སྤྱི་ཚེས་8ཉིན།　གཞོན་སྐྱེས་པར་ལེན་པ་འབྲོག་བསྟན་འཛིན་ཆོས་འཕེལ་གྱི་པར་ལེན་འགྲེམ་སྟོན“མཁའ་དབྱིངས་ནས་བོད་ལྗོངས་མཇལ་བ”ཞེས་པ་བོད་རང་སྐྱོང་ལྗོངས་མང་ཚོགས་སྒྱུ་རྩལ་ཁང་དུ་སྤེལ་འགོ་ཚུགས།　ད་ཐེངས་ཀྱི་པར་ལེན་འགྲེམ་སྟོན་དེ་བོད་རང་སྐྱོང་ལྗོངས་པར་ལེན་མཐུན་ཚོགས་ཀྱིས་གཙོ་གཉེར་བྱས་པ་དང་།　ལྷ་ས་གྲོང་ཁྱེར་རིག་རྩལ་ལྷན་ཚོགས་དང་བོད་རང་སྐྱོང་ལྗོངས་མང་ཚོགས་སྒྱུ་རྩལ་ཁང་གིས་མཐུན་གཉེར་བྱས་པ།　བོད་ལྗོངས་འདམ་ཤོད་དཀར་མོ་པར་རིས་རིག་གནས་ཀུང་སིས་སྒྲུབ་འགན་འཁུར་བ་ཞིག་རེད།　ད་རེས་ཀྱི་འགྲེམ་སྟོན་དེ་ཟླ་8ཚེས་8ཉིན་ནས་ཚེས་15ཉིན་བར་བྱ་རྒྱུ་ཡིན།

ཤེས་གཏོགས་བྱུང་བར་གཞིགས་ན།　ད་ཐེངས་གི་པར་ལེན་འགྲེམ་སྟོན་ཐོག་གི་བརྩམ་བྱ་དེ་རྣམས་འབྲོག་བསྟན་འཛིན་ཆོས་འཕེལ་གྱིས་2017ལོ་ནས་2019ལོ་བར་དུ་བོད་ལྗོངས་གི་ས་གནས་ཁག་ནས་པར་ལེན་བྱས་པ་ཞིག་ཡིན་པ་དང་།　ཁོང་ནི་2008ལོར་བོད་རང་སྐྱོང་ལྗོངས་པར་ལེན་མཐུན་ཚོགས་དང་།　2012ལོར་ཀྲུང་གོ་པར་ལེན་མཐུན་ཚོགས་དུ་ཞུགས།　　

“པར་ལེན་གྱི་ལམ་བུ་ནི་དཀའ་ཚེགས་ཧ་ཅང་ཆེ་བ་ཞིག་སྟེ།　པར་རྒྱག་བརྒྱུད་རིམ་ནང་རྐང་ཐང་མར་འགྲོ་བ་དང་།　རྟ་བཞོན་པ།　རླངས་འཁོར་ལ་སྡོད་པ།　བྱེས་ཐང་དུ་སྒར་རྒྱག་པ།　གྲོང་མིའི་སྡོད་ཁང་གཡར་བ་སོགས་ནི་རྒྱུན་གཏན་གྱི་གནས་ཚུལ་ཡིན”ཞེས་འབྲོག་བསྟན་འཛིན་ཆོས་འཕེལ་གྱིས་གསར་འགོད་པར་བཤད་བྱུང་།　2017ལོ་ནས་ད་བར་ཁོང་གིས་སྤྱི་ལེ་ཁྲི་6ཙམ་གྱི་ལམ་ཐག་བརྒྱུད་ནས་བོད་ཀྱི་ས་ཆ་གང་སར་སླེབས་ཐུབ་པ་བྱུང་ཞིང་།　དེའི་རིང་གནམ་པར་རྒྱག་ཐབས་ལ་བརྟེན་ནས་མངའ་རིས་ཀྱི་ས་བབ་མཐོ་བའི་ཁུལ་དང་ནག་ཆུའི་བྱང་ཐང་མི་མེད་ཁུལ།　ཉིང་ཁྲི་མེ་ཏོག་རྫོང་གི་གདོད་མའི་ནགས་ཚལ།　གྲོང་ཁྱེར་དང་ས་གནས་ཁག་གི་རྣམ་པ་གསར་པའི་ཡུལ་ལྗོངས་ཡོངས་རྫོགས་སོགས་བོད་ལྗོངས་བརྗོད་བྱ་གཙོ་བོར་བྱས་པའི་མཁའ་ཐོག་པར་ལེན་བརྩམས་ཆོས་མི་ཉུང་བ་ཞིག་པར་ལེན་བྱས་ཡོད།　　　　　

ཁོང་གིས་འཚོལ་བསྡུ་བྱས་པའི་བརྙན་པར་དཔྱད་གཞི་མང་པོའི་ཐོག་ནས་བོད་ཀྱི་དཔལ་འབྱོར་འཕེལ་རྒྱས་དང་།　འཆམ་མཐུན་བརྟན་ལྷིང་།　སྣོད་བཅུད་བཟང་བ།　དམངས་རྣམས་བདེ་སྡོད་ལས་བརྩོན་བཅས་ཀྱི་རྣམ་པ་མངོན་པ་མ་ཟད།　རྩོམ་པ་པོས་ང་ཚོའི་ཉེ་འགྲམ་དུ་ཡོད་པའི་བདེན་བཟང་ཉམས་གསུམ་རང་ཉིད་ཀྱི་སེམས་ཁམས་དང་མིག་གཉིས་ལ་བརྟེན་ནས་བཟུང་ཐུབ་པ་བྱས་ཏེ་མི་དམངས་མང་ཚོགས་ཀྱི་མིག་ལམ་དུ་འཆར་ཐུབ་པ་བྱུང་བ་དེས་མི་རྣམས་ལ་པར་ལེན་ལ་མྱོང་རོལ་དང་མཛེས་ཆོས་ལ་མྱོང་རོལ་བྱེད་པའི་དེ་རིང་གི་བསྐལ་པ་བཟང་པོ་དེ་ཐོབ་པ་བྱས་ཡོད།