“ཁྱེད་ལ་མེ་ཏོག་ལྟར་གྱི་མིང་ཞིག་ཡོད། མཛེས་པའི་བུ་མོ་སྒྲོལ་མ་ལགས། ཁྱེད་ལ་མེ་ཏོག་འདྲ་བའི་འཛུམ་མདངས་ཡོད། མཛེས་པའི་བུ་མོ་སྒྲོལ་མ་ལགས”

རྒྱ་ཁྱབ་ཆེ་བའི་གླུ་གཞས《སྒྲོལ་མ》ཡིས་བོད་རིགས་བུད་མེད་ཀྱི་མཛེས་པའི་བྱད་བཞིན་དང་ཉམས་སྣང་དོད་པོར་བསྔགས་བརྗོད་བྱས་ཡོད། བོད་དུ་བུད་མེད་ཕལ་ཆེར་བའི་མིང་ལ“སྒྲོལ་མ”ཟེར་གྱི་ཡོད་ལ་མིང་ལ“སྒྲོལ་མ”བཏགས་ཀྱི་ཡོད།“སྒྲོལ་མའི”གཟུགས་བརྙན་དེ་མེས་རྒྱལ་གྱི་ས་ཕྱོགས་གང་སར་མི་སེམས་སུ་གཟུགས་ཡོད།

འོན་ཀྱང“སྒྲོལ་མ”སུ་ཡིན་པ་དང“སྒྲོལ་མའི”རྣམ་པ་ཇི་འདྲ་ཞིག་ཡོད་པ། ནུས་པ་གང་འདྲ་ལྡན་ཚེ“སྒྲོལ་མ”ཡི་རྣམ་པ་གྲུབ་བམ་ཟེར་ན། 

ང་ཚོས་ལོ་རྒྱུས་ལ་ཕྱིར་མིག་བྱས་པ་དང་གངས་ལྗོངས་ས་མཐོར་བསྐྱོད་དེ“སྒྲོལ་མ”འཚོལ་ཞིང“སྒྲོལ་མའི”བརྒྱབ་ཀྱི་བོད་ཀྱི་གཏམ་རྒྱུད་དང་དུས་རབས་ཀྱི་འཕོ་འགྱུར་ལ་རྒྱུས་ལོན་བྱེད།

འདི་ནི་ལྷོ་ཁ་གྲོང་ཁྱེར་སྣེ་གདོང་ཆུས་ཁེ་གསུམ་གྲོང་རྡལ་དུ་ཡོད་པའི་བདེ་ཆེན་སྒྲོལ་མས་ཁྱིམ་གྱི་མེ་ཏོག་རྩི་ཤིང་ལ་ལྟ་རྟོག་བྱེད་བཞིན་པ།

“སྒྲོལ་མ”བ་ཚང་ནང་འཚོ་བ་སྐྱེལ་མཇུག་འགྲིལ་བ།

བདེ་ཆེན་སྒྲོལ་མ་ད་ལོ་ལོ་65ལ་སླེབས་ཅིང་། ཁོང་གི་ཨ་མའི་མིང་གི་རྗེས་སུའང“སྒྲོལ་མ”ཞེས་པའི་ཡིག་འབྲུ་གཉིས་པོ་དེ་ཡོད།

བོད་ཀྱི་སྲོལ་རྒྱུན་རིག་གནས་ཁྲོད“སྒྲོལ་མ”ཞེས་པས་ལྷ་མོའི་གཟུགས་བརྙན་མཚོན་གྱི་ཡོད། ཕལ་ཆེར་རྒན་རབས་ཚོས་རང་ཉིད་ལ་མིང་འདི་འདོགས་དོན་ནི་ནམ་མཁའི་ལྷ་མོས་རང་ཉིད་ལ་མགོན་སྐྱབས་བྱེད་པའི་རེ་བ་བྱས་པ་ཞིག་ཡིན་ཤས་ཆེ།

འོན་ཀྱང་མ་སྨད་གཉིས་སྐྱེས་མ་ཐག་བ་ཚང་ནང་སྡོད་དགོས་པའི་ལས་དབང་ལྡོག་ཐབས་བྲལ་བ་མ་ཟད། མི་ཡུལ་དུ་སླེབས་མ་ཐག་སྐུ་དྲག་གི་གཞིས་ཀར་མི་ལུས་རང་དབང་མེད་པའི་ཞིང་བྲན་བྱེད་དགོས་བྱུང་ཡོད།

1959ལོའི་སྔོན་ཆད་བོད་ལ་སྔར་བཞིན་ཆོས་སྲིད་ཟུང་འབྲེལ་གྱི་ཞིང་བྲན་ལམ་ལུགས་ལག་བསྟར་བྱེད་ཀྱི་ཡོད། མ་སྨད་གཉིས་ཁེ་གསུམ་གཞིས་ཀའི་ཞིང་བྲན་ཡིན་པ་དང་། གཞིས་ཀ་དེ་ནི་སྐབས་དེ་དུས་བཀའ་ཤག་སྲིད་གཞུང་གི་བཀའ་བློན་བཟོ་ཁང་དབང་ཆེན་དགེ་ལེགས་ཀྱི་ལྷོ་ཁའི་གཞིས་ཀ་དྲུག་གི་གྲས་ཤིག་རེད། ཞིང་བྲན་302ཉིན་ལྟར་ཁྲལ་འུ་ལག་ལྕི་པོ་དང་ངལ་རྩོལ་བྱས་ཀྱང་ཟས་ཀྱིས་གྲོད་པ་མི་རྒྱག་པ་དང་གོས་ཀྱིས་ལུས་པོ་མི་དྲོད་ཁར་རྡུང་རྡེག་དྲག་པོ་མྱོང་དགོས་ཀྱི་ཡོད།

སྐབས་དེ་དུས་བདེ་ཆེན་སྒྲོལ་དཀར་ནི་ཤ་རིད་ཅིང་རྟག་ཏུ་སྐྲ་ཟང་ཟིང་ཡིན་པ་དང་མཚན་མོ་དུད་འགྲོ་དང་མཉམ་དུ་བ་ཚང་ནང་ཉལ་ནས་སྡོད་ཀྱི་ཡོད།

1959ལོའི་ཟླ་3པར་ལས་དབང་ཀྱི་ཀྱོག་མཚམས་སུ་སླེབས། ཀྲུང་གོ་གུང་ཁྲན་ཏང་གིས་བོད་ཀྱི་མི་རིགས་ཁག་གི་མི་དམངས་ཀྱི་སྣེ་ཁྲིད་དེ་དམངས་གཙོའི་བཅོས་སྒྱུར་བྱས་ནས་བཀས་བཀོད་རྒྱུད་འཛིན་ཞིང་བྲན་ལམ་ལུགས་ཀྱི་ལྕགས་སྒྲོག་གཏོར།

རྩྭ་ཐང་དང་གངས་རི……“སྒྲོལ་མའི”ཕ་ཡུལ་དུས་དེ་ནས་བཟུང་འོད་ཟེར་གྱི་དུས་རབས་གསར་པའི་ཕྱོགས་སུ་བསྐྱོད་འགོ་ཚུགས།

བདེ་ཆེན་སྒྲོལ་མ་ཡང་གཞི་ནས་བ་ཚང་ནང་འཚོ་བ་སྐྱེལ་དགོས་བྱུང་མེད། ཁོང་གི་ཕ་ཡུལ་ཏེ་དེང་གི་ལྷོ་ཁ་གྲོང་ཁྱེར་སྣེ་གདོང་ཆུས་ཁེ་གསུམ་སྡེ་ཁུལ་དུ་དམངས་གཙོའི་བཅོས་སྒྱུར་སྔོན་ལ་བྱས་པས་ད་ཆ“བོད་ཀྱི་དམངས་གཙོའི་བཅོས་སྒྱུར་གྱི་གྲོང་ཚོ་དང་པོ”ཞེས་བརྗོད་ཀྱི་ཡོད།

“བ་ཚང་ནང་དུ་སྡོད་མི་དགོས་ཁར་སྒོ་ཕྱུགས་གཅིག་ཀྱང་བགོ་བཤའ་གནང་བྱུང”ཞེས་བདེ་ཆེན་སྒྲོལ་མས་གསུངས་ཤིང་། སྐབས་དེ་དུས་ཁོང་གི་ཨ་མས་རང་གི་བུ་མོར་ས་ཞིང་དང་། སྡོད་ཁང་། སྒོ་ཕྱུགས་བཅས་བགོ་བཤའ་ཐུབ་ཀྱི་ཡོད་པ་བསམ་པའི་ཡུལ་ལ་མེད་པ་རེད།

སྤྱི་ཚོགས་ལམ་ལུགས་ལ་བཅོས་སྒྱུར་བྱུང་བས་བུད་མེད་དང་བོད་རྙིང་པར་རིམ་པ་དམའ་པའི་མང་ཚོགས་ལ་ཞི་བའི་བཅིངས་འགྲོལ་དངོས་སུ་ཐོབ་ཡོད། སྔོན་ཆད《ཞལ་ལྕེ་བཅུ་གསུམ》《ཞལ་ལྕེ་བཅུ་དྲུག》སོགས་བོད་ཀྱི་ཁྲིམས་སྲོལ་རྙིང་པས་བུད་མེད་ནི“རིམ་པ་དམའ་བའི་མི”ཡི་ཁོངས་སུ་གཏོགས་པ་གཏན་འབེབས་བྱས་པ་དང“ཚེ་སྲོག་གི་རིན་ཐང”ནི་རྩྭ་ཕྲན་རྐང་གཅིག་གི་རིན་ཐང་ཙམ་ལས་མེད་པ་རེད།

1959ལོར་ཞལ་ལྕེ་དེ་དག་རྩྭ་མེད་དུ་བཏང་ཡོད།

ཕྱིས་སུ་བདེ་ཆེན་སྒྲོལ་མ་གྲོང་ཚོའི་ནང་གི་སློབ་ཆུང་འགྲིམ་ཐུབ་ཡོད། སྒྱུར་བཅོས་སྒོ་དབྱེ་བྱས་རྗེས་ཞིང་ལས་ཐོན་སྐྱེད་ཀྱི་སྤུས་ཚད་རིམ་བཞིན་ཇེ་མཐོར་སོང་བ་དང་བསྟུན་ཁོང་གི་ཁྱིམ་ཚང་ཡང་གྲོང་ཚོའི་ཐེམ་དུད་གཞན་དང་འདྲ་བར་འདྲུད་འཐེན་འཕྲུལ་འཁོར་ཉོས་པ་རེད། ཞིང་ལས་བྲེལ་འཚུབ་ཆེ་དུས་སྡེ་ཁུལ་གྱིས་རིན་མེད་ཐོག་མང་ཚོགས་ལ་ཞིང་འཕྲུལ་ཡོ་བྱད་ཀྱང་མཁོ་འདོན་བྱས་ཏེ་མང་ཚོགས་ཀྱི་དཔྱིད་འདེབས་སྟོན་བསྡུའི་གནད་དོན་ཐག་གཅོད་བྱས་ཡོད།

དེར་བརྟེན་བ་ཕྱུགས་ཀྱིས་རྨོད་འདེབས་བྱེད་མི་དགོས་པ་བྱུང་ཡོད་ལ་མི་ཚེ་ཕྱེད་ཀ་ས་ཞིང་དང་བ་ཚང་ལ་འཁོར་ནས་སྡོད་པའི་བདེ་ཆེན་སྒྲོལ་མ་འཚོ་བ་གསར་པ་སྐྱེལ་འགོ་ཚུགས་ཡོད།

འདི་ནི་བདེ་ཆེན་སྒྲོལ་མ(གཡས)དང་ཁྱིམ་མཚེས་མཉམ་དུ་ཉིན་གཉིས་པའི་དཔྱིད་འདེབས་མཛད་སྒོའི་ཐོག་གི་འདྲུད་འཐེན་འཕྲུལ་འཁོར་ལ་མཛེས་རྒྱན་སྤྲད་བཞིན་པ།

ད་ཆ་ཁོང་གི་བུ་མོ་གསུམ་པོ་ནི་ཁྱིམ་ནས་རླངས་འཁོར་གྱི་སྐར་མ་15ཡི་བར་ཐག་ཡོད་པའི་ལྷོ་ཁ་གྲོང་ཁྱེར་དུ་ལས་ཀ་བྱེད་བཞིན་ཡོད། དེའི་ནང་ནས་བུ་མོ་རྒན་པ་དང་མག་པས་སྐྱེལ་འདྲེན་གྱི་ཚོང་གཉེར་བྱེད་ཀྱི་ཡོད། ཁེ་གསུམ་ལ་98%ཞིང་ལས་འཕྲུལ་ཆས་ཅན་དུ་གྱུར་ཟིན་པས་ཞིང་པ་མི་ཉུང་བ་ལོ་འཁོར་མོ་ས་ཞིང་ཐོག་ལས་ཀ་བྱ་ནས་སྡོད་མི་དགོས་པར་ཉེ་འཁོར་དུ་ཞོར་ལས་དང་ཚོང་གཉེར་བྱེད་པའི་དར་སྲོལ་ཞིག་ཆགས་ཡོད།

ཏང་གི་ཚོགས་ཆེན་བཅོ་བརྒྱད་པ་ཚོགས་ཚུན་རྒྱལ་ཁབ་ཀྱིས་ཁེ་གསུམ་གྲོང་ཚོར་མ་དངུལ་སྒོར་ཁྲི་4000བཏང་སྟེ“སྐྱེ་ཁམས་ཤེས་དཔལ་འབྱོར་འབྲིང་དཔེ་སྟོན་ཁུལ”འཛུགས་སྐྲུན་བྱེད་འགོ་ཚུགས་པ་དང་། ཆུ་འགྲོ་དང་། གློག་ལམ། སྔོ་ལྗང་སོགས་ཁྱོན་ཡོངས་ནས་བཟོས་པ་དང་། དམངས་ཕན་ཞབས་ཞུ་ལྟེ་གནས་དང་ཞིང་ཁྱིམ་དཔེ་ཁང་སོགས་ཀྱང་བསྐྲུན་ཡོད། 2017ལོར་ཁེ་གསུམ་གྲོང་ཚོའི་དབུལ་པོའི་ཁྱིམ་ཚང་ཚང་མ་དབུལ་གྲོལ་ཐུབ་པ་དང་2020ལོར་སྡེ་ཁུལ་གྱི་མི་རེའི་ལོའི་ཆ་སྙོམས་ཡོང་འབབ་སྒོར་ཁྲི་2.5ཟིན་ཡོད།

བདེ་ཆེན་སྒྲོལ་མས“རང་ཉིད་བ་ཚང་ནང་སྐྱེས་པའི་ཁྱིམ་རྒྱུད་ཀྱི་མི་ཐོག་བཞི་པ་ཡིན། ད་ཆ་ཕྲུ་གུ་ཚོ་སྡུག་བསྔལ་དེ་འདྲ་མྱོང་དགོས་མེད”ཅེས་བཤད།

འདི་ནི་སྒྲོལ་མ་བོད་རང་སྐྱོང་ལྗོངས་གནམ་གཤིས་ཅུད་ཀྱི་གཞུང་ལས་ཁང་དུ་བླངས་པའི་པར་ཡིན་པ།

“སྒྲོལ་མ”ཡིས་འཕེལ་རྒྱས་ཀྱི་དཔང་པོ་བྱེད་པ།

དམངས་གཙོའི་བཅོས་སྒྱུར་བྱས་ནས་ལོ་10སོང་རྗེས་སྒྲོལ་མ་ཞེས་འབོད་པའི་བུ་མོ་ཞིག་ཇོ་མོ་གླང་མའི་འདབས་ཀྱི་གཞིས་ཀ་རྩེར་སྐྱེས། ད་ཆ་ཁོང་ནི་བོད་ལྗོངས་གནམ་གཤིས་ཁྱབ་ཁོངས་ཀྱི་རྩེར་སོན་རིགས་གཅིག་མཁས་ཅན་ཞིག་རེད།

སླརཡང་ལོ་ངོ་10སོང་རྗེས་བསོད་ནམས་སྒྲོལ་མ་ཟེར་བའི་བུ་མོ་ཞིག་བོད་ཤར་ཕྱོགས་ཀྱི་ཆབ་མདོར་སྐྱེས། ཕྱིས་སུ་ཁོང་བོད་ཀྱི་ལྕགས་ལམ་ལས་དོན་པ་མི་རབས་དང་པོར་གྱུར།

བུ་མོ་གཅིག་ནི་སྟེང་མཁའ་དབྱིངས་ལ་བརྟག་དཔྱད་བྱེད་མཁན་ཞིག་དང་། བུ་མོ་གཞན་ཞིག་ནི་དམའ་ས་སྟེང་དུ་འགྲོ་མང་མཁན་ཞིག་ཡིན། གང་ཞིག་གིས་རི་གྲོང་གི“སྒྲོལ་མ”ས་མཐོའི་འཕེལ་རྒྱས་ཀྱི་ཆེས་མདུན་མར་སླེབས་ཐུབ་པ་ཡིན་ནམ།

འདི་ནི་སྒྲོལ་མ(གཡས)དང་ལས་རོགས་ཀྱིས་བོད་རང་སྐྱོང་ལྗོངས་གནམ་གཤིས་ཅུད་ཀྱི་གཞུང་ལས་ཁང་དུ་གནམ་གཤིས་ཀྱི་གྲངས་གཞིར་བགྲོ་གླེང་བྱེད་བཞིན་པའི་གནས་ཚུལ་ཡིན་པ།

1986ལོར་སྒྲོལ་མ“ཀྲུང་གོའི་གནམ་གཤིས་ཀྱི་ཤེས་ལྡན་མི་སྣའི་རྟེན་གཞི”རུ་གྲགས་པའི་དེ་སྔའི་ནན་ཅིང་གནམ་གཤིས་སློབ་གླིང་དུ་ཚུད། ཁོང་གིས“རྒྱལ་ཁབ་ཀྱིས་མཐའ་མཚམས་མི་རིགས་ས་ཁུལ་དུ་ཆེད་ལས་ཤེས་ལྡན་མི་སྣ་གསོ་སྐྱོང་བྱ་ཆེད། སྐབས་དེ་དུས་སློབ་གླིང་གིས་མི་རིགས་འཛིན་གྲྭ་སྐབས་ཁ་ཤས་བསྟུད་མར་བསྡུས་ཡོད ང་ཚོའི་སྐབས་ཀྱི་སློབ་མ་རྣམས་ད་ཆ་བོད་ཀྱི་གནམ་གཤིས་ལས་རིགས་ཀྱི་རྐང་འཛིན་པ་ཤ་སྟག་རེད”ཅེས་བཤད།

སློབ་གྲྭ་ཐོན་རྗེས་སྒྲོལ་མ་དིང་རི་རྫོང་གནམ་གཤིས་ཅུད་དུ་ལས་བགོས་སྦྱོང་བརྡར་བྱེད་པར་བཏང་། དེ་ནི་ཇོ་མོ་གླང་མ་དང་ཐག་ཉེ་ཤོས་ཀྱི་གནམ་གཤིས་ས་ཚུགས་ཤིག་རེད། གངས་ཆར་ཀླུང་འཚུབ་ཀྱི་གནམ་གཤིས་གང་འདྲ་ཞིག་བསྟན་རུང་ས་ཚུགས་ནང་གི་གནམ་གཤིས་ལྟ་ཞིབ་མཁན་གྱིས་དུས་བཀག་ནང་གྲངས་གཞི་ནོར་འཛོལ་མེད་པར་སྙན་སེང་ཞུས་དགོས་ཀྱི་ཡོད། ཐོ་རེངས་སུ་གྲང་ངར་ཆེ་བའི་ཇོ་མོ་གླང་མའི་འདབས་སུ་སྒྲོལ་མས་ས་ཚུགས་སུ་ལོ་བཅུ་ལྷག་ལས་གནས་བརྟན་སྲུང་གནང་མཁན་གྱི་ལས་བྱེད་པ་རྒན་གྲས་ཀྱིས་ས་ཐོག་ཏུ་མར་ཉལ་ནས་གྲངས་གཞིའི་ཨང་གྲངས་རེ་རེ་བྱས་ཏེ་ཀློག་པ་མཐོང་སྐབས། གནམ་གཤིས་ལས་དོན་པའི་འཁུར་དགོས་པའི་འགན་འཁྲི་རང་བཞིན་ངང་ཤེས་རྟོགས་བྱུང་ཡོད།

“ང་ཚོའི་ལས་ཀ་དེ་ཞིང་འབྲོག་མང་ཚོགས་ཀྱི་ཐོན་འབབ་དང་མི་སྒེར་གྱི་བདེ་སྡུག་དང་ཐད་ཀར་འབྲེལ་བ་ཡོད་པས་སྐར་ཆ་གཅིག་ཀྱང་ནོར་འཛོལ་ཤོར་ན་མི་འགྲིག”ཅེས་སྒྲོལ་མས་བཤད།

འདི་ནི་བསོད་ནམས་སྒྲོལ་མ(གཡོན)དང་ལས་རོགས་ལྷ་སའི་མེ་འཁོར་འབབ་ཚུགས་སུ་མཉམ་པར་བླངས་བཞིན་པ།

2006ལོར་མེ་འཁོར་འབབ་ཚུགས་སུ་བསོད་ནམས་སྒྲོལ་མས་ལྷ་སར་ཡོང་བའི་མེ་འཁོར་ཨང་དང་པོ་བསུ་བའི་མཚམས་དེར་འགན་འཁྲི་ལྕི་པོ་ཡིན་པ་ཤེས་རྟོགས་བྱུང་ཡོད།

འདི་ལོ་ལོ་40ལ་སླེབས་པའི་བསོད་ནམས་སྒྲོལ་མས་ངེས་གསལ་ལ་ཆུང་དུས་སློབ་ཆུང་དུ་འགྲོ་སྐབས་སྔོན་ལ་ལ་བརྒྱབ་ནས་རྐང་ཐང་མར་ཉིན་3བསྐྱོད་པ་དང་དེ་རྗེས་སླར་ཡང་རླངས་འཁོར་ནང་ཉིན་གཅིག་བསྐྱོད་ཚེ་གཞི་ནས་རྫོང་གྲོང་དུ་འབྱོར་གྱི་ཡོད།  ཕྱིས་སུ་ཁོང་ནང་སའི་བོད་ལྗོངས་འཛིན་གྲྭར་རྒྱུགས་འཕྲོད་རྗེས་རླངས་འཁོར་དང་གྲུ་གཟིངས་ལ་བསྡད་ནས་ཟླ་ཕྱེད་ཙམ་གྱི་རྗེས་གཞི་ནས་ཧུའུ་ནན་གཡོད་ཡང་དམའ་རིམ་སློབ་འབྲིང་དུ་འབྱོར་གྱི་ཡོད་པ་རེད། 

སློབ་གཉེར་གྱི་ལམ་བུར་དཀའ་ཚེགས་ཆེ་ན་ཡང་བསོད་ནམས་སྒྲོལ་མས“ནང་སར་སློབ་སྦྱོང་བྱེད་པར་ཕྱིན་མེད་ཚེ་ད་ལྟའི་གྲུབ་འབྲས་དེ་ལྟ་བུ་ཐོབ་ཐབས་བྲལ”ཞེས་བཤད།

དུས་རབས་20ལོ་རབས་80པར་བོད་དུ་ཤེས་ལྡན་མི་སྣ་དཀོན་པ་དང་སློབ་གསོའི་རྨང་གཞི་ཅུང་ཞན་པའི་དོན་དངོས་ལ་དམིགས་ནས། རྒྱལ་ཁབ་ཀྱིས་ནང་སར་བོད་ལྗོངས་འཛིན་གྲྭ(སློབ་གྲྭ)འཛུགས་རྒྱུའི་གཏན་འཁེལ་བྱས། 1985ལོའི་ཟླ་9པར་བོད་རིགས་ཀྱིས་གཙོ་བོར་བྱས་པའི་བོད་ཀྱི་སློབ་ཆུང་སློབ་ཐོན་སློབ་མ་ཁག་དང་པོ་ནང་སར་བསྐྱོད་དེ་བོད་ཀྱི་སློབ་གསོ་སྤེལ་སྟངས་གསར་པ་ཞིག་བཏོད་ཡོད།

ཧུའུ་ནན་དུ་སློབ་སྦྱོང་ལོ་4བྱེད་རིང་ཁྱིམ་དང་ལམ་ཐག་རིང་བའི་དབང་གིས་བསོད་ནམས་སྒྲོལ་མ་ནང་ལ་ཐེངས་གཅིག་ཀྱང་ལོག་མེད་ལ། སྐབས་དེ་དུས་གྲོང་ཚོའི་ནང་དུ་བརྡ་འཕྲིན་མེད་པས་ཕ་མ་གཉིས་པོས“བུ་མོ་སློབ་གྲྭར་ཕྱིན་ཏེ་མི་བརླགས་སོང་བ་ལྟར”སེམས་ནང་དྲན་བཞིན་ཡོད།

འདས་དོན་ཕྱིར་དྲན་བྱེད་དུས་ཁོང་དགའ་སྐྱོ་གཉིས་ལྡན་གྱི་གནས་སུ་ལྷུང་།

2001ལོར་གོར་མོ་ནས་ལྷ་ས་བར་མཚོ་བོད་ལྕགས་ལམ་གྱི་ལས་འགོའི་ཨར་སྐྲུན་འཛུགས་སྐྲུན་བྱེད་དུས་བསོད་ནམས་སྒྲོལ་མ་མཐོ་རིམ་སློབ་འབྲིང་འགྲིམས་བཞིན་ཡོད། ཁོང་གིས་མཚོ་བོད་ལྕགས་ལམ་གྱི་ཤེས་ལྡན་མི་སྣ་གསོ་སྐྱོང་བྱ་ཆེད་ལྷོ་ནུབ་འགྲིམ་འགྲུལ་སློབ་ཆེན་གྱིས་བོད་ཀྱི་སློབ་མ་བསྡུ་རྒྱུ་ཡིན་པ་གོ་ཐོས་བྱུང་བས་ཐེ་ཚོམ་མེད་པར་མིང་ཐོ་བཀོད་ཡོད།

མ་གཞི་མུ་མཐུད་དུ་ཕ་ཡུལ་དང་རྒྱང་དུ་བསྐྱོད་དགོས་ཀྱང་ཁོང་གིས“རང་ཉིད་སློབ་གྲྭ་ཐོན་སྐབས་ཕ་ཡུལ་དུ་མེ་འཁོར་ཤར་གཏོང་ཐུབ་པར་དཔང་རྟགས་བྱེད་རྒྱུའི་ཆོད་སེམས་བཅངས”ཡོད་པ་རེད།

མཚོ་བོད་ལྕགས་ལམ་ཤར་གཏོང་ཐུབ་པ་ནས་ད་བར་བསོད་ནམས་སྒྲོལ་མས་ལྷ་སའི་མེ་འཁོར་འབབ་ཚུགས་སུ་ལས་ཀ་བྱས། ཁོང་ཐོག་མར་མེ་འཁོར་འབབ་ཚུགས་སུ་ཡོང་སྐབས་ཉེ་འཁོར་ཚང་མ་ཞིང་ཁ་ཡིན་པ་དང་ད་ཆ་ལྷ་ས་མཐོ་གསར་ལག་རྩལ་གསར་སྤེལ་ཁུལ་དུ་གྱུར་ཡོད།

མིག་སྔར་བོད་ལྗོངས་ལྕགས་ལམ་གྱི་གཉེར་སྐྱོང་ལམ་ཐག་སྤྱི་ལེ་954ཙམ་ཟིན་པ་དང་། གཞུང་ལམ་དུ་རླངས་འཁོར་ཤར་གཏོང་ཐུབ་ཚད་སྤྱི་ལེ་ཁྲི་11.7ལས་བརྒལ་བ། ལྗོངས་ཡོངས་ཀྱི་ཤང་དང་གྲོང་རྡལ་དང་སྒྲིག་ཚུད་གྲོང་ཚོར་གཞུང་ལམ་ཤར་གཏོང་ཐུབ་ཚད་95%དང་75%ཟིན་ཡོད།

འདི་ནི་བསོད་ནམས་སྒྲོལ་མས(དཀྱིལ)ལྷ་སའི་མེ་འཁོར་འབབ་ཚུགས་སུ་འགྲུལ་པར་ལམ་སྟོན་བྱེད་བཞིན་པ།

ལོ་ལྟར་བསོད་ནམས་སྒྲོལ་མས་མེ་འཁོར་འབབ་ཚུགས་སུ་ཕྱོགས་བཞིའི་སྐུ་མགྲོན་ལ་སྐྱེལ་མ་བྱེད་པ་དང་། ནང་སའི་སློབ་གྲྭ་མང་པོས་འགྲུལ་སྐྱེལ་ས་ཚུགས་དང་མཉམ་འབྲེལ་བྱས་ཏེ་སློབ་མར་གཅིག་གྱུར་ཐོག་སྤ་སེ་ཉོ་བ་དང་རླངས་འཁོར་གྱི་སྐྱེལ་བསུ་སོགས་བྱེད་དགོས་པས། ཁོང་གིས་དམིགས་བསལ་མ་ཡིན་པའི་སྐུ་མགྲོན་ཁོ་ཚོར་ཡང་ཕེབས་སྐྱེལ་བྱེད་ཀྱི་ཡོད། 

དེང་གི་ཕྲུ་གུ་ཚོར་བསོད་ནམས་སྒྲོལ་མ་ཡིད་སྨོན་སྐྱེས། ཁོང་ཚོ་རྒྱང་རིང་དུ་བསྐྱོད་པ་མཐོང་དུས་རང་ཉིད་ཀྱི་ལས་ཀར་རིན་ཐང་ཆེན་པོ་ལྡན་པ་ཁོང་གིས་ཚོར།

ལས་རིགས་མི་འདྲ་བའི་སྒྲོལ་མ་ཁོང་གཉིས་པོ་ནི་བོད་ཀྱི་བུད་མེད་ཀྱི་གནས་བབས་རྒྱུན་ཆད་མེད་པར་གོང་མཐོར་སོང་བའི་དཔེ་མཚོན་ཙམ་ཞིག་རེད།

བོད་རྙིང་པར“བུད་མེད་ལ་རྒྱལ་དོན་གླེང་བའི་དབང་ཆ་མེད”ཅེས་པ་ཞལ་ལྕེའི་ནང་འཁོད་པ་དང་ད་ཆ་བོད་དུ་བུད་མེད་ཁྲིམས་དཔོན་དང་།  བུད་མེད་ཁྲིམས་རྩོད་པ། བུད་མེད་འཕུལ་སྐྱོད་པ་སོགས་ཡོད་པ་དང་བུད་མེད་གཞུང་ལས་པས་གཞུང་ལས་པའི་བསྡོམས་འབོར་གྱི་33.3%བཟུང་ཡོད།

བོད་ཀྱི་བུད་མེད་ཀྱིས་དངོས་འབྲེལ“གནམ་ཕྱེད་ཀ”འདེགས་ཐུབ་ཡོད།

“ངས་དུས་རྟག་ཏུ་ཨ་མས་ང་རང་ལ་མིང་འདི་བཏགས་དོན་བསམ་བློ་འཁོར་གྱི་འདུག”སྲུང་སྐར་གྱི་སྤྲིན་པར་མངོན་པའི་བརྙན་ཤེལ་གྱི་མདུན་དུ་ལངས་ཏེ་བོད་རང་སྐྱོང་ལྗོངས་གནམ་གཤིས་ཅུད་ནམ་ཟླ་ལྟེ་གནས་ནམ་ཟླ་ལྟ་ཞིབ་དང་ཚོད་བགམ་ཁང་གི་རིགས་གཅིག་མཁས་དབང་ཨང་དང་པོ་ཡིན་པའི་སྒྲོལ་མ་ཡིས་གསུངས་པར། ཨ་མའི་རེ་བར“སྒྲོལ་མ”ཟེར་བའི་བུ་མོ་སེམས་བཟང་ཞིང་བློ་སྟོབས་ཆེན་པོ་དགོས་པ་དང་། མི་སྒེར་གྱི་སྟོབས་ཤུགས་ཉམས་ཆུང་ཡང་ནུས་ཤུགས་ཡོད་རྒུས་གཞན་ཕན་བྱེད་དགོས་པ་རེད།

ལོ་དེ་དག་སྒྲོལ་མ་གནམ་གཤིས་ཐོན་ཁུངས་རྩིས་བཤེར་དང་གནམ་གཤིས་གནོད་འཚེའི་ཉེན་ཁའི་རྩིས་བཤེར་སོགས་ཀྱི་གལ་ཆེའི་རྣམ་གྲངས་ནང་ཞུགས་པས། གནམ་གཤིས་བྱ་གཞག་གི་འཕེལ་རྒྱས་འབྲས་བུས་ས་མཐོའི་ཚན་རིག་ཞིབ་འཇུག་དང་། དཔལ་འབྱོར་ཐོན་སྐྱེད། ཁྱིམ་ཚང་ཁྲི་སྟོང་མང་པོ་བཅས་ལ་ཕན་པ་བྱུང་ཡོད།

“ལོ་ངོ་30ཕྱིན་སོང་། ང་རང་གི་བསམ་པར་རང་ཉིད་ཀྱིས་ལས་ཀ་བརྒྱུད་ནས་ཨ་མའི་བསམ་འདུན་མངོན་འགྱུར་བྱེད་བཞིན་ཡོད”ཅེས་སྒྲོལ་མས་བཤད།

འདི་ནི་བློ་བཟང་སྒྲོལ་མ(གཡས་ཀྱི་བརྒྱབ)དང་ལོ་ཆུང་བྱིས་པའི་མོ་ཐྲོལ་གསོ་སྦྱོང་གི་སློབ་མ་རྣམས་དང་མཉམ་དུ་རོལ་རྩེད་རྩེད་བཞིན་པ།

སྒྲོལ་མ་ཡིས་འབྱུང་འགྱུར་ལ་རྒྱང་ལྟ་བྱེད་པ།

“90རྗེས་སྐྱེས”ཀྱི་བློ་བཟང་སྒྲོལ་མས་མོ་ཐྲོལ་ལས་རིགས་ལ་གཞོལ་རྒྱུར་ཐག་གཅད་དུས་ཨ་མ་དང་ཁོང་ཁ་རྩོད་ཆེན་པོ་ཤོར།

ཁོང་སློབ་ཆེན་ནང་ཁྲིམས་ལུགས་སློབ་སྦྱོང་བྱས་ཀྱང་མོ་ཐྲོལ་གྱི་ལས་རིགས་གདམ་ག་བྱེད་དུས་ཨ་མའི་མིག་ནང་དུ་དེ་ཅུང་ཚུལ་མཐུན་མིན་པའི་ལས་ཀ་ཤིག་ཡིན་པར་མངོན།

ལོ་13ཡིན་པའི་འབྲོག་ཁུལ་གྱི་བུ་མོ་རྡོ་རྗེ་སྒྲོལ་མ་དང་ཐོག་རྐང་རྩེད་སྤོ་ལོ་རྒྱག་དུས་སུའང་ཕ་མ་གཉིས་པོས་ཁོང་ལ་རྒྱབ་སྐྱོར་བྱེད་ཀྱི་མེད།

“སྒྲོལ་མ”ཡི་ཕུགས་བསམ་རྒྱུན་འཁྱོངས་བྱེད་དགོས་སམ།

བློ་བཟང་སྒྲོལ་མས་ང་ཆུང་དུས་ནས་མོ་ཐྲོལ་གྱི་ལས་རིགས་དེར་དགའ་པོ་ཡོད། ཧྲའན་ཤིས་སུ་སློབ་ཆེན་འགྲིམ་སྐབས་ངས་རང་ཐག་ངང་མོ་ཐྲོལ་གྱི་གསོ་སྦྱོང་ནང་མི་ཐོ་བཀོད་པ་ཡིན་ལ་སློབ་ཡོན་ཡང་གཞན་ནས་གཡར་བ་ཡིན། སློབ་གྲྭ་ཐོན་རྗེས་མོ་ཐྲོལ་དང་ཚབ་ཁྲིད་དགེ་རྒན་བྱས་ནས་གཞན་གྱི་དངུལ་སྐྱིན་པ་སྤྲོད་ཐུབ་པ་བྱུང་། 2011ལོར་རང་ཉིད་འཛམ་གླིང་རིམ་འདས་མཛེས་མའི་འགྲན་བསྡུར་ཆེ་མོ་སྐབས་25པའི་ནང་ཞུགས་སྐབས་ཀྲུང་གོའི་ཁུལ་གྱི་མཐའ་བསྡུར་གྱི་ཨང་བཞི་པ་རག་བྱུང་ཞེས་བཤད།

འདི་ནི་བློ་བཟང་སྒྲོལ་མས་ལོ་ཆུང་བྱིས་པའི་མོ་ཐྲོལ་གསོ་སྦྱོང་ནང་ཞུགས་མཁན་གྱི་སློབ་མར་སློབ་ཚན་ཁྲིད་བཞིན་པ།

2016ལོར་ཁོང་གིས་ཕ་ཡུལ་ལྷ་སར་ལོ་ཆུང་བྱིས་པའི་མོ་ཐྲོལ་དང་མཛེས་རྩལ་སློབ་གསོའི་གསོ་སྦྱོང་སྒྲིག་གཞི་ཞིག་བཙུགས།

གཞན་གྱིས་ཚོད་ལྟ་བྱེད་མེད་པའི་ཁྱབ་ཁོངས་སུ་ལས་གཏོད་བྱ་གཞག་སྤེལ་དུས་ཐམས་ཅད་གསར་པ་ནས་འགོ་ཚུགས་དགོས་པ་རེད། བློ་བཟང་སྒྲོལ་མར་ཐོག་མར་ཁྱིམ་བདག་ཚོས་མོ་ཐྲོལ་གྱི་ལས་རིགས་དེར་ཁས་ལེན་མིན་གྱི་སེམས་ཁྲལ་བྱུང་བ་དང་ཕྱིས་སུ་དགེ་རྒན་མི་འདང་བའི་གནད་དོན་འཕྲད་ཡོད། ཁོང་གིས་སློབ་མ་ཚོ་འགྲན་བསྡུར་མ་སྤེལ་གོང་མཛེས་བཟོ་དང་གྱོན་གོས་སོགས་འགྲིག་ཡོད་མིན་ལ་མཚན་གང་གྲ་སྒྲིག་བྱེད་ཀྱི་ཡོད། འགྲན་བསྡུར་སྤེལ་མཚམས་སུ་སློབ་མ་འགས་གར་སྟེགས་བརྒྱབ་དུ་ངུ་སྐབས། ཁོང་གིས་ཕྲུ་གུ་ཚོར་གར་སྟེགས་ཐོག་འགྲོ་འདོད་ཡོད་མེད་ཀྱི་གདམ་ཁའི་དབང་ཆ་སྤྲད་ནས་བསམ་བློ་ཡག་པོ་བཏང་འཇུག་གི་ཡོད།

འདི་ནི་བློ་བཟང་སྒྲོལ་མ(གཡོན)ལུས་སྦྱོང་ཁང་དུ་ཡོད་པ།

“ངས་ཕྲུ་གུའི་རང་རྐྱ་འཕེལ་བ་དང་གདེང་ཚོད་ཡོད་པ་བྱེད་པར་མཐོང་ཆེན་བྱེད་ཀྱི་ཡོད། སོ་སོས་དགའ་བའི་ལས་ཀ་བྱེད་རྒྱུ་བྱུང་བར་དངོས་གནས་སྐྱིད་པོ་འདུག སློབ་མ་ཚོས་ཀྱང་རང་ཉིད་དགའ་བའི་ལས་ཀ་ཞིག་བྱ་རྒྱུའི་རེ་བ་ཡོད”ཅེས་བློ་བཟང་སྒྲོལ་མས་བཤད།

ཐ་ན་མི་མང་ཆེ་བའི་མིག་ནང་དུ་རང་ཉིད་ཀྱི་ཁྱབ་ཁོངས་མིན་པའི་ལས་རིགས་ལ་ཚོད་ལྟ་བྱེད་ཀྱང་ཆོག

འདི་ནི་རྡོ་རྗེ་སྒྲོལ་མ་སློབ་གྲྭའི་རྐང་རྩེད་སྤོ་ལོའི་སྤྲོ་སྣང་སློབ་ཚན་ནང་ཞུགས་བཞིན་པ།

ས་བབ་སྨི་4300ཟིན་པའི་འདམ་གཞུང་རྩྭ་ཐང་སྟེང་རྡོ་རྗེ་སྒྲོལ་མ་རྐང་རྩེད་སྤོ་ལོ་རྒྱག་རྒྱུར་དགའ་པོ་ཡོད་ཀྱང་ཕ་མས་རྒྱབ་སྐྱོར་བྱེད་ཀྱི་མེད།

ཁོང་ལ་ཅུང་མཁྲེགས་པའི་ལྷམ་ཆ་གཅིག་ལས་མེད་པས་ཕྱུགས་འཚོ་བ་དང་སྤོ་ལོ་རྒྱག་པ་སོགས་ཀྱི་སྐབས་དེ་གྱོན་གྱི་ཡོད། རྐང་རྩེད་སྤོ་ལོའི་དགའ་ཕྱོགས་ཚོ་ཆུང་དུ་རྩལ་ཁྲིད་པས་ཁོང་ལ་ལྷམ་དེ་འདྲ་གྱོན་ནས་རྒྱུག་ཤར་ལྷོད་ཚེ་རྨས་སྐྱོན་ཕོག་ཉེན་ཡོད་པའི་དྲན་སྐུལ་བྱས་ཡོད་པ་རེད།

འདི་ནི་རྡོ་རྗེ་སྒྲོལ་མས་སློབ་གྲྭ་གྲོལ་རྗེས་སྤོ་ལོའི་ལྷམ་ལག་ཏུ་ཁྱེར་ནས་ཁྱིམ་དུ་ལོག་བཞིན་པ།

སློབ་གྲྭའི་དགེ་རྒན་གྱིས་རྡོ་རྗེ་སྒྲོལ་མར་རྒྱབ་སྐྱོར་ཆེན་པོ་བྱེད་ཀྱི་ཡོད། ལྷ་ས་གྲོང་ཁྱེར་འདམ་གཞུང་རྫོང་ལུང་རིང་ཤང་ལྟེ་བའི་སློབ་ཆུང་དུ་རྐང་རྩེད་སྤོ་ལོ་དང་། ལན་ཆིའུ་སྤོ་ལོ། ཞབས་བྲོ་སོགས་སྤྲོ་སྣང་ཚོགས་ཆུང་མང་པོ་བཙུགས་ཡོད་པ་མ་ཟད། ད་དུང་རྐང་རྩེད་སྤོ་ལོའི་རུ་ཁག་གྲབས་འཛུགས་བྱེད་བཞིན་ཡོད། སློབ་སྤྱི་པ་སངས་ཚེ་རིང་གིས་སློབ་མ་ཚོ་ཕྱོགས་གང་ས་སྤྱི་ཐད་ནས་ཡར་རྒྱས་ཡོང་ཐབས་བྱས་ཏེ་ཉུང་མཐར་ཡང་དགའ་ཕྱོགས་གཅིག་གསོ་སྐྱོང་ཐུབ་པ་བྱེད་ཀྱི་ཡོད། “དེ་འདྲ་བྱུང་ན་ཁོང་ཚོ་སྤྱི་ཚོགས་དང་མཉམ་འདྲེས་ཡག་པོ་ཐུབ་པ་མ་ཟད། སྤྲོ་སྣང་ལྡན་པའི་འཚོ་བར་ཡང་རོལ་ཐུབ”ཅེས་བཤད།

འདི་ནི་རྡོ་རྗེ་སྒྲོལ་མས་ཕྱུགས་འཚོ་བཞིན་པ།

འབྲོག་རའི་ནང་བཙུགས་པའི་ཤང་སློབ་ཆུང་ལ་རོལ་དབྱངས་དང་། མཛེས་རྩལ། རྩིས་འཁོར་བཅས་ཀྱི་ཆེད་ལས་སློབ་ཁང་ཡོད་པ་དེ་ནི་བོད་དུ་འཕེལ་ཕྱོགས་ཤིག་ཏུ་གྱུར་ཡོད། “ལོ་ལྔ་ཚན་བཅུ་གསུམ་པའི་སྐབས་བོད་ཀྱི་སློབ་གསོའི་རོལ་དབྱངས་དང་། ལུས་རྩལ། མཛེས་རྩལ་བཅས་སློབ་ཚན་གྱི་དགེ་རྒན་ཆེད་ལས་ཅན་གྱི་ཚད་དེ་རྒྱུན་ཆད་མེད་པར་གོང་མཐོར་འགྲོ་བ་དང་དམའ་རིམ་སློབ་འབྲིང་གི་རྩིས་རིག་དང་། དངོས་ཁམས། རྫས་འགྱུར་བཅས་སློབ་ཚན་གྱི་སློབ་ཁྲིད་འཆར་གཞི་ལེགས་གྲུབ་བྱས་ཚད་100%ཟིན་ཡོད། དམའ་རིམ་སློབ་འབྲིང་གི་དངོས་ཁམས་དང་། རྫས་འགྱུར། སྐྱེ་ཁམས་བཅས་ཀྱི་ཚོད་ལྟའི་སློབ་ཚན་ཁྲིད་ཚད་100%ཟིན་ཡོད། ལོ་ངོ་10ཡི་རིང་རྒྱལ་ཁབ་ནོར་སྲིད་རང་བཞིན་གྱི་སློབ་གསོའི་གྲོན་དངུལ་བོད་ལ་སྔ་ཕྱིར་བསྡོམས་པས་སྒོར་དུང་ཕྱུར་1656.89བཏང་བ་དང་ལོ་རེར་ཆ་སྙོམས་17.96%འཕར་ཡོད་པ་རེད།

ཚོད་འཛིན་མེད་པའི་སྤྱི་ཚོགས་ཁོར་ཡུག་གིས་གཞོན་སྐྱེས་པས་བློ་སྟོབས་ཆེན་པོས་ཕུགས་འདུན་མངོན་འགྱུར་ཡོང་བ་བྱེད་ཀྱི་ཡོད། གྲངས་གཞི་ལས་མངོན་པར“ལོ་ལྔ་ཚན་བཅུ་གསུམ”རིང་བོད་ཀྱི་ཁྲོམ་རའི་བྱེད་པོ་ཐེམ་དུད་ཁྲི་36.5ཟིན་པ་དང་། ལོ་5ཡི་རིང་ལྡབ་1.3འཕེལ་ཡོད་པས་ལས་གཏོད་བྱ་གཞག་གི་ཚ་རླབས་མུ་མཐུད་འཕྱུར་བཞིན་ཡོད།  2012ལོ་ནས་ད་བར་བོད་དུ་སློབ་ཆེན་སློབ་མ་4000ཡན་ནང་སར་ལས་ཞུགས་ཐུབ་ཡོད་པས་སྲོལ་རྒྱུན་གྱི་བོད་ཀྱི་སློབ་ཐོན་སློབ་མའི་ལས་ཞུགས་ཀྱི་རྣམ་པར་འགྱུར་བ་ཕྱིན་ཡོད།

བློ་བཟང་སྒྲོལ་མར་སློབ་མ་མང་པོའི་ཁྱིམ་བདག་གིས་ཕྲུ་གུར་མོ་ཐྲོལ་གྱི་རྨང་གཞིའི་སྦྱོང་བརྡར་ཐེབས་རྗེས་བསམ་ཚུལ་ཤོད་ཕོད་པ་དང་བློ་སྟོབས་ཆེ་བར་གྱུར་ཡོད་པའི་འཕྲིན་འབྱོར་གྱི་ཡོད།

ཨ་མས་ཁོང་གི་གཟེངས་བསྟོད་དེབ་དེ་ཁྱིམ་གྱི་མངོན་གསལ་དོད་སའི་ས་ཆར་བཞག་ཡོད་པ་བློ་བཟང་སྒྲོལ་མས་ཕྱིས་སུ་ཤེས་རྟོགས་བྱུང་ཡོད།

ཁོང་གི་ལས་ཀས་མཛེས་ཉམས་བསྐྲུན་པ་དང་མཛེས་པ་རྒྱུད་སྤྲོད་བྱེད་ཀྱང་ཁོང་གི་སེམས་ནང་གི་མཛེས་པ་ནི་ཁོང་ཡངས་དང་བརྩི་འཇོག་རེད་ལ། རང་ཉིད་ལ་གདེང་འཇོག་བྱས་པ་ཞིག་ཀྱང་རེད།

“ངའི་མིང་ལ‘སྒྲོལ་མ’ཟེར་བ་དེས་ནུས་ཤུགས་ལྡན་པའི་བུད་མེད་ཞིག་མཚོན་པས། དེ་བས་མང་བའི་གཞོན་སྐྱེས་ཚོར་ཕུགས་བསམ་མངོན་འགྱུར་བྱེད་པའི་བློ་སྟོབས་ལྡན་རྒྱུའི་རེ་བ་ཡོད”ཅེས་བློ་བཟང་སྒྲོལ་མས་བཤད།

བྱང་ཕྱོགས་ཀྱི་འབྲོག་རའི་སྟེང་ལུང་རིང་ཤང་ལྟེ་བའི་སློབ་ཆུང་གི་ལོ་གཅིག་དུས་གཅིག་གི་རྐང་རྩེད་སྤོ་ལོའི་འགྲན་བསྡུར་འགོ་ཚུགས་པ་དང་། རྡོ་རྗེ་སྒྲོལ་མ་ཡང་འགྲན་བསྡུར་ནང་ཞུགས་ཡོད། ཨ་མས་ཁོང་ལ་རྐང་རྩེད་སྤོ་ལོ་རྒྱག་པའི་ལྷམ་གསར་རྐྱང་ཞིག་སྤྲད།

སྤོ་ལོའི་ཐང་དུ་ལྷགས་པ་བརྒྱབ་ནས་གྲང་ཟུག་ཆེན་པོ་ཡོད་ཀྱང་སྤོ་ལོ་ལྟ་མཁན་མང་པོ་ཡོད། རྡོ་རྗེ་སྒྲོལ་མས་ལྷམ་གསར་པ་གྱོན་ཏེ་རུ་མི་གཞན་དང་མཉམ་དུ་སྐྱེས་པའི་རུ་ཁག་ནང་ཞུགས།

དེ་ནི་སློབ་གྲྭའི་དམིགས་བསལ་གཏན་འབེབས་ཡིན་ཞིང་མི་བདུན་གྱི་འགྲན་བསྡུར་ནང་རུ་ཁག་རེར་ཉུང་མཐར་ཡང་བུ་མོ་རུ་མི་གཉིས་དགོས་ཀྱི་ཡོད། ཁོང་ཚོས་ས་བབ་མཐོ་ཚད་སྨི་4000ལྷག་ཙམ་ཟིན་པའི་ས་མཐོའི་ཐོག་གང་དགའ་གང་སྐྱིད་ངང་རྐང་རྩེད་སྤོ་ལོར་རོལ་བཞིན་ཡོད། ཁོང་གི་དགའ་ཞེན་དེར་སྲུང་སྐྱོང་དང་རྒྱབ་སྐྱོར་ཐོབ་ཡོད།

“སྒྲོལ་མ་ཤུགས་རྒྱོབ། སྒྲོལ་མ་ཤུགས་རྒྱོབ”ཅེས་ལྷད་མོ་བ་ཚོས་ངར་ཤུགས་སློང་བཞིན་ཡོད།

( བསོད་ནམས་དབང་འདུས་ཀྱིས་སྒྱུར་ཞུས་བྱས )