ཟླ་9ཚེས་22ཉིན། རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་གིས“‘ལོ་ལྔ་ཚན་བཅོ་ལྔ་པའི’འགོ་འཛུགས”ཀྱི་བརྗོད་དོན་གཙོ་བོའི་གསར་འགྱུར་ཡོངས་བསྒྲགས་ཚོགས་འདུ་འཚོགས་ནས་རང་བྱུང་ཐོན་ཁུངས་བདེ་འཇགས་དང་ནུས་ཆེ་དང་རྒྱུན་མཐུད་ངང་བེད་སྤྱོད་བྱ་རྒྱུར་སྐུལ་འདེད་གཏོང་བའི་འབྲེལ་ཡོད་གནས་ཚུལ་ངོ་སྤྲོད་བྱས་པ་རེད།

གཙོ་གནད་རྣམ་གྲངས་2800ལྷག་ཙམ་ལ་ས་ཆའི་བར་མཐོངས་སྔོན་ཉར་བྱས་ནས“དྲ་བ་དྲུག”སོགས་འཛུགས་སྐྲུན་གལ་ཆེན་ལ་ཞབས་འདེགས་ཞུ་བ།

“ང་ཚོས་བར་མཐོངས་དང་རྒྱུ་རྐྱེན་གཙོ་བོར་ནུས་ཆེའི་བཀོད་སྒྲིག་བྱས་ནས་སྤུས་ཚད་མཐོ་བའི་འཕེལ་རྒྱས་ལ་ཞབས་འདེགས་ཞུ་རྒྱུ་ཡིན”ཞེས་རང་བྱུང་ཐོན་ཁུངས་པུའི་ཏང་ཙུའི་ཧྲུའུ་ཅི་དང་རྒྱལ་ཁབ་རང་བྱུང་ཐོན་ཁུངས་ཀྱི་སྤྱི་ཁྱབ་ལྟ་ཞིབ་པ་ལིའུ་གོ་ཧུང་གིས་ངོ་སྤྲོད་བྱས་ཤིང་། ཁོང་གིས། རྒྱལ་ཁབ་ས་ཆའི་བར་མཐོངས་མཉམ་སྐྲུན་མཉམ་སྤྱོད་ཀྱི་འཆར་འགོད“དཔེ་རིས་གཅིག”མཐའ་འཁྱོངས་བྱས་ཏེ། གཙོ་གནད་རྣམ་གྲངས་2800ལྷག་ཙམ་ལ་ས་ཆའི་བར་མཐོངས་སྔོན་ཉར་བྱས་ནས“དྲ་བ་དྲུག”སོགས་ཀྱི་འཛུགས་སྐྲུན་གལ་ཆེན་ལ་ཞབས་འདེགས་ཞུ་གི་ཡོད། གཏེར་ཁ་དང་། རྒྱ་མཚོ། ནགས་ཚལ་དང་རྩྭ་ཐང་། ས་ཁམས་ཀྱི་ཆ་འཕྲིན་སོགས་ཐོན་ཁུངས་ཀྱི་ཐོན་ལས་དབྱར་མཚོ་རྒྱས་པ་ལྟར་འཕེལ་རྒྱས་འགྲོ་རྒྱུར་སྐུལ་འདེད་བཏང་སྟེ་ཟླ་དང་པོ་ནས་བརྒྱད་པའི་བར་རྒྱལ་ཡོངས་ཀྱི་གཏེར་འཚོལ་དབང་ཆ་ནང་བཤུག་བཏང་བའི་ཚོང་འགྲིག་དངུལ་འབོར་དུས་མཚུངས་ལས་133.5%འཕར་བ་དང་། ལོ་སྟོད་དུ་སྣུམ་རླངས་མིན་པའི་གཏེར་ཁ་རྩད་ཞིབ་ལ་མ་དངུལ་གཏོང་ཚད་དུས་མཚུངས་ལས་8.1%འཕར་ཡོད། ཟླ་དང་པོ་ནས་བརྒྱད་པའི་བར་མཚོ་སྐྱོད་གྲུ་གཟིངས་བཟོ་བའི་མངགས་ཐོ་གསར་པ་དང་ལེན་བྱེད་ཚད་དང་རྒྱ་མཚོའི་འདུ་འགོད་སྒྲིག་ཆས་ཀྱི་མངགས་ཐོ་གསར་པ་དང་ལེན་བྱས་པའི་དངུལ་འབོར་དུས་མཚུངས་ལས་83.7%དང་160.8%སོ་སོར་འཕར་ཡོད་ཅེས་བརྗོད་པ་རེད།

རང་བྱུང་ཐོན་ཁུངས་པུའི་པུའུ་ཀྲང་གཞོན་པ་ཀྲོང་ཧྲའོ་ཆིན་གྱིས། “‘ལོ་ལྔ་ཚན་བཅོ་ལྔ་པའི’རིང་། གསར་འཕར་གྱི་འཛུགས་སྐྲུན་ས་ཆ་སོགས་ཐོན་ཁུངས་ཀྱི་གཞི་ཁྱོན་འགན་ལེན་འདང་ངེས་ཡོད་པ་དང་། འགག་རྩ་ནི་ཐོན་ཁུངས་དེ་དག་བཀོད་སྒྲིག་ཡག་པོ་དང་བེད་སྤྱོད་ཡག་པོ་ཇི་ལྟར་བྱ་རྒྱུ་དེ་རེད”ཅེས་ངོ་སྤྲོད་བྱས་ཤིང་། ཁོང་གིས། ཕྱོགས་གཉིས་ནས་བར་མཐོངས་མཐུན་སྦྱོར་ལ་སྐུལ་འདེད་གཏོང་རྒྱུ་སྟེ། ཐོག་མར་རྒྱལ་ཁབ་ཀྱི་འཐབ་ཇུས་བར་མཐོངས་མཐུན་སྦྱོར་ལ་ཤུགས་སྣོན་རྒྱག་པ་དང་། བྱེད་ནུས་ཁུལ་གཙོ་བོ་ལེགས་གཏོང་གི་ལག་བསྟར་ཇུས་གཞི་བཟོས་ནས་ཇུས་གཞི་དེ་བརྒྱུད་འཐབ་ཇུས་བར་མཐོངས་གལ་ཆེན་གྱི་བརྩེགས་སྣོན་ཕན་འབྲས་ཆེ་རུ་གཏོང་བ་དང་། ཆེད་དོན་འཆར་འགོད་ཁག་ལ་རྒྱལ་ཁབ་ས་ཆའི་བར་མཐོངས་ཀྱིས་མཛུབ་ཁྲིད་དང་ཚོད་འཛིན་བྱེད་ཤུགས་ཆེ་རུ་གཏོང་བ་དང་། དེ་དང་ཆབས་ཅིག “འཆར་འགོད་དང་བསྟུན་ནས་རྣམ་གྲངས་སྒྲུབ་པ་དང་། རྣམ་གྲངས་དང་བསྟུན་ནས་རྒྱུ་རྐྱེན་གཙོ་བོ་གཉེར་བའི”བླང་བྱ་གཞིར་བཟུང་། བར་མཐོངས་ཆོག་འཐུས་ཀྱི་ལམ་སྲོལ་འཐུས་སྒོ་ཚང་དུ་བཏང་ནས་རྒྱལ་ཁབ་ས་ཆའི་བར་མཐོངས་འཆར་འགོད“དཔེ་རིས་གཅིག”ཏུ་བཅུག་པའི་གཙོ་གནད་རྣམ་གྲངས་ལ“ཤར་གཏོང་བགྲོད་ལམ”བཏོད་དེ། ཞིབ་མཆན་སྟབས་བདེ་རུ་བཏང་ནས་སྔ་ཙམ་ལས་འགོ་འཛུགས་པ་དང་སྔ་ཙམ་དོན་འཁྱོལ་བྱེད་པར་སྐུལ་འདེད་གཏོང་གི་ཡིན་ཞེས་བརྗོད་པ་རེད།

2030ལོར་སླེབས་སྐབས་རྒྱལ་ཡོངས་སུ་ནགས་ཚལ་ཁྱབ་ཚད་25.8%ཟིན་རྒྱུའི་བརྩོན་ལེན་བྱེད་པ།

རྒྱལ་ཁབ་ནགས་ལས་དང་རྩྭ་ཐང་ཅུས་ཀྱིས་ནགས་ལས་དང་རྩྭ་ཐང་སྲུང་སྐྱོང་བེད་སྤྱོད་ཀྱི“ལོ་ལྔ་ཚན་བཅོ་ལྔ་པའི”འཆར་འགོད་བཟོས་ནས་2030ལོར་སླེབས་སྐབས་རྒྱལ་ཡོངས་སུ་ནགས་ཚལ་ཁྱབ་ཚད་25.8%ཟིན་པ་དང་། ནགས་ཚལ་གསོག་ཚད་སྨི་རྒྱ་དཔངས་གྲུ་བཞི་དུང་ཕྱུར་224ཟིན་པ། རྩྭ་ཐང་གི་ཕྱོགས་བསྡུས་སྔོ་ཁེབས་ཁྱབ་ཚད་51%ཟིན་པ། རང་བྱུང་སྲུང་སྐྱོང་ས་ཆའི་རྒྱ་ཁྱོན་གྱིས་སྐམ་སའི་རྒྱ་ཁྱོན་ལས་བཟུང་བའི་བསྡུར་ཚད་18%དུ་བརྟན་པོར་གནས་པ། ནགས་ཚལ་དང་རྩྭ་ཐང་ཐོན་ལས་ཀྱི་སྤྱིའི་ཐོན་རྫས་རིན་ཐང་སྒོར་དུང་ཕྱུར་ཁྲི་14ཟིན་པ་བཅས་ཀྱི་བརྩོན་ལེན་བྱ་རྒྱུ་རེད། ནགས་ཚལ་དང་རྩྭ་ཐང་ཐོན་ལས་ཀྱི་ལས་ཞུགས་འབབ་འཕར་གྱི་བར་མཐོངས་རྒྱ་སྐྱེད་ཧུར་ཐག་གཏོང་བ་དང་། “ལྷོ་ཕྱོགས་སུ་རྒྱལ་ཁབ་ཀྱི་གསོག་འཇོག་ནགས་ཚལ་ཁག་གཅིག་འཛུགས་སྐྲུན་དང་བྱང་ཕྱོགས་སུ་དེང་རབས་རྩྭ་ར་ཁག་གཅིག་འཛུགས་སྐྲུན་བྱས་ཏེ། རང་རྒྱལ་གྱི་སྤུས་ལེགས་ཤིང་རིགས་དང་སྤུས་ལེགས་ཕྱུགས་རྩྭའི་མཁོ་སྤྲོད་ནུས་པ་ཆེ་རུ་གཏོང་བ་དང་། ནགས་ཚལ་དང་རྩྭ་ཐང་ཐོན་ལས་ཀྱི་སྐྱེ་ཁམས་དམངས་ཕན་ནུས་པ་ཧུར་ཐག་བཏོན་ཏེ་སྐྱེ་ཁམས་བདག་སྐྱོང་གི་སྤྱི་ཕན་རང་བཞིན་གྱི་ལས་གནས་ཡག་པོ་སྤྱོད་ཀྱི་ཡིན”ཞེས་རྒྱལ་ཁབ་ནཌ་ལས་དང་རྩྭ་ཐང་ཅུས(རྒྱལ་ཁབ་སྤྱི་གླིང་དོ་དམ་ཅུས)ཀྱི་ཅུས་ཀྲང་གཞོན་པ་ཡན་ཀྲེན་གྱིས་བརྗོད།

མ་ལག་རང་བཞིན་གྱི་སྐྱེ་ཁམས་སྲུང་སྐྱོང་དང་སླར་གསོར་བརྟེན་ནས་རང་བྱུང་ཐོན་ཁུངས་རྒྱུན་མཐུད་བེད་སྤྱོད་ལ་འདེགས་སྐྱོར་བྱས་ཤིང་། རང་བྱུང་ཐོན་ཁུངས་པུའུ་ཡིས་སྐྱེ་ཁམས་མ་ལག་གི་སྤུས་ཚད་ལེགས་སུ་གཏོང་བར་ཧུར་ཐག་གཞོལ་བ་དང་། རི་ཆུ་ནགས་ཞིང་མཚེའུ་རྩྭ་བྱེ་མ་བཅས་གཞི་གཅིག་ཅན་གྱི་སྲུང་སྐྱོང་དང་བརྒྱུད་རིམ་ལྡན་པའི་བཅོས་སྐྱོང་མཐའ་འཁྱོངས་བྱས་ནས་རང་བྱུང་སྲུང་སྐྱོང་ས་ཆ་བསྡུ་སྒྲིལ་དང་ལེགས་གཏོང་ཁྱོན་ཡོངས་ནས་ལེགས་སྒྲུབ་བྱེད་པ་དང་། སྐྱེ་ཁམས་དམངས་ཕན་དང་། སྐྱེ་ཁམས་དམངས་བདེ། སྐྱེ་ཁམས་དམངས་ཆེད་བཅས་མཐའ་འཁྱོངས་ཀྱིས་སྐྱེ་ཁམས་ཐོན་ལས་ཅན་དང་ཐོན་ལས་སྐྱེ་ཁམས་ཅན་ལ་སྐུལ་འདེད་བཏང་སྟེ། “རི་གཉིས”བརྗེ་སྒྱུར་གྱི་ཐབས་ལམ་རྒྱ་ཆེར་གཏོང་རྒྱུ་རེད།

རྨོ་ཞིང་སྲུང་སྐྱོང་ཁྱབ་ཁོངས་ཀྱི་ཆེད་དོན་ཁྲིམས་འཛུགས་ཐོག་མ་དེ་ལག་བསྟར་བྱ་རྒྱུ་ཡིན་པ།

རང་རྒྱལ་གྱི་རྨོ་ཞིང་སྲུང་སྐྱོང་ཁྱབ་ཁོངས་ཀྱི་ཆེད་དོན་ཁྲིམས་འཛུགས་ཐོག་མ་སྟེ་རྨོ་ཞིང་སྲུང་སྐྱོང་དང་སྤུས་ཚད་མཐོ་རུ་གཏོང་བའི་བཅའ་ཁྲིམས་སང་ལོའི་ཟླ་1ཚེས་1ཉིན་ནས་ལག་ལེན་བསྟར་རྒྱུ་ཡིན་ཞིང་། འབྲུ་རིགས་བདེ་འཇགས་ནི“རྒྱལ་ཁབ་ཀྱི་དོན་ཆེན”དང་རྨོ་ཞིང་ནི་འབྲུ་རིགས་ཐོན་སྐྱེད་ཀྱི་སྲོག་རྩ་ཡིན། ལིའུ་གོ་ཧུང་གིས། རང་བྱུང་ཐོན་ཁུངས་པུས་བཅའ་ཁྲིམས་ལག་བསྟར་ལ་དམིགས་ནས་ལེ་ལག་ཚང་བའི་སྲིད་ཇུས་དང་བྱ་ཐབས་ཞིབ་ཕྲ་བཟོ་རྒྱུ་ཡིན་ལ། འགག་རྩ་ནི་གྲངས་འབོར་བརྟན་པོ་དང་། གྲུབ་ཆ་ལེགས་གཏོང་། ལྟ་འདོམས་ཆེར་གཏོང་བཅས་ཕྱོགས་གསུམ་གྱི་ལས་དོན་ཡག་པོ་བསྒྲུབ་རྒྱུར་རག་ལས་ཡོད་ཅེས་བརྗོད་པ་རེད།

རེས་སྐོར་གསར་པའི་གཏེར་འཚོལ་ལ་ཚད་བརྒལ་གྲུབ་འབྲས་དགའ་འོས་པ་ཞིག་ཐོབ་པ་སྟེ། ཟླ་དང་པོ་ནས་བརྒྱད་པའི་བར། རྒྱལ་ཡོངས་ཀྱི་རྡོ་སྣུམ་འདོན་རུང་ཚད་ཏུན་ཁྲི་7000ཙམ་གསར་དུ་འཕར་བ་དང་། རང་བྱུང་སོལ་རླངས་འདོན་རུང་ཚད་སྨི་རྒྱ་དཔངས་གྲུ་བཞི་དུང་ཕྱུར་6100གསར་དུ་འཕར་བ། ཨན་ཧུའེ་ཁྲ་ཐིང་གི་ཟངས་གསེར་གཏེར་ཁ་དང་ཀུའེ་ཀྲོའུ་ཀྲུའུ་ཀུང་ཐང་གི་ཞ་ཉེ་དང་ཏི་ཚའི་གཏེར་ཁའི་གསར་སྣོན་ཐོན་ཁུངས་ཀྱི་གྲངས་འབོར་ཧ་ཅང་ཆེན་པོ་ཡོད་པ་རེད།

རང་བྱུང་ཐོན་ཁུངས་པུའི་གསར་འགྱུར་མགྲིན་ཚབ་པ་དང་པུའུ་ཀྲང་གཞོན་པ་ཀྲོའུ་ཤིང་གིས། རྡོ་སྣུམ་དང་། ལྕགས། ཟངས། ཧ་ཡང་སོགས་གཏེར་ཁ་དཀོན་གྲས་ལ་དམིགས་པ་དང་། ས་དཀོན་སོགས་ཁྱད་ལྡན་གཏེར་ཁ་དང་ཟུང་འབྲེལ་གྱིས་གཙོ་གནད་རྩད་ཞིབ་སྔོག་འདོན་རྣམ་གྲངས་ཁག་གཅིག་བཀོད་སྒྲིག་བྱས་ནས། གཏེར་ཁ་ཐོན་ཡུལ་དང་སྣུམ་ཞིང་དང་རླངས་ཞིང་ཆེ་གྲས་དང་འབྲིང་གྲས་ཁག་གཅིག་གསར་དུ་རྙེད་རྒྱུའི་བརྩོན་ལེན་བྱ་རྒྱུ་ཡིན་ཞེས་བརྗོད་པ་རེད། ཀྲོའུ་ཤིང་གིས“འཐབ་ཇུས་རང་བཞིན་གྱི་གཏེར་ཁའི་ཐོན་ཁུངས་ཀྱི་རང་མཁོ་རང་སྤྲོད་བྱེད་ཚད་མངོན་གསལ་དོད་པོས་མཐོ་རུ་བཏང་ནས། རང་རྒྱལ་གྱི་ནུས་རྒྱུ་དང་ཐོན་ཁུངས་བདེ་འཇགས་འགན་ལེན་བྱེད་པའི་གཏིང་ཤུགས་ཆེ་རུ་གཏོང་བར་བརྩོན་ལེན་བྱ་རྒྱུ་ཡིན”ཞེས་བརྗོད།