མི་སྣའི་རྒྱབ་ལྗོངས།

འཆི་མེད།　བུད་མེད།　1949ལོའི་ཟླ་10པར་སྐྱེས།　ད་ལོ་ལོ་70ལ་སླེབས་པ་དང་ཉིང་ཁྲི་གྲོང་ཁྱེར་སྨན་གླིང་རྫོང་བཀྲ་ཤིས་རབ་བརྟན་ཤང་འཐིམས་པ་རོང་གྲོང་ཚོའི་གྲོང་མི་ཞིག་ཡིན།　1959ལོར་བོད་ལ་དམངས་གཙོའི་བཅོས་སྒྱུར་མ་བྱས་གོང་འཆི་མེད་ཀྱི་ནང་མི་10པོ་ཚང་མ་ནི་བཀྲ་ཤིས་རབ་བརྟན་དགོན་གྱི“ནང་བཟན”ཡིན་པས་རང་ལུས་རང་དབང་མེད་པ་དང་།　ས་ཞིང་དང་སྒོ་ཕྱུགས་མེད་ལ་རྟག་ཏུ་ལྟོས་གྲོད་པ་མི་རྒྱགས་པ་དང་གོས་ཀྱིས་ལུས་མི་འཐུམ་པར་ཆུང་དུས་ནས་དགོན་སྡེར་ལས་ཀ་བྱེད་དགོས་ཀྱི་ཡོད།　དམངས་གཙོའི་བཅོས་སྒྱུར་བྱས་རྗེས་འཆི་མེད་ཀྱི་ཁྱིམ་ལ་ས་ཞིང་དང་སྒོ་ཕྱུགས་བགོས་པས་འཚོ་བ་ཇི་ཙམ་བསྐྱལ་བ་དེ་ཙམ་གྱིས་ཡག་ཏུ་ཕྱིན་ཡོད།　ད་ཆ་འཆི་མེད་ལ་ཚ་བོ་ཚ་མོ་མང་པོ་ཡོད་ལ་འཚོ་བའང་བདེ་སྐྱིད་ལྡན་པ་ཞིག་ཡོད།

བཀྲ་ཤིས་རབ་བརྟན་དགོན་ནི་ལོ་500ཡི་སྔོན་དུ་དགེ་འདུན་པ་བཀྲ་ཤིས་དང་རབ་བརྟན་གཉིས་ཀྱིས་བཀྲ་ཤིས་རབ་བརྟན་ཤང་དུ་ཕྱག་བཏབ་པ་ཞིག་ཡིན་ལ་བཀྲ་ཤིས་རབ་བརྟན་ཤང་དེ་ཡང་དགོན་མིང་ཡུལ་ལ་ཐོགས་པ་ཞིག་རེད།　དམངས་གཙོའི་བཅོས་སྒྱུར་མ་བྱས་གོང་དུ་བཀྲ་ཤིས་རབ་བརྟན་དགོན་གནས་ཡུལ་ཞོལ་པ་གྲོང་ཚོའི་གྲོང་མི་ཚང་མ་དགོན་སྡེའི་ཁོངས་སུ་གཏོགས་པས་འཚོ་བར་དཀའ་སྡུག་ཆེན་པོ་ཡོད།　1959ལོའི་ཟླ་8པར་སྨན་གླིང་རྫོང་དུ་དམངས་གཙོའི་བཅོས་སྒྱུར་ཚ་ཚ་འུར་འུར་ངང་བྱས་པ་དང་བཀྲ་ཤིས་རབ་བརྟན་དགོན་དུ“ངོ་རྒོལ་གསུམ་དང་གཙང་རྩིས་གསུམ”（ངོ་ལོག་ཟིང་འཁྲུག་ལ་ངོ་རྒོལ་དང་།　དམིགས་བསལ་དབང་ཆར་ངོ་རྒོལ།　བཤུ་གཞོག་ལ་ངོ་རྒོལ་དང་།　ཆབ་སྲིད་ཀྱི་གནོད་འཚེར་གཙང་རྩིས་དང་།　རིམ་དབྱེའི་གཉའ་གནོན་ལ་གཙང་རྩིས།　དཔལ་འབྱོར་བཤུ་གཞོག་ལ་གཙང་རྩིས）ཀྱི་ལས་འགུལ་སྤེལ་ཏེ་ས་ཞིང་དང་།　སྒོ་ཕྱུགས།　འབྲུ་རིགས།　ཁང་པ་དང་དེ་བཞིན་རྒྱུ་ནོར་བཅས་གཞུང་བཞེས་བཏང་ནས་ཞིང་འབྲོག་མང་ཚོགས་ལ་བགོས་པ་རེད།

སྨན་གླིང་རྫོང་ནས་རླངས་འཁོར་བསྡད་དེ་བཀྲ་ཤིས་རབ་བརྟན་གཙང་པོ་བརྒྱུད་ནས་ཆུ་ཚོད་1ཙམ་བསྐྱོད་ཚེ་བཀྲ་ཤིས་རབ་བརྟན་ཤང་འཐིམས་པ་རོང་གྲོང་ཚོར་སླེབས་ཤིང་།　མིག་མདུན་གྱི་གྲོང་ཚོ་དེ་གཙང་སྦྲ་དོད་ལ་གྲལ་སྒྲིག་པ་དང་།　ཚོན་མདངས་རྣམ་པར་བཀྲ་བའི་བོད་བཟོའི་ཁང་པའི་ཐོག་སྐར་ལྔའི་དར་དམར་ལྷབ་ལྷུབ་ཏུ་གཡོ་བཞིན་འདུག　འཆི་མེད་ཀྱི་ཁྱིམ་དུ་སྐྱོད་སྐབས་ཁོང་གིས་ཚ་བོ་ཁ་ཤས་དང་མཉམ་དུ་སྒོ་རའི་ནང་ཉི་མ་སྲོ་བཞིན་འདུག

འདི་ནི་འཆི་མེད（གཡོན་གྱི་གསུམ་པ）ནང་མི་ཚོ་སྒོ་རའི་ནང་ཅི་འཕྲོས་མོལ་འཕྲོས་བྱེད་པ་དང་ཉི་མ་སྲོ་བཞིན་པ།　

“དམངས་གཙོའི་བཅོས་སྒྱུར་མ་བྱས་གོང་དུ་ང་ཚོའི་མི་རབས་ཚང་མ་བཀྲ་ཤིས་རབ་བརྟན་དགོན་གྱི‘ནང་ཟན’རེད”ང་ཧ་གཉིད་གོ་བ་ནས་བཟུང་ངའི་གཅེན་པོ་5བཀྲ་ཤིས་རབ་བརྟན་དགོན་སྡེར་ལས་ཀ་བྱེད་པར་འགྲོ་དགོས་པས་ལོ་གཅིག་ལ་ཐེངས་ཁ་ཤས་ལས་ཐུག་རྒྱུ་མེད།　ང་ལོ་ན་ཆུང་བའི་རྐྱེན་གྱིས་ཕ་མ་གཉིས་དང་མཉམ་དུ་ནོར་ལུག་འཚོ་རོགས་བྱས་ནས་བསྡད།　སྐབས་དེར་ཉིན་གཅིག་ལ་ལྟོ་དུས་གཉིས་ལས་མེད་ཅིང་།　ཞོགས་པ་རྩམ་པ་དང་ཕྱི་དྲོར་བོད་གྲོའི་བག་ལེབ་ལས་མེད་ལ་ཟ་རིགས་ཚང་མར་ཚད་གཞི་ཡང་ཡོད”ཅེས་བགྲེས་སོང་འཆི་མེད་ཀྱིས་ཅོག་ཙེའི་ཐོག་གི་ཇ་ཕོར་ལ་མཛུབ་མོ་བཙུགས་ཏེ“ཁྱིམ་གྱི་ཕྲུ་གུ་རྒན་པ་ཚོས་སྤགས་ཇ་ཕོར་དོ་བཟའ་ཆོག་པ་དང་དེ་ལས་ཆུང་བ་ཚོས་སྤགས་ཇ་ཕོར་གང་ལས་བཟའ་ཆོག་གི་མེད”ཅེས་བརྗོད་བྱུང་།

“ང་ཚོ་ལོ་གཅིག་དུས་བཞི་ཚང་མ་སྦྲ་གུར་ནང་འཚོ་བ་སྐྱེལ་དགོས་ཀྱི་ཡོད།　ལམ་འགྲོ་རྒྱུགས་པའི་སྐབས་སུ་དགོན་པས་དབྱུག་པའི་པགས་པ་བསྒྲུགས་ནས་འབོལ་གདན་དང་ཉལ་ཆས་བཟོ་ཡི་ཡོད།　ང་ལོ་10ལ་མ་སླེབས་གོང་གོས་ཐུང་རྩ་བ་ནས་གྱོན་མྱོང་མེད་ལ་རས་ཞེས་པ་གང་ཡིན་པའང་ཤེས་ཀྱི་མེད།　ལུས་འཁྱག་པའི་སྐབས་སུ་ནང་མི་ཚང་མ་མཉམ་དུ་རུབ་ནས་སྡོད་པ་དང་ཆར་པ་བབས་པའི་སྐབས་བཞའ་ཚན་གྱིས་ཞོགས་པ་མལ་ལས་ལངས་དུས་གཟུགས་པོ་ཡོངས་བརློན་པར་གྱུར་གྱི་ཡོད།　སྐབས་དེ་དུས་ལུས་ལ་ནད་གཞི་ཕོག་ཚེ་དུག་ཡོད་མེད་བསམ་བློ་གཏོང་ལོང་མེད་པར་སྨན་རྩྭ་གང་བྱུང་དུ་བཏུས་ནས་བཟའ་ཡི་ཡོད།　མི་ཞིག་གིས་སྨན་རྩྭ་གང་བྱུང་དུ་བཟས་པས་སྲོག་ཤོར་བ་རེད་ཅེས་ཐོས་མྱོང་ཡོད།　གལ་ཏེ་ནད་གཞི་ཅུང་ལྕི་ཙམ་ཕོག་ཚེ་འཆི་གསོན་ལས་ལ་ལྟ་རྒྱུ་རང་རེད།　འབྲོག་རའི་བྲན་གཡོག་ཚང་མ་དེ་ལྟར་རེད།　སྐབས་དེ་དུས་ཀྱི་བུད་མེད་ཚོའང་ཕྲུ་གུ་སྐྱེས་རྗེས་ལམ་སེང་ཞིང་ལས་བྱེད་པར་འགྲོ་དགོས་ཀྱི་ཡོད”ཅེས་བགྲེས་སོང་འཆི་མེད་ཀྱིས་ཕྱིར་དྲན་བྱེད་བཞིན་དུ་བརྗོད་བྱུང་།

འཆི་མེད་ཀྱི་ཁྱིམ།

“ངའི་གཅེན་པོ་ཚོ་ལོ་8ལ་སླེབས་སྐབས་དགོན་པར་ལས་ཀ་བྱེད་པར་བསྐྱལ་གྱི་ཡོད།　ཁོང་ཚོ་དགོན་པར་ལས་ཀ་བྱེད་ཀྱི་ཡོད་ཀྱང་ལྟོས་གྲོད་པ་མི་རྒྱག་པ་དང་གོས་ཀྱིས་ལུས་མི་དྲོད་པ་མ་ཟད།　ད་དུང་རྟག་ཏུ་ཉེས་རྡུང་བཟེད་དགོས་ཀྱི་ཡོད།　ཐེངས་ཤིག་དགོན་པའི་དགེ་འདུན་པ་ཞིག་གིས་ངའི་གཅེན་པོ་གཅིག་ལ་ལམ་སེང་མར་རྡོག་7འདོན་དགོས་པའི་རེ་བ་བཏོན་ཡང་གཅེན་པོས་མར་རྡོག་6ལས་འདོན་ཐུབ་མེད་པས་དགེ་འདུན་པ་དེས་གཅེན་པོའི་དཔྲལ་བར་རྡོ་ཡང་ཡང་གཞུས་བྱུང་ཞེས་གཅེན་པོས་ང་ལ་བརྗོད་མྱོང་།　སྐབས་དེ་དུས་ཀྱི་རྨ་ཤུལ་ད་ལྟའང་གསལ་པོར་མཐོང་རྒྱུ་ཡོད”ཅེས་འཆི་མེད་ཀྱིས་མིག་ཆུ་འཕྱིས་བཞིན་དུ་མུ་མཐུད“ངའི་བསམ་པར་དཀའ་ངལ་དེ་དག་ཁྱད་བསད་ཀྱིས་གསོན་ཐུབ་ཙམ་བྱུང་བ་ནི་ལས་སླ་པོ་ཞིག་གཏན་ནས་མ་རེད་སྙམ་གྱི་འདུག　གཅུང་པོ་དང་གཅུང་མོ་སྐྱེས་དུས།　ངས་ཕ་མར་ང་ཚོ་ཐད་ཀར་ས་སྦས་མ་བཏང་བར་གསོ་དགོས་དོན་གང་ཡིན་ནམ་ཞེས་དྲིས་མྱོང་ཡོད”ཅེས་བརྗོད་བྱུང་།

“སྐྱུར་མོ་ཞིག་དང་མ་འཕྲད་ན་མངར་མོ་ཐམས་ཅད་ཅང་ཅང་ཡིན”ཞེས་པ་ནི་བགྲེས་སོང་འཆི་མེད་ཀྱིས་རྟག་ཏུ་བརྗོད་མང་ཤོས་ཀྱི་གཏམ་དཔེ་ཞིག་རེད།

1959ལོར་དམངས་གཙོའི་བཅོས་སྒྱུར་གྱི་དཔྱིད་རླུང་སྨན་གླིང་རྫོང་དུ་ལྡང་ཞིང་།　འཆི་མེད་ཀྱི་གཅེན་པོ་5དགོན་པ་ནས་ཕྱིར་འབྲོག་ཁྱིམ་དུ་ལོག　དེ་ནས་བཟུང་ནང་མི་ཆ་ཚང་མཉམ་འཛོམས་བྱུང་བ་རེད།

“སྐབས་དེ་དུས་ང་ཚོར་མི་ལུས་རང་དབང་ཐོབ་སྲིད་པ་བསམ་པའི་ཡུལ་ལ་འཁོར་མ་བྱུང་།　ང་ཚོ་ནང་མི་ཚང་མ་ཕན་ཚུན་གཅེས་འཛིན་གྱིས་གུ་དོག་པའི་སྦྲ་གུར་ནང་འཚོ་སྡོད་བྱེད་པའི་ཞོར་ལ་རྟག་ཏུ་གཅེན་པོ་དགོན་པས་བཟུང་མི་ཡོང་ངམ་སྙམ་པའི་སེམས་ཁྲལ་བྱེད་དགོས་ཀྱི་ཡོད།　ཛ་དྲག་པའི་ཟླ་གཅིག་རིང་ང་ཚོ་ཡར་ལངས་བཅིངས་འགྲོལ་ཐོབ་པ་དང་།　ང་ཚོར་ས་ཞིང་ཡོད་པ།　ང་ཚོ་རང་ཁྱིམ་རང་བདག་ཡིན་པ་སོགས་ཀྱི་གཏམ་བཟང་འབྲོག་རར་ཡང་ཡང་བསྒྲགས”ཞེས་འཆི་མེད་ཀྱིས་གསར་འགོད་པར་བརྗོད་བྱུང་།

“ཟླ་གཅིག་སོང་རྗེས།　ཕ་མ་གཉིས་ཀྱིས་ང་ཚོ་རི་ནས་བབས་ཏེ་གྲོང་ཚོར་ལོག　སྐབས་དེ་དུས་ལས་དོན་རུ་ཁག་གིས་ང་ཚོ་འབྲོག་པ་ཡིན་པར་དམིགས་ཏེ་ནོར་མགོ་གྲངས་60ལྷག་ཙམ་བགོས་པ་མ་ཟད།　ད་དུང་གྲོང་ཚོ་ནས་ང་ཚོར་ཁང་པ་ཞིག་སྤྲད་བྱུང”ཞེས་འཆི་མེད་ཀྱིས་དགའ་ཚོར་ཆེན་པོས་བརྗོད་བྱུང་།

འཆི་མེད་ཀྱིས་རང་ཁྱིམ་གྱི་སྒོ་རའི་ནང་དུ་ཚལ་འཁྲུ་བཞིན་པ།

སྐབས་དེ་དུས་ལས་དོན་རུ་ཁག་གི་ལས་སྒྲུབ་བྱ་ཡུལ་དུ་མའོ་ཀྲུའུ་ཞིའི་སྐུ་པར་ཞིག་བཀལ་ཡོད་པ་འཆི་མེད་ཀྱིས་བློ་ལ་གསལ་པོར་ངེས་ཡོད།　ཕ་མས་འཆི་མེད་ཁྲིད་དེ་ལས་དོན་རུ་ཁག་ལས་སྒྲུབ་བྱ་ཡུལ་ནས་བསྐྱོད་རིམ་བཞིན“མའོ་ཀྲུའུ་ཞིས་ང་ཚོ་སྡུག་བསྔལ་གྱི་གནས་ལས་བསྐྱབས་པ་དང་ང་ཚོར་རང་དབང་གནང་ཡོད།　ཁོང་གི་བཀའ་དྲིན་ལས་ང་ཚོར་ལྟོས་གྲོད་པ་རྒྱག་པ་དང་གོས་ཀྱིས་ལུས་དྲོད་པ་ཞིག་བྱུང་ཡོད།　དེར་བརྟེན་བུ་རང་གིས་ཁོང་ངེས་པར་དུ་བློ་ལ་བརྟན་པོར་ངེས་དགོས”ཞེས་ཡང་ཡང་བརྗོད་མྱོང་ཡོད།

དངོས་ནས་དུས་སྐབས་དེ་བརྒྱུད་མྱོང་བའི་འཆི་མེད་ཀྱིས་ཀྲུང་གོ་གུང་ཁྲན་ཏང་གིས་མ་གཏོགས་མི་སེར་ལ་བདེ་སྐྱིད་ལྡན་པའི་འཚོ་བ་གཏོད་མི་ཐུབ་པ་གསལ་པོ་རྟོགས་ཀྱི་ཡོད།　ལོ་19ལ་སླེབས་པའི་འཆི་མེད་ཀྱིས་ཏང་ནང་ཞུགས་པའི་འདུན་ཞུ་ཕུལ་ནས་རང་མོས་ངང་ཀྲུང་གོ་གུང་ཁྲན་ཏང་ནང་ཞུགས།　ལོ་20ལ་སླེབས་སྐབས་དངོས་སུ་གུང་ཁྲན་ཏང་ཡོན་ཞིག་ལ་གྱུར།　“སྐབས་དེ་དུས་ང་ནི་གྲོང་ཚོའི་ཏང་ཡོན་འབའ་ཞིག་དེ་ཡིན།　ངས་ཏང་དང་མའོ་ཀྲུའུ་ཞིར་ཡིད་ཆེས་བརྟན་པོ་བྱེད་ཀྱི་ཡོད།　ང་རང་ཏང་ནང་ཞུགས་པའི་ཉིན་དེ་ནས་བཟུང་བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་རྒྱུའི་སེམས་ཐག་བཅད་པ་ཡིན”ཞེས་གྲོང་ཚོའི་ཡུལ་དམག་གི་པན་ཀྲང་ཞིག་ནས་གྲོང་ཚོའི་ཏང་ཀྲི་པུའི་ཧྲུའུ་ཅི་གཞོན་པའི་བར་འཆི་མེད་ཀྱིས་བྱ་སྤྱོད་དངོས་ལ་བརྟེན་ནས་སྐད་ཆ་འདི་དོན་གཉེར་བྱས་ཡོད།　ད་ཆ་ཁོང་གིས་རང་ཉིད་ཀྱི་མྱོང་ཚོར་དངོས་དང་ཟུང་འབྲེལ་བྱས་ཏེ་བོད་རྙིང་པའི་སྡུག་བསྔལ་དང་བོད་གསར་པའི་བདེ་སྐྱིད་རྟག་ཏུ་བརྗོད་བཞིན་ཡོད།

འཆི་མེད་ཁྱིམ་གྱི་མོ་ཊ།

ཉིན་དགུང་ལ་སླེབས་ཉེའི་མཚམས་སུ་འཆི་མེད་ཀྱི་རེ་བའི་འོག་ང་ཚོ་ཁོང་གི་ཁྱིམ་དུ་དགུང་ཟས་བཟས་པ་ཡིན།　བོད་ཕག་གི་ཤ་དང་།　ཚགས་ཤ　བག་ལེབ་སོགས་ཟས་ཞིམ་ལེགས་པར་སྒྲིག་བྱུང་།　སྐབས་དེར་ཁོང་གིས“བག་ལེབ་འདི་སྐབས་དེ་དུས་དང་མི་འདྲ་བར་བྲོ་བ་ཞིམ་པོ་ཡོད།　སྐབས་དེ་དུས་ཀྱི་བག་ལེབ་ད་ཆ་ནོར་གྱི་གཟན་ཆག་ཏུ་གྱུར་ཡོད”ཅེས་དགོད་སློང་བཞིན་དུ་བརྗོད་བྱུང་།