“ཨ་ཀྲུང་དབར་ལག་གདང་སྦྲེལ་ནས་གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ཁ་གཏད་བཅག་ནས་གཉིས་ཕན་གཉིས་ཁེ་ཡོང་བར་བྱས་ཏེ། འཛམ་གླིང་གི་ཞི་བདེ་དང་འཕེལ་རྒྱས་ལ་གཏན་འཁེལ་རང་བཞིན་སྣོན་དགོས”ཞེས་འཛམ་གླིང་འབྲུ་རིགས་བྱ་དགའི་ཐེབས་རྩ་ལྷན་ཚོགས་ཀྱི་མཚན་འཛིན་ཀྲུའུ་ཞི་ཁེན་ཉི་སི·ཁུའེ་དབྱིན་གྱིས་ཉེ་ཆར་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས་དེ་ལྟར་བརྗོད།

ད་ལོ་ལོ་84ལ་སླེབས་པའི་ཁུའེ་དབྱིན་གྱིས་དུས་ཡུན་རིང་པོའི་ནང་ཨ་ཀྲུང་གི་མཛའ་མཐུན་བྱ་གཞག་ལ་གཞོལ་བཞིན་ཡོད། ཁུའེ་དབྱིན་གྱིས། ཨ་ཀྲུང་ཕྱོགས་གཉིས་པོར་རོགས་ཟླའི་འབྲེལ་བ་བསྐྱར་འཛུགས་བྱས་ནས་རྒྱལ་ཁབ་གཉིས་པོའི་འབྲེལ་བ་འཕེལ་རྒྱས་བརྟན་པོ་གཏོང་བའི་ཆ་རྐྱེན་ཡོངས་སུ་འཛོམས་ཡོད་པའི་ངོས་འཛིན་བྱེད་ཀྱི་ཡོད།

ཁུའེ་དབྱིན་གྱིས། ཨ་རི་དང་ཀྲུང་གོའི་གཙོ་བདག་པེ་ཅིང་དུ་ཞལ་འཛོམས་གནང་སྐབས་ཨ་ཀྲུང་གི་དགེ་མཚན་ལྡན་པའི་འཐབ་ཇུས་བརྟན་ལྷིང་གི་འབྲེལ་བ་འཛུགས་པའི་ངེས་གནས་གསར་པ་ཐུན་མོང་ཐོག་གཏན་འཁེལ་གནང་ནས། རྒྱལ་ཁབ་གཉིས་པོ་མཉམ་ལས་གཙོ་བོར་འཛིན་པ་དང་། འགྲན་རྩོད་རན་པོ། མི་མཐུན་པའི་ཆ་ཚོད་འཛིན་ཐུབ་པ། ཞི་བདེར་རེ་སྒུག་བྱེད་པ་བཅས་ཀྱི་ཕྱོགས་སུ་ལག་གདང་སྦྲེལ་ནས་འབད་བརྩོན་བྱ་རྒྱུ་ཁ་གསལ་བཟོས་ཏེ། རྒྱལ་ཁབ་གཉིས་པོའི་འབྲེལ་བ་སླར་ཡང་བརྟན་ལ་ཚོད་འཛིན་ཐུབ་པའི་ལམ་བུར་སླེབས་པར་སྐུལ་འདེད་གཏོང་ཆེད་འཐབ་ཇུས་ཀྱི་མཛུབ་ཁྲིད་བྱས་ཡོད། ཝ་ཧྲེང་ཐོན་གྱི་ཞལ་འཛོམས་ཀྱིས་པེ་ཅིང་གི་ཞལ་འཛོམས་ཀྱི་དགེ་མཚན་ལྡན་པའི་ཕན་ནུས་ཀྱི་རྒྱུན་བསྐྱངས་ནས་ཨ་ཀྲུང་འབྲེལ་བའི་ངེས་གནས་གསར་པའི་ནང་དོན་རྒྱ་སྐྱེད་བཏང་ཡོད། “ཨ་རི་ཕྱོགས་ཀྱི་སྲིད་དོན་དང་ཚོང་དོན་ལས་རིགས་ཀྱི་དཔྱོད་ལྡན་པས། ཐེངས་མང་བ་དང་ཤུགས་ཆེ་བའི་སྲིད་ཇུས་ལེགས་སྒྲིག་དང་སྒོ་ཁྲལ་འཐབ་འགྲན་སོགས་ཐལ་དྲགས་པའི་བྱེད་སྟངས་ཀྱིས་ཕྱོགས་གཉིས་པོའི་ཐུན་མོང་གི་ཁེ་ཕན་ལ་གནོད་འཚེ་ཚབས་ཆེན་གཏོང་བའི་ངོས་འཛིན་ཐུབ་ཡོད། ཨ་ཀྲུང་རྒྱལ་ཁབ་གཉིས་པོའི་འབྲེལ་བ་བརྟན་བགྲོད་རྒྱང་འཁྱོལ་ཡོང་བར་རེ་སྒུག་བྱེད་ཀྱི་ཡོད”ཅེས་བརྗོད། ཁུའེ་དབྱིན་གྱིས། ཕྱོགས་གཉིས་པོས་རྒྱུན་རྣམ་ཅན་གྱི་གླེང་མོལ་ལམ་སྲོལ་ལ་བརྟེན་ནས་མི་ཐབས་རིག་ནུས་དང་། ཚན་རྩལ་གསར་ཤོས། ཤེས་ལྡན་པ་གསོ་སྐྱོང་སོགས་ཀྱི་ཁྱབ་ཁོངས་སུ་བདེ་འཇགས་དངོས་སྒྲུབ་ཀྱི་མཉམ་ལས་ཐབས་ལམ་འཚོལ་ཞིབ་བྱས་ཏེ། དགེ་མཚན་ལྡན་པའི་མཉམ་འགུལ་ལ་བརྟེན་ནས་མི་མཐུན་པའི་ཆ་དོ་དམ་ཚོད་འཛིན་དང་ཕན་ཚུན་ཡིད་ཆེས་ཟབ་ཏུ་གཏོང་དགོས་པའི་གྲོས་འགོ་བཏོན་ཡོད།

ཁུའེ་དབྱིན་གྱིས། ཞིང་ལས་ཁྱབ་ཁོངས་ཀྱི་མཉམ་ལས་ནི་ཨ་ཀྲུང་གི་དགེ་མཚན་ལྡན་པའི་འཐབ་ཇུས་བརྟན་ལྷིང་གི་འབྲེལ་བ་འཛུགས་པའི་འཇུག་སྒོ་གལ་ཆེན་གྱི་གྲས་ཤིག་ཡིན་ཞིང་། འབྲུ་རིགས་བདེ་འཇགས་ཀྱི་གནད་དོན་ནི་མིའི་རིགས་ལ་འཕྲད་པའི་འགྲན་སློང་ཆེན་པོ་ཞིག་ཡིན་པ་དང་། ཞི་བདེ་བརྟན་ལྷིང་ནི་འགྲན་སློང་འདིར་ཁ་གཏད་གཅོག་པའི་རྩ་བའི་སྔོན་འགྲོའི་ཆ་རྐྱེན་ཞིག་ཡིན་པའི་ངོས་འཛིན་བྱེད་ཀྱི་ཡོད། ཁོང་གིས། རྒྱལ་ཁབ་ཆེན་པོའི་འབྲེལ་བ་བརྟན་པོ་ཡོད་པ་དེས་གོ་ལ་ཧྲིལ་པོའི་འཕེལ་རྒྱས་ལ་ཕན་ཡོད་ཀྱི་ཁོར་ཡུག་གཏོད་ཐུབ། རྒྱལ་ཁབ་ཆེན་པོ་གལ་ཆེན་གཉིས་ཡིན་པའི་ཨ་རི་དང་ཀྲུང་གོས་བདེ་འཇགས་ཀྱི་འགྲན་སློང་ལ་དེ་བས་མཉམ་དུ་ཁ་གཏད་གཅོག་པ་དང་། ལག་གདང་སྦྲེལ་ནས་གོ་ལ་ཧྲིལ་པོའི་ཞི་བདེ་བརྟན་ལྷིང་ལ་སྲུང་སྐྱོང་བྱེད་དགོས་ཞེས་བརྗོད།

དམངས་སེམས་གཅིག་མཐུན་གྱིས་ཀྲུང་ཨའི་འབྲེལ་བ་འཕེལ་རྒྱས་ལ་སྲ་ཞིང་བརྟན་པའི་སྟོབས་ཤུགས་དང་ཡུན་རིང་གི་སྒུལ་ནུས་མཁོ་འདོན་བྱས་ཡོད། ཁུའེ་དབྱིན་གྱིས། རྒྱལ་ཁབ་གཉིས་པོས་རིམ་པ་མང་བའི་ཕྱོགས་གཉིས་སྤེལ་རེས་ཕྱོགས་ཡོངས་ནས་རྒྱ་སྐྱེད་བཏང་སྟེ། བཟོ་ཚོང་ལས་རིགས་དང་། སློབ་གསོའི་ལས་རིགས། དེ་བཞིན་ས་གནས་ཀྱི་ཞིང་ཆེན་དང་གྲོང་ཁྱེར་གྱི་དཔོན་རིགས་སོགས་ལས་རིགས་ཁག་གི་མི་སྣས་རྒྱུན་རྣམ་ཅན་གྱི་འཚམས་འདྲི་བྱེད་རེས་ལ་སྐུལ་འདེད་གཏོང་དགོས་པ་མ་ཟད། ལུས་རྩལ་དང་། རིག་རྩལ། སྨྱན་སྦྱོར་སོགས་མི་ཆོས་རིག་གནས་ཁྱབ་ཁོངས་ཀྱི་མཉམ་ལས་བྱེད་ཟབ་ཏུ་དུས་གཅིག་ཏུ་གཏོང་དགོས། ངོ་ཐུག་གདོང་འཕྲད་ཀྱིས་སྤེལ་རེས་བྱས་ན་ངེས་ཤེས་ཀྱི་འགལ་ཟླ་དང་ཕྱོགས་ཞེན་དང་གོ་ནོར་བསལ་ནས་རྒྱལ་ཁབ་གཉིས་པོའི་དམངས་ཚོགས་ཀྱིས་ཕན་ཚུན་གཅིག་མཐུན་གྱི་རིན་ཐང་གི་རེ་ཞུ་དང་འཕེལ་རྒྱས་ཀྱི་རེ་འདོད་མཐོང་བར་ཕན་ཐོགས་ཡོད་ཅེས་བརྗོད།

ཁུའེ་དབྱིན་གྱིས། གཞོན་ནུ་ལོ་ཆུང་ནི་ཨ་ཀྲུང་འབྲེལ་བའི་འབྱུང་འགྱུར་དང་རེ་བ་ཡིན་ཞིང་། གཞོན་ནུ་ལོ་ཆུང་དབར་སྤེལ་རེས་བྱས་ཚེ་ཇི་མ་ཇི་བཞིན་དང་ཕྱོགས་ཡོངས་ནས་ཕར་ཕྱོགས་རྒྱལ་ཁབ་ཤེས་རྟོགས་ཐུབ་སྟེ་ཨ་ཀྲུང་གི་མཛའ་གྲོགས་རྒྱུན་འཛིན་དང་། སྲུང་སྐྱོང་། འཕེལ་རྒྱས་བཅས་གཏོང་ཐུབ། ཨ་ཀྲུང་གིས་ཁྱབ་ཁོངས་ཁག་གི་སྤེལ་རེས་དང་དཔྱད་གཞིར་འཛིན་ཏེ་རྒྱུན་མཐུད་བྱེད་ཟབ་ཏུ་བཏང་ནས་མཉམ་ལས་བྱེད་པ་ལས་འགྲན་རྒོལ་མི་བྱེད་པ་མཐའ་འཁྱོངས་བྱས་ཚེ། གཞི་ནས་རྒྱལ་ཁབ་གཉིས་པོའི་མི་དམངས་ཀྱི་བདེ་རྩ་རྒྱུན་ཆད་མེད་པར་ཆེ་རུ་གཏོང་ཐུབ་པ་དང་། འཛམ་གླིང་ཞི་བདེ་དང་། བརྟན་ལྷིང་། དར་རྒྱས་བཅས་ལ་སྐུལ་འདེད་གཏོང་ཐུབ་ཅེས་བརྗོད་པ་རེད།