“འདུ་ཤེས་བཞི”བརྟན་པོ་བཙུགས་ཏེ་ཚོགས་ཆེན་བཅུ་དགུ་པའི་ཐོག་གཏན་འཁེལ་བྱས་པའི་འཐབ་ཇུས་དམིགས་ཚད་ཁག་འབད་བརྩོན་ཆེན་པོས་མངོན་འགྱུར་བྱེད་དགོས།
ཚེས་19ཉིན་གྱི་སྔ་དྲོ་ཏང་གི་ཚོགས་ཆེན་བཅུ་དགུ་པར་ཞུགས་མཁན་རང་ལྗོངས་ཀྱི་འཐུས་མི་ཚོགས་པས་ཚོགས་ཆུང་ཁག་བགོས་ཀྱིས་བློ་མཐུན་ཞི་ཅིན་ཕིང་གི་སྙན་སྒྲོན་ལ་མུ་མཐུད་གྲོས་བསྡུར་གནང་བ་རེད། ཚང་མས་ངེས་པར་དུ་སྙན་སྒྲོན་གྱི་དགོངས་དོན་སློབ་སྦྱོང་ནན་ཏན་དང་། དྲིལ་བསྒྲགས་ཡག་པོ། ལག་བསྟར་ཡག་པོ། དོན་འཁྱོལ་ཡག་པོ་བཅས་བྱས་ཏེ་ཚོགས་ཆེན་བཅུ་དགུ་པའི་དགོངས་དོན་གྱི་མཛུབ་ཁྲིད་འོག་ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པར་འབད་བརྩོན་ཧུར་ཐག་བྱེད་དགོས་ཞེས་མགྲིན་གཅིག་ཏུ་གསུངས་པ་རེད།
འཐུས་མི་ཏིང་ཡེ་ཤན་དང་། ཀྲོང་ཡན། ནོར་བུ་དོན་གྲུབ། ཝང་གཡུང་ཅུན། ཙེང་དབན་མིང་། སྤེན་པ་བཀྲ་ཤིས། པད་མ་དབང་འདུས་བཅས་ཀྱིས་སྔ་རྗེས་སུ་གཏམ་བཤད་གནང་བ་རེད།
འཐུས་མི་ཏིང་ཡེ་ཤན་གྱིས་བློ་མཐུན་ཞི་ཅིན་ཕིང་གི་སྙན་སྒྲོན་གྱིས་རྒྱུན་འཛིན་དང་གསར་གཏོད་ཟུང་འབྲེལ་དང་། རིགས་པའི་གཞུང་ལུགས་དང་ལག་ལེན་ཟུང་འབྲེལ། དེང་དང་ཕུགས་ཟུང་འབྲེལ། རྒྱལ་སྤྱི་དང་རྒྱལ་ནང་ཟུང་འབྲེལ་བཅས་བྱ་རྒྱུ་མཐའ་འཁྱོངས་བྱས་ནས་གནས་བབ་གསར་པ་གཏན་འཁེལ་དང་། འགལ་ཟླ་གསར་པ་སྟངས་འཛིན། རྒྱང་སྐྱོད་ལམ་བུ་གསར་པ་འཆར་འགོད། འདུ་འགོད་གསར་པར་སྐུལ་འདེད། དགོངས་པ་གསར་པ་རྒྱས་བཤད་བཅས་བྱ་རྒྱུ་དེ་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ཆེན་འཛུགས་སྐྲུན་བྱེད་པའི་བསྒྲགས་གཏམ་དང་སྐུལ་སློང་གི་བཀའ་རྒྱ་ཞིག་རེད། ང་ཚོས་ངེས་པར་དུ“འདུ་ཤེས་བཞི”བརྟན་པོ་བཙུགས་ཏེ་སྤྱི་ཁྱབ་ཧྲུའུ་ཅིའི་སྲོག་ཤིང་གི་གནས་བབ་དང་དབང་གྲགས་ལ་སྲུང་སྐྱོང་མཐའ་གཅིག་ཏུ་བྱས་ནས་ཚོགས་ཆེན་གྱི་དགོངས་དོན་དང་ལྷག་པར་དུ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་ལག་བསྟར་གཏིང་ཟབ་བྱེད་པ་དང་། བསམ་ཕྱོགས་དང་བྱེད་ཐབས་གསར་གཏོད་བྱེད་པ། སྒྱུར་འཕེལ་བརྟན་གསུམ་གྱི་རྣམ་པ་གསར་པ་ཟམ་མི་ཆད་པར་གསར་གཏོད་བྱ་རྒྱུར་ནུས་ཤུགས་ཡོད་རྒུས་སྐུལ་འདེད་གཏོང་བ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་བོད་གསར་གྱི་བྱ་གཞག་ཁག་གི་གནས་ཚད་གསར་པ་ཟམ་མི་ཆད་པར་གཏོད་རྒྱུར་སྐུལ་འདེད་གཏོང་བ་བཅས་བྱས་ཏེ་འཕེལ་རྒྱས་མྱུར་པོ་དང་ཡུན་རིང་བདེ་འཁོད་གསར་པར་བརྟེན་ནས་སྤྱི་ཁྱབ་ཧྲུའུ་ཅི་དང་ཏང་ཀྲུང་དབྱང་ལ་ལྷག་བསམ་ཟོལ་མེད་མཐའ་གཅིག་ཏུ་བྱེད་དགོས་ཞེས་གསུངས་པ་རེད།
འཐུས་མི་ཀྲོང་ཡན་གྱིས་སྙན་སྒྲོན་ནང་དར་ཆ་མཐོན་པོར་བསྒྲེངས་པ་དང་། བརྗོད་དོན་གཙོ་བོ་མངོན་གསལ་དོད་པ། ཚན་རིག་དང་མཐུན་པའི་བརྡར་ཤ་བཅད་པ། རྣམ་པ་གསར་པ་འཆར་འགོད་བཅས་བྱས་ཡོད་པས་བསམ་བློ་བཅིངས་འགྲོལ་དང་། དམ་པ་དོན་གཉེར། དུས་བསྟུན་འཕེལ་རྒྱས། གསར་འབྱེད་གསར་གཏོད་བཅས་ཀྱི་སྙན་སྒྲོན་ཡག་པོ་ཞིག་དང་། དུས་རབས་ཀྱི་རླབས་རྒྱུན་དང་མཐུན་པ་དང་། ཏང་ཡོངས་ཀྱི་བློ་སྟོབས་མཚོན་པ། མི་དམངས་ཀྱི་འདུན་པ་མཚོན་པ་བཅས་ཀྱི་སྙན་སྒྲོན་ཡག་པོ་ཞིག ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རླབས་ཆེན་རྒྱལ་ཁ་ལེན་པའི་ཆབ་སྲིད་ཀྱི་བསྒྲགས་གཏམ་ཞིག ཏང་ཡོངས་དང་རྒྱལ་ཡོངས་མི་དམངས་སྐུལ་སློང་བྱས་ནས་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་བྱེད་པའི་བྱ་སྤྱོད་ཀྱི་རྩ་འཛིན་ཞིག་བཅས་རེད། ང་ཚོས་ངེས་པར་དུ་སྲོག་ཤིང་ལ་གོང་བཀུར་དང་ལྷག་བསམ་ཟོལ་མེད་མཐའ་གཅིག་ཏུ་བྱེད་པ་དང་། ངེས་པར་དུ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པར་བརྟེན་ནས་བསམ་བློར་དྲག་ཆས་སྤྲས་ཏེ་ལས་དོན་ལ་མཛུབ་ཁྲིད་བྱེད་པ། ངེས་པར་དུ་འཕེལ་རྒྱས་ཀྱི་དུས་མཚམས་རང་བཞིན་གྱི་ཁྱད་ཆོས་ཁོང་དུ་བརྟན་པོར་ཆུད་པ་བྱེད་པ། ངེས་པར་དུ་ཕྱོགས་ཡོངས་ནས་ཏང་ནན་པོས་སྐྱོང་བ་བཅས་བྱས་ཏེ་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་ལ་ལྷག་བསམ་ཟོལ་མེད་མཐའ་གཅིག་ཏུ་བྱེད་པའི་བྱ་སྤྱོད་དངོས་ཀྱི་ཐོག་ནས་བོད་འཕེལ་རྒྱས་མྱུར་པོ་དང་ཡུན་རིང་བདེ་འཁོད་ལ་སྐུལ་འདེད་གཏོང་དགོས་ཞེས་གསུངས་པ་རེད།
འཐུས་མི་ནོར་བུ་དོན་གྲུབ་ཀྱིས་བློ་མཐུན་ཞི་ཅིན་ཕིང་གི་སྙན་སྒྲོན་ནང་དར་ཆ་མཐོན་པོར་བསྒྲེངས་པ་དང་སྤྱི་ཡོངས་ལ་སྤྱི་འདོམས་བྱས་ནས་ཏང་ཀྲུང་དབྱང་གི་སྲོག་ཤིང་དང་ཏང་ཡོངས་ཀྱི་སྲོག་ཤིང་ཡིན་པའི་སྤྱི་ཁྱབ་ཧྲུའུ་ཅིའི་ཕུལ་དུ་བྱུང་བའི་འགོ་ཁྲིད་ཀྱི་ཐབས་རྩལ་དང་གཟིགས་རྒྱང་རིང་བའི་ཆབ་སྲིད་ཀྱི་ངེས་ཤུགས་གང་ལེགས་མཚོན་པ་དང་། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་ཕྱོགས་གང་ལེགས་མཚོན་པས་ཆབ་སྲིད་རང་བཞིན་དང་། བསམ་བློའི་རང་བཞིན། མཛུབ་ཁྲིད་རང་བཞིན་བཅས་ཧ་ཅང་ཆེན་པོ་ལྡན་པས་ང་ཚོས་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་མཐའ་འཁྱོངས་དང་འཕེལ་རྒྱས་གཏོང་རྒྱུར་མདུན་སྐྱོད་ཀྱི་ཁ་ཕྱོགས་གསལ་སྟོན་གནང་ཡོད། ང་ཚོས“འདུ་ཤེས་བཞི”བརྟན་པོ་བཙུགས་ཏེ་སྲོག་ཤིང་ལ་མཐའ་གཅིག་ཏུ་གོང་བཀུར་དང་། ཡིད་ཆེས། ལྷག་བསམ་རྣམ་དག སྲུང་སྐྱོབ་བཅས་བྱས་ཏེ་ཏང་གི་ཚོགས་ཆེན་བཅུ་དགུ་པའི་དགོངས་དོན་མཛུབ་ཁྲིད་དུ་བྱས་ནས་ལས་དོན་ཁག་ལ་དམ་འཛིན་ཡག་པོ་བྱེད་པ་དང་། ཤིན་ཏུ་དབུལ་པོའི་ས་ཁུལ་གྱི་དབུལ་སྒྲོལ་འགག་སྒྲོལ་གྱི་དམག་འཐབ་དྲག་པོའི་ནང་གི་དྲག་པོ་དེར་རྒྱལ་ཁ་མཐའ་གཅིག་ཏུ་བླངས་ཏེ་མི་རིགས་ཁག་གི་མང་ཚོགས་དབུལ་སྒྲོལ་ཕྱུག་འགྱུར་ཐུབ་ནས་འབྱོར་འབྲིང་ཕྱོགས་སུ་བསྐྱོད་རྒྱུར་ཁྲིད་སྟོན་བྱས་ཏེ་ཏང་གི་ཚོགས་ཆེན་བཅུ་དགུ་པས་གཏན་འཁེལ་བྱས་པའི་འཐབ་ཇུས་ཀྱི་དམིགས་ཚད་ཁག་མངོན་འགྱུར་ཐུབ་རྒྱུར་འབད་བརྩོན་བྱེད་དགོས་ཞེས་གསུངས་པ་རེད།
འཐུས་མི་ཝང་གཡུང་ཅུན་གྱིས་ཞི་ཅིན་ཕིང་གི་རུལ་རྒོལ་གཙང་སྤེལ་གྱི་འཐབ་ཇུས་དགོངས་པ་ནི་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པའི་གྲུབ་ཆ་གལ་ཆེན་ཞིག་ཡིན་པས་དུས་རབས་གསར་པའི་ཏང་འཛུགས་སྐྱོང་ལ་སྣེ་འཁྲིད་བྱེད་པའི་རླབས་ཆེའི་འདུ་འགོད་གསར་པ་ཞིག་དང་ཕྱོགས་ཡོངས་ནས་ཏང་ནན་སྐྱོང་གཏིང་ཟབ་ཀྱི་ཕྱོགས་སུ་སྐུལ་འདེད་གཏོང་བའི་སྣེ་ཁྲིད་ཀྱི་ལམ་སྟོན་སྒྲོན་མེ་དང་བྱ་སྤྱོད་ཀྱི་ཕྱོགས་སྟོན་དུ་གྱུར་ངེས་རེད། ཕྱོགས་ཡོངས་ནས་ཏང་ནན་སྐྱོང་ལྷོད་གཡེང་གཏན་ནས་གཏོང་མི་རུང་བ་དང་མཚམས་གཏན་ནས་འཇོག་མི་རུང་བར་ང་ཚོས་ངེས་པར་དུ“འདུ་ཤེས་བཞི”བརྟན་པོ་བཙུགས་ནས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པས་བསམ་བློར་དྲག་ཆས་སྤྲས་ནས་རྒྱུན་སྲིང་ལྷོད་མེད་ངང་སྤྱོད་བཟང་སྒྲིག་ནན་ཡོང་བ་བྱས་ཏེ་དུས་བདེ་ཞོད་འཇགས་ཡོང་བ་བྱེད་དགོས་ཞེས་གསུངས་པ་རེད།
འཐུས་མི་ཙེང་དབན་མིང་གིས་བློ་མཐུན་ཞི་ཅིན་ཕིང་གི་སྙན་སྒྲོན་ཧྲིལ་པོ་ནས“གསར་པ”མངོན་ཡོད། སྙན་སྒྲོན་དེས་འཕོ་འགྱུར་གསར་པ་ཕྱོགས་སྡོམ་བྱས་པ་དང་། དུས་རབས་གསར་པ་བཏོན་པ། འགལ་བ་གསར་པ་བསྟན་པ། དགོངས་པ་གསར་པ་གཏན་འཁེལ་བྱས་པ། དམིགས་ཚད་གསར་པ་ཁ་གསལ་བཟོས་པ། མཛད་ཇུས་གསར་པ་རྒྱས་བཤད་བྱས་པ། ལས་འགན་གསར་པ་བཀོད་སྒྲིག་བྱས་པ་བཅས་ནི་ཏང་འཕེལ་རྒྱས་ཀྱི་ལོ་རྒྱུས་རང་བཞིན་གྱི་ལེགས་སྐྱེས་ཤིག་རེད། གོམ་སྟབས་རྗེས་མར་ང་ཚོས་ཚོགས་ཆེན་བཅུ་དགུ་པའི་དགོངས་དོན་སློབ་སྦྱོང་དང་ལག་བསྟར་བྱ་རྒྱུ་དེ་མདུན་གྲལ་དུ་སླེབས་པ་བྱེད་པ་དང་མིག་དཔེ་བཟང་པོ་སྟོན་ཏེ་ཕྱོགས་ཁག་གི་ལས་དོན་ཡག་པོ་སྒྲུབ་ཐོག་བྱ་སྤྱོད་དངོས་ཀྱི་ཐོག་ནས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་ཐུགས་ཁུར་དང་བྱམས་སྐྱོང་ལ་དྲིན་ལན་འཇལ་དགོས་ཞེས་གསུངས་པ་རེད།
འཐུས་མི་སྤེན་པ་བཀྲ་ཤིས་ཀྱིས་བློ་མཐུན་ཞི་ཅིན་ཕིང་གི་སྙན་སྒྲོན་དེ་མཐོ་གཟིགས་འོག་བསྐྱངས་དང་དགོངས་པ་གཏིང་ཟབ་པས་ཆབ་སྲིད་རང་བཞིན་དང་། རིགས་པའི་གཞུང་ལུགས་ཀྱི་རང་བཞིན། གསར་གཏོད་རང་བཞིན། རྒྱུན་འཛིན་རང་བཞིན། མི་དམངས་རང་བཞིན། ལག་ལེན་རང་བཞིན་བཅས་ཧ་ཅང་ཆེན་པོ་ལྡན་ཏེ་དེང་རབས་ཀྲུང་གོའི་མར་ཁེ་སིའི་རིང་ལུགས་ཀྱི་རྩ་འཛིན་རང་བཞིན་གྱི་ཡིག་ཆ་ཞིག་དང་ཏང་ཡོངས་ཀྱི་བསམ་བློ་གཅིག་གྱུར་གྱི་ཚད་ལྡན་བསླབ་གཞི་ཞིག་རེད། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་མེད་ཚེ་བོད་ཀྱི་ད་ལྟའི་ཞི་མཐུན་བརྟན་ལྷིང་གི་དུས་བབ་གསར་པ་ཡོང་མི་སྲིད་པ་ང་ཚོར་མྱོང་ཚོར་ཟབ་མོ་བྱུང་། ང་ཚོར་རླབས་ཆེན་གྱི་ཏང་དེ་འདྲ་ཞིག་ཡོད་པར་གཟི་བརྗིད་བླ་ན་མེད་པ་ཞིག་ཚོར་བ་དང་མཁས་མཛངས་ལྡན་པའི་སྲོག་ཤིང་དེ་འདྲ་ཞིག་ཡོད་པར་སེམས་དབུས་ནས་སྤོབས་པ་སྐྱེ་གི་འདུག ང་ཚོས“འདུ་ཤེས་བཞི”བརྟན་པོ་བཙུགས་ཏེ་སྤྱི་ཁྱབ་ཧྲུའུ་ཅིའི་སྲོག་ཤིང་གི་གནས་བབ་སྲུང་སྐྱོང་མཐའ་གཅིག་ཏུ་བྱེད་པ་དང་འདུ་ཤེས་འཛིན་སྟངས་ཀྱི་ལས་དོན་ཡག་པོ་བསྒྲུབ་སྟེ་ནུས་ཤུགས་ཡོད་རྒུས་ཏང་གི་ཚོགས་ཆེན་བཅུ་དགུ་པའི་དགོངས་དོན་སློབ་སྦྱོང་དང་། དྲིལ་བསྒྲགས། ལག་བསྟར། དོན་འཁྱོལ་བཅས་ཡག་པོ་བྱེད་དགོས་ཞེས་གསུངས་པ་རེད།
འཐུས་མི་པད་མ་དབང་འདུས་ཀྱིས་ལོ་ལྔའི་རིང་སྤྱི་ཁྱབ་ཧྲུའུ་ཅིའི་མཐའ་སྐྱོང་བོད་བརྟན་གྱི་འཐབ་ཇུས་དགོངས་པ་གལ་ཆེན་གྱི་མཛུབ་ཁྲིད་འོག་ལྷ་ས་གྲོང་ཁྱེར་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་བ་དང་། མི་རིགས་ཁག་གི་མང་ཚོགས་ཚོས་ཕན་པ་གང་ནས་བྱུང་བ་དང་སུ་ལ་ཕན་པ་ཐོབ་པ་གསལ་རྟོགས་གཏིང་ཟབ་ཐུབ་སྟེ་སེམས་གཏིང་ནས་དེ་བས་རང་རྟོགས་ངང་སྲོག་ཤིང་ལ་གོང་བཀུར་དང་། ཡིད་ཆེས། ལྷག་བསམ་རྣམ་དག སྲུང་སྐྱོབ་བཅས་བྱས་ཏེ་དེ་བས་རང་རྟོགས་ངང་ཏང་གི་བཀའ་དྲིན་ཚོར་བ་དང་། ཏང་གི་བཀའ་ལ་ཉན་པ། ཏང་གི་རྗེས་སུ་འབྲང་བ་བཅས་བྱེད་དགོས། ང་ཚོས་ངེས་པར་དུ“འདུ་ཤེས་བཞི”བརྟན་པོ་བཙུགས་ནས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱས་ནས་ཐོག་མའི་བསམ་འདུན་མ་བརྗེད་པ་དང་འགན་འཁྲི་སེམས་ལ་བརྟན་པོ་ངེས་ཏེ་འཕེལ་རྒྱས་དང་། བརྟན་ལྷིང་། སྣོད་བཅུད་བཅས་ཀྱི་དོན་ཆེན་གསུམ་ལ་དམ་འཛིན་ཡག་པོ་བྱས་ཏེ་ལྷ་སའི་འཕེལ་རྒྱས་མྱུར་པོ་དང་ཡུན་རིང་བདེ་འཁོད་ཀྱི་རྣམ་པ་གསར་པ་རྒྱུན་ཆད་མེད་པར་གཏོད་དགོས་ཞེས་གསུངས་པ་རེད།
འགན་འཁུར་རྩོམ་སྒྲིག་པ། 索朗多拉
བོད་ལྗོངས་ཉིན་རེའི་ཚགས་པར་གྱི་པར་དབང་རང་བདག་ཡིན་པས་གན་རྒྱ་དང་དབང་ཆ་སྤྲད་མེད་ཚེ་དྲ་ཐོག་ནས་ཕབ་མི་ཆོག
སྡོད་གནས། བོད་རང་སྐྱོང་ལྗོངས་ལྷ་ས་གྲོང་ཁྱེར་རྡོ་སེང་གེ་ལམ་སྒོ་ཨང་༣༦ སྦྲག་ཨང། ༨༥༠༠༠༠ ཁ་པར། ༠༨༩༡-༦༣༣༡༠༨༩ བརྙན་སྐྱེལ། ༠༨༩༡-༦༣༣༡༠༨༩
བཟོ་མཁན་ལས་ཁུངས། ཀྲུང་གོའི་བོད་ཀྱི་གསར་འགྱུར་དྲ་ཚུགས།
ཐོ་བདག་ཨང་། བོད་ICPཐོ་ཨང་༠༩༠༠༠༧༣༣