འདི་ནི་ལྷུན་རྩེ་རྫོང་ཡུལ་སྨད་མཐའ་མཚམས་མངགས་གཏོང་ཁང་གི་རྒྱལ་སྒོའི་དར་སྲུང་རུ་ཁག་གིས་རྒྱལ་སྟོན་ལ་རྒྱལ་དར་སྒྲེང་བའི་མཛད་སྒོ་ཐེངས་དང་པོ་འཚོགས་པ།

ཞོགས་པའི་ཉི་འོད་ས་མཐོར་འཕྲོས། རྒྱལ་དར་བསྒྲེངས་ནས་འཁྲུངས་སྐར་བསུ། ཟླ་10ཚེས་1ཉིན། རང་ལྗོངས་ཀྱི་ས་གནས་ཁག་ཏུ“རྒྱལ་དར་སྒྲེང་བ་དང་རྒྱལ་གླུ་ལེན་པའི”མཛད་སྒོ་འཚོགས་ཤིང་། མི་རིགས་ཁག་གི་མང་ཚོགས་རྣམས་རྒྱལ་དར་སྒྲེང་སར་མཉམ་དུ་འཛོམས་ཏེ། རྔམ་བརྗིད་ལྡན་པའི《བློས་བླངས་དམག་གི་མདུན་སྐྱོད་གླུ་གཞས》ཀྱི་དབྱངས་རྟ་དང་ལྷན་དུ་སྐར་ལྔའི་དར་དམར་དལ་བུར་བསྒྲེངས་ནས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་77འཁོར་བར་རྟེན་འབྲེལ་ཞུས་པ་རེད།

ཟླ་10ཚེས་1ཉིན། ལྷོ་ཁ་གྲོང་ཁྱེར་གྱི་མི་རིགས་ཁག་དང་ལས་རིགས་ཁག་གི་ལས་བྱེད་པ་དང་མང་ཚོགས་དང་། སློབ་གྲྭའི་དགེ་སློབ། བཅིངས་འགྲོལ་དམག དྲག་ཆས་ཉེན་རྟོག་དཔོན་དམག སྤྱི་བདེའི་མི་དམངས་ཉེན་རྟོག་པ། སྨན་དོན་མི་སྣ་སོགས་ཀྱི་འཐུས་མི་རྣམས་སྔ་ས་ནས་ལྷོ་ཁའི་མེ་འཁོར་འབབ་ཚུགས་མདུན་གྱི་ཐང་ཆེན་དུ་འཛོམས་ཏེ“རྒྱལ་དར་སྒྲེང་བ་དང་རྒྱལ་གླུ་ལེན་པའི”མཛད་སྒོར་ཞུགས་པ་རེད། སྔ་དྲོའི་ཆུ་ཚོད་10པར་རྒྱལ་དར་སྒྲེང་བའི་མཛད་སྒོ་དངོས་སུ་འགོ་ཚུགས་ཤིང་། དེ་གར་འཛོམས་པའི་མི་ཚང་མས་སྐད་གསང་མཐོན་པོས་རྒྱལ་གླུ་བླངས་པ་དང་རྒྱལ་དར་ལ་མིག་འདུད་ཞུས་ནས་རྒྱལ་གཅེས་ཀྱི་བརྩེ་སེམས་ཟབ་མོ་ཡོངས་སུ་མཚོན་པར་བྱས། ཉིན་དེའི་སྔ་དྲོར་ལྷོ་ཁ་གྲོང་ཁྱེར་ལྷུན་རྩེ་རྫོང་ཡུལ་སྨད་མཐའ་མཚམས་མངགས་གཏོང་ཁང་དུ་རྒྱལ་སྟོན་གྱི་རྒྱལ་དར་སྒྲེང་བའི་མཛད་སྒོ་འཚོགས་པ་རེད། དེ་ནི་ཡུལ་སྨད་འདི་ཉིད་རྒྱལ་ཁབ་གནས་སྤོས་ཡུལ་མི་དོ་དམ་ཅུས་ཀྱི་ཁག་དང་པོའི་འགག་སྒོ་གལ་ཆེན་གྱི་རྒྱལ་དར་སྒྲེང་གནས་སུ་ཚུད་རྗེས་རྒྱལ་ཁབ་རིམ་པའི་གནས་གཏན་འཁེལ་གྱི་ཚད་གཞི་ལྟར་རྒྱལ་སྟོན་གྱི་རྒྱལ་དར་སྒྲེང་ཐེངས་དང་པོ་དེ་རེད།

ཚེས་1ཉིན་གྱི་ཞོགས་པར་ཆབ་མདོ་གྲོང་ཁྱེར་བཅིངས་འགྲོལ་ཐང་ཆེན་དུ་དར་ཚོན་ལྷབ་ལྷུབ་ཏུ་གཡོ་བ་དང་རྔམ་བརྗིད་ལྡན་པའི་རྣམ་པས་ཁེངས། “རྒྱལ་དར་སྒྲེང་བ་དང་རྒྱལ་གླུ་ལེན་པའི”མཛད་སྒོ་དེ་གར་འཚོགས་ཤིང་། ལས་རིགས་ཁག་གི་ལས་བྱེད་པ་དང་མང་ཚོགས་སྔ་ས་ནས་དེ་གར་ཡོང་སྟེ་བརྗིད་ཉམས་ལྡན་པའི་དུས་སྐབས་དེར་མཉམ་དུ་དཔང་པོ་བྱས་པ་རེད།

མྱང་ཆུའི་ངོགས་ཀྱི་གཞིས་རྩེར“རྒྱལ་དར་སྒྲེང་བ་དང་རྒྱལ་གླུ་ལེན་པའི”མཛད་སྒོ་སྔ་དྲོའི་ཆུ་ཚོད་8དང་སྐར་མ་30ཡི་ཐོག་འགོ་ཚུགས་ཤིང་། དེ་གར་འཛོམས་པའི་ལས་བྱེད་པ་དང་མང་ཚོགས་ཚོས། མིག་སྔར་གཞིས་རྩེ་འདི་ཉིད“ལྟེ་བའི་གྲོང་ཁྱེར་གཉིས”སྐྲུན་པའི་འགག་སྒྲོལ་ཚད་བརྒལ་དུས་མཚམས་དང་ཕྱོགས་ཡོངས་ནས་སྒྱུར་བཅོས་ཟབ་གཏོང་དང་ཆུ་ཚད་མཐོ་བའི་སྒོ་དབྱེའི་རྣམ་པ་གསར་པ་གཏོད་པའི་འགག་རྩའི་དུས་མཚམས་སུ་གནས་ཡོད་པས། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་དེ་བས་མཐུན་སྒྲིལ་དམ་ཟབ་བྱས་ཏེ། “དོན་ཆེན་བཞི”དང“འཛུགས་གཏོད་བཞི”སྤྱི་འདོམས་དོན་འཁྱོལ་དང“ལྟེ་བའི་གྲོང་ཁྱེར་གཉིས”འཛུགས་སྐྲུན་ལ་སྐུལ་འདེད་གཏོང་བར་དམིགས་ནས་ཀྲུང་གོའི་ལུགས་ཀྱི་དེང་རབས་ཅན་གྱི་གཞིས་རྩེའི་ལེའུ་གསར་པ་ནུས་ཤུགས་ཡོད་རྒུས་རྩོམ་དགོས་ཞེས་མགྲིན་གཅིག་ཏུ་བརྗོད་པ་རེད།

མངའ་རིས་ས་ཁུལ་སྒར་རྫོང་ཞང་ཞུང་རིག་གནས་ཐང་ཆེན་དུ་རྒྱལ་དར་སྒྲེང་བའི་མཛད་སྒོར་ཞུགས་མཁན་ལས་བྱེད་པ་དང་མང་ཚོགས་ཚོས། འདི་ནི་གསོན་ཉམས་དོད་པའི་རྒྱལ་གཅེས་རིང་ལུགས་ཀྱི་སློབ་གསོ་ཞིག་ཡིན་པས་སེམས་ནང་གི་རྒྱལ་གཅེས་ཀྱི་བརྩེ་སེམས་ཟབ་མོ་དེ་ཉིད་ལས་གནས་ཐོག་གཞི་ཚུགས་པ་དང་རྒྱལ་ཁབ་ལ་དྲིན་ལན་འཇལ་བའི་བྱ་སྤྱོད་དུ་བསྒྱུར་ཏེ། དེ་བས་སྤྲོ་སེམས་འཕེལ་བའི་ངང་མཐའ་མཚམས་འཛུགས་སྐྲུན་དང་། དམངས་འཚོའི་ཞབས་ཞུ། སྐྱེ་ཁམས་སྲུང་སྐྱོང་སོགས་ཀྱི་ལས་དོན་ཁག་ནང་ཞུགས་ནས་མཐུན་སྒྲིལ་དང་། འབྱོར་ཕྱུག ཤེས་དཔལ། ཞི་མཐུན། མཛེས་སྡུག་བཅས་ལྡན་པའི་སྤྱི་ཚོགས་རིང་ལུགས་དེང་རབས་ཅན་གྱི་མངའ་རིས་གསར་པ་སྐྲུན་ཆེད་སྟོབས་ཤུགས་སྐྱེས་སུ་འབུལ་གྱི་ཡིན་ཞེས་གཅིག་རྗེས་གཉིས་མཐུད་ངང་བརྗོད་པ་རེད།

ཚེས་1ཉིན་གྱི་སྔ་དྲོར། ཉིང་ཁྲི་གྲོང་ཁྱེར་གྱི་གང་སར་དུས་ཆེན་གྱི་རྣམ་པས་ཁེངས་ཤིང་། གྲོང་ཁྱེར་དེ་ཡོངས་ཀྱི་མི་རིགས་ཁག་དང་ལས་རིགས་ཁག་གི་ལས་བྱེད་པ་དང་མང་ཚོགས་རྣམས་ཏང་སྲིད་ཐོག་བརྩེགས་ཁང་ཆེན་དུ་འཛོམས་ནས“རྒྱལ་དར་སྒྲེང་བ་དང་རྒྱལ་གླུ་ལེན་པའི”མཛད་སྒོར་ཞུགས་པ་རེད། དམར་མདངས་བཀྲ་བའི་སྐར་ལྔའི་དར་དམར་དལ་བུར་སྒྲེང་བར་ལྟ་བཞིན་ཚང་མར་སེམས་འགུལ་ཆེན་པོ་ཐེབས་པ་དང་གུས་བཀུར་ཆེན་པོ་འཆང་བཞིན་དུ་ཐོག་མའི་བསམ་འདུན་དང་འགན་འཁྲི་བློ་ལ་བརྟན་པོར་བཅངས་ཏེ། རྒྱལ་གཅེས་ཀྱི་བརྩེ་སེམས་ཟབ་མོ་དེ་ལས་སྒྲུབ་ལས་གཏོད་ཀྱི་སྒུལ་ཤུགས་ཆེན་པོར་འགྱུར་བར་བྱེད་ཀྱི་ཡིན་ཞེས་བརྗོད་པ་རེད།