ས་མཐོའི་རྫོང་ཁོངས་ཀྱི་སྨན་བཅོས་ཤེས་ལྡན་པའི་དཀའ་གནད་ལ་དམིགས་ནས། རྫ་ཡུལ་རྫོང་མི་དམངས་སྨན་ཁང་གིས་ཏང་འཛུགས་སྐྱོང་དང་ཤེས་ལྡན་པ་གསོ་སྐྱོང་མཉམ་འདྲེས་གཏིང་ཟབ་བྱེད་པར་སྐུལ་འདེད་གཏོང་བ་དང་། བོད་སྐྱོར་ཐོན་ཁུངས་གནད་སྨིན་སྦྲེལ་མཐུད་བྱས་ནས་ས་གནས་དེ་གའི་སྨན་བཅོས་ཤེས་ལྡན་པ་ཕྱོགས་ཡོངས་ནས་སྐྱེད་སྲིང་བྱས་ཡོད།

ལག་རྩལ་ཡོད་པ་ཙམ་གྱིས་མི་འགྲིག་པར་ཆབ་སྲིད་ཐད་ཉམས་སད་ཐེག་ཐུབ་པ་ཞིག་བྱུང་ན། གཞི་ནས་བརྟན་བགྲོད་རྒྱང་འཁྱོལ་ཡོང་ཐུབ། རྫ་ཡུལ་རྫོང་མི་དམངས་སྨན་ཁང་གིས་ཏང་ཨུད་ཀྱིས་སློབ་སྦྱོང་ལ་སྣེ་ཁྲིད་པ་དང་། ཀྲི་པུའུ་ཡིས་སློབ་སྦྱོང་ལ་ཞིབ་འཇུག་བྱེད་པ། ཏང་ཡོན་གྱིས་སློབ་སྦྱོང་ལག་ལེན་བསྟར་བ་བཅས་ཟུང་དུ་འབྲེལ་བའི་སློབ་སྦྱོང་བྱེད་སྟངས་གསར་གཏོད་བྱེད་པ་དང་། སྨན་དོན་མི་སྣའི་ཆབ་སྲིད་ཀྱི་བྱང་ཚད་ལ་དེ་བས་མཐོང་ཆེན་བྱས་ཏེ“མཐའ་མཚམས་སྨན་བཅོས་ཀྱི་ཏང་གི་སློབ་ཚན་ཐུང་ངུ”དང“ཐོག་མའི་བསམ་འདུན་གྱི་གཏམ་རྒྱུད་མཉམ་སྤྱོད་འདུ་ཚོགས”སོགས་མང་ཚོགས་དང་འབྲེལ་འདྲིས་དམ་ཟབ་ཡོད་པའི་བྱེད་སྒོ་འདི་རིགས་རྟག་ཏུ་སྤེལ་གྱི་ཡོད་ཅིང་། རིམ་རྩིས་བརྒྱབ་ན་ཆེད་དོན་སློབ་སྦྱོང་ཐེངས་20ལྷག་ཙམ་དང་ཆེད་དོན་ཏང་གི་སློབ་ཚན་ཐེངས་10ལྷག་ཙམ་སྒྲིག་འཛུགས་བྱས་ནས་སྨན་དོན་མི་སྣས་སློབ་སྦྱོང་བྱེད་རིང་ཕུགས་བསམ་དང་དད་སེམས་བརྟན་དུ་གཏོང་བ་དང་། མི་དམངས་ལ་ཞབས་འདེགས་ཞུ་བའི་ཐོག་མའི་བསམ་འདུན་རྒྱུན་གཏན་སྨན་བཅོས་ཀྱི་ལྷུ་ཚིགས་ཚང་མར་མཉམ་འདྲེས་བྱས་ཏེ། ལག་རྩལ་ཤེས་ལ་ཐེག་པ་ཁུར་ལེན་ཡང་ཐུབ་པ་དང་དངོས་སྒྲུབ་ལ་བརྟེན་ནས་མཐའ་མཚམས་མང་ཚོགས་ཀྱི་ཚེ་སྲོག་བདེ་ཐང་སྲུང་སྐྱོང་བྱས་ཡོད།

ལས་སྒོའི་ཐད། རྫ་ཡུལ་རྫོང་མི་དམངས་སྨན་ཁང་གིས་ས་གནས་དེ་གའི་སྨན་དོན་མི་སྣ་ཕྱིར་སློབ་སྦྱོང་བྱེད་པར་མངགས་པ་དང་། སྔ་རྗེས་སུ་མི་25ལྗོངས་ཕྱིར་ཟབ་སྦྱོང་བྱེད་པར་བཏང་ཡོད། དེ་དང་ཆབས་ཅིག “གདན་ཞུ”བྱས་པའི་རིགས་གཅིག་མཁས་ཅན་གྱིས“བརྒྱུད་རོགས་ཁྲིད་གསུམ”བྱས་པ་དང་བོད་སྐྱོར་རིགས་གཅིག་མཁས་ཅན་93གྱིས་གཅིག་གཏད་གཅིག་གི་ཐོག་ནས་སློབ་རོགས་བྱས་ཏེ་རྫོང་དང་ཤང་གི་སྨན་དོན་རྐང་འཛིན་པ་50ལྷག་ཙམ་གསོ་སྐྱོང་བྱས་ཡོད། གཞན་ཡང་རིག་ནུས་སྨན་བཅོས་ལ་བརྟེན་ནས་སྨན་ཁང་གིས“རྫ་ཡུལ་དང་ཧྲེན་ཀྲེན”གྱི་རྒྱང་ཁྲིད་ནད་བརྟག་ལས་སྟེགས་8བཏོད་ནས་མི་ཐེངས་ཁྲི་4.7ལ་རྒྱང་ཁྲིད་ནད་བརྟག་སྨན་བཅོས་བྱས་པས། ས་གནས་དེ་གའི་མང་ཚོགས་ཕྱིར་སྐྱོད་མི་དགོས་པར་ཀ་པ་རིམ་པ་གསུམ་པའི་སྨན་ཁང་གི་ནད་བརྟག་སྨན་བཅོས་ཞབས་ཞུ་ལོངས་སྤྱོད་ཐུབ་པ་མ་ཟད། ས་གནས་དེ་གའི་སྨན་དོན་མི་སྣས་ཀྱང་དྲ་ཐོག་ནས་ཀ་པ་རིམ་པ་གསུམ་པའི་སྨན་ཁང་གི་རིགས་གཅིག་མཁས་ཅན་དང་མཉམ་དུ་ནད་བརྟག་སྨན་བཅོས་ཀྱི་བསམ་ཕྱོགས་དང་བཀོལ་སྤྱོད་ཀྱི་ཚད་གཞི་སློབ་སྦྱོང་ཐུབ་ཡོད།

ལག་ལེན་ནི་སྨན་དོན་མི་སྣའི་སྦྱོང་བརྡར་བྱེད་ས་ཡག་ཤོས་རེད་ལ། མང་ཚོགས་ལ་ཞབས་འདེགས་ཞུ་བའི་བརྒྱུད་རིམ་ནི་ཤེས་ལྡན་པར་སྦྱོང་བརྡར་བྱེད་པའི་བརྒྱུད་རིམ་ཞིག་ཀྱང་རེད། རྫ་ཡུལ་རྫོང་མི་དམངས་སྨན་ཁང་གིས་སྨན་དོན་ཏང་ཡོན་གདོང་ལེན་རུ་ཁག་བཙུགས་ནས་རྟག་ཏུ་གྲོང་གསེབ་དང་། སློབ་གྲྭ དཔུང་སྡེ་བཅས་སུ་བསྐྱོད་དེ་དམངས་ཡོངས་ཀྱི་གཟུགས་པོར་བརྟག་དཔྱད་དང་། བྱིས་པའི་ལྷན་སྐྱེས་སྙིང་ནད་གྲལ་བཤེར། “དམག་སྒར་ནང་བདེ་ཐང་ཡོང་ཐབས་བྱེད་པ”སོགས་ཀྱི་བྱེད་སྒོ་སྤེལ་ཞིང་། སྔ་རྗེས་སུ་བྱེད་སྒོ་ཐེངས་110ལྷག་ཙམ་སྤེལ་བར་མང་ཚོགས་དང་། སློབ་མ། དཔོན་དམག་བཅས་མི་ཐེངས་ཁྲི་5ལྷག་ཙམ་ལ་ཁྱབ་ཡོད།

ཆབ་སྲིད་ཀྱི་བྱང་ཚད་མཐོ་རུ་དང་ལག་རྩལ་བྱང་ཆུབ་ཏུ་སོང་ཞིང་། ད་ཆ་རྫ་ཡུལ་རྫོང་མི་དམངས་སྨན་ཁང་ལ་རང་ས་རང་ཡུལ་དུ་རྩ་བ་ཚུགས་པའི“ནམ་ཡང་གནས་ཐུབ་པའི”སྨན་བཅོས་དཔུང་ཁག་ཅིག་ཡོད་ཅིང་། ཁོང་ཚོས་གངས་ལྗོངས་ས་མཐོར་གཞིས་ཚུགས་ནས་ཏང་དར་མཐའ་མཚམས་ཀྱི་འཐབ་ས་དང་པོར་ལྷབ་ལྷུབ་ཏུ་གཡོ་བ་དང་སྨན་པའི་བྱམས་སེམས་ལ་བརྟེན་ནས་ས་མཐོའི་མང་ཚོགས་ཀྱི་བདེ་ཐང་སྲུང་སྐྱོང་བྱེད་བཞིན་ཡོད།