ནམ་མཁའ་སྔོ་ཞིང་གཡའ་དག་ལ་དཔྱིད་རླུང་དལ་བུར་ལྡང་བའི་རེས་གཟའ་པ་སངས་ཀྱི་ཉིན་མོར། དགུང་ཟས་བཟས་མ་ཐག ཐོག་མའི་ཁ་ཆད་ལྟར་གསར་འགོད་པས་གྲ་སྒྲིག་ལེགས་པར་བྱས་ནས། ད་ལྟ་ལྷ་སའི་མཐུན་སྒྲིལ་གྲོང་གསར་དུ་བཞུགས་བཞིན་པའི་ཕ་ཡུལ་རྣམ་གླིང་རྫོང་ཐོབ་རྒྱལ་ཤང་ཤ་རུ་གྲོང་ཚོའི་བགྲེས་སོང་ཆུང་བདག་ལ་བཅར་འདྲིར་བསྐྱོད་པ་ཡིན། ང་ཚོ་སྡེ་ཁུལ་གྱི་ལས་དོན་པའི་སྣེ་ཁྲིད་འོག ཀྱག་ཀྱོག་གི་སྲང་ལམ་ཞིག་བརྒྱུད་ནས་བགྲེས་སོང་ཆུང་བདག་གི་སྒོ་རྩར་འབྱོར། 

བགྲེས་སོང་ཁོང་དང་བཟའ་ཟླས་སྔ་ས་ནས་རང་ཁྱིམ་གྱི་སྒོ་ཁར་ང་ཚོ་བསྒུགས་ནས་བསྡད་འདུག

གསར་འགོད་པ་མཐོང་མ་ཐག སེམས་རྩ་འཁོལ་པོས་ནང་དུ་ཕེབས་ཞེས་བརྗོད་ཞོར། ང་ཚོ་ཚོམས་ཆེན་དུ་ཁྲིད་པ་དང་ཞལ་ཏོག་གམ་ཡང་ན་ཤིང་འབྲས་ནས་མཆོད་དང་ཞེས་སྨྲས། ཚོམས་ཆེན་དུ་འབྱོར་དུས་ཁང་པ་མཛེས་བཟོ་རྫིག་པོ་བྱས་འདུག་པས། ངས་མ་བསམ་ཁ་ནས་ད་ལྟའི་དུས་སུ་ལྷ་སར་ཁང་པ་ཆེ་ཆུང་དེ་འདྲ་ཡོད་ན་དངོས་ནས་སྐྱིད་པོ་རེད་ཅེས་ཤོད་ཀྱིན་ཁང་པའི་རྒྱ་ཁྱོན་ག་ཚོད་ཡོད་མེད་སྐོར་དྲིས། ཁོང་གིས“ངའི་ཁང་པར་སྨི་ངོས་གྲུ་140ལྷག་ཡོད་པ་དང་2017ལོར་ཡང་བསྐྱར་མཛེས་བཟོ་བྱས་པ་ཡིན”ཞེས་ལན་བཏབ། 

ད་ལོ་ལོ་73ལ་སླེབས་པའི་བགྲེས་སོང་ཁོང་སྔར་བཞིན་གཟུགས་པོ་ཐང་ལ་གྲུང་ཤ་དོད་ཅིང་། དཔྲལ་བའི་གཉེར་མའི་གསེབ་ནས་ལོ་ཟླའི་རྗེས་ཤུལ་དང་མི་ཚེའི་ཉམས་མྱོང་ངང་གིས་མངོན་ཡང་།  སྐད་ཆ་ཤོད་སྐབས་སྐད་ཤུགས་ཆེ་ལ་སྐས་ཀ་འཛེག་དུས་ཡང་ཤ་དོད་པས་ལོ་ན་མཐོ་པོ་ཡིན་པའི་ཚོར་སྣང་ཅི་ནས་མི་འདུག 

རང་ཁྱིམ་གྱི་སྒོ་འགྲམ་དུ་བཞུགས་པའི་བགྲེས་སོང་ཆུང་བདག་ལགས།

སྔོན་མའི་ལོ་རྒྱུས་སྐོར་གླེང་དུས། ལོ་བཅུ་ལྷག་སྤྱི་ཚོགས་རྙིང་པའི་ནང་འཚོ་བ་སྐྱེལ་མྱོང་བའི་བགྲེས་སོང་ཁོང་གིས་སྐབས་དེར་ངལ་རྩོལ་མི་དམངས་95%ལྷག་ཙམ་ལ་རང་ལུས་རང་དབང་མེད་པ་མ་ཟད། ཁང་པའང་ད་ལྟ་ལྟར་ཡག་པོ་མེད”ཅེས་ཇ་འཐུང་ཞོར་གྱོན་པའི་བཟོ་ལྟ་བཟོ་ཙམ་བྱས་ནས་ང་ཚོ་འདས་དོན་གྱི་ཀློང་དུ་ཕྱིར་དྲན་བྱེད་པར་ཁྲིད་བྱུང་། 

“ཆེས་མུན་ནག་དང་། ཆེས་ཀླ་ཀློ། ཆེས་གདུག་རྩུབ་ཀྱི་སྤྱི་ཚོགས་རྙིང་པར་ཞིང་བྲན་ལ་རང་ལུས་རང་དབང་མེད་ཅིང་། སྡོད་ཁང་ཐེབས་ཆག་ཡིན་པ་དང་། ཉིན་མོའི་མི་དང་མཚན་མོའི་ཁྱི་ལྟར་གྱིས་ལས་ཀ་བྱས་ཀྱང་། ལྟོ་གྲོད་པ་རྒྱགས་པ་ཟ་རྒྱུ་མེད་ལ། གོས་ངོ་དྲག་པ་གཅིག་ཀྱང་གྱོན་རྒྱུ་མེད་པ་དང་། སློབ་གྲྭར་འགྲོ་བའི་གོ་སྐབས་ནི་ཉིན་མོའི་སྐར་མ་ལྟ་བུ་རེད”ཅེས་བགྲེས་སོང་ཆུང་བདག་གིས་ཕྱིར་དྲན་བྱེད་བཞིན་ངག་ལྡབ་ལྡིག་ངང་བརྗོད་ལ། “ང་རང་སྔོན་མ་ལོ་ན་ཕྲ་བས། ཁྲལ་ལྕི་པོ་འཁུར་ཐབས་བྲལ་སྟབས། ཕ་མས་ཞིང་བྲན་བདག་པོའི་ལུག་འཚོ་བར་བཏང་། ལུག་རྫིར་འགྲོ་དུས་ཞོགས་སྔ་ལངས་དང་དགོང་ཕྱི་ཉལ་བྱེད་དགོས། ལྷག་པར་དུ། ལྟོ་ཞིམ་པོ་ཟ་རྒྱུ་སྤྲོས་བྲལ་རེད། གྲོད་པ་རྒྱགས་པ་ཐེངས་གཅིག་ཀྱང་ཟ་རྒྱུ་མེད། ལྷམ་གྱོན་རྒྱུ་མེད་པས་དགུན་ཁར་འཁྱགས་སྦོས་ཐེབས་པ་དང་། སྟོན་དུས་སུ་སོག་མ་རྐང་མཐིལ་ལ་ཟུག་སྟེ་ན་ཟུག་བཟོད་ཐབས་བྲལ་བ་གཏོང་གི་འདུག”ཅེས་བརྗོད། འདྲེན་བྱེད་ཟུང་དུ་མཆི་ཞགས་འཁོར་བཞིན་སྔོན་མའི་ཉམ་ཐག་གི་འཚོ་བའི་སྐོར་གླེང་བའི་མཚམས་འདིར། གསར་འགོར་པར་ཡ་ང་སྙིང་རྗེའི་ཚོར་སྣང་ཞིག་ངང་གིས་སྐྱེས་ལ། ད་ལྟ་བདེ་སྐྱིད་ལྡན་པའི་འཚོ་བ་སྐྱེལ་རྒྱུ་བྱུང་བ་ནི་ཀྲུང་གོ་གུང་ཁྲན་ཏང་གི་བཀའ་དྲིན་རང་རེད་སྙམ་བྱུང་། 

ཆུང་བདག་གིས་གསར་འགོད་པའི་བཅའ་འདྲི་དང་ལེན་གནང་བཞིན་པ།

ཁོང་གིས“སྤྱི་ཚོགས་རྙིང་པར་ངའི་ཕ་ཡུལ་ནས་ལྷ་ས་བར་ལམ་ངོ་དྲག་པ་གཅིག་ཀྱང་མེད་ཅིང་། གྲོང་ཚོའི་སྲང་ལམ་གང་སར་དབྱར་ཁ་ཆར་པ་འབབ་སྐབས། འདམ་རྫབ་ཀྱིས་ཁེངས་པ་དང་། དཔྱིད་ཀ་ཐལ་རླུང་འཚུབ་དུས་ལམ་ཁའང་གསལ་པོ་མཐོང་གི་མེད། ད་ཆ་རྒྱ་ཆེ་བའི་ཨར་འདམ་ལམ་ཁྱིམ་དུད་ཚང་མའི་སྒོ་རྩར་བཏིངས་ཡོད་པ་མ་ཟད། གཞུང་ལམ་གྱི་གཡས་གཡོན་དུ་ལྗོན་ཤིང་སྣ་ཚོགས་བཏབ་ཡོད། གྲོང་མིའི་སྡོད་ཁང་མང་ཆེ་བ་དཀར་ཆ་དོད་ལ་རྒྱ་ཆེ་བའི་ཉིས་ཐོག་ཤ་སྟག་རེད། བྱས་ཙང་ང་ཚོའི་ཟས་གོས་སྡོད་གསུམ་ལ་སེམས་ཁྲལ་བྱེད་དགོས་མེད་ལ། སློབ་གསོར“འགན་ལེན་གསུམ”ཡོད་པ་དང་། རྒས་དུས་འཚོ་རྟེན་ཡོད་པ་དང་ན་དུས་སྨན་བཅོས་ཡོད་པ་མ་ཟད། སྨན་རིན་མང་ཆེ་བ་སྲིད་གཞུང་གི་སྤྲོད་ཀྱི་འདུག”ཅེས་ད་ལྟའི་བདེ་སྐྱིད་ཀྱི་འཚོ་བའི་སྐོར་གླེང་སྐབས་བཞིན་ལས་འཛུམ་མདངས་མངོན། 

1965ལོར་ཁོང་དམག་མིར་ཞུགས་པ་དང་ལོ་དྲུག་དམག་དཔུང་དུ་སྡོད་རིང་འཐབ་འཛིང་པ་དང་། བཅུ་དཔོན་གཞོན་པ། བཅུ་དཔོན་རྒན་པ་སོགས་བྱེད་མྱོང་ལ། སྔ་རྗེས་སུ་བཟང་པོ་ལྔ་ལྡན་གྱི་འཐབ་འཛིང་པའི་དཔེ་བཟང་ཐེངས་བཞི་ཙམ་རག་ཡོད་།1967ལོར་ཏང་ཡོན་ལ་ཞུགས་པ་དང་། དེ་རྗེས་དམག་ཁོངས་ནས་ལོག་སྟེ་བཟོ་པར་གྱུར་པའི་ཁོང་1971ལོར་ཀོང་པོའི་ཤོག་བུ་བཟོ་གྲྭར་ལས་ཀ་བྱེད་པར་བསྐྱོད། སྐབས་དེ་དུས་ཁོང་གིས་བཟོ་གྲྭའི་ཁྲང་ཀྲང་དང་ཧྲུའུ་ཅིའི་འགན་གཅིག་ལྕོགས་ཁུར་ནས་བཟོ་པར་སྐུལ་སློང་གིས་ཐོན་སྐྱེད་འཕེལ་རྒྱས་བཏང་བས། དཔལ་འབྱོར་ཆེས་ཆེར་འཕར་བ་དང་སྦྲགས། བཟོ་པ་ཚོའི་འཚོ་བ་ལའང་འགྱུར་ལྡོག་ཆེན་པོ་བྱུང་ཡོད། དེར་བརྟེན། 1985ལོར་ལྷ་སའི་འགྱིག་ཆས་བཟོ་གྲྭར་ཁྲང་ཀྲང་དང་ཧྲུའུ་ཅིའི་འགན་གཅིག་ལྕོགས་བཞེས་སུ་བཅུག ལྷ་སའི་འགྱིག་ཆས་བཟོ་གྲྭར་ཐོན་སྐྱེད་ལ་དཀའ་ངལ་འཕྲད་སྐབས་ཡིད་མུག་ནས་མི་སྡོད་པར་བསམ་བློ་དྲུག་གསུམ་བཅོ་བརྒྱད་དང་དཀའ་བ་དུ་མ་སྤྱད་པས། བཟོ་གྲྭའི་ཕྱོགས་གང་ས་ཅི་ཐད་ལ་འཕེལ་རྒྱས་ཆེན་པོ་བྱུང་ཡོད། 2009ལོར་རྒན་ཡོལ་ཞུས་རུང་། ཁོང་གིས་ཏང་དང་མི་དམངས་ལ་ཞབས་འདེགས་ཞུ་མཚམས་མ་བཞག་པར་མཐུན་སྒྲིལ་གྲོང་གསར་སྡེ་ཁུལ་གྱི་ཙུའུ་ཀྲང་དང་བཅུ་དཔོན་བྱས་ཏེ་ཏང་གི་སྲིད་ཇུས་བཟང་པོ་མང་ཚོགས་ལ་སྒྲོག་འགྲེལ་བྱས་དང་བྱེད་མུས་རེད། 

“མདོར་ན། ད་ཆའི་བློ་བདེ་བག་ཕེབས་དང་བདེ་སྐྱིད་ལྡན་པའི་འཚོ་བ་འདི་གུང་ཁྲན་ཏང་གིས་གནང་བྱུང་། ཏང་གི་བཀའ་དྲིན་བཟང་པོའི་འོག་ངའི་ཕྲུ་གུ་གསུམ་ཚང་མར་ལས་ཀ་རག་བྱུང་། ཏང་ཡོན་རྒན་གྲས་ཤིག་ཡིན་པའི་ང་རང་ལ་ཁ་གསབ་མི་ཉུང་བ་འདུག”ཅེས་བགྲེས་སོང་ཆུང་བདག་གིས་དགའ་ཚོར་ཆེན་པོས་བརྗོད་བྱུང་། 

“བགྲང་བྱ་དྲུག་ཅུའི་རིང་ཀྲུང་གོ་གུང་ཁྲན་ཏང་གི་མཁས་མཛངས་ལྡན་པའི་འགོ་ཁྲིད་འོག་ཞིང་བྲན་ཁྲི་ཚོ་བརྒྱར་ཡང་ལངས་བཅིངས་འགྲོལ་ཐོབ་ནས་རང་ཁྱིམ་རང་བདག་བྱུང་སྟེ། བོད་རྗེས་ལུས་ནས་ཡར་ཐོན་དང་། དབུལ་ཕོངས་ནས་འབྱོར་ཕྱུག སྲིད་དབང་སྒེར་འཛིན་ནས་དམངས་གཙོ། སྒོ་རྒྱག་ནས་སྒོ་དབྱེ་བཅས་ཀྱི་ཕྱོགས་སུ་བསྐྱོད་དེ། དུས་ཐུང་ལོ་ངོ་དྲུག་བཅུའི་རིང་ལོ་ངོ་སྟོང་གི་མཆོང་སྐྱོད་བྱུང་ཡོད། ད་ཆ་བོད་ཀྱི་མི་རིགས་ཁག་གི་མི་དམངས་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་དང་ལྗོངས་ཏང་ཨུད་ཀྱི་ཡང་དག་པའི་འགོ་ཁྲིད་འོག ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པའི་ཕྱོགས་སུ་སྐྱོད་བཞིན་ཡོད་པས། ང་ཚོའི་འཚོ་བ་ཉིན་རེ་ལས་མ་འདས་པར་ཡག་ཏུ་འགྲོ་རྒྱུ་ཡིན་པ་ང་ལ་ཡིད་ཆེས་བརྟན་པོ་ཡོད”ཅེས་བརྗོད་བྱུང་།