ད་ལོ་ནི་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་105འཁོར་བ་དང་བོད་ཞི་བས་བཅིངས་འགྲོལ་བཏང་ནས་ལོ་ངོ་75འཁོར་བའི་ལོ་རེད། ཟླ་9ཚེས་30ཉིན་གྱི་སྔ་དྲོར་རང་སྐྱོང་ལྗོངས་ཀྱིས་སྔོན་གཤེགས་དཔའ་བོའི་དྲན་གསོའི་ཉིན་མོར་སྔོན་གཤེགས་དཔའ་བོར་མེ་ཏོག་སི་ར་འབུལ་བའི་མཛད་སྒོ་འཚོགས་ཤིང་། རང་སྐྱོང་ལྗོངས་ཏང་སྲིད་དམག་གསུམ་གྱི་འགོ་ཁྲིད་ཀྱིས་ལྗོངས་ཡོངས་ཀྱི་མི་རིགས་ཁག་དང་ལས་རིགས་ཁག་གི་ལས་བྱེད་པ་དང་མང་ཚོགས་ཀྱི་འཐུས་མི་དང་མཉམ་དུ་ལྷ་སའི་སྔོན་གཤེགས་དཔའ་བོའི་བང་སོའི་སྐྱེད་ཚལ་དུ་སྔོན་གཤེགས་དཔའ་བོར་མེ་ཏོག་སི་ར་ཕུལ་ནས། གསར་བརྗེའི་སྔོན་གཤེགས་དཔའ་བོར་རྗེས་དྲན་དང་སྔོན་གཤེགས་དཔའ་བོའི་སྙིང་སྟོབས་དར་སྤེལ་བཏང་སྟེ་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་སྐྲུན་པར་སྟོབས་ཤུགས་ཆེན་པོ་གཅིག་ཏུ་བསྒྲིལ་བ་རེད། ཧུའུ་ཁྲང་ཧྲེང་དང་། ཡན་ཅིན་ཧའེ། ཀརྨ་ཚེ་བརྟན། ཀུང་ཧུའེ་ཚའེ། ལའེ་ཅའོ། ཚེ་རིང་ཐར། བསྟན་པ། ཞུས་ཀྲི་ཝུན་བཅས་མཛད་སྒོར་ཞུགས་པ་དང་། ཟླ་བ་ཚེ་རིང་གིས་མེ་ཏོག་སི་ར་འབུལ་བའི་མཛད་སྒོ་གཙོ་སྐྱོང་གནང་བ་རེད། 

ཧུའུ་ཁྲང་ཧྲེང་གིས་མེ་ཏོག་སི་རའི་དར་འཛར་སྲོང་སྐྱོར་གནང་བ། 

ལྷ་སའི་སྔོན་གཤེགས་དཔའ་བོའི་བང་སོའི་སྐྱེད་ཚལ་དུ་ལྷིང་འཇགས་རྔམ་བརྗིད་ལྡན་ཞིང་། དྲན་གསོའི་རྡོ་རིང་དེ་བས་བརྗིད་ཉམས་ལྡན་ལ་འགྱིང་ངེར་གནས། ཆུ་ཚོད་9པར་སྔོན་གཤེགས་དཔའ་བོར་མེ་ཏོག་སི་ར་འབུལ་བའི་མཛད་སྒོ་དངོས་སུ་འགོ་ཚུགས་པ་དང་། རྔམ་བརྗིད་ལྡན་པའི《བློས་བླངས་དམག་གི་མདུན་སྐྱོད་གླུ་དབྱངས》གྲགས་པ་དང་སྦྲགས་ཚོགས་ར་ཡོངས་ཀྱིས་སྐད་གསང་མཐོན་པོས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་གླུ་མགྲིན་གཅིག་ཏུ་བླངས་པ་རེད། 

རྒྱལ་གླུ་བླངས་རྗེས་ཚང་མས་སྔོན་གཤེགས་དཔའ་བོར་ངག་བསྡམས་ནས་མྱ་ངན་ཞུས་པ་དང་། མྱ་ངན་ཞུས་རྗེས་ལག་ཏུ་མེ་ཏོག་སོས་པ་བཟུང་བའི་ལོ་ཆུང་བྱིས་པས་དྲན་གསོའི་རྡོ་རིང་ལ་ཁ་ཕྱོགས་ནས《ང་ཚོ་ནི་གུང་ཁྲན་རིང་ལུགས་ཀྱི་ཤུལ་འཛིན་པ་ཡིན》ཞེས་པའི་གླུ་གཞས་སྐད་གསང་མཐོན་པོས་བླངས་པ་དང་འབྲེལ་ལོ་ཆུང་གདོང་ལེན་རུ་ཁག་གི་གུས་འདུད་ཞུས་པ་རེད།

ཧུའུ་ཁྲང་ཧྲེང་དང་རང་སྐྱོང་ལྗོངས་ཏང་སྲིད་དམག་གསུམ་གྱི་འགོ་ཁྲིད་ཀྱིས་སྔོན་གཤེགས་དཔའ་བོའི་དྲན་གསོ་ཁང་དུ་ལྟ་སྐོར་གནང་བ། 

རུ་སྟར་གྲུ་བཞིའི་མདུན་དུ་རང་སྐྱོང་ལྗོངས་ཏང་ཨུད་དང་། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན། རང་སྐྱོང་ལྗོངས་སྲིད་གཞུང་། རང་སྐྱོང་ལྗོངས་སྲིད་གྲོས། བོད་དམག་ཁུལ་ཁང་། རང་སྐྱོང་ལྗོངས་བཟོ་ཚོང་མཉམ་འབྲེལ་ལྷན་ཚོགས། མི་དམངས་ཚོགས་པ་ཁག ལྷ་སའི་མི་རིགས་ཁག་དང་ལས་རིགས་ཁག་གི་མང་ཚོགས། བོད་ཀྱི་ལོ་ཆུང་གདོང་ལེན་རུ་ཁག་བཅས་ཀྱི་མིང་ཐོག་ནས་ཕུལ་བའི་མེ་ཏོག་སི་ར་ཆེ་གྲས་9གྲལ་སྟར་འགྲིག་པོས་བཞག་ཡོད་པ་དང་། མེ་ཏོག་སི་རའི་དར་འཛར་དམར་པོའི་ཐོག་བྲིས་པའི“སྔོན་གཤེགས་དཔའ་བོ་ནམ་ཡང་མི་ནུབ་པར་གྱུར་ཅིག”ཅེས་པའི་ཡིག་འབྲུ་དག་ཧ་ཅང་མངོན་གསལ་དོད་པོ་ཡོད། 

བརྩེ་སེམས་ཟབ་མོ་མཚོན་པའི《མེ་ཏོག་འབུལ་བའི་རོལ་དབྱངས》ཁྲོད་གུས་དམག་18ཀྱིས་མེ་ཏོག་སི་ར་བརྟན་པོའི་ངང་བཏེགས་ནས་སྔོན་གཤེགས་དཔའ་བོའི་དྲན་གསོའི་རྡོ་རིང་གི་ཕྱོགས་སུ་དལ་བུར་བསྐྱོད་དེ་མེ་ཏོག་སི་ར་དྲན་གསོའི་རྡོ་རིང་གི་ཞབས་སྟེགས་ཐོག་བཞག་པ་རེད།

ཧུའུ་ཁྲང་ཧྲེང་སོགས་རང་སྐྱོང་ལྗོངས་ཀྱི་ཞིང་ཆེན་དང་ཅུན་རིམ་པའི་འགོ་ཁྲིད་རིམ་པ་བཞིན་དྲན་གསོའི་རྡོ་རིང་གི་མདུན་དུ་ཕེབས་ནས་མེ་ཏོག་སི་རའི་མདུན་དུ་བཞེངས་ཏེ་ཁ་ཁུ་སིམ་པོས་གཟིགས།

ཧུའུ་ཁྲང་ཧྲེང་གིས་མེ་ཏོག་སི་རའི་དར་འཛར་སྲོང་སྐྱོར་གནང་བ་དང་། དེ་རྗེས་རང་སྐྱོང་ལྗོངས་ཀྱི་ཞིང་ཆེན་དང་ཅུན་རིམ་པའི་འགོ་ཁྲིད་ཀྱིས་སྔོན་གཤེགས་དཔའ་བོའི་དྲན་གསོའི་རྡོ་རིང་ལ་སྐོར་བ་བསྐྱོན་ནས་གུས་མཇལ་ཞུས་པ་རེད། 

ལོ་ཆུང་བྱིས་པ་དང་མི་རིགས་ཁག་དང་ལས་རིགས་ཁག་གི་མང་ཚོགས་ཀྱི་འཐུས་མིས་རིམ་པ་བཞིན་དྲན་གསོའི་རྡོ་རིང་མདུན་དུ་བསྐྱོད་དེ་མེ་ཏོག་སོས་པ་ཕུལ་བ་དང་འབྲེལ་དྲན་གསོའི་རྡོ་རིང་ལ་གུས་མཇལ་དང་སྔོན་གཤེགས་དཔའ་བོར་གུས་འདུད་ཞུས་པ་རེད།

མཛད་སྒོ་མཇུག་འགྲིལ་རྗེས་ཧུའུ་ཁྲང་ཧྲེང་ཁུང་ཧྥན་སེན་སོགས་སྔོན་གཤེགས་དཔའ་བོའི་བང་སོའི་མདུན་དུ་ཕེབས་ནས་གུས་བཀུར་ཆེན་པོས་མེ་ཏོག་སོས་པ་ཕུལ་ཏེ་རྗེས་དྲན་ཞུས་པ་རེད། 

སྔོན་གཤེགས་དཔའ་བོའི་དྲན་གསོ་ཁང་དུ་ལོ་རྒྱུས་ཀྱི་པར་རིས་རེ་རེ་དང་རྩ་ཆེའི་རིག་དངོས་རེ་རེ་ལས་སྔོན་གཤེགས་དཔའ་བོ་བོད་ཀྱི་གསར་བརྗེ་འཛུགས་སྐྲུན་དང་སྒྱུར་བཅོས་འཕེལ་རྒྱས་ལ་ཞུགས་པའི་འབད་འཐབ་ཀྱི་ལོ་རྒྱུས་ལམ་བུ་མངོན་པས་ཚང་མར་སློབ་གསོ་ཟབ་མོ་ཐེབས་པ་དང་བསམ་བློར་ཞུན་བརྡར་ཡང་ཐེབས་ཡོད། ཧུའུ་ཁྲང་ཧྲེང་གིས་འགྲེལ་བཤད་ནན་ཏན་ངང་གསན་པ་དང་ཕེབས་མཚམས་ཡང་ཡང་བཞག་ནས་གཟིགས་པ་མ་ཟད་སྔོན་གཤེགས་དཔའ་བོའི་ཚེ་གང་གི་བྱས་རྗེས་མཁྱེན་རྟོགས་ཞིབ་ཕྲ་གནང་བ་རེད། ཁོང་གིས་བོད་སྐྱོད་པ་རྒན་གྲས་ཀྱི་སྙིང་སྟོབས་དང་། “ལམ་གཉིས”ཀྱི་སྙིང་སྟོབས། ཁུང་ཧྥན་སེན་གྱི་སྙིང་སྟོབས་བཅས་རྒྱུན་འཛིན་དང་དར་སྤེལ་ཤུགས་ཆེན་གཏོང་བ་དང་། གསར་བརྗེའི་སྙིང་སྟོབས་རྒྱུན་འཛིན་བྱེད་པ། ཁྱིམ་ཞེན་རྒྱལ་ཞེན་གྱི་བརྩེ་སེམས་ཟབ་ཏུ་གཏོང་བ། མི་དམངས་ཀྱི་ལངས་ཕྱོགས་སུ་བརྟན་པོ་ལངས་པ། ཕུགས་བསམ་དང་དད་སེམས་བརྟན་དུ་གཏོང་བ། འགན་འཁྲི་འཁུར་སེམས་ཆེ་རུ་གཏོང་བ་བཅས་བྱས་ཏེ་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་རྒྱུན་ཆད་མེད་པར་གྲུབ་འབྲས་གསར་པ་ཐོབ་པར་སྐུལ་འདེད་ཧུར་ཐག་གཏོང་དགོས་ཞེས་ནན་བཤད་གནང་བ་རེད།