འདི་ནི་ཁྲབ་རྨོག་གྲོང་རྡལ་འདོང་རོ་གྲོང་ཚོའི་ཡུལ་མིས་ར་མོ་ཤག་ཆེན་རྐོ་བཞིན་པ།

བོད་ལྗོངས་ཉིང་ཁྲི་གྲོང་ཁྱེར་སྤོ་བོ་རྫོང་གི་ནགས་ཁྲོད་ཀྱི་ས་རྒྱུ་གཤིན་པོར་མི་ཐབས་ལ་བརྟེན་པའི་རི་སྐྱེས་ར་མོ་ཤག་ཆེན་ཡུག་གཅིག་ཏུ་བཏབ་པ་དག་ས་མཐོའི་ནགས་རིའི་ལྷན་སྐྱེས་ཀྱི་ཆུ་ལུད་དྲོད་གཤེར་གྱིས་སྐྱོང་བཞིན་ཡོད། སྤོ་བོ་རྫོང་གི་ནགས་སའི་སྤྱིའི་རྒྱ་ཁྱོན་ལ་སྤྱི་ཆིང་ཁྲི་59.69ཟིན་པ་དང་། དེ་ནི་རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་བཅད་ཅིག་རེད་ལ་མང་ཚོགས་ཀྱིས་མིག་མཐོང་ལག་ཟིན་ཐུབ་པའི་འབབ་ཁུངས་ཞིག་ཀྱང་རེད།

དུས་ཡུན་རིང་པོར་གདོད་མའི་སྐྱེ་ཁམས་སྲུང་སྐྱོང་གི་རྨང་གཞིའི་ཐོག་ནགས་ཁྲོད་ཐོན་ཁུངས་གང་འགབ་ཅི་སྤྱོད་དང་མང་ཚོགས་ལ་འབབ་འཕར་ལ་སྐུལ་ཁྲིད་ཇི་ལྟར་བྱ་རྒྱུ་དེ་ས་གནས་འཕེལ་རྒྱས་གཏོང་བའི་འགག་རྩའི་ཞིབ་འཇུག་བྱ་གཞིར་གྱུར་ཡོད།

ལམ་ལུགས་ལ་བརྟེན་ཚེ་འཕེལ་རྒྱས་གཏོང་བར་གཞི་ནས་གདེང་ཚོད་འོང་ཐུབ། སྤོ་བོ་རྫོང་གིས་མཉམ་སྡེབ་ནགས་ས་མུའུ་ཁྲི་1.05ཡི་བདག་དབང་གཏན་འཁེལ་ཐོ་འགོད་བྱས་ནས་ནགས་སའི“དབང་ཆ་གསུམ་ལོགས་དབྱེའི”སྒྱུར་བཅོས་དོན་འཁྱོལ་བྱས་པས། མང་ཚོགས་ནགས་རི་སྲུང་མཁན་དུ་གྱུར་པ་མ་ཟད། ནགས་ཁྲོད་ཐོན་ལས་ཀྱི་ཐད་ཀའི་ཕན་པ་ཐོབ་མཁན་དུའང་གྱུར་ནས་འབབ་འཕར་ཕྱུག་འགྱུར་ཡོང་བའི་སེམས་ཤུགས་འཕེལ་ཡོད།

ཁྲབ་རྨོག་གྲོང་རྡལ་འདོང་རོ་གྲོང་ཚོའི་ཡུལ་མི་ཚེ་རིང་གི་ཁྱིམ་དུ་བེད་མེད་དུ་ལུས་པའི་ནགས་ས་མུའུ་3ཡོད། དེ་སྔ་ཁོང་གིས་རི་སྐྱེས་ཤ་མོ་བཏུས་ནས་འཚོ་བ་འཕྱིད་ཐབས་བྱེད་ཀྱི་ཡོད། ནགས་ས་བརྒྱུད་བཤུག་བཏང་ནས་མཉམ་ལས་ཁང་དུ་ཞུགས་རྗེས། ཁོང་གིས་ཁེ་ལས་ནས་ར་མོ་ཤག་ཆེན་འདེབས་སྟངས་ཆ་ཚང་སྦྱངས་ཤིང་། “ཤིང་གཅོད་པ་དང་ཞིང་སྨན་རྒྱག་པ་སོགས་བྱས་ནས་རི་དང་ནགས་ཚལ་གྱི་སྔར་ཡོད་རྣམ་པར་གཏོར་སྐྱོན་གཏོང་བའི་ལས་ཀ་བྱེད་མི་དགོས་པར་རང་ཁྱིམ་གྱི་སྒོ་རྩར་ར་མོ་ཤག་ཆེན་བཏབ་པར་ན་ནིང་ཁོ་ནར་ཡོང་འབབ་སྒོར་ཁྲི་ཁ་ཤས་བྱུང”ཞེས་ཚེ་རིང་གིས་བཤད། ཁོང་གིས་ར་མོ་ཤག་ཆེན་བཙོངས་པའི་ཡོང་འབབ་ཀྱིས་བོད་བཟོའི་ཁང་གསར་སྒོ་ར་ཅན་ཞིག་བརྒྱབ་པ་མ་ཟད། ཕྲུ་གུར་སློབ་ཡོན་སྤྲད་དེ་དགའ་མོས་འཛིན་གྲྭར་ཡང་བཏང་ཐུབ་པས་འཚོ་བ་སྔར་བས་སྐྱིད་དུ་སོང་ཡོད།

མིག་སྔར་རྫོང་ཡོངས་སུ་མི་ཐབས་ལ་བརྟེན་ནས་འདེབས་པའི་ནགས་ཁྲོད་ར་མོ་ཤག་ཆེན་འདེབས་ཁྱོན་མུའུ་2900ཟིན་པ་དང་། ཚད་ལྡན་ཅན་གྱི་རྟེན་གཞིར་ཐོན་ལས་འཕེལ་རྒྱས་བྱུང་བ་དང་སྦྲགས་གདོད་མའི་ནགས་ཚལ་ཡང་སྲུང་སྐྱོང་ཐུབ་པའི་སྐྱེ་ཁམས་ཀྱི་འཁོར་རྒྱུག་བཟང་པོ་ཆགས་ཐབས་བྱས་ཡོད།

ཐོན་ལས་འཕེལ་རྒྱས་བཏང་མཐར་དམངས་ཕྱུག་འབབ་འཕར་བྱུང་ཡོད། སྤོ་བོ་རྫོང་གིས་ཁེ་ལས་དང་། རྟེན་གཞི། ཞིང་དུད། མཉམ་སྡེབ་བཅས་ཟུང་དུ་འབྲེལ་བའི་འཕེལ་རྒྱས་གཏོང་སྟངས་གསར་གཏོད་དང་ཁྱབ་གདལ་བཏང་ནས་བོད་ཀྱི་ར་མོ་ཤག་ཆེན་ཐོན་ལས་འཁོར་འབྲེལ་གྱི་ཏང་ཨུད་དང་། ཐོན་ལས་ཅན་གྱི་མཉམ་འབྲེལ་སྒྲིག་གཞི། ལས་རིགས་མཐུན་ཚོགས་བཅས་བཙུགས་ཏེ“གཅིག་གྱུར་ལྔ་དང་ཐ་སྐྱོང་གཅིག”གི་རོགས་སྐྱོར་ལམ་སྲོལ་དོན་འཁྱོལ་བྱས་པ་སྟེ། འདེབས་འཛུགས་དང་། གསོ་སྦྱོང་། མཛུབ་ཁྲིད། རྒྱུ་ཆ་མཁོ་འདོན། ལས་སྣོན། མ་མཐའི་རིན་གོང་འགན་ལེན་བཅས་གཅིག་གྱུར་བཟོ་བའི་སྒོ་ནས་ར་མོ་ཤག་ཆེན་ཚུར་བསྡུ་བྱས་པས། ཞིང་དུད་ལ་སོན་བཟང་དང་། ལག་རྩལ། ཚོང་ལམ་བཅས་དཀོན་པའི་དཀའ་ངལ་རྦད་དེ་ཐག་གཅོད་ཐུབ་ཡོད།

ར་མོ་ཤག་ཆེན་ཐོན་ལས་དེ་རྫོང་དེའི་ཤང་དང་གྲོང་རྡལ7གྱི་སྲིད་འཛིན་གྲོང་ཚོ་36ལ་ཁྱབ་ནས་མང་ཚོགས་དུད་ཚང་500ལྷག་ཙམ་ལ་འབབ་འཕར་བརྟན་པོ་ཡོང་བར་སྐུལ་ཁྲིད་ཐུབ་ཡོད། 2025ལོར་ཐད་ཀར་ཕྱིར་འཚོང་ནང་ཞུགས་མཁན་ཞིང་དུད་ལ་ཡོང་འབབ་སྒོར་ཁྲི་600ལྷག་ཙམ་བྱུང་ནས་དུད་ཚང་རེར་ཆ་སྙོམས་འབབ་འཕར་སྒོར་ཁྲི་ལྷག་ཙམ་ཟིན་ཡོད།