ཟླ་6ཚེས་15ཉིན། བོད་ཀྱི་སློབ་གྲྭར་འགྲོ་མུས་ཀྱི་སློབ་གྲྭ་ཆེ་མོ་བ་ལས་གྲུབ་པའི་དྲོ་སྐྱིད་སྤྱི་ཕན་ཚོགས་པ་དང་། མཉམ་དུ་དགའ་སྤྱི་ཕན་རུ་ཁག TCསྤྱི་ཕན་རུ་ཁག གངས་ལྷ་རེ་སྒྲུབ་སྤྱི་ཕན་ཚོགས་པ། བོད་དབྱངས་གཞོན་ནུ་བཅས་ཀྱིས་གཉེར་འགན་འཁུར་བའི་སྦྲ་གུར་ནག་པོའི་སྐབས་དང་པོའི་སྤྱི་ཕན་བྱེད་སྒོའི་འགོ་ཚུགས་མཛད་སྒོ་ལྷ་སའི་ཧི་མ་ལ་ཡ་མགྲོན་ཁང་དུ་གཉེར་བ་རེད།
ད་ཐེངས་ཀྱི་བྱེད་སྒོར་ལྷ་ས་གྲོང་ཁྱེར་གུང་གཞོན་སྡེ་ཚོགས་ཨུ་ལྷན་གཞོན་ནུའི་དང་བླངས་མཐུན་ཚོགས་དང་། གནས་མཆོག་སྒྱུ་རྩལ་ལས་དོན་ཁང་། བོད་ལྗོངས་ཅ་ཞང་རླངས་འཁོར་ཕྱིར་ཚོང་ཞབས་ཞུ་ཚད་ཡོད་ཀུང་སི། ཧི་མ་ལ་ཡ་མགྲོན་ཁང་། གངས་ལྗོངས་དཔེ་ཀློག་ཁང་། ཁ་བཏགས་དཀར་པོ་ལོང་བའི་རོལ་དབྱངས་ཚོགས་པ་སོགས་ཀྱི་རྒྱབ་སྐྱོར་ཐོབ་ཡོད་པ་རེད།
བྱེད་སྒོ་འདིའི་འགན་འཁུར་བ་བསྟན་འཛིན་ཟླ་བས“ང་ཚོ་སློབ་ཆེན་སློབ་མ་300ལྷག་ཙམ་གྱིས་ད་ཐེངས་ཀྱི་སྤྱི་ཕན་བྱེད་སྒོ་འདི་བརྒྱུད། མི་རྣམས་ཀྱིས་ང་ཚོའི་ཚོགས་པར་རྒྱུས་མངའ་ཡོང་བ་བྱ་རྒྱུ་མ་ཟད། མི་དེ་བས་མང་བ་སྤྱི་ཕན་གྱི་བྱེད་སྒོར་ཞུགས་རྒྱུའི་རེ་བ་ཡོད། འདི་འདྲ་བྱུང་ན། ང་ཚོའི་ཚོགས་པ་ཉིན་རེ་མ་འདས་པར་སྟོབས་ཆེར་འགྲོ་རྒྱུ་སྨོས་མེད་རེད་ལ། དེང་སྐབས་ཀྱི་སློབ་ཆེན་སློབ་མའི་འགན་འཁྲི་ཁུར་སེམས་དང་ལས་འགན་སྒྲུབ་སེམས་ཀྱང་སྔར་བས་ཆེ་རུ་འགྲོ་རྒྱུ་རེད། ཡིན་ནའང་ང་ཚོ་སློབ་མ་ཞིག་ལ་ཆ་མཚོན་ན། དཔལ་འབྱོར་གྱི་ཐོག་ནས་རོགས་རམ་དེ་ཙམ་བྱེད་མི་ཐུབ་རུང་ནུས་པས་ལྕོགས་ཚོད་ཀྱིས་སྤྱི་ཕན་བྱ་བ་སྒྲིག་འཛུགས་བྱ་རྒྱུ་ཡིན། དེ་ནི་ང་ཚོ་སློབ་ཆེན་སློབ་མས་ཕ་ཡུལ་ལ་དྲིན་ལན་འཇལ་བའི་ཐབས་ལམ་ཞིག་རེད”ཅེས་བརྗོད།
བོད་དབྱངས་གཞོན་ནུ་སྤྱི་ཕན་ཚོགས་པའི་འགན་འཁུར་བ་སྐལ་བཟང་ཡོན་ཏན་གྱིས་ཀྱང“ངས་ད་ཐེངས་ཀྱི་བྱེད་སྒོའི་ཁོངས་མི་ཚང་མའི་ཚབ་ཞུས་ནས། རོགས་སྐྱོར་ཚན་པ་དང་། བྱེད་སྒོར་ཞུགས་མཁན་དང་བླངས་པ། དེ་བཞིན་རོགས་སྐྱོར་གནང་མཁན་རྒྱ་ཆེའི་དྲ་གྲོགས་ལ་ཐུགས་རྗེ་ཆེ་ཞུ་རྒྱུ་མ་ཟད། ཕྱིས་སུ་ང་ཚོས་སྤྱི་ཕན་གྱི་བྱེད་སྒོ་འདི་འདྲ་མང་ཙམ་སྤེལ་རྒྱུ་ཡིན”ཞེས་བཤད།
གསར་འགོད་པར་ཤེས་རྟོགས་བྱུང་བར་གཞིགས་ན། ད་རེས་ཀྱི་ཞལ་འདེབས་འབུལ་བའི་བྱེད་སྒོ་དེ་ཟླ་6ཚེས་16ཉིན་ནས་ཚེས་25ཉིན་བར་གྱི་ཞོགས་པའི་ཆུ་ཚོད་10པ་ནས་12བར་དང་ཕྱི་དྲོའི་ཆུ་ཚོད་2པ་ནས་4པ་བར་སྤེལ་རྒྱུ་ཡིན་པ་དང་། ཁྲེང་ཀོན་མེ་ཏོག་ལྡུམ་ར་དང་། རྣམ་སྲས་སྡེ་ཁུལ། བདེ་སྐྱིད་སྡེ་ཁུལ། ཞོལ་སློབ་ཆུང་སོགས་ནས་ཞལ་འདེབས་དངོས་ཟོག་བསྡུ་རྒྱུ་རེད། (འབྲེལ་གཏུག་ཁ་པར་13549015872) ད་ཐེངས་སྤྱི་ཚོགས་ནས་ཞལ་འདེབས་ཕུལ་བའི་ཅ་དངོས་ཚང་མ་ནག་ཆུ་གྲོང་ཁྱེར་ཨ་མདོ་རྫོང་ལ་སྤྲོད་རྒྱུ་རེད།
བསྟན་འཛིན་ཟླ་བས“ངས་ནག་ཆུར་སྐྱོད་མཁན་དང་བླངས་པ་ཚོའི་ཚབ་ཞུས་ནས། ཞལ་འདེབས་ཕུལ་བའི་དངོས་ཟོག་ཚང་མ་དཀའ་ངལ་ཡོད་པའི་མང་ཚོགས་ཀྱི་ལག་ཏུ་འབྱོར་ཐུབ་པའི་འགན་ལེན་བྱེད་ཀྱི་ཡིན”ཞེས་བརྗོད།
སློབ་ཆེན་སློབ་མ་སྤྱི་ཕན་གྱི་བྱེད་སྒོར་ཞུགས་པ་ལས་ཁོང་ཚོའི་སྤྱི་ཡོངས་ཀྱི་བྱང་ཚད་མཐོ་རུ་འགྲོ་རྒྱུ་ཡིན་ཞིང་། སློབ་ཆེན་སློབ་མས་སྤྱི་ཚོགས་ལ་རྒྱུས་མངའ་ཡོང་བ་དང་། སྤྱི་ཚོགས་ལ་ཞབས་འདེགས་ཞུ་བ། གསར་གཏོད་ཀྱི་བསམ་པ་སྐྱེད་སྲིང་ཐུབ་པ། ལག་ལེན་གྱི་འཇོན་ཐང་ཆེ་རུ་འགྲོ་བ། སློབ་མའི་བསམ་བློ་ཀུན་སྤྱོད་ལེགས་སུ་འགྲོ་བ་བཅས་ལ་དོན་སྙིང་གལ་ཆེན་ལྡན་ཡོད།