འབྲས་སྤུངས་ཀྱི་གོས་སྐུ་ཆེ་མོ་ནི་དང་ཐོག་འབྲས་སྤུངས་གདན་རབས་བརྒྱད་པ་འཇམ་དབྱངས་དགའ་བློའམ་རྗེ་ལེགས་པ་ཆོས་འབྱོར་བས་ཞལ་བཀོད་དང་སྣེའུ་རྫོང་དཔོན་ནམ་མཁའ་བཟང་པོའི་ཡང་ཚ་སྣེའུ་དཔོན་ངག་དབང་བསོད་ནམས་ལྷུན་པོ་དང་གཅུང་པོ་ངག་དབང་བསོད་ནམས་རྣམ་རྒྱལ་གྱིས་སྦྱིན་བདག་བྱས་ཏེ་བོད་རབ་བྱུང་བཅོ་བརྒྱད་པའི་ཆུ་གླང་ལོ་སྟེ་སྤྱི་ལོ་1493ལོར་གོས་སྐུ་ཆེ་མོ་གསར་བཞེངས་ཀྱིས་གླང་ཆེན་སྣ་ཞགས་བརྐྱང་འདྲའི་ནུབ་རིའི་ལྡེབས་སུ་འགྲེམས་སྟོན་གནང་གི་ཡོད། ཕྱིས་ཏཱ་ལའི་བླ་མ་སྐུ་ཕྲེང་ལྔ་པའི་སྐབས་ནས་དེ་དང་ཆབས་ཅིག་ཚོགས་ཆེན་ཞལ་ངོ་གསར་རྙིང་བརྗེས་ཏེ་ཏཱ་ལའི་བླ་མའི་འབྲས་སྤུངས་བཅའ་ཡིག་ཆེ་མོ་ཡང་རྩིས་སྤྲོད་བྱེད་ཀྱི་ཡོད་པས་ད་ལྟའི་བར་ལོ་ངོ་520ཙམ་གྱི་ལོ་རྒྱུས་ལྡན། ཚོད་དཔག་བྱས་ན་ད་ལྟའི་གོས་སྐུར་ཞེང་ཚད་སྨི་33དང་མཐོ་ཚད་སྨི་40ཡོད་ཅིང་། ཞིབ་ཕྲའི་འགྲེམས་ཐབས་ནི་ལོ་ལྟར་བོད་ཟླ་དྲུག་པའི་གནམ་གང་ཉིན་གྱི་ཞོགས་པ་རི་རྩེར་ཉི་ཟེར་ཕོག་སྐབས། དགེ་འདུན་པ་ཚོས་འབྲས་སྤུངས་ཚོགས་ཆེན་འདུ་ཁང་ནས་སྤོས་སྣ་དང་བཅས་གོས་སྐུ་ཕྲག་སྟེང་དུ་གདན་ཞུ་བྱས་ཏེ། དགོན་པའི་ནུབ་ཕྱོགས་ཀྱི་གོང་གསལ་རི་བོའི་ངོས་སུ་བཀྲམས་ནས་ཁྲུས་གསོལ་རབ་གནས་གནང་བ་དང་དད་ལྡན་པ་ཚོས་ཞལ་མཇལ་ཞུ་བ་དང་གཞས་ཕུད་འབུལ་བ་སོགས་བྱས་རྗེས། སླར་ཡང་ཚོགས་ཆེན་འདུ་ཁང་དུ་གདན་འདྲེན་ཞུ་གི་ཡོད། འོན་ཀྱང་དེང་སང་འགྲེམས་པའི་གོས་སྐུ་དེ་ནི་ཕྱིས་སུ་བཞེངས་པ་ཞིག་ཡིན་པ་ལས་དང་ཐོག་གི་གོས་སྐུ་དེ་མིན་པར་གྲགས།