ཚེས་11ཉིན་རང་སྐྱོང་ལྗོངས་ཀྱི“ཐོག་མའི་བསམ་འདུན་མ་བརྗེད་པར་འགན་འཁྲི་བློ་ལ་བརྟན་པོར་འཆང་བའི”བརྗོད་དོན་གཙོ་བོའི་སློབ་གསོ་ཁག་གཉིས་པའི་སྐོར་སྐྱོད་མཛུབ་ཁྲིད་ཚོགས་ཆུང་གི་གསོ་སྦྱོང་ཚོགས་འདུ་ལྷ་སར་འཚོགས་ཏེ་བློ་མཐུན་ཁྲེན་ཤིས་ཀྱིས“ཐོག་མའི་བསམ་འདུན་མ་བརྗེད་པར་འགན་འཁྲི་བློ་ལ་བརྟན་པོར་འཆང་བའི”བརྗོད་དོན་གཙོ་བོའི་སློབ་གསོ་ཁག་གཉིས་པའི་ཀྲུང་དབྱང་མཛུབ་ཁྲིད་ཚོགས་ཆུང་དང་སྐོར་སྐྱོད་ལྟ་སྐུལ་མཛུབ་ཁྲིད་ཚོགས་ཆུང་གི་གསོ་སྦྱོང་ཚོགས་འདུའི་ཐོག་གནང་བའི་གསུང་བཤད་ཀྱི་དགོངས་དོན་བརྒྱུད་བསྒྲགས་སློབ་སྦྱོང་བྱས་ཤིང་། ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ལྗོངས་སྲིད་གྲོས་ཏང་ཙུའི་ཧྲུའུ་ཅི་ཏིང་ཡེ་ཤན་གྱིས“འདུ་ཤེས་བཞི”ཟབ་ཏུ་གཏོང་བ་དང་། “གདེང་ཚོད་བཞི”བརྟན་དུ་གཏོང་བ། “སྲུང་སྐྱོང་གཉིས”ཐུབ་པར་བྱེད་པ་བཅས་ཀྱི་ཆབ་སྲིད་ཀྱི་མཐོ་ཚད་ཐོག་ནས་ཆབ་སྲིད་ཀྱི་ཚུགས་གནས་མཐོ་རུ་ཏན་ཏིག་གཏོང་བ་དང་ཆབ་སྲིད་ཀྱི་འགན་འཁྲི་འཁུར་ཏེ་ཆབ་སྲིད་ཀྱི་སྤྲོ་སེམས་ཆེན་པོ་དང་བསམ་བློའི་ཉམས་འགྱུར་བཟང་པོའི་ཐོག་ནས་སྐོར་སྐྱོད་མཛུབ་ཁྲིད་ལས་དོན་ཡག་པོ་བསྒྲུབས་ཏེ་བརྗོད་དོན་གཙོ་བོའི་སློབ་གསོ་ཧྲིལ་པོ་འགོ་ཡོད་མཇུག་ཡོད་དང་ལས་དོན་སྒྲུབ་མཁས་པའི་འགན་ལེན་བྱེད་དགོས་པའི་ནན་བཤད་གནང་བ་རེད།
ཏིང་ཡེ་ཤན་གྱིས་བརྗོད་དོན་གཙོ་བོའི་སློབ་གསོའི་སྐོར་སྐྱོད་མཛུབ་ཁྲིད་བྱ་རྒྱུ་ནི་ཀྲུང་དབྱང་དང་ལྗོངས་ཏང་ཨུད་ཀྱིས་དཀྲིས་པའི་ཆབ་སྲིད་ཀྱི་འགན་འཁྲི་ལག་བསྟར་དོན་འཁྱོལ་བྱེད་པའི་ཞིབ་ཕྲའི་མཚོན་ཚུལ་དང་། གནད་དོན་དངོས་ཐག་གཅོད་ཏན་ཏིག་བྱས་ནས་མང་ཚོགས་ཀྱི་རེ་སྒུག་ཟབ་མོ་དང་འཚམ་པར་བྱེད་པའི་ཁ་ཚ་དགོས་གཏུག་གི་དགོས་མཁོ། བརྗོད་དོན་གཙོ་བོའི་སློབ་གསོར་དངོས་ཕན་ཐོབ་པར་བྱེད་པའི་འགན་ལེན་གལ་ཆེན་བཅས་རེད་ཅེས་བསྟན་གནང་བ་རེད།
ཏིང་ཡེ་ཤན་གྱིས་སྐོར་སྐྱོད་མཛུབ་ཁྲིད་ཚོགས་ཆུང་ཁག་གིས་ཕན་ཚུན་སློབ་སྦྱོང་དང་། སྤེལ་རེས། འབྲེལ་མཐུད་བཅས་བྱས་ཏེ་ཀྲུང་དབྱང་ལྟ་སྐུལ་མཛུབ་ཁྲིད་ཚོགས་ཆུང་གི་ལས་དོན་གྱི་བླང་བྱ་ལག་བསྟར་ནན་ཏན་དང་། ལྗོངས་ཏང་ཨུད་ཀྱི་བརྗོད་དོན་གཙོ་བོའི་སློབ་གསོ་ཁག་གཉིས་པའི《ལག་བསྟར་བསམ་འཆར》ལག་བསྟར་བྱས་ཏེ་འགན་འཁྲི་དང་འོས་འགན་གསལ་པོ་བཟོ་བ་དང་། འགན་འཁྲི་ནན་ཏན་འཁུར་བ། གླེང་ཕྱོགས་ཀྱི་ཁྲིད་སྟོན་ཡག་པོ་བྱེད་པ། གནོན་ཤུགས་བརྒྱུད་སྤྲོད་ནུས་ལྡན་དང་སྒུལ་ཤུགས་བསྣན་ཏེ་བརྗོད་དོན་གཙོ་བོའི་སློབ་གསོ་གཡོ་ཟོལ་མེད་པ་དང་། སྟོང་བཤད་མེད་པ། ཡོ་འཁྱོག་མེད་པ། ཕྱི་ཚུལ་ཙམ་དུ་མི་ལུས་པར་མི་དམངས་མང་ཚོགས་བློ་ཡིད་ཚིམ་པའི་ཕན་འབྲས་ཐོན་པའི་འགན་ལེན་བྱེད་དགོས།“ནན་པོ”དང“ཏན་ཏིག”ཐོག་ཤུགས་སྣོན་བརྒྱབ་ནས་བརྒྱུད་རིམ་ཚོད་སྐོར་དང་འབྲས་བུ་ཚོད་སྐོར་ཟུང་འབྲེལ་མཐའ་འཁྱོངས་བྱེད་པ་དང་། སྐོར་སྐྱོད་མཛུབ་ཁྲིད་དང་། སྐབས་འཕྲལ་འཐེན་བཤེར། བརྟག་ཞིབ་བཅར་གླེང་སོགས་ཀྱི་བྱེད་སྟངས་སྤྱད་དེ། གཞི་རིམ་དང་འཐབ་ས་དང་པོར་བསྐྱོད་ནས་སྐུལ་འདེད་མཛུབ་ཁྲིད་ལ་ཤུགས་སྣོན་ཏན་ཏིག་བརྒྱབ་སྟེ་ཐོན་བཟོ་ཡོད་པ་དང་། ཕྱོགས་ལྷུང་རང་བཞིན། མངོན་མེད་རང་བཞིན་བཅས་ཀྱི་གནད་དོན་འཕྲལ་དུ་ཐག་གཅོད་བྱས་ནས་ལས་ཀའི་གཙོ་གནད་དམ་འཛིན་གནད་འཁེལ་དང་། གཞི་རྩའི་བླང་བྱ་དོན་ཐོག་ཏུ་འཁྱོལ་བ། གནད་དོན་ཐག་གཅོད་སྐུལ་འདེད་གནད་འཁེལ་བཅས་བྱེད་དགོས། བརྗོད་དོན་གཙོ་བོའི་སློབ་གསོའི་ཁག་དང་པོའི་སྐོར་སྐྱོད་མཛུབ་ཁྲིད་ལས་དོན་གྱི་ཉམས་མྱོང་དཔྱད་གཞིར་གང་ལེགས་འཛིན་ཏེ་རང་གི་དོན་དངོས་དང་ཟུང་འབྲེལ་དམ་ཟབ་བྱེད་པ་དང་། ཏང་ཨུད（ཏང་ཙུའུ）ཀྱིས་ལས་དོན་སྤེལ་བར་དམ་པོར་བརྟེན་པ། འགོ་ཁྲིད་གཙོ་བོའི་ནུས་པ་འདོན་རྒྱུར་སྣང་ཆེན་བྱེད་པ། དམ་པ་དོན་གཉེར་གྱི་བསམ་བློར་བརྟེན་ཏེ་གསར་གཏོད་རང་བཞིན་གྱི་སྒོ་ནས་ལས་དོན་སྤེལ་བ། ནང་གནས་ཀྱི་ཆོས་ཉིད་ཁོང་དུ་ཆུད་པར་བྱེད་པ། མཛུབ་ཁྲིད་བྱ་རྒྱུར་གནད་སྨིན་སྐུལ་འདེད་གཏོང་བ་བཅས་བྱས་ཏེ་ལས་ཀའི་ཕན་འབྲས་ཆེ་རུ་གཏོང་དགོས། རང་ངོས་འཛུགས་སྐྱོང་མངོན་གསལ་དོད་པའི་གནས་བབ་ཐོག་འཇོག་རྒྱུ་མཐའ་འཁྱོངས་བྱས་ནས། རང་རྟོགས་དང་རང་འགུལ་ངང་སློབ་སྦྱོང་བྱེད་པ་དང་། མཛུབ་ཁྲིད་བླང་བྱར་བརྩི་སྲུང་ནན་པོ་ཞུ་བ། ལས་ཀའི་སྒྲིག་ཁྲིམས་ནན་པོ་སྲུང་བ། ཕྱོགས་བསྡུས་བྱང་ཚད་མཐོར་གཏོང་ཐད་ཤུགས་སྣོན་རྒྱག་པ། རང་ངོས་ཀྱི་ཉམས་སད་ཐེག་ཐུབ་པའི་བྱང་ཚད་ཐོག་ནས་བརྗོད་དོན་གཙོ་བོའི་སློབ་གསོ་གཏིང་ཟབ་ཏུ་གཏོང་བ་དང་། ནང་སེམས་ལ་ཟུག་པ། ཏན་ཏན་ཏིག་ཏིག་བཅས་ཡོང་བ་བྱེད་དགོས་པའི་ནན་བཤད་གནང་བ་རེད།