ་བས་སྤུས་ལེགས་དང་དེ་བས་མཛེས་སྡུག་ལྡན་པའི་འཚོ་བ་སྐྱེལ་རྒྱུའི་མི་དམངས་མང་ཚོགས་ཀྱི་འདུན་པ་ཟམ་མི་ཆད་པར་ཆེ་རུ་འགྲོ་བཞིན་ཡོད་པས། ང་ཚོས་ལྷོད་གཡེང་སྤུ་ཙམ་མེད་པར་ལས་དོན་ཧུར་ཐག་སྒྲུབ་དགོས། རིམས་ནད་ཐོན་རྗེས། བོད་རང་སྐྱོང་ལྗོངས་ཀྱིས་ཧུའུ་པེར་ནུས་ཤུགས་ཡོད་རྒུས་རོགས་སྐྱོར་བྱས་པས་ཧུའུ་པེས་མངགས་པའི་བོད་སྐྱོར་ལས་བྱེད་པ་ཞིག་ཡིན་པའི་ང་ལ། བོད་རྒྱ་མི་དམངས་དབར་ལྟ་རེས་སྐྱོང་རེས་ཀྱི་མི་རིགས་ཀྱི་བརྩེ་སེམས་ཟབ་མོ་ཚོར་བྱུང་། ང་ཚོས་དྲིན་ཚོར་གྱི་བསམ་པ་འཆང་བཞིན་བོད་སྐྱོར་ཐོན་ཁུངས་སྤྱི་འདོམས་བྱས་ནས་བོད་ཀྱི་དབུལ་སྒྲོལ་འགག་སྒྲོལ་ལས་དོན་ཡག་པོ་བསྒྲུབ་རྒྱུའི་སེམས་ཤུགས་དེ་བས་ཆེ་རུ་ཕྱིན་སོང”ཞེས་ལྷོ་ཁ་གྲོང་ཁྱེར་འཕྱོངས་རྒྱས་རྫོང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ཁྲེན་ཡུང་ཐའོ་ཡིས་བཤད།
“སྤྱི་ཁྱབ་ཧྲུའུ་ཅིས་ཏང་ཀྲུང་དབྱང་གི་ཚབ་ཞུས་ནས་དབུལ་སྒྲོལ་འགག་སྒྲོལ་གྱི་འཐབ་ས་དང་པོའི་བློ་མཐུན་ཚོར་ལྷག་བསམ་ཟོལ་མེད་ཀྱི་འཚམས་འདྲི་གནང་བ་དེས་གཞི་རིམ་དུ་འབད་འཐབ་བྱེད་བཞིན་པའི་ང་ཚོ་ལས་བྱེད་པར་སྐུལ་མ་ཤུགས་ཆེན་ཐེབས་པ་མ་ཟད། ང་ཚོས་མང་ཚོགས་དང་མཉམ་དུ་དབུལ་སྒྲོལ་འགག་སྒྲོལ་གྱི་ལས་དོན་ཡག་པོ་བསྒྲུབ་རྒྱུའི་ཡིད་ཆེས་དང་ཆོད་སེམས་ཀྱང་དེ་བས་བརྟན་དུ་ཕྱིན་སོང”གཞིས་རྩེ་གྲོང་ཁྱེར་རྣམ་གླིང་རྫོང་ལྷ་བུ་ཕུ་ཤང་སྤད་གྲོང་ཚོར་བཅའ་སྡོད་རང་སྐྱོང་ལྗོངས་ཆུ་བེད་ཐིང་ས་ཆུ་སྲུང་འཛིན་ཅུས་ཀྱི་ལས་དོན་རུ་ཁག་དང་། གྲོང་ཚོའི“ཨུ་ལྷན་གཉིས” གྲོང་མིའི་འཐུས་མི་བཅས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་མཉམ་དུ་སློབ་སྦྱོང་བྱས་ཤིང་། ཁོང་ཚོས“བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་ཚད་མཐོའི་མཐོང་ཆེན་དང་རིམ་ཁག་ཏང་ཨུད་དང་སྲིད་གཞུང་གི་ཡང་དག་པའི་འགོ་ཁྲིད། གྲོང་ཚོའི་མང་ཚོགས་ཚོས་དཀའ་སྤྱད་འབད་འཐབ་བཅས་བྱས་པ་བརྒྱུད། གྲོང་མི་རྣམས་བདེ་སྐྱིད་ལྡན་པའི་འཚོ་བ་སྐྱེལ་ཐུབ་ངེས་ཡིན་པའི་ཡིད་ཆེས་བརྟན་པོ་ཡོད”ཅེས་བཤད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ད་ཡོད་ཀྱི་རོགས་སྐྱོར་སྲིད་ཇུས་སྤྱིའི་ཆ་ནས་བརྟན་པོ་ཡོང་བ་རྒྱུན་འཁྱོངས་བྱས་ཏེ། མུ་མཐུད་རོགས་སྐྱོར་ལས་དོན་སྤེལ་དགོས”ཞེས་ནན་བཤད་གནང་ཡོད། ཉེ་བའི་ལོ་ཤས་རིང་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ལེན་རྒྱུར་རོགས་སྐྱོར་བྱ་ཆེད། ཞིང་ལས་དངུལ་ཁང་བོད་ལྗོངས་ཡན་ལག་དངུལ་ཁང་གིས་ཡིད་རྟོན་དངུལ་བུན་གཏོང་ཤུགས་མང་དུ་བཏང་བ་དང་། དངུལ་རྩའི་ཞབས་ཞུའི་དྲ་རྒྱ་བརྟན་པོའི་ངང་སྣུར་སྲིང་བྱས་ཏེ། དངུལ་རྩའི་རོགས་སྐྱོར་ཐོན་རྫས་ཟམ་མི་ཆད་པར་གསར་གཏོད་བྱས་ཤིང་། ཞིང་ལས་དངུལ་ཁང་བོད་ལྗོངས་ཡན་ལག་དངུལ་ཁང་གི་འགན་ཁུར་བ་ལིང་ཆིང་གིས་འདི་ལོ་ཞིང་ལས་དངུལ་ཁང་བོད་ལྗོངས་ཡན་ལག་དངུལ་ཁང་གིས་དངུལ་རྩའི་དབུལ་སྐྱོར་དང“ཞིང་གསུམ”ལ་ཞབས་འདེགས་ཞུ་བའི་ལས་དོན་ལ་མུ་མཐུད་ཤུགས་སྣོན་རྒྱག་པ་དང་། བྱེད་པོའི་འགན་འཁྲི་སྔར་བས་ནན་དུ་གཏོང་བ། “མཚམས་འཇོག་མི་བྱེད་པ་བཞི”ཡི་སྲིད་ཇུས་དོན་འཁྱོལ་ནན་པོ་བྱེད་པ། ཡིད་རྟོན་དངུལ་བུན་གཏོང་ཤུགས་མུ་མཐུད་ཆེ་རུ་བཏང་བ་བཅས་བྱས་པར་བརྟེན། ཤིན་ཏུ་དབུལ་བའི་རྫོང་44ཡི་དངུལ་བུན་ལྷག་གྲངས་བསྡོམས་འབོར་དེ་དངུལ་ཁང་ཡོངས་ཀྱི་དངུལ་བུན་ཁག་གི་ཆ་སྙོམས་འཕར་ཚད་ལས་མཐོ་བ་ཡོད་ཅེས་བཤད།
སྒེར་རྩེ་རྫོང་གི་རྫོང་དཔོན་ཀྲོའུ་ཆོན་གྱིས་དབུལ་ཞྭ་ཕུད་པ་ནི་ཡོད་ཚད་ལ་རྫོགས་ཤད་འཐེན་པ་ཞིག་མིན་པར། དེ་ནི་འཚོ་བ་གསར་པ་དང་འབད་འཐབ་གསར་པའི་འགོ་འཛུགས་ས་ཡིན་ཞེས་སྤྱི་ཁྱབ་ཧྲུའུ་ཅིས་གསུངས་པ་ལྟར་རེད། 2020ལོར་ང་ཚོས་སྒྱུར་བཅོས་ཚོད་ལྟ་བྱེད་ཤུགས་ཆེ་རུ་བཏང་ནས་འབྲོག་ལས་ཐོན་སྐྱེད་ཀྱི་གཞི་ཁྱོན་ཆེ་རུ་གཏོང་བ་དང་། དབུལ་སྒྲོལ་འགག་སྒྲོལ་སྲ་བརྟན་དང་ལས་དོན་གྱི་ཆུ་ཚད་མཐོ་རུ་གཏོང་བ། མི་སེར་གྱི་དམངས་འཚོའི་དོན་དངོས་ཐག་གཅོད་བཅས་བྱས་ཏེ། མི་སེར་གྱི་དངུལ་ཁུག་ལྗིད་ཏིག་ཏིག་ཡོང་བ་དང་མི་དམངས་མང་ཚོགས་དེ་བས་མཛེས་སྡུག་ལྡན་པའི་འཚོ་བ་སྐྱེལ་ཐུབ་པ་བྱ་རྒྱུ་ཡིན་ཞེས་བཤད།