འདི་ནི་ཀྲུང་གོའི་ཁེ་ལས་ཀྱིས་སྐྲུན་འགན་འཁུར་བའི་མོ་རི་ཐིའུ་སིའི་སྤྱི་ཚོགས་འགན་ལེན་སྡོད་ཁང་ཡིན་པ།

མོ་རི་ཐིའུ་སི་ཡི་མོ་ཁ་ཆུས་སོགས་ཆུས་ཆེན་3གྱི་གྲོང་ཁྱེར་7དུ་པེ་ཅིང་འཛུགས་སྐྲུན་བཟོ་ལས་ཚོགས་པ་འགན་འཁྲི་ཚད་ཡོད་ཀུང་སིས་སྐྲུན་འགན་འཁུར་བའི་སྤྱི་ཚོགས་འགན་ལེན་སྡོད་ཁང་1200ཚང་མ་ན་ནིང་ལོ་མཇུག་ཏུ་ལས་མཇུག་འགྲིལ་ནས་རྩིས་སྤྲད་པ་དེ་ནི་མོ་རི་ཐིའུ་སིའི་སྤྱི་ཚོགས་འགན་ལེན་སྡོད་ཁང་8000གི་འཆར་གཞིའི་ནང་གི་བསྐྲུན་ཟིན་ནས་རྩིས་སྤྲད་པའི་རྣམ་གྲངས་ཆེ་ཤོས་ཐོག་མ་དེ་རེད།

མོ་རི་ཐིའུ་སི་ལོ་འཁོར་མོར་གནམ་གཤིས་དྲོ་ལ་བཞའ་ཚན་ཆེན་པོ་ཡོད། རྣམ་གྲངས་དེས་འཛུགས་སྐྲུན་གྱི་ཁ་ཕྱོགས་དང་། སྒོ་དང་སྒེའུ་ཁུང་གི་བཀོད་པ། ཁང་ངོས་ཇུས་འགོད་བཅས་ལེགས་སུ་བཏང་བ་བརྒྱུད་རང་བྱུང་རླུང་བུ་སྤྱད་དེ་དྲོད་ཚད་དམའ་རུ་དང་ནུས་རྒྱུ་ཟད་གྲོན་ཆུང་དུ་གཏོང་གང་ཐུབ་བྱས་ཡོད། ཁང་པའི་ཐོག་ཁར་བསྒར་བའི་ཉི་ནུས་མ་ལག་གིས་མོ་རི་ཐིའུ་སིའི་ཕུན་སུམ་ཚོགས་པའི་ཉི་འོད་ཐོན་ཁུངས་གང་ལེགས་སྤྱད་དེ་ཡོང་འབབ་དམའ་བའི་ཁྱིམ་ཚང་གི་འགྲོ་སོང་གྲོན་ཆུང་ཐུབ་ཀྱི་ཡོད།

ཝ་ལའེ་ཁ་ཐེ་གྲོང་ཁྱེར་དང་བར་ཐག་རིང་པོ་མེད་པའི་ཧོ་ཡ་ཐ་གྲོང་ཁྱེར་དུ་ལོ་57ལ་སླེབས་པའི་མ་ལི·ཤེར་ཝུའེ་ཐེ་ལའང་རང་ཉིད་ལ་དབང་བའི་ཁང་པ་གསར་པ་ཞིག་རག་ཡོད། ཁོང་ཉིན་ལྟར་ས་སྲོས་སུ་སྒོ་འགྲམ་གྱི་མེ་ཏོག་ལྡུམ་རའི་ནང་བསྡད་དེ་ཁྱིམ་མཚེས་འཆམ་འཆམ་དུ་འགྲོ་བ་དང་ཕྲུ་གུ་རྩེད་མོ་རྩེ་བར་བལྟས་ནས་དེང་རབས་སྡེ་ཁུལ་གྱི་སྟབས་བདེ་དང་བག་ཕེབས་ཀྱི་འཚོ་བར་རོལ་བཞིན་མཆིས།

པེ་ཅིང་འཛུགས་སྐྲུན་བཟོ་ལས་མོ་རི་ཐིའུ་སི་ཡན་ལག་ཀུང་སིའི་ཅིང་ལི་སུན་ཅན་པིང་གིས་ངོ་སྤྲོད་བྱས་པར་གཞིགས་ན། ཆར་ཞོད་ཆེ་བའི་རྐྱེན་གྱིས་ཐོན་པའི་ཞོད་སྐྱོན་གྱི་མངོན་མེད་རྐྱེན་ངན་ལ་ཁ་གཏད་གཅོག་ཆེད། འགན་ལེན་ཁང་པའི་སྡེ་ཁུལ་ཚང་མར་ད་དུང་དམིགས་སུ་བཀར་ནས་ཆུ་གསོག་ཡུར་བུ་བསྐྲུན་ཏེ་སྡེ་ཁུལ་ཆུས་མི་ཁེངས་པ་དང་ཆབས་ཅིག ཆུ་ལམ་གྱི་འབྲུབ་ཆུ་གཤོང་བའི་གནོན་ཤུགས་ཆུང་དུ་བཏང་ཡོད། རྣམ་གྲངས་ཀྱི་ས་ཆ་ཁ་ཐོར་དང་། ཆར་དུས་རིང་བ། མཁོ་སྤྲོད་འཁོར་འབྲེལ་མི་འདང་བ་སོགས་ཀྱི་འགྲན་སློང་མང་པོའི་མདུན་དུ། རྣམ་གྲངས་ཚོགས་པས་ལག་རྩལ་གྱི་མ་དཔེ་དང་སྤུས་ཚད་ཀྱི་མ་དཔེ་ཟུང་དུ་འབྲེལ་བའི་མ་དཔེ་གཉིས་ལྡན་གྱི་མ་ལག་གསར་གཏོད་བྱས་ཏེ། སྔོན་ལ་མ་དཔེའི་ཐོག་ཁང་བསྐྲུན་ནས་ཇུས་འགོད་དང་ཨར་ལས་བཟོ་རྩལ་ལ་ཞིབ་དཔྱད་བྱེད་པ་དང་དེ་རྗེས་ཚད་ལྡན་ཅན་གྱི་དོ་དམ་བརྒྱུད་སྡོད་ཁང་གི་སྤུས་ཚད་ཚང་མ་གཅིག་གྱུར་ཡོང་བར་འགན་ལེན་བྱས་ཡོད། དེ་དང་ཆབས་ཅིག ཚོགས་པས་ས་གནས་དེ་གར་ཨར་འདམ་ས་ཚིགས་དང་སོ་ཕག་བཟོ་གྲྭ་བཙུགས་ནས་ཨར་ལས་རྒྱུ་ཆ་གཙོ་བོ་རང་བརྟེན་མཁོ་སྤྲོད་ཐུབ་པར་བྱས་པ་དང་འབྲེལ། ཀྲུང་གོའི་བྱང་ཆུབ་པའི་ཐོན་ལས་འཁོར་འབྲེལ་ལ་བརྟེན་ནས་སྤུས་ལེགས་ཨར་ལས་རྒྱུ་ཆ་ནང་འདྲེན་བྱས་ཏེ་ལས་གྲྭའི་སྤུས་ཚད་དང་འཛུཌ་སྐྲུན་གྱི་འཕེལ་རིམ་ལ་འགན་ལེན་ནུས་ལྡན་བྱས་ཡོད།

“དེ་ནི་འགན་ལེན་སྡོད་ཁང་གི་རྣམ་གྲངས་ཡིན་པ་མ་ཟད། ་རབས་ཅན་གྱི་སྡེ་ཁུལ་འཛུགས་སྐྲུན་གྱི་དཔེ་མཚོན་ཞིག་དེ་བས་ཀྱང་རེད”རྣམ་གྲངས་ཀྱི་དོ་བདག་གི་འཐུས་མི་ཏུའུ་ཝ་ཧྲེན·ལཱ་མུའུ་ཏེས། སྡོད་ཁང་གི་སྤུས་ཚད་དང་། སྡེ་ཁུལ་གྱི་ཁོར་ཡུག སྒྲིག་བཀོད་ཆ་ཚང་བཅས་གང་ཞིག་ཡིན་རུང་ཀྲུང་གོའི་ཁེ་ལས་ཀྱིས་བསྐྲུན་པའི་འགན་ལེན་སྡོད་ཁང་རྣམ་གྲངས་ཀྱིས་ས་གནས་འདི་གའི་སྤྱི་ཚོགས་ཀྱི་སྡོད་ཁང་འཛུགས་སྐྲུན་ཆུ་ཚད་གསར་པ་ཞིག་ཏུ་སླེབས་པར་བྱས་ཡོད་ཅེས་བཤད།

མོ་རི་ཐིའུ་སིའི་ཙུང་ལི་ཟུར་པ་ཅ་ཀེ་ན་ཐེས་རྣམ་གྲངས་རྩིས་སྤྲོད་མཛད་སྒོར་རྣམ་གྲངས་དེ་ལས་ཡོང་འབབ་དམའ་བའི་ཁྱིམ་ཚང་གི་སྡོད་ཁང་ཆ་རྐྱེན་ལེགས་སུ་ཕྱིན་པ་མ་ཟད། དེང་རབས་སྤྱི་ཚོགས་ཀྱི་སྡོད་ཁང་འཛུགས་སྐྲུན་གྱི་འཕེལ་རྒྱས་ཁ་ཕྱོགས་དེ་བས་མངོན་པས། མོ་ཀྲུང་གི་དངོས་སྒྲུབ་མཉམ་ལས་ཀྱི་གྲུབ་འབྲས་གལ་ཆེན་ཞིག་རེད་ཅེས་བརྗོད་པ་རེད།