ཉེ་བའི་ལོ་ཤས་རིང་། མངའ་རིས་ས་ཁུལ་སྤུ་ཧྲེང་གྲོང་རྡལ་སྟོད་ཡུལ་གྲོང་ཚོས་དོན་དངོས་ལ་གཞི་ཚུགས་ནས་ཏང་འཛུགས་སྐྱོང་གིས་སྣེ་ཁྲིད་དང་། མང་ཚོགས་ཞུགས་པ། སྣ་མང་མཉམ་བཅོས་བཅས་ཀྱི་གྲོང་གསེབ་བཅོས་སྐྱོང་གི་ཐབས་ལམ་འཚོལ་ཞིབ་ཀྱིས་མང་ཚོགས་ཀྱི་སེམས་ཁྲལ་སྣ་ཚོགས་གནད་སྨིན་སེལ་བ་དང་དམངས་འཚོའི་རེ་སྒུག་གི་ལས་དོན་དོན་འཁྱོལ་བྱས་ཐོག“ཚད་བརྒལ་ཆུང་ངུར”བཅོས་སྐྱོང་བྱས་པ་ལས་གྲོང་གསེབ་འཕེལ་རྒྱས་ཀྱི“མཐོར་གཏོང་ཆེན་པོ”མངོན་འགྱུར་བྱུང་ཡོད།

ལས་སྟེགས་ཡག་པོ་བསྐྲུན་ནས་ལམ་སྲོལ་བཙུགས་པ།

བཅོས་སྐྱོང་གི་སྤུས་ཚད་མཐོ་རུ་དང་ཕན་འབྲས་ཆེ་རུ་གཏོང་ཆེད་སྟོད་ཡུལ་གྲོང་ཚོས“གྲོས་བསྡུར་བཞི་དང་ཡོངས་བསྒྲགས་གཉིས”ཀྱི་ལམ་ལུགས་དོན་འཁྱོལ་ནན་པོ་བྱེད་པའི་རྨང་གཞིའི་ཐོག་རེས་གཟའ་མིག་དམར་ལ་གཅིག་སྡུད་ཐོག་གཞུང་དོན་སྒྲུབ་པ་དང་། གཞི་རིམ་བཅོས་སྐྱོང་གི་མཉམ་འབྲེལ་ཚོགས་འདུ་འཚོགས་པ། “དོན་དག་ཡོད་ཚེ་གྲོས་བསྡུར་བྱེད་པ”བཅས་ཀྱི་གྲོས་མོལ་དང་གྲོས་བསྡུར་ལས་ཀའི་ལམ་སྲོལ་གསུམ་རྒྱུན་རྣམ་ཅན་གྱི་སྒོ་ནས་ཁྱབ་གདལ་བཏང་བ་རེད།

སྟོད་ཡུལ་གྲོང་ཚོས་མཉམ་འདུས་རྣམ་པའི་འགལ་ཟླ་འདུམ་འགྲིག་ཚོགས་ཆུང་བཙུགས་ཏེ་གྲོང་ཚོ་རིམ་པའི་འདུམ་འགྲིག་ཁང་དང་ཞིང་པའི་སྤྲོ་སྐྱིད་ཇ་ཁང་སོགས་དམངས་ཕན་དམངས་བདེའི་འཐབ་སར་བརྟེན་ནས་རུབ་རུབ་བྱས་ཏེ་ཇ་འཐུང་བ་དང་སྙིང་གཏམ་ཤོད་རེས་ཀྱི་རྣམ་པར་བརྟེན་ནས་རེ་ཞུ་ཉན་པ་དང་། སེམས་རྩ་འཁོལ་པོས་འགལ་ཟླ་སེལ་བ། ཁྱིམ་མཚེས་དབར་གྱི་རྩོད་གཞི་ཙག་ཙིག་འདུམ་འགྲིག་བྱེད་པ། རྒྱུན་གཏན་གྱི་འགལ་ཟླ་སེལ་བ་བཅས་བྱས་པ་རེད།

“དེ་སྔ་ཁྱིམ་མཚེས་དབར་གོ་འཛོལ་བྱུང་བ་དང་འགལ་ཟླ་ཙག་ཙིག་ཐོན་སླ་པོ་ཡོད་པ་མ་ཟད་ཚང་མས་ཀྱང་སེམས་སུ་ངེས་ནས་སྡོད་ཀྱི་ཡོད། ད་ཆ་གྲོང་ཚོས་རྟག་ཏུ་ཚང་མ་སྒྲིག་འཛུགས་ཀྱིས་སྙིང་གཏམ་ཤོད་རེས་དང་གནས་ལུགས་རྒྱུ་མཚན་བཤད་པས་ཚང་མའི་སེམས་ནད་བསལ་བ་མ་ཟད། ཁྱིམ་མཚེས་དབར་གྱི་འབྲེལ་བ་ཡང་ཟབ་ཏུ་ཕྱིན་ཡོད”ཅེས་སྟོད་ཡུལ་གྲོང་ཚོའི་ཡུལ་མི་བསོད་ནམས་ཆོས་སྒྲོན་གྱིས་བཤད།

དམངས་འཚོ་རྩ་བར་འཛིན་ནས་དམངས་ཀྱི་སེམས་ཁྲལ་བསལ་བ།

དེ་གོང་དབྱར་དུས་ཀྱི་འབྲུབ་དུས་འཆར་རིམ་བཞིན་སྟོད་ཡུལ་གྲོང་ཚོའི་ཆུ་ཡུར་དུ་བྱེ་འདམ་གྱིས་ཁེངས་པ་དང་། ཆུ་མདོང་རྙིང་པ་ཡང་ཡང་འགག་ནས་གྲོང་ཚོའི་ཀ་ལའི་ཆུ་རྙོག་པ་དང་ཆུ་ཤུགས་ཆེན་པོ་མེད་པ་ནི་ས་གནས་དེ་གའི་མང་ཚོགས་ཀྱི་ལོ་མང་རིང་གི་དམངས་འཚོའི་དཀའ་གནད་ཅིག་རེད།

དེར་བརྟེན་གྲོང་ཚོའི“ཨུ་ལྷན་གཉིས”ཀྱིས་གྲོང་ཚོར་བཅའ་སྡོད་ལས་དོན་རུ་ཁག་དང་མཉམ་འབྲེལ་ཐོག་རང་འགུལ་ངང་ཆུ་བེད་དང་གྲོང་གསེབ་དར་རྒྱས་སོགས་སྡེ་ཚན་དང་འབྲེལ་མཐུད་བྱས་ཏེ། ས་གནས་ས་ཐོག་ཏུ་ཆུ་འགོ་རྩད་ཞིབ་དང་མདོང་དྲའི་མངོན་མེད་རྐྱེན་ངན་གྲལ་བཤེར་བྱས་པ་དང་། ཚན་རིག་དང་མཐུན་པའི་སྒྱུར་བཀོད་ཇུས་གཞི་བཟོས་ཏེ་རྣམ་གྲངས་ཀྱི་མ་དངུལ་སྒོར་ཁྲི་1000ལྷག་ཙམ་བརྩོན་ལེན་ཧུར་ཐག་བྱས་ཐོག་གྲོང་གསེབ་ཀྱི་འཐུང་ཆུའི་བདེ་འཇགས་སྲ་བརྟན་དང་མཐོར་གཏོང་ལས་གྲྭ་ལག་ལེན་བསྟར་བ་རེད། ཆུ་གཙང་བཟོའི་སྒྲིག་བཀོད་གསར་སྐྲུན་དང་། མདོང་དྲ་རྙིང་པ་བརྗེ་བ། ཆུ་ཤུགས་བརྟན་གཏོང་གི་སྒྲིག་བཀོད་མང་དུ་གཏོང་བ། ཆུ་འགོའི་འགོག་སྲུང་སྒྲིག་བཀོད་ཉམས་བཟོ་སོགས་ཀྱི་བྱ་ཐབས་བརྒྱུད་འབྲུབ་དུས་ཀྱི་ཆུ་མཁོ་འདོན་བརྟན་པོ་མེད་པ་དང་ཆུ་སྤུས་ཡག་པོ་མེད་པའི་གནད་དོན་རྦད་དེ་ཐག་གཅོད་ཐུབ་ནས་གྲོང་ཚོ་ཡོངས་ཀྱི་མང་ཚོགས་ལ་དྭངས་གཙང་དང་བློས་འགེལ་ཆོག་པའི་རང་འབབ་ཆུ་ཀ་ལ་སྤྱོད་རྒྱུ་བྱུང་ཡོད།

གྲོང་ཚོའི་ལོ་ན་མཐོ་བ་དང་ཁེར་སྡོད་རྒན་རྒོན་གྱི་སྡོད་ཁང་བདེ་འཇགས་ཀྱི་མངོན་མེད་རྐྱེན་ངན་ལ་དམིགས་ནས་གྲོང་ཚོས་ཕྱོགས་ཡོངས་ནས་གྲལ་བཤེར་དང་། ཉེན་ཡོད་ཁང་པ་དང་གཏོར་སྐྱོན་ཐེབས་པའི་ཁང་པའི་གནས་ཚུལ་ཐོ་འགོད་གནད་སྨིན་བྱས་ཏེ་ཁེར་སྡོད་རྒན་རྒོན་གྱི་སྡོད་ཁང་བདེ་འཇགས་ཀྱི་རྩིས་ཁྲ་བཟོས་ཡོད། རོགས་སྐྱོར་མ་དངུལ་སྒོར་ཁྲི་13ལྷག་ཙམ་གྲབས་གསོག་ཧུར་ཐག་བྱས་ཏེ་ཁང་པ་རྙིང་པ་དང་། ཐོག་ཁ། སྒོ་དང་སྒེའུ་ཁུང་། གློག་ལམ་སོགས་འགག་རྩའི་ཆ་ཤས་ཉམས་གསོ་གསར་སྐྲུན་དང་། ཁང་པའི་གྲུབ་གཞི་བརྟན་གཏོང་། སྡོད་ཁང་གི་སྒྲིག་བཀོད་འཐུས་སྒོ་ཚང་དུ་གཏོང་བ་བཅས་བྱས་ནས། དམིཌ་བསལ་ཚོགས་སྤྱིའི་སྡོད་གནས་ཀྱི་བདེ་འཇགས་ནུས་ཤུགས་ཡོད་རྒུས་སྲུང་སྐྱོང་བྱས་ཡོད། དེ་དང་ཆབས་ཅིག རྒྱུན་རྣམ་ཅན་གྱི་སྒོ་ནས་དུད་ཚང་དུ་བཅར་འདྲིར་བསྐྱོད་དེ་དམིགས་བསལ་ཚོགས་སྤྱིའི་འཚོ་བའི་གནས་ཚུལ་ཤེས་རྟོགས་དང་། རོགས་སྐྱོར་སྲིད་ཇུས་དོན་འཁྱོལ། འཚམས་འདྲི་བཅས་བྱས་པ་རེད། མིག་སྔའི་བར་དམིགས་བསལ་མང་ཚོགས་དུད་ཚང་50ལ་རྒྱུན་རྣམ་ཅན་གྱི་རོགས་སྐྱོར་བྱས་ཡོད།

སྲོལ་བཟང་དར་སྤེལ་གྱིས་བཅོས་སྐྱོང་ལ་སྐུལ་འདེད་བཏང་བ།

སྟོད་ཡུལ་གྲོང་ཚོས་ཡུལ་སྲོལ་ཤེས་དཔལ་སྲོལ་གཏོད་དེ་གཞི་རིམ་བཅོས་སྐྱོང་གི་དམ་འཛིན་བྱ་གཞི་གལ་ཆེན་དུ་བརྩི་རྒྱུ་མཐའ་འཁྱོངས་ཀྱིས་ཤེས་དཔལ་སྐྱེད་སྲིང་དང་གོམས་སྲོལ་སྒྱུར་བ་དེ་གྲོང་གསེབ་འཕེལ་རྒྱས་ཀྱི་བརྒྱུད་རིམ་ཧྲིལ་པོར་ཁྱབ་པར་བྱས་ཡོད། གྲོང་བབ་དམངས་འདུན་དང་ཟུང་འབྲེལ་དང་མང་ཚོགས་ཀྱི་ཐོན་སྐྱེད་འཚོ་བ་དང་ཟུང་འབྲེལ་བྱེད་པའི་གྲོང་སྲོལ་དམངས་ཆིངས་མུ་མཐུད་བཟོ་བཅོས་དང་འཐུས་སྒོ་ཚང་དུ་བཏང་ནས། རྒྱ་ཆེའི་ཡུལ་མིའི་སྣེ་ཁྲིད་དེ་ལུགས་རྙིང་སྲོལ་ངན་རང་རྟོགས་ངང་དོར་ནས་ཡ་རབས་བབ་ཆགས་ཀྱི་ཁྱིམ་སྲོལ་སྐྱེད་སྲིང་དང་མཛེས་མཐུན་གྲོང་སྲོལ་བཏོད་ཡོད།

སྟོད་ཡུལ་གྲོང་ཚོས་རྒྱུན་རྣམ་ཅན་གྱི་རིག་གནས་དམངས་ཕན་བྱེད་སྒོ་སྤེལ་ནས“བྱང་སྐར་སྤུན་བདུན་གྱི་ལམ་སྟོན་ཇི་བཞིན་བསྐྱོད་ན་ལམ་ནོར་ཐེབས་མི་སྲིད་པ་དང་གུང་ཁྲན་ཏང་གི་རྗེས་སུ་འབྲང་ན་བདེ་སྐྱིད་ཐོབ་ངེས་ཡིན་པ”སོགས་བརྗོད་དོན་གཙོ་བོའི་རིག་གནས་བྱེད་སྒོ་30ལྷག་ཙམ་སྤེལ་ནས་རྒྱ་ཆེའི་ཡུལ་མིའི་བསམ་པའི་རིག་གནས་འཚོ་བ་སྔར་བས་ཕུན་སུམ་ཚོགས་སུ་བཏང་བ་དང་ཡུལ་སྲོལ་ཤེས་དཔལ་གྱི་ནང་དོན་ཟབ་ཏུ་བཏང་ཡོད། གྲོང་ཚོའི“ཨུ་ལྷན་གཉིས”ཀྱི་རྐང་འཛིན་གྱི་སྣེ་ཁྲིད་ནུས་པ་གང་ལེགས་བཏོན་ནས་གྲོང་ཚོ་རིམ་པའི་དང་བླངས་ཞབས་ཞུ་རུ་ཁག་12འཐབ་ཕྱོགས་དང་པོར་བསྐྱོད་དེ་དང་བླངས་ཞབས་ཞུ་སྒྲུབ་པ་དང་ཆབས་ཅིག་སྐྱེ་ཁམས་སྲུང་སྐྱོང་དང་སྡོད་མལ་ཁོར་ཡུག་བཅོས་སྒྲིག་གི་འབྲེལ་ཡོད་ཤེས་བྱ་རྒྱུན་རྣམ་ཅན་གྱི་སྒྲོག་འགྲེལ་བྱས་ནས་མང་ཚོགས་ཀྱི་ཁོར་ཡུག་སྲུང་སྐྱོང་གི་འདུ་ཤེས་རིམ་བཞིན་ཟབ་ཏུ་བཏང་སྟེ་ཁྱིམ་གཞིས་ལ་གཅེས་སྐྱོང་དང་སྐྱེ་ཁམས་སྲུང་སྐྱོང་གི་ཤེས་དཔལ་འདུ་ཤེས་མི་སེམས་སུ་གཏིང་ཟབ་ཟུག་པར་བྱས་པས་ཡུལ་མིའི་རང་རྟོགས་ཀྱི་གོམས་གཤིས་སུ་གྱུར་ཡོད། 2025ལོ་ནས་བཟུང་རིམ་རྩིས་བརྒྱབ་ན། གཅིག་སྡུད་བཅོས་སྒྲིག་ཐེངས་200ལྷག་ཙམ་དང་། འཚོ་བའི་གད་སྙིགས་ཏུན་8ཙམ་གཙང་སེལ། དུད་ཚང་35ཡི་གསང་སྤྱོད་སྤུས་ཚད་མཐོ་པོས་སྒྱུར་བཀོད་བཅས་བྱས་ཡོད།

ད་ཆ་སྲོལ་གསར་དང་བཅོས་མཁས་ལ་བརྟེན་ནས་དམངས་སེམས་ཀྱི་ཞིང་ས་གཤིན་པོ་བརླན་པར་བྱས་པ་དེ་མཛེས་མཐུན་སྟོད་ཡུལ་གྲོང་ཚོའི་འཕེལ་རྒྱས་ཀྱི་གཞི་མདངས་མངོན་གསལ་དོད་ཤོས་སུ་གྱུར་ཡོད།