2018ལོའི་ལོ་སྟོད་དུ། ལྗོངས་ཞིང་འབྲོག་ཚན་རིག་ཁང་གི་གྲོང་སྡོད་ལས་དོན་རུ་ཁག་གཞིས་རྩེ་གྲོང་ཁྱེར་ལྷ་རྩེ་རྫོང་ལྷ་རྩེ་གྲོང་རྡལ་དཔེ་ལེབ་གྲོང་ཚོར་བཅའ་སྡོད་བྱས་ཚུན། “ཏང་གི་ཚོགས་ཆེན་བཅུ་དགུ་པའི་དགོངས་དོན་སློབ་སྦྱོང་དང་། དྲིལ་བསྒྲགས། ལག་བསྟར་གཏིང་ཟབ་དང་། དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ལེན་རྒྱུར་རོགས་སྐྱོར། གྲོང་གསེབ་དར་རྒྱས་ཀྱི་འཐབ་ཇུས་ལ་སྐུལ་འདེད་གཏོང་བ”སོགས་ཀྱི་ལས་འགན་ཁག་བདུན་ལ་དམིགས་ནས་དཔེ་ལེབ་གྲོང་ཚོའི“ཨུ་ལྷན་གཉིས”ཀྱི་ཚན་ཁག་གི་ཁོངས་མིར་བརྟེན་པ་དང་། “དབུལ་སྐྱོར་དང་བློ་སྐྱོར་གལ་ཆེ་མཉམ་དུ་འཛིན་པ་དང་། རང་བརྟེན་དང་གཞན་བརྟེན་མཉམ་དུ་སྤེལ་བའི”རྩ་དོན་གཞིར་བཟུང་། དཔེ་ལེབ་གྲོང་ཚོའི་རྒྱ་ཆེའི་ཞིང་འབྲོག་མང་ཚོགས་ལ་མཐུན་སྒྲིལ་གྱིས་གྲོང་སྡོད་རོགས་སྐྱོར་ལས་དོན་ཏན་ཏིག་སྤེལ་བ་རེད།

བརྒྱུད་རོགས་ཁྲིད་གསུམ་གྱི་ནུས་པ་མངོན་གསལ་དོད་པ།

གྲོང་སྡོད་ལས་དོན་ལེགས་པར་སྒྲུབ་པའི་འགག་རྩ་ནི་གྲོང་ཚོའི“ཨུ་ལྷན་གཉིས”ཀྱི་ཚན་ཁག་གི་དཔུང་ཁག་འཛུགས་སྐྱོང་ལ་ཐུག་ཡོད། ཏང་གི་ཚོགས་ཆེན་བཅུ་དགུ་པ་དང་ལྗོངས་ཏང་ཨུད་སྐབས་དགུ་པའི་ཨུ་ལྷན་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་དང་། དྲིལ་བསྒྲགས། ལག་བསྟར་བཅས་ཡག་པོ་བྱེད་པར་གྲོང་ཚོའི“ཨུ་ལྷན་གཉིས”ཀྱི་ཚན་ཁག་ལ་འགན་འཁྲི་ལྕི་པོ་གཉིས་ཁུར་དགོས་པ་སྟེ། སྔོན་ལ་སློབ་སྦྱོང་དང་སློབ་སྦྱོང་གཏིང་ཟབ་ཐེངས་གཅིག་བྱེད་དགོས་པ་མ་ཟད། དྲིལ་བསྒྲགས་སྒྲོག་འགྲེལ་ནུས་ལྡན་བྱས་ཏེ་གྲོང་ཚོ་ཧྲིལ་པོས་སློབ་སྦྱོང་ལག་བསྟར་བྱེད་པའི་ཚ་རླབས་འཕྱུར་རྒྱུར་སྐུལ་འདེད་ཡང་གཏོང་དགོས། དེར་བརྟེན་གྲོང་སྡོད་ལས་དོན་རུ་ཁག་གིས《ཚོགས་ཆེན་བཅུ་དགུ་པ་དང་ལྗོངས་ཏང་ཨུད་སྐབས་དགུ་པའི་ཨུ་ལྷན་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སྐོར་གྱི་དཔེ་ལེབ་གྲོང་ཚོའི་གྲོང་སྡོད་ལས་དོན་རུ་ཁག་གི་སྒྲོག་འགྲེལ་ཇུས་གཞི》བཟོས་ཏེ། གྲོང་ཚོའི“ཨུ་ལྷན་གཉིས”ཀྱི་ཚན་ཁག་གིས་ཇི་མ་ཇི་བཞིན་དང་ཆད་ལུས་མེད་པར་སློབ་སྦྱོང་བྱ་རྒྱུ་སྒྲིག་འཛུགས་བྱས་ནས་གྲོང་ཚོའི“ཨུ་ལྷན་གཉིས”ཀྱི་ཚན་ཁག་གི་ཁོངས་མིས་སློབ་སྦྱོང་དང་གོ་བ་གཏིང་ཟབ་ལེན་ཐུབ་པ་དང་ཕྱོགས་ཡོངས་ནས་དོན་འཁྱོལ་ཐུབ་པའི་འགན་ལེན་བྱས་པ་རེད།

“དཔེ་ལེབ་གྲོང་ཚོའི‘ཨུ་ལྷན་གཉིས’ཀྱི་ཚན་ཁག་གི་རིག་གནས་ཀྱི་བྱང་ཚད་དང་ཆུ་ཚད་མཐོ་རུ་དང་ལས་ཀའི་འཇོན་ཐང་སྔར་བས་ཆེ་རུ་གཏོང་ཆེད། ང་ཚོ་ལས་དོན་རུ་ཁག་གིས་རྟག་ཏུ་དགོང་མོའི་དུས་ཚོད་སྤྱད་དེ་གྲོང་ཚོའི‘ཨུ་ལྷན་གཉིས’ཀྱི་ཚན་ཁག་གི་ཁོངས་མི་སྒྲིག་འཛུགས་བྱས་ནས་གྲོང་ཚོ་ཨུ་ལྷན་དུ་རང་སྐྱོང་ལྗོངས་ཀྱི‘གྲོང་ཚོའི(གྲོང་ལྷན)ལས་བྱེད་པའི་རིག་གནས་བྱང་ཚད་མཐོར་གཏོང་འདུ་འགོད’ཀྱི་ཆེད་སྤྱོད་བརྙན་ལམ་སློབ་ཁྲིད་ཡོ་ཆས་སྤྱད་དེ་མཛུབ་ཁྲིད་བྱེད་ཀྱི་ཡོད”ཅེས་ལིན་པིན་གྱིས་བརྗོད། བརྒྱུད་རོགས་ཁྲིད་གསུམ་གྱི་ནུས་པ་འདོན་སྤེལ་བྱེད་པ་ཕུད། ད་དུང་གྲོང་སྡོད་ལས་དོན་རུ་ཁག་གིས་རྩ་འཛུགས་ཀྱི་འཚོ་བའི་ཚོགས་འདུ་དང་། ཏང་ཡོན་ལ་དམངས་གཙོའི་དཔྱད་མོལ་གྱི་ཚོགས་འདུ་སོགས་འཚོག་རྒྱུར་མཛུབ་ཁྲིད་བྱས་པ་དང་ཆབས་ཅིག དཔེ་ལེབ་གྲོང་ཚོ་རང་སྐྱོང་ལྗོངས་རིམ་པའི་སྣོད་བཅུད་ཤེས་དཔལ་གྲོང་ཚོར་གཏོད་པའི་ཡིག་ཐོག་སྙན་ཞུ་འབུལ་བའི་ལས་དོན་ལ་རོགས་སྐྱོར་སོགས་བྱས་ཡོད་པ་རེད།

གཞན་ཡང་། གནད་སྨིན་དབུལ་སྒྲོལ་དང་གྲོང་གསེབ་དར་རྒྱས་ཀྱི་འཐབ་ཇུས་ལག་ལེན་བསྟར་རྒྱུར་སྐུལ་འདེད་མགྱོགས་མྱུར་བཏང་ནས་མཛེས་སྡུག་ལྡན་པའི་གྲོང་གསེབ་འཛུགས་སྐྲུན་ལ་སྐུལ་འདེད་མགྱོགས་མྱུར་གཏོང་ཆེད། ད་དུང་གྲོང་སྡོད་ལས་དོན་རུ་ཁག་གིས་ཞིང་འབྲོག་ཚན་རིག་ཁང་དང་ཚན་རྩལ་ཐིང་གི་གྲོང་སྡོད་བྱ་ཡུལ་གྲོང་ཚོ་ཁག་གཅིག་གི“ཨུ་ལྷན་གཉིས”ཚན་ཁག་གི་ཁོངས་མི་10ལྷག་ཙམ་ཉེ་ཆར་ནང་སར་ལྟ་སྐོར་དང་སློབ་སྦྱོང་ལ་མངགས་ཏེ་གྲོང་ཚོའི་ལས་བྱེད་པའི་མཐོང་རྒྱ་ཆེ་རུ་དང་། བསམ་ཕྱོགས་རྒྱ་སྐྱེད། སྒུལ་ཤུགས་འཕེལ་བ། ཉམས་མྱོང་དཔྱད་གཞིར་འཛིན་རྒྱུ་བཅས་ལ་རོགས་རམ་བྱས་ཏེ་གྲོང་ཚོའི་་གྲོང་དོན་དོ་དམ་ཞབས་ཞུར་ཤུགས་སྣོན་རྒྱག་པ་དང་། གྲོང་ཚོ་ཡོངས་ཀྱི་ཞིང་འབྲོག་པའི་སྣེ་ཁྲིད་དེ་དབུལ་སྒྲོལ་ཕྱུག་འགྱུར་གྱིས་འབྱོར་འབྲིང་ཕྱོགས་སུ་སྐྱོད་པའི་ཕྱོགས་བསྡུས་འཇོན་ཐང་ཆེ་རུ་བཏང་ཡོད་པ་རེད།

མང་ཚོགས་ཀྱི་སེམས་ཁྲལ་བསལ་བ་དང་། དགོས་མཁོ་བསྐངས་པ། དཀའ་གནད་ཐག་གཅོད་བྱས་པ།

གྲོང་སྡོད་ལས་དོན་རུ་ཁག་གིས་དམངས་འཚོར་དོ་ཁུར་བྱས་ནས་དཔེ་ལེབ་གྲོང་ཚོའི་ཞིང་འབྲོག་མང་ཚོགས་ཀྱི་སེམས་ཁྲལ་བསལ་བ་དང་། དགོས་མཁོ་བསྐངས་པ། དཀའ་གནད་ཐག་གཅོད་བཅས་བྱས་པ་རེད། དཔེ་ལེབ་གྲོང་ཚོའི་ཞིང་ནང་ཆུ་བེད་ཀྱི་རྨང་གཞིའི་སྒྲིག་བཀོད་རྗེས་ལུས་ཐེབས་པ་དང་ཞིང་ནང་ཆུ་འདྲེན་འགན་ལེན་མེད་པར་དམིགས་ནས་གྲོང་སྡོད་ལས་དོན་རུ་ཁག་གིས་ལྷ་རྩེ་རྫོང་ཆུ་བེད་ཅུས་དང་འབྲེལ་གཏུག་དང་མཐུན་སྦྱོར་ཧུར་ཐག་བྱས་པས་དཔེ་ལེབ་གྲོང་ཚོའི་ཞིང་ལས་སྐྱེ་དངོས་ཀྱི་དཔྱིད་རྨོད་ལ་དཔྱིད་ཆུ་གཏོང་བའི་གནད་དོན་ཐག་གཅོད་བྱས་པ་རེད།

ན་ནིང་ཟླ་བརྒྱད་པར། དཔེ་ལེབ་གྲོང་ཚོར་ལོ་20ལྷག་ཙམ་ནང་འཕྲད་པར་དཀའ་བའི་ཆུ་ལོག་གི་གནོད་འཚེ་ཚབས་ཆེན་ཐོན་སྐབས། གྲོང་སྡོད་ལས་དོན་རུ་ཁག་གིས་གནོད་འཚེ་ཕོག་པའི་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་ལ་འགན་ལེན་བྱ་ཆེད། གྲོང་ཚོའི“ཨུ་ལྷན་གཉིས”དང་མཉམ་དུ་རྒྱ་ཆེའི་ཏང་ཡོན་མང་ཚོགས་འབྲུབ་འགོག་དང་། ཆུ་ལོག་སྔོན་འགོག གེགས་སེལ་བཅས་ཀྱི་ལས་དོན་ཁག་ནང་རྒྱ་ཁྱབ་ངང་ཞུགས་རྒྱུ་སྒྲིག་འཛུགས་བྱས་ཏེ་དུས་ཐོག་ཏུ་མང་ཚོགས་གནས་སྤོ་དང་། ནུས་ཤུགས་ཡོད་རྒུས་ཉེན་སེལ་གེགས་སེལ། གནོད་འཚེ་ཕོག་པའི་མང་ཚོགས་བཀོད་སྒྲིག ཉེན་ཁར་མ་འཛེམས་པར་གནོད་འཚེ་ཕོག་པའི་མང་ཚོགས་ཀྱི་ཕྱུགས་ཟོག་དང་། ཞིང་ལས་ཡོ་བྱད། ཁྱིམ་ཆས་སོགས་རྒྱུ་ནོར་སྤོ་རོགས་བཅས་བྱས་པས་དཔེ་ལེབ་གྲོང་ཚོའི་གྲོང་མི་དང་ཕྱུགས་ཟོག་གཅིག་ཀྱང་ཤི་རྨས་བྱུང་མེད་ལ་གྲོང་སྡོད་བྱ་ཡུལ་མང་ཚོགས་ཀྱི་བློ་གཏད་བཅོལ་ས་དང་སྙིང་ཉེ་བ་ཡག་པོ་ཞིག་བྱེད་ཐུབ་ཡོད་པ་རེད།

དམངས་ཀྱི་ཆེད་དུ་ཁེ་ཕན་དོན་གཉེར་དང་རེ་བ་ཡག་པོ་བསྐངས་པ།

ལོ་གཅིག་རིང་། གྲོང་སྡོད་ལས་དོན་རུ་ཁག་གིས་མང་ཚོགས་ལ་བརྩེ་སེམས་བཅངས་པ་དང་དམངས་འཚོ་འཕེལ་རྒྱས་ལ་དོ་ཁུར་བྱས་ཤིང་། དཔེ་ལེབ་གྲོང་ཚོའི་དཔྱིད་རྨོད་དཔྱིད་འདེབས་བདེ་བླག་ཡོང་བའི་འགན་ལེན་བྱ་ཆེད། གྲོང་སྡོད་ལས་དོན་རུ་ཁག་གིས་མངགས་གཏོང་ཚན་པ་ལྗོངས་ཞིང་འབྲོག་ཚན་རིག་ཁང་དང་གཤམ་འོག་ཞིབ་འཇུག་སུའོ་ཁག་གི་རྒྱབ་སྐྱོར་བརྩོན་ལེན་ཧུར་ཐག་བྱས་ཏེ་དཔེ་ལེབ་གྲོང་ཚོར་གཅིན་རྒྱུ་ཏུན་11སྤྲད་པ་མ་ཟད། རིན་ཐང་སྒོར་ཁྲི་10ཙམ་རི་བའི་ནས་ཀྱི་སོན་བཟང“ཧི་མ་ལ་ཨང་22པ”དང་། “བོད་ནས་2000”གི་སོན་བཟང་། པད་ཁའི་སོན། ཡུ་གུའི་སོན་སོགས་གཏོང་འདྲེན་བྱས་ནས་ཞིང་ལས་ཐོན་སྐྱེད་ཀྱི་སོན་བཟང་བདེ་འཇགས་ངང་སྤྱོད་ཐུབ་པའི་འགན་ལེན་བྱས་ཡོད། དཔྱིད་རྨོད་ཐོན་སྐྱེད་ཀྱི་ནམ་དུས་དང་དེ་བཞིན་ཞིང་ལས་སྐྱེ་དངོས་སྐྱེས་མཚར་དུས་སུ། རུ་མི་ཚོས་ཞིང་ནང་དུ་བསྐྱོད་དེ་ལག་རྩལ་མཛུབ་ཁྲིད་དང་། དོ་སྣང་བྱེད་དགོས་པའི་དོན་ཚན་གསལ་འགྲེལ་། འདེབས་འཛུགས་འཕྲུལ་ཆས་ཉམས་བཟོ་སོགས་ཐད་ཀྱི་ཤེས་བྱ་བསླབས་པ་རེད།

གཞན་ཡང་། གྲོང་སྡོད་ལས་དོན་རུ་ཁག་གིས་ཆེད་ལས་ཞིང་འབྲོག་པ་གསར་པའི་གསོ་སྦྱོང་ལས་དོན་ལ་དམ་འཛིན་ཡག་པོ་བྱས་ཏེ་མངགས་གཏོང་ཚན་པ་ལྗོངས་ཞིང་འབྲོག་ཚན་རིག་ཁང་གསོ་སྦྱོང་ཁྲུའུ་དང་མཐུན་སྦྱོར་ཧུར་ཐག་བྱས་ཏེ་དཔེ་ལེབ་གྲོང་ཚོའི་གྲོང་མི་13ལྷ་སའི་གྲོང་གསེབ་ཕྱུགས་ནད་སྨན་པའི་སྲོག་ཆགས་ཀྱི་འགོ་ནད་འགོག་བཅོས་གསོ་སྦྱོང་འཛིན་གྲྭར་འདེམས་གཏོང་བྱས་པས་དཔེ་ལེབ་གྲོང་ཚོའི་གྲོང་གསེབ་ཀྱི་ཕྱུགས་ནད་སྨན་པའི་ཞབས་ཞུའི་རུ་ཁག་རྒྱ་སྟོབས་ཆེ་རུ་ཕྱིན་ཡོད་ལ་དཔེ་ལེབ་གྲོང་ཚོའི་འབྲོག་ལས་སྐྱོན་བྲལ་ངང་འཕེལ་རྒྱས་འགྲོ་ཆེད་རྨང་གཞི་བརྟན་པོ་བཏིང་ཡོད་པ་རེད།