རྒྱང་ལམ་གསར་པར་འབད་འབུངས་མདུན་སྐྱོད་བྱེད་པ་དང“ལོ་ལྔ་ཚན་བཅོ་ལྔ་པ”འགོ་ཚུགས་པའི་དུས་སུ། ང་ཚོས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་77འཁོར་བའི་དྲན་གསོའི་ཉིན་མོ་བསུས་པ་འདི་ནི་ས་ཕྱོགས་ཀུན་ཏུ་རྟེན་འབྲེལ་ཞུ་བའི་དུས་ཆེན་གལ་ཆེན་ཞིག་རེད།

ལོ་77གྱི་རིང་། ཀྲུང་གོ་གུང་ཁྲན་ཏང་གིས་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་སྣེ་ཁྲིད་བྱས་ཏེ་དཔལ་འབྱོར་འཕེལ་རྒྱས་མྱུར་པོ་དང་སྤྱི་ཚོགས་ཡུན་རིང་བརྟན་ལྷིང་གི་ངོ་མཚར་ཆེན་པོ་གཉིས་བཏོད་པ་དང་། འཛམ་གླིང་དེང་རབས་ཅན་གྱི་འཕེལ་རིམ་ཁྲོད་བརྗིད་ཉམས་ཆེ་བའི་ཀྲུང་གོའི་ལུགས་ཀྱི་དེང་རབས་ཅན་གྱི་ལོ་རྒྱུས་སྙན་ངག་བརྩམས་ཏེ་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་སྔར་བྱུང་མྱོང་མེད་པའི་འོད་སྟོང་འཕྲོ་བའི་མདུན་ལམ་བསུས་ཡོད།

“དུས་རབས་འདིའི་དུས་དཀྱིལ་དུ་སླེབས་སྐབས། ང་ཚོས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ཆེན་ཕྱོགས་ཡོངས་ནས་བསྐྲུན་ཏེ་ལོ་བརྒྱ་གཉིས་པའི་འབད་འཐབ་དམིགས་ཚད་མངོན་འགྱུར་བྱེད་དགོས། དུས་ཚོད་ཀྱིས་མི་མི་སྒུག་ལ། ལོ་རྒྱུས་ཀྱིས་ཀྱང་མི་མི་སྒུག”ཅེས་ད་ལོའི“བདུན་གཅིག”ལ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ལོ་རྒྱུས་ཀྱི་འོད་སྟོང་གསར་པ་ཧུར་ཐག་གཏོད་དགོས་པའི”རླབས་ཆེའི་འབོད་སྐུལ་གནང་ཡོད།

རྒྱུན་མཐུད་འབད་འཐབ་བྱས་ནས་སླར་ཡང་འོད་སྟོང་གཏོད་རྒྱུར་ང་ཚོར་གདེང་ཚོད་བརྟན་པོ་ཡོད་ལ་བློ་སྟོབས་ཀྱང་ཆེན་པོ་ཡོད།

ད་ཆའི་ཀྲུང་གོ་ནི་གསར་ཞིང་ལེགས་པའི་ཕྱོགས་སུ་རྒྱུན་མཐུད་འཕེལ་རྒྱས་ཕྱིན་ནས་ལོ་རྒྱུས་ཀྱི་རང་འགུལ་ལ་སྟངས་འཛིན་ནན་པོ་བྱེད་བཞིན་ཡོད།

ད་ལོ་ཚུན་དུ་རང་རྒྱལ་གྱི་དཔལ་འབྱོར་གནོན་བཟོད་མདུན་སྐྱོད་བྱས་ནས་སྒུལ་ནུས་གསར་པ་དང་གྲུབ་ཆ་ལེགས་པའི་ཕྱོགས་སུ་འཕེལ་རྒྱས་འགྲོ་བའི་རྣམ་པ་མངོན་པ་དང་སྙུགས་ཤེད་དང་གསོན་ཤུགས་ཆེན་པོའང་མངོན་ཡོད།

མི་ཐབས་རིག་ནུས་ཀྱིས་ལས་རིགས་མང་པོར་མཐུན་རྐྱེན་སྦྱོར་བ་དང་། མི་གཟུགས་འཕྲུལ་མི་ཐོན་སྐྱེད་བྱེད་ཚད་གོ་ལ་ཧྲིལ་པོའི་མདུན་གྲལ་དུ་སླེབས་པ། ནུས་གསར་རླངས་འཁོར་ཐོན་འཚོང་བྱེད་ཚད་བརྟན་པོ་འཕར་བ་སོགས་ཆུ་ཚད་མཐོ་བའི་ཚན་རྩལ་གྱི་རང་ཚུགས་རང་དར་ཀྱིས་ཐོན་སྐྱེད་ནུས་ཤུགས་གསར་མའི་འཕེལ་རྒྱས་ལ་སྣེ་ཁྲིད་བྱས་ཏེ“ཀྲུང་གོའི་རིག་སྐྲུན”དེ་ཉིད་ཀྲུང་གོའི་ལུགས་ཀྱི་དེང་རབས་ཅན་གྱི་བཀྲག་མདངས་འཚེར་བའི་མིང་བྱང་གཞན་ཞིག་ཏུ་གྱུར་ཡོད།

“འདྲུད་འཐེན་འཁོར་ལོ་གཅིག་ཀྱང་བཟོ་མི་ཐུབ་པ”ནས“བཟོ་ལས་རྣམ་གྲངས་ཆ་ཚང་ཤོས་ཀྱི་འཛམ་གླིང་བཟོ་སྐྲུན་ལས་རིགས་ཀྱི་རྒྱལ་ཁབ་ཆེན་པོ་དང་པོའི”བར་རང་རྒྱལ་འཕེལ་རྒྱས་ཀྱི་དངོས་པོ་དང་ལག་རྩལ་གྱི་རྨང་གཞི་དེ་བས་བརྟན་དུ་ཕྱིན་ནས“ལམ་བུ་འདི་ནི་ཡང་དག་པ་ཞིག་ཡིན་པ”མངོན་འགྱུར་བྱུང་ཡོད།

ད་ཆའི་ཀྲུང་གོས་སྤྲིན་ནག་ཟང་ཟིང་འཁྲུག་ཀྱང་འཐབ་ཇུས་ཀྱི་ངེས་ཤུགས་རྒྱུན་འཁྱོངས་བྱས་ནས་འཕེལ་རྒྱས་ཀྱི་བར་མཐོངས་རྒྱུན་ཆད་མེད་པར་རྒྱ་སྐྱེད་གཏོང་བཞིན་ཡོད།

“ལེའུ་དགུ་ཨང་བཞི”ཡིས་འོད་ཀྱི་གྲངས་རྡུལ་ཆ་འཕྲིན་ལག་རྩལ་གྱི་འཛམ་གླིང་གི་ཟིན་ཐོ་གསར་པ་བཏོད་པ་དང་། འཛམ་གླིང་ཐོག་མཚོ་སྐམ་གཉིས་ཀའི་མེ་ཤུགས་འཕུར་མདའ་ཚུར་བསྡུའི་ལག་རྩལ་དུས་མཚུངས་སུ་ཁོང་དུ་ཆུད་པའི་རྒྱལ་ཁབ་འབའ་ཞིག་ཡིན་པ་སོགས“གོ་ལ་ཧྲིལ་པོའི་ཚན་རྩལ་ནང་ཞུགས་མཁན་དང་ལེགས་སྐྱེས་འབུལ་མཁན་ནས་གསར་འབྱེད་པ་དང་སྣེ་ཁྲིད་པར་མགྱོགས་མྱུར་གྱུར་ནས”རང་རྒྱལ་འདི་ཉིད་གསར་གཏོད་ནུས་པ་ཆེ་རུ་མགྱོགས་ཤོས་འགྲོ་བའི་རྒྱལ་ཁབ་ཀྱི་གྲས་སུ་གྱུར་ཡོད།

ཀྲུང་གོ་གསར་པ་དབུ་བརྙེས་ཚུན། གཙང་པོ་དང་མཚོ་ཐོག་ཤར་གཏོང་ཐུབ་པའི་མིས་བཟོས་གཙང་པོ་ཆེ་གྲས་དང་པོ་སྟེ། ཕིང་ལུའུ་མིས་བཟོས་གཙང་པོ་བཟོས་ནས་གྲུ་གཟིངས་ཤར་གཏོང་ཐུབ་པ་དང་། འབྲུ་རིགས་དང་ནུས་རྒྱུའི“ལྟོ་ཕོར་གཉིས”བརྟན་པོ་བཟུང་བ། དེང་རབས་ཅན་གྱི་ཐོན་ལས་མ་ལག་གི་རྨང་གཞི་བརྟན་པ་དང་ལྷུ་ཚིགས་ཁག་ཤར་གཏོང་ཐུབ་པ། ཤར་ནུབ་རྒྱུད་ཀྱི་མཉམ་ལས་གཉིས་ཁེ་གཉིས་ཕན་དང་ཐུན་མོང་འཕེལ་རྒྱས་ཀྱི་ཕྱོགས་སུ་སྐྱོད་པ་བཅས་རེད། འཐབ་ཇུས་ཀྱི་བརྩེགས་སྣོན་ནུས་འབྲས་བཏོན་པ་དང་འཕེལ་རྒྱས་ཀྱི་བཀོད་ཇུས་གསར་པ་གང་མགྱོགས་བཏོད་པས་རང་རྒྱལ་འཕེལ་རྒྱས་ཀྱི་གསོག་ནུས་མདུན་དུ་སྐྱོད་བཞིན་ཡོད།

“གོམ་པ་རེ་རེ་བྱས་ཏེ་བློ་བརྟན་འགྱུར་མེད་ངང་སྐྱོད་དགོས”ཀྲུང་གོའི་ལུགས་ཀྱི་དེང་རབས་ཅན་ནི་བརྗིད་ཆགས་མཐའ་ཡས་དང་དགེ་མཚན་དཔག་མེད་ཅིག་རེད།

ད་ཆའི་ཀྲུང་གོས་མི་དམངས་ལ་དམ་པོར་བརྟེན་ནས་མཛེས་སྡུག་ལྡན་པའི་འཚོ་བ་གཏོད་པ་དང་དམངས་འཚོའི་བདེ་རྩ་རྒྱུན་མཐུད་ཆེ་རུ་གཏོང་བཞིན་ཡོད།

ཁུལ་ཆུང་རྙིང་པ་སྒྱུར་བཀོད་བྱས་པ་ལས་རྒྱལ་ཡོངས་ཀྱི་མི་དུང་ཕྱུར་མང་པོར་ཕན་པ་ཐོབ་པ་དང་འཛད་སྤྱོད་དངོས་རྫས་རྙིང་པ་གསར་པར་བརྗེས་པ་ལས་ལྗང་མདོག་རིག་ནུས་ཐོན་རྫས་དུད་ཚང་ཁྲི་སྟོང་མང་པོར་ཁྱབ་པར་སྐུལ་ཁྲིད་ཐུབ་པ་ནས་འཛམ་གླིང་དུ་གཞི་ཁྱོན་ཆེ་ཤོས་ཀྱི་དམངས་འཚོའི་འགན་ལེན་དྲ་བ་ཚགས་དམ་དུ་བཏང་བའི་བར།

སྤུས་ཚད་མཐོ་བའི་འཕེལ་རྒྱས་དང་སྤུས་ཀ་དག་པའི་འཚོ་བ་ཕྱོགས་གཉིས་ཀར་སྐུལ་འདེད་བཏང་སྟེ་དུས་རབས་གསར་པའི“དམངས་འཚོའི་རྒྱུགས་ལན”གྱིས་མི་སེམས་ལ་དྲོ་སྐྱིད་སྦྱིན་ཡོད།

ཡང་དག་པའི་སྲིད་དོན་ལས་རྗེས་ལྟ་བ་འཛུགས་པ་དང་ལག་བསྟར་གྱི་སློབ་སྦྱོང་སློབ་གསོ་གོ་སྐབས་སུ་བྱས་ཏེ་རྒྱ་ཆེའི་ཏང་ཡོན་དང་ལས་བྱེད་པས་ལས་སྒྲུབ་ལས་གཏོད་ཀྱི“གཅུས་སྒོ་ཨ་མ”དམ་དུ་གཏོང་བ་དང་། མི་དམངས་ཀྱི་ཆེད་དུ་སྲིད་དོན་ལས་རྗེས་འཇོག་རྒྱུ་དང་དངོས་སྒྲུབ་ལ་བརྟེན་ནས་སྲིད་དོན་ལས་རྗེས་འཇོག་རྒྱུ་མཐའ་འཁྱོངས་བྱས་ཡོད།

ཏང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་ཀྲུང་གོའི་མི་དམངས་ཀྱིས་རྒྱལ་ཁབ་འཕེལ་རྒྱས་ཡར་ཐོན་ཡོང་བའི་ལས་དབང་རང་ཉིད་ཀྱི་ལག་ཏུ་དམ་པོར་བཟུང་ཡོད།

ད་ཆའི་ཀྲུང་གོས་མིའི་རིགས་ཀྱི་ཤེས་དཔལ་གཏོད་པའི་མདུན་གྲལ་དུ་ལངས་ནས་དུས་རབས་ལ་སྣེ་ཁྲིད་དང་འབྱུང་འགྱུར་ལ་སྣེ་ཁྲིད་བྱེད་བཞིན་ཡོད།

“ལོ་ལྔ་ཚན་བཅོ་ལྔ་པའི”འཆར་འགོད་ནི་ཀྲུང་གོའི་རང་ངོས་འཕེལ་རྒྱས་ཀྱི་འཆར་འགོད་ཅིག་རེད་ལ་འཛམ་གླིང་ལ་ཕྱོགས་པའི་མཉམ་ལས་ཀྱི་གསལ་ཐོ་ཞིག་ཀྱང་རེད།

འོད་ཤུགས་གློག་འདོན་འཕྲུལ་འཁོར་ནས་གློག་འདོན་ཚད་སོལ་གློག་ལས་ཐོག་མར་བརྒལ་བ་དང་། རྒྱལ་ཐོན་གྱི་འབབ་བཟོའི་དཔེ་དབྱིབས་ཆེ་མོ་རིམ་རྩིས་བརྒྱབ་ན་ཕབ་ལེན་བྱེད་ཚད་གོ་ལ་ཧྲིལ་པོའི་ཨང་དང་པོར་སླེབས་པ། “ཀྲུང་གོའི་གོ་སྐབས་2.0”གྱིས་གོ་ལ་ཧྲིལ་པོར“གསར་གཏོད་ཀྱི་ཁེ་སྤོགས”དེ་བས་མང་བ་བཏོད་ཡོད།

“མཐའ་འཁྱོངས་བཞི”ཡིས་ཧྲང་ཧའེ་མཉམ་ལས་རྩ་འཛུགས་ནུས་སེམས་གཅིག་སྒྲིལ་དང་བརྟན་བགྲོད་རྒྱང་འཁྱོལ་ཡོང་བར་སྣེ་ཁྲིད་བྱས་པ་དང་། “གདོང་ལེན་ཆེན་པོ་བཞི”ཡིས་འབོ་གསེར་རྒྱལ་ཁབ་ཀྱི་མཉམ་ལས་ལ་ལོ་རྒྱུས་ཀྱི་འགན་འཁྲི་ཁ་གསལ་བཟོས་པ་དང་འཐབ་ཇུས་ཀྱི་ངེས་གནས་མཐོ་རུ་བཏང་བ་སོགས།

“མིའི་རིགས་ཀྱི་མདུན་ལམ་སེམས་ལ་འཆང་བ་དང་མི་དམངས་ཀྱི་བདེ་རྩ་ཡིད་ལ་འཇོག་དགོས”ཀྲུང་གོ་ནི་ཐོག་མཐའ་བར་གསུམ་དུ་འཛམ་གླིང་གི་དཔལ་འབྱོར་འཕར་བའི་སྒུལ་ཤུགས་གལ་ཆེན་དང་བརྟན་ལྷིང་གི་རྨང་རྡོ་ལྟ་བུ་ཡིན་ལ། མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པའི་དར་སྤེལ་བ་དང་ལག་ལེན་པའང་ཡིན།

དུས་ལ་འགྱུར་བ་གཏོང་ཐབས་མེད་ཀྱང་འབད་འབུངས་བརྩོན་འགྲུས་ཅན་གྱིས་འབྲས་བུར་འགྱུར་ལྡོག་གཏོང་ཐུབ།

ད་ཆ། ལོ་རྒྱུས་ཡུན་རིང་ལྡན་ཞིང་ཉིན་རེ་བཞིན་འགྱུར་ལྡོག་འགྲོ་བའི་ཀྲུང་གོ་གསར་པ་ཞིག་དེ་བས་བརྗིད་ཉམས་ལྡན་པའི་སྒོ་ནས་འཛམ་གླིང་གི་ཤར་ཕྱོགས་སུ་འགྱིང་ངེར་གནས་ཤིང་། ཀྲུང་གོའི་མི་དམངས་ཀྱིས་གདེང་ཚོད་དང་། རང་ཚུགས། རང་དར་བཅས་ཀྱི་ཉམས་འགྱུར་ཐོག་ནས་དེ་བས་མཛེས་སྡུག་ལྡན་པའི་འབྱུང་འགྱུར་ཕྱོགས་སུ་གོམ་ཞེང་ཆེན་པོས་སྐྱོད་བཞིན་ཡོད་ལ། ཀྲུང་ཧྭ་མི་རིགས་འདི་ཉིད་སུས་ཀྱང་འགོག་ཐབས་བྲལ་བའི་གོམ་སྟབས་ཐོག་ནས་བསྐྱར་དར་རླབས་པོ་ཆེའི་ཕྱོགས་སུ་སྐྱོད་བཞིན་ཡོད།

ཕྱི་རྒྱལ་གྱི་སྲིད་ཕྱོགས་མི་སྣ་གལ་ཆེན་ཞིག་གིས“ཀྲུང་གོའི་གྲུབ་འབྲས་ནི་ཀྲུང་གོ་གུང་ཁྲན་ཏང་གི་གྲུབ་འབྲས་རེད”ཅེས་བཤད་ཡོད།

ལོ་105ཡི་རིང་། ཏང་གིས་མི་དམངས་ལ་མཐུན་སྒྲིལ་སྣེ་ཁྲིད་བྱས་ཏེ་འོད་སྟོང་ཟམ་མི་ཆད་པར་བཏོད་ཐུབ་པའི་འགག་རྩ་ནི་བློ་བརྟན་འགྱུར་མེད་ངང་བདེན་དོན་དོན་གཉེར་དང་། མི་དམངས་ཀྱི་ཁྲོད་དུ་རྩ་བ་ཟབ་ཚུགས། ལོ་རྒྱུས་ཀྱི་འགན་འཁྲི་འཁུར་ཕོད་པ། འཕེལ་རྒྱས་ཀྱི་རླབས་རྒྱུན་དང་བསྟུན་པ། འཐབ་རྩོད་བྱེད་ཕོད་པ། རང་ངོས་སྟོབས་ཆེར་གཏོང་བར་མཐོང་ཆེན་བྱེད་པ་སོགས་ཀྱི་རྨད་བྱུང་གི་ཁྱད་ཡོན་ལྡན་པ་ལས་བྱུང་བ་ཞིག་རེད།

དུས་རབས་གསར་པ་ཤར་ཚུན། ཏང་དང་མི་དམངས་ལ་ཏང་སྟོབས་ཆེར་དང་རྒྱལ་ཁབ་སྟོབས་ཆེར་གཏོང་བའི་ལོ་རྒྱུས་ཀྱི་རང་འགུལ་དབང་ཆ་ཐོབ་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་ལོ་རྒྱུས་ཀྱི་འཕེལ་ཕྱོགས་ཆེན་པོ་འགོག་ཐབས་མེད་པ་རྩ་བའི་ཆ་ནས་འགན་ལེན་ཐུབ་པ་དེ་ནི“གཏན་འཁེལ་གཉིས”ལས་བྱུང་བ་ཞིག་རེད།

ད་ལོ་ནི་དམར་དམག་རྒྱང་སྐྱོད་ལ་རྒྱལ་ཁ་ཐོབ་ནས་ལོ་ངོ་90འཁོར་བའི་ལོ་ཞིག་རེད།

“རྒྱང་ལམ་གསར་པ་ནི་རྒྱང་སྐྱོད་གསར་པ་ཞིག་རེད”ད་ཆ་འགག་རྩའི་དུས་སྐབས་སུ་སླེབས་པས་སྒྱུར་འཕེལ་བརྟན་གསུམ་གྱི་ལས་འགན་དཀའ་ཚེགས་ཆེ་ལ་ལྕི་པོ་ཡོད་པ་དང་། མདུན་སྐྱོད་ཀྱི་ལམ་བུར་ད་དུང་འགོག་རྐྱེན་དང་བཀག་རྡོ་མང་པོ་ཡོད་པས་ངེས་པར་དུ་ལོ་རྒྱུས་ཀྱི་ཁྱད་ཆོས་གསར་པ་མང་པོ་ལྡན་པའི་རླབས་ཆེའི་འཐབ་རྩོད་ཀྱི་རྒྱལ་ཁ་གསར་པ་བླངས་ནས། སྤྱི་ཚོགས་རིང་ལུགས་དེང་རབས་ཅན་གཞི་རྩའི་ཆ་ནས་མངོན་འགྱུར་ཡོང་བར་ཐག་གཅོད་རང་བཞིན་གྱི་འཕེལ་རྒྱས་ཡོང་བར་བྱེད་དགོས།

ཏང་གི་ཕྱོགས་ཡོངས་ཀྱི་འགོ་ཁྲིད་མཐའ་འཁྱོངས་དང་དེར་ཤུགས་སྣོན་རྒྱག་རྒྱུ་ནི་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་རྩ་བའི་འགན་ལེན་ཞིག་རེད། འཚོག་ཉེར་ཡོད་པའི་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་ལྔ་པའི་ཐོག་རྒྱུན་སྲིང་ལྷོད་མེད་ངང་ཕྱོགས་ཡོངས་ནས་ཏང་ནན་པོས་སྐྱོང་བར་སྐུལ་འདེད་གཏོང་བའི་གནད་དོན་གལ་ཆེན་འགའ་ཞིག་ལ་ཞིབ་འཇུག་བྱེད་པའི་དམིགས་ཡུལ་ནི་རང་རེའི་ཏང་དེ་བས་འགྱུར་མེད་སྟོབས་ལྡན་དུ་སྐྲུན་ཆེད་རེད།

རྒྱང་ལམ་གསར་པར་ང་ཚོས་རྒྱལ་ཁ་ཐོབ་ངེས་ཡིན་པའི་དད་སེམས་བརྟན་དུ་གཏོང་བ་དང་། རང་རྒྱལ་གྱི་འཕེལ་རྒྱས་ལ་ལེགས་ཆ་མང་པོ་དང་འཐབ་ཇུས་རང་བཞིན་གྱི་མཐུན་རྐྱེན་ལྡན་པར་ངོས་འཛིན་གཏིང་ཟབ་དང་སྟངས་འཛིན་ནན་པོ་བྱེད་པ། འགྲོ་ལམ་མི་འགྱུར་བ་དང་བློ་སྟོབས་མི་ཉམས་པ་རྒྱུན་འཁྱོངས་བཅས་བྱས་ཏེ་མིག་ཟུང་སྤྲིན་གྱིས་གྲིབ་ཀྱང་རླུང་བརྟེན་རླབས་གཤགས་ཀྱི་ཁ་ཕྱོགས་མི་འཛོལ་བར་བྱེད་དགོས། འགག་སྒྲོལ་དཀའ་སེལ་བྱེད་ཕོད་པ་དང་དཀའ་ངལ་མཐའ་དག་ཟིལ་གྱིས་གནོན་པར་བྱེད་པའི་ཆོད་སེམས་དང་བློ་སྟོབས་ཀྱི་ཐོག་ནས་འཐབ་རྩོད་བྱེད་ཕོད་པ་དང་གསར་གཏོད་བྱེད་མཁས་པ་བྱས་ཏེ་གནས་ཚུལ་གསར་པར་ཞིབ་འཇུག་དང་གནད་དོན་གསར་པ་ཐག་གཅོད་བྱེད་པའི་ཐད་ཤུགས་སྣོན་རྒྱག་པ་དང་ཉམས་མྱོང་གསོག་དགོས། བློ་བརྟན་འགྱུར་མེད་ངང་མཐུན་སྒྲིལ་འབད་འཐབ་ཀྱིས་ཐོག་མཐའ་བར་གསུམ་དུ་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་བྱེད་པ་དང་། མི་དམངས་དུང་ཕྱུར་མང་པོའི་ཧུར་བརྩོན་རང་བཞིན་དང་། རང་འགུལ་རང་བཞིན། གསར་གཏོད་རང་བཞིན་བཅས་སྐུལ་སློང་གང་ལེགས་བྱེད་པ། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་བརྗིད་ཆེའི་སྟོབས་ཤུགས་གཅིག་ཏུ་སྒྲིལ་བ་བཅས་བྱས་ཏེ། བརྗིད་ཆེའི་འཆར་གཞི་དེ་མཛེས་སྡུག་ལྡན་པའི་དོན་དངོས་སུ་འགྱུར་བར་བྱེད་དགོས།

“ཕུགས་འདུན་དང་བདེ་སྐྱིད་ཀྱི་ཆེད་དུ་མཉམ་དུ་འབད་འཐབ་བྱེད་དགོས”ང་ཚོས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་དེ་བས་མཐུན་སྒྲིལ་དམ་ཟབ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་ཕྱོགས་ཡོངས་ནས་ལག་བསྟར། “གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་པ། “སྲུང་སྐྱོང་གཉིས”མཐའ་གཅིག་ཏུ་ཐུབ་པ། བློ་རྩ་བརྟན་པོས་ཡར་རྒྱས་བརྩོན་ལེན་དང་གསར་འབྱེད་གསར་གཏོད་བཅས་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་དེ་བས་བརྗིད་ཉམས་ལྡན་པའི་ལེའུ་ནུས་ཤུགས་ཡོད་རྒུས་རྩོམ་དགོས།

(ཤིན་ཧྭ་གསར་འགྱུར་ཁང་པེ་ཅིང་ནས་ཟླ་9ཚེས་30ཉིན་འབྱོར་བའི་གློག་འཕྲིན)