ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བ་དང་བོད་ལ་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བར་རྟེན་འབྲེལ་ཞུ་ཆེད་དང་། མཐའ་མཚམས་གྲངས་ཉུང་མི་རིགས་ས་ཁུལ་གྱི་རིག་གནས་འཚོ་བ་སྔར་བས་ཕུན་སུམ་ཚོགས་སུ་བཏང་ནས། བོད་ཀྱི་མི་རིགས་ཁག་གི་མི་དམངས་རྣམས་བོད་སྐད་དཔར་མའི་རྒྱལ་གཅེས་རིང་ལུགས་བརྗོད་བྱའི་གློག་བརྙན་པར་གཞི་དུས་གཅིག་ཏུ་བལྟ་ཐུབ་པ་བྱས་ཏེ། རྟ་དབྱངས་གཙོ་བོའི་གློག་བརྙན་གྱི་སྟོན་མོ་དུས་གཅིག་ཏུ་མྱོང་རོལ་ཐུབ་པ་དང་། རང་རེའི་རྒྱལ་ཁབ་ཀྱི་ཕུལ་བྱུང་གློག་བརྙན་གྱི་ཁྱབ་སྤེལ་བྱེད་ཚད་དང་ཤུགས་རྐྱེན་ཐེབས་ཚད་རྒྱ་ཆེར་གཏོང་བ་བཅས་བྱ་ཆེད། བོད་རང་སྐྱོང་ལྗོངས་གློག་བརྙན་སྤྱི་པའི་ཞབས་ཞུ་ལྟེ་གནས་ཀྱིས་རང་ཉིད་ཀྱི་ལེགས་ཆ་འདོན་སྤེལ་བྱས་ཏེ་གློག་བརྙན་སྒྲིག་བཟོ་ཕྱོགས་དང་འབྲེལ་བ་ལེགས་པར་བྱས་ནས། ཏང་དབུ་བརྙེས་ནས་ལོ་ངོ་100འཁོར་བའི་རྟེན་འབྲེལ་ཞུ་བའི་ཕྱག་རྟགས་ཆེ་གྲས་གློག་བརྙན《1921》བོད་སྐད(ལྷ་སའི་སྐད)དཔར་མ་བསྒྱུར་བཟོ་བྱ་རྒྱུར་གཏན་འཁེལ་བྱས་པ་མ་ཟད། འཕྲལ་དུ་བསྒྱུར་བཟོ་བྱེད་བཞིན་ཡོད་ཅིང་དཔར་གཞི་ཨ་མ་དང་དུས་གཅིག་ཏུ་གློག་བརྙན་ཁང་ལ་བསྟན་རྒྱུར་བརྩོན་ལེན་བྱེད་བཞིན་ཡོད་པ་རེད།

ལྗོངས་ཏང་ཨུད་དྲིལ་བསྒྲགས་པུའུ་དང་ལྗོངས་གློག་བརྙན་ཅུས་ཀྱི་ཤུགས་ཆེའི་རྒྱབ་སྐྱོར་འོག ལྗོངས་གློག་བརྙན་སྤྱི་པའི་ཞབས་ཞུ་ལྟེ་གནས་ཀྱི་ཏང་ཨུད་ཀྱིས་སྒྲིག་འཛུགས་ཞིབ་ཚགས་བྱས་ཏེ། ད་ལོའི་ཟླ་3པའི་ཟླ་སྟོད་དུ་གློག་བརྙན《1921》སྒྲིག་བཟོ་མཁན་ཐང་ཞུན་གློག་བརྙན་རིག་གནས་ཁྱབ་སྤེལ་ཚད་ཡོད་ཀུང་སི་དང་འབྲེལ་བ་བྱས་ཏེ། གློག་བརྙན་དེའི་བོད་སྐད་དཔར་མའི་བསྒྱུར་བཟོ་དང་འགྲེམས་སྤེལ་ལས་དོན་གྱི་ངོ་འཕྲད་གྲོས་བསྡུར་བྱས་པ་རེད། ཕྱོགས་ཁག་གི་མཐུན་སྦྱོར་དང་འབད་བརྩོན་བྱས་པ་བརྒྱུད། ཟླ་6ཚེས་26ཉིན་གློག་བརྙན་གྱི་འཁྲབ་ཚིག་དེབ་འབྱོར་བ་དང་། ལྗོངས་གློག་བརྙན་སྤྱི་པའི་ཞབས་ཞུ་ལྟེ་གནས་ཏང་ཨུད་ཀྱིས་འཕྲལ་མར་གློག་བརྙན་དེའི་སྒྱུར་བཟོའི་རྣམ་གྲངས་ཚོགས་ཆུང་བཀོད་སྒྲིག་བྱས་ཤིང་། ཚོགས་ཆུང་གི་གཤམ་དུ་འཁྲབ་གཞུང་ལེགས་སྒྲིག་ཚོ་ཆུང་དང་། ཡིག་སྒྱུར་ཚོ་ཆུང་། སྒྲ་འཇུག་ཚོ་ཆུང་། འཁྲབ་ཁྲིད་ཚོ་ཆུང་། འཁྲབ་མི་ཚོ་ཆུང་། གློག་བརྙན་དྲིལ་བསྒྲགས་ཁྱབ་སྤེལ་ཚོ་ཆུང་བཅས་ཡོད་པ་རེད། ཟླ་6ཚེས་27ཉིན་གློག་བརྙན་གྱི་སྒྲ་བརྙན་དཔར་གཞི་འབྱོར་བས་འཕྲལ་དུ་སྒྱུར་བཟོའི་འཁྲབ་ཁྲིད་དང་ཡིག་སྒྱུར་མི་སྣ་བསྐོངས་ནས་གློག་བརྙན་གྱི་མ་དཔེའི་རྒྱུ་ཆ་གཤམ་སྤྲོད་བྱས་ཏེ་སྔོན་འགྲོའི་ལས་དོན་སྤེལ་བ་རེད། ཟླ་6ཚེས་28ཉིན་སྒྱུར་བཟོའི་ལས་དོན་ནང་ཞུགས་མཁན་ཡོངས་སྐོང་བསྡུ་བྱས་ནས་མཉམ་དུ་གློག་བརྙན་བལྟས་ཤིང་ཞིབ་འཇུག་གྲོས་བསྡུར་བྱས་ཏེ་བློ་བསྡུས་དགེ་འཚོལ་གྱིས་སྒྱུར་བཟོའི་འཆར་གཞི་བཏིང་བ་དང་སྒྱུར་བཟོའི་བརྒྱུད་རིམ་གཏན་འཁེལ་བྱས་པ་རེད། ཟླ་6ཚེས་29ཉིན་གྱི་སྔ་དྲོ་སྒྲ་འཇུག་ལས་དོན་དངོས་སུ་འགོ་མ་བཙུགས་གོང་། ལྗོངས་གློག་བརྙན་སྤྱི་པའི་ཞབས་ཞུ་ལྟེ་གནས་ཏང་ཨུད་ཀྱིས་སྐུལ་སློང་ཚོགས་ཆེན་འཚོགས་ནས་ལས་དོན་མི་སྣ་ཡོངས་ཀྱིས་ཚད་མཐོའི་ཆབ་སྲིད་ཀྱི་འགན་འཁུར་གྱི་བསམ་པ་དང་ལས་འགན་སྒྲུབ་སེམས་དུས་ཐོག་ཏུ་སྤུས་འབོར་གཉིས་ལྡན་གྱི་སྒོ་ནས་བསྒྱུར་བཟོའི་ལས་འགན་བསྒྲུབ་དགོས་པའི་རེ་བ་བཏོན་པ་རེད།

“གློག་བརྙན《1921》ཡི་སྒྱུར་བཟོ་བྱ་རྒྱུ་དེ་ནི་རང་སྐྱོང་ལྗོངས་གློག་བརྙན་སྤྱི་པའི་ཞབས་ཞུ་ལྟེ་གནས་ཀྱིས་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བར་རྟེན་འབྲེལ་ཞུ་བར་སྐྱེས་སུ་ཕུལ་བའི་གཙོ་གནད་སྒྱུར་བཟོའི་རྣམ་གྲངས་ཤིག་ཡིན་ལ། བོད་ཀྱི་གློག་བརྙན་སྒྱུར་བཟོའི་ལས་དོན་ཐེངས་དང་པོར་གློག་བརྙན་བསྒྲིགས་བཟོ་མཁན་དང་ཐད་ཀར་འབྲེལ་མཐུད་ཐོག་བསྒྱུར་བཟོ་བྱས་པའི་ཕན་ཐོགས་ཆེ་བའི་འཚོལ་ཞིབ་ཞིག་རེད། བསྒྱུར་བཟོ་ཚོགས་ཆུང་གིས་རང་རྐྱ་འཕེར་བའི་ངང་གློག་བརྙན་སྒྱུར་བཟོའི་འོད་ལྡེར་ལེགས་སྒྲིག་དང་། གློག་བརྙན་པར་ལེན་གྱི་འཁྲབ་དེབ་རྒྱུས་ལོན། གློག་བརྙན་གྱི་དུས་མཇུག་གི་དྲིལ་བསྒྲགས་འཆར་འགོད་བཅས་བྱེད་པའི་འབྲེལ་ཡོད་ལས་དོན་བསྒྲུབ་དགོས་པས། ལས་ཀ་མང་བ་དང་། དུས་ཚོད་ཛ་དྲག་པ། ལས་འགན་ལྕི་བ་བཅས་ཡོད་ནའང་། ང་ཚོས་ནུས་ཤུགས་ཡོད་རྒུས་རྒྱ་སྐད་དཔར་མའི་གློག་བརྙན་དང་དུས་མཚུངས་སུ་བོད་སྐད་དཔར་མའི་གློག་བརྙན་དེ་བསྟན་ཐུབ་པ་བྱ་རྒྱུའི་བརྩོན་ལེན་བྱེད་བཞིན་ཡོད”ཅེས་རང་སྐྱོང་ལྗོངས་གློག་བརྙན་སྤྱི་པའི་ཞབས་ཞུ་ལྟེ་གནས་ཀྱི་ཀྲུའུ་རེན་ཀྲང་ཅན་ཧྭའ་ཡིས་གསར་འགོད་པར་བཤད།

ཤེས་རྟོགས་བྱུང་བར་གཞིགས་ན། གློག་བརྙན《1921》བོད་སྐད་དཔར་མའི་སྒྱུར་བཟོའི་ལས་དོན་མཐའ་མཇུག་གི་མཇུག་གྲིལ་བའི་དུས་མཚམས་སུ་སླེབས་ཡོད་ཅིང་། ཟླ་7པའི་ཟླ་དཀྱིལ་དུ་བོད་ཀྱི་གྲོང་ཁྱེར་ཁག་གི་གློག་བརྙན་ཁང་དུ་བསྟན་རྒྱུ་ཡིན་པ་རེད།

འདི་ནི་སྐུལ་སློང་ཚོགས་ཆེན་གྱི་ཚོགས་རྭ་ཡིན་པ།

འདི་ནི་འཁྲབ་གཞུང་ལེགས་སྒྲིག་ཚོ་ཆུང་གིས་འཁྲབ་དེབ་ལེགས་སྒྲིག་བྱེད་བཞིན་ཡོད་པ།

ཡིག་སྒྱུར་ཚོ་ཆུང་གིས་དུས་ཚོད་དམ་འཛིན་བྱས་ནས་འཁྲབ་དེབ་ཡིག་སྒྱུར་བྱེད་བཞིན་ཡོད་པ།

འཁྲབ་ཁྲིད་ཚོ་ཆུང་གིས་གློག་བརྙན་གྱི་སྒྲ་སྒྱུར་འཁྲབ་མི་བགོ་བཤའ་རྒྱག་བཞིན་ཡོད་པ།

སྒྲ་སྦྱོར་མི་སྣས་སྒྲ་སྦྱོར་བྱེད་བཞིན་ཡོད་པ།

འདི་ནི་སྒྲ་འཇུག་མཁན་གྱིས་རྒྱབ་ཕྱོགས་སྒྲིག་བཟོ་བྱེད་བཞིན་པའི་གནས་ཚུལ་ཡིན་པ།