ཟླ་9ཚེས་30ཉིན་གྱི་སྔ་དྲོར། ཏང་དང་རྒྱལ་ཁབ་ཀྱི་འགོ་ཁྲིད་པ་ཞི་ཅིན་ཕིང་དང་། ལི་ཆང་། ཀྲའོ་ལེ་ཅི། ཝང་ཧུའུ་ཉིང་། ཚའེ་ཆི། ཏིང་ཤུའེ་ཞང་། ལི་ཞི། ཧན་ཀྲེང་སོགས་པེ་ཅིང་གནམ་བདེ་སྒོ་མོའི་ཐང་ཆེན་དུ་ཕེབས་ནས་སྔོན་གཤེགས་དཔའ་བོའི་དྲན་གསོའི་ཉིན་མོར་མི་དམངས་དཔའ་བོར་མེ་ཏོག་སི་ར་འབུལ་བའི་མཛད་སྒོར་ཞུགས་ཤིང་། འདི་ནི་ཞི་ཅིན་ཕིང་གིས་མེ་ཏོག་སི་རའི་དར་འཛར་སྲོང་སྐྱོར་གནང་བཞིན་པ།

ཟླ་9ཚེས་30ཉིན་གྱི་སྔ་དྲོར། ཏང་དང་རྒྱལ་ཁབ་ཀྱི་འགོ་ཁྲིད་པ་ཞི་ཅིན་ཕིང་དང་། ལི་ཆང་། ཀྲའོ་ལེ་ཅི། ཝང་ཧུའུ་ཉིང་། ཚའེ་ཆི། ཏིང་ཤུའེ་ཞང་། ལི་ཞི། ཧན་ཀྲེང་སོགས་པེ་ཅིང་གནམ་བདེ་སྒོ་མོའི་ཐང་ཆེན་དུ་ཕེབས་ནས་སྔོན་གཤེགས་དཔའ་བོའི་དྲན་གསོའི་ཉིན་མོར་མི་དམངས་དཔའ་བོར་མེ་ཏོག་སི་ར་འབུལ་བའི་མཛད་སྒོར་ཞུགས་པ།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་9ཚེས་30ཉིན་གློག་འཕྲིན་འབྱོར་གསལ། སྔོན་གཤེགས་དཔའ་བོར་གུས་འདུད་ཞུ། བསྐྱར་དར་སྟོབས་ཤུགས་གཅིག་ཏུ་སྒྲིལ། ཟླ་9ཚེས་30ཉིན་གྱི་སྔ་དྲོར། སྔོན་གཤེགས་དཔའ་བོའི་དྲན་གསོའི་ཉིན་མོར་མི་དམངས་དཔའ་བོར་མེ་ཏོག་སི་ར་འབུལ་བའི་མཛད་སྒོ་པེ་ཅིང་གནམ་བདེ་སྒོ་མོའི་ཐང་ཆེན་དུ་གཟབ་རྒྱས་འཚོགས་ཤིང་། ཏང་དང་རྒྱལ་ཁབ་ཀྱི་འགོ་ཁྲིད་པ་ཞི་ཅིན་ཕིང་དང་། ལི་ཆང་། ཀྲའོ་ལེ་ཅི། ཝང་ཧུའུ་ཉིང་། ཚའེ་ཆི། ཏིང་ཤུའེ་ཞང་། ལི་ཞི། ཧན་ཀྲེང་སོགས་ཀྱིས་ལས་རིགས་ཁག་གི་འཐུས་མི་དང་ལྷན་དུ་མཛད་སྒོར་ཞུགས་པ་རེད།

བརྗིད་ཉམས་ལྡན་པའི་གནམ་བདེ་སྒོ་མོའི་ཐང་ཆེན་དུ་དམར་མདངས་བཀྲ་བའི་སྐར་ལྔའི་དར་དམར་ལྷབ་ལྷུབ་ཏུ་གཡོ་བ་དང་། མི་དམངས་དཔའ་བོའི་དྲན་གསོའི་རྡོ་རིང་འགྱིང་ངེར་གནས། ཐང་ཆེན་དབུས་ཀྱི“མེས་རྒྱལ་ལ་སྨོན་འདུན་ཞུ”ཞེས་པའི་མེ་ཏོག་སི་ར་ཆེན་པོ་ལས་མེས་རྒྱལ་དར་རྒྱས་གོང་འཕེལ་ཡོང་བའི་སྨོན་འདུན་བཟང་པོ་མཚོན་ཡོད།

དྲན་གསོའི་རྡོ་རིང་གི་བྱང་ངོས་མེ་ཏོག་སྟེགས་བུ་གཉིས་ཀྱི་ཐོག་ལུག་མིག་མེ་ཏོག་དཀར་པོ་སོགས་ལས་གྲུབ་པའི་མེ་ཏོག་ཕྲེང་བ་18ཀྱིས་ཀྲུང་ཧྭའི་བུ་ཕྲུག་ཡོངས་ནས་སྔོན་གཤེགས་དཔའ་བོར་རྗེས་དྲན་ཟབ་མོ་ཞུ་ལུགས་མཚོན་ཡོད།

ཆུ་ཚོད་10པ་ཙམ་ལ། ཞི་ཅིན་ཕིང་དང་། ལི་ཆང་། ཀྲའོ་ལེ་ཅི། ཝང་ཧུའུ་ཉིང་། ཚའེ་ཆི། ཏིང་ཤུའེ་ཞང་། ལི་ཞི། ཧན་ཀྲེང་སོགས་ཏང་དང་རྒྱལ་ཁབ་ཀྱི་འགོ་ཁྲིད་པ་གནམ་བདེ་སྒོ་མོའི་ཐང་ཆེན་དུ་ཕེབས་ནས་མི་དམངས་དཔའ་བོར་མེ་ཏོག་སི་ར་འབུལ་བའི་མཛད་སྒོར་ཞུགས་པ་རེད།

ཀྲུང་གོ་མི་དམངས་བཅིངས་འགྲོལ་དམག་གི་དམག་མིའི་རོལ་ཆ་རུ་ཁག་གི་འཁྱིལ་ཆུང་བས་བཏང་བའི《སྔོན་གཤེགས་དཔའ་བོའི་དྲན་གསོའི་ཉིན་མོའི་དུང་བརྡ》ལྷང་ལྷང་དུ་གྲགས།

“གུས་དམག་རང་གནས་སུ་ལོག”ཅེས་པའི་བཀའ་བཏང་བ་དང་བསྟུན་ནས་དམག་གསུམ་གཟབ་སྦྲེང་དམག་གིས་ཤུགས་གྲགས་ཆེ་བའི་གོམ་སྟབས་བརྟན་པོ་སྤོས་ནས་རྐང་ཐང་མར་དྲན་གསོའི་རྡོ་རིང་མདུན་དུ་བསྐྱོད་རྗེས་མེ་མདའ་ཁྱེར་ནས་ཡུན་རིང་ཀྲོང་ངེར་ལངས།

ཆུ་ཚོད་10པ་ཏག་ཏག་ལ། མི་དམངས་དཔའ་བོར་མེ་ཏོག་སི་ར་འབུལ་བའི་མཛད་སྒོ་དངོས་སུ་འགོ་ཚུགས་པ་དང་། དམག་མིའི་རོལ་ཆ་ཚོགས་པས《བློས་བླངས་དམག་གི་མདུན་སྐྱོད་གླུ་གཞས》གྲགས་པ་དང་བསྟུན་ནས་ཚོགས་ར་ཡོངས་ཀྱིས་སྐད་གསང་མཐོན་པོས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་གླུ་བླངས་པ་རེད།

རྒྱལ་གླུ་བླངས་རྗེས། ཚོགས་ར་ཡོངས་སུ་ཚང་མས་གུས་སྟབས་ཀྱིས་ཡར་བཞེངས་ཏེ་ཀྲུང་གོ་མི་དམངས་ཀྱི་བཅིངས་འགྲོལ་བྱ་གཞག་དང་སྤྱི་མཐུན་རྒྱལ་ཁབ་འཛུགས་སྐྲུན་བྱ་གཞག་ཆེད་དཔའ་ངར་ཆེན་པོས་རང་སྲོག་བློས་གཏོང་མཁན་གྱི་སྔོན་གཤེགས་དཔའ་བོར་ངག་བསྡམས་ནས་མྱ་ངན་ཞུས་པ་རེད།

ངག་བསྡམས་ནས་མྱ་ངན་ཞུས་རྗེས། ལག་ཏུ་མེ་ཏོག་སོས་པ་ཁྱེར་བའི་ལོ་ཆུང་བྱིས་པས་མི་དམངས་དཔའ་བོའི་དྲན་གསོའི་རྡོ་རིང་ལ་ཁ་ཕྱོགས་ནས《ང་ཚོ་ནི་གུང་ཁྲན་རིང་ལུགས་ཀྱི་ཤུལ་འཛིན་པ་ཡིན》ཞེས་པའི་གླུ་གཞས་སྐད་གསང་མཐོན་པོས་བླངས་པ་དང་སྦྲགས། ལོ་ཆུང་གདོང་ལེན་རུ་ཁག་གི་གུས་ལུགས་ཀྱང་མཚོན་པར་བྱས་པ་རེད།

རུ་སྟར་གྲུ་བཞིའི་མདུན་དུ་ཀྲུང་གུང་ཀྲུང་དབྱང་དང་། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ལྷན། རྒྱལ་སྲིད་སྤྱི་ཁྱབ་ཁང་། རྒྱལ་ཡོངས་སྲིད་གྲོས། ཀྲུང་དབྱང་དམག་ཨུད། དམངས་གཙོའི་ཏང་ཤོག་ཁག རྒྱལ་ཡོངས་བཟོ་ཚོང་ལས་རིགས་མཉམ་འབྲེལ་ལྷན་ཚོགས། ཏང་ཤོག་གང་ལའང་མི་གཏོགས་པའི་རྒྱལ་གཅེས་མི་སྣ། མི་དམངས་ཚོགས་པ་ཁག་དང་ལས་རིགས་ཁག་གི་མང་ཚོགས། འཐབ་འཛིང་པ་རྒན་གྲས་དང་། བློ་མཐུན་རྒན་གྲས། སྔོན་གཤེགས་དཔའ་བོའི་གཉེན་ཉེ། ཀྲུང་གོ་ལོ་ཆུང་གདོང་ལེན་རུ་ཁག་བཅས་ཀྱི་མིང་ཐོག་ནས་ཕུལ་བའི་མེ་ཏོག་སི་ར་ཆེ་གྲས་9གྲལ་སྟར་འགྲིག་པོས་བཞག་ཡོད་པ་དང་། མེ་ཏོག་སི་རའི་དར་འཛར་དམར་པོའི་ཐོག་བྲིས་པའི“སྔོན་གཤེགས་དཔའ་བོ་ནམ་ཡང་མི་ནུབ་པར་གྱུར་ཅིག”ཅེས་པའི་ཡིག་འབྲུ་ཧ་ཅང་མངོན་གསལ་དོད།

དམག་མིའི་རོལ་ཆ་ཚོགས་པས་བརྩེ་སེམས་ཟབ་མོ་མཚོན་པའི《མེ་ཏོག་འབུལ་བའི་རོལ་དབྱངས》དཀྲོལ་བ་དང་གུས་དམག་18ཀྱིས་མེ་ཏོག་སི་ར་བཏེགས་ནས་མི་དམངས་དཔའ་བོའི་དྲན་གསོའི་རྡོ་རིང་གི་ཕྱོགས་སུ་དལ་བུར་བསྐྱོད་དེ་མེ་ཏོག་སི་ར་དྲན་གསོའི་རྡོ་རིང་གི་ཞབས་སྟེགས་ཐོག་བཞག་པ་རེད།

ཞི་ཅིན་ཕིང་སོགས་ཏང་དང་རྒྱལ་ཁབ་ཀྱི་འགོ་ཁྲིད་པས་དྲན་གསོའི་རྡོ་རིང་གི་ཞབས་སྟེགས་ཐོག་ཕེབས་པ་དང་མེ་ཏོག་སི་རའི་མདུན་དུ་བཞེངས་ཏེ་བློ་རྩེ་གཅིག་སྒྲིམ་གྱིས་གཟིགས་པ་རེད། དམར་མདངས་བཀྲ་བའི་ཧུང་ཀྲང་མེ་ཏོག་དང་། འདབ་བརྒྱ་ལྷུག་པོར་གྲོལ་བའི་ལུག་མཉེ་མེ་ཏོག དྲི་བསུང་ལྷང་ལྷང་དུ་འཐུལ་བའི་མེ་ཏོག་ཝུན་ཤིན་ལན་བཅས་ལས་མི་དམངས་དཔའ་བོར་རྗེས་དྲན་ཟབ་མོ་དང་བླ་ན་མེད་པའི་གུས་འདུད་ཞུ་ལུགས་མཚོན་ཡོད།

ཞི་ཅིན་ཕིང་མདུན་དུ་ཕེབས་ནས་མེ་ཏོག་སི་རའི་དར་འཛར་སྲོང་སྐྱོར་གནང་རྗེས། ཞི་ཅིན་ཕིང་སོགས་ཏང་དང་རྒྱལ་ཁབ་ཀྱི་འགོ་ཁྲིད་པས་སྐོར་བ་དལ་བུར་བསྐྱོན་ནས་མི་དམངས་དཔའ་བོའི་དྲན་གསོའི་རྡོ་རིང་ལ་གུས་འཇལ་ཞུས་པ་རེད།

ད་ལོ་ནི་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་105འཁོར་བ་དང་ཀྲུང་གོ་བཟོ་ཞིང་དམར་དམག་གི་རྒྱང་སྐྱོད་ལ་རྒྱལ་ཁ་ཐོབ་ནས་ལོ་ངོ་90འཁོར་བའི་ལོ་ཞིག་རེད། དུས་རབས་གསར་པའི་རྒྱང་ལམ་ཐོག་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག ཏང་ཡོངས་དང་། དམག་ཡོངས། རྒྱལ་ཡོངས་མི་རིགས་ཁག་གི་མི་དམངས་བཅས་ཀྱིས་ཏང་འཛུགས་སྐྱོང་གི་སྙིང་སྟོབས་རླབས་པོ་ཆེ་དང་རྒྱང་སྐྱོད་ཀྱི་སྙིང་སྟོབས་རླབས་པོ་ཆེ་རྒྱུན་འཛིན་དང་དར་སྤེལ་བཏང་ནས་བློ་སྟོབས་ཆེན་པོས་མཐུན་སྒྲིལ་རྡོག་རྩ་གཅིག་སྒྲིལ་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཕྱོགས་ཡོངས་ནས་སྐུལ་འདེད་གཏོང་ཆེད་འབད་འཐབ་ལྷོད་མེད་བྱེད་བཞིན་ཡོད།

ལོ་ཆུང་བྱིས་པ་དང་ལས་རིགས་ཁག་གི་འཐུས་མིས་ཀྱང་རིམ་པ་བཞིན་དྲན་གསོའི་རྡོ་རིང་གི་མདུན་དུ་བསྐྱོད་དེ་མེ་ཏོག་སོས་པ་ཕུལ་བ་དང་འབྲེལ་དྲན་གསོའི་རྡོ་རིང་ལ་གུས་མཇལ་ཞུས་པ་རེད།

མེ་ཏོག་སི་ར་འབུལ་བའི་མཛད་སྒོ་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་པེ་ཅིང་གྲོང་ཨུད་ཀྱི་ཧྲུའུ་ཅི་དབྱིན་ལིས་གཙོ་སྐྱོང་གནང་བ་རེད།