ཚེས་28ཉིན་རྒྱལ་ཡོངས་ལྕགས་ལམ་དུ་མེ་འཁོར་ཤར་གཏོང་བྱེད་པའི་དུས་ཚིགས་འཆར་ཞིང་། ཅིང་ཀང་མྱུར་བགྲོད་ལྕགས་ལམ་ཞུང་ཨན་ནས་ཧྲང་ཆིའུ་བར་གྱི་དུམ་བུ་དང་། ཧར་པིན་ནས་དབྱི་ཁྲུན་བར་གྱི་མྱུར་བགྲོད་ལྕགས་ལམ། ཤིས་ཡུས་མྱུར་བགྲོད་ལྕགས་ལམ་གྱི་ཤིས་ཨན་ནས་ཨན་ཁང་བར་གྱི་དུམ་བུ། དབྱི་ཁྲང་ནས་ཤིན་ཧྲན་བར་གྱི་མྱུར་བགྲོད་ལྕགས་ལམ་བཅས་མྱུར་བགྲོད་ལྕགས་ལམ་གསར་པ་བཞི་གཅིག་སྡུད་ཐོག་ཤར་གཏོང་ཐུབ་པ་རེད།

རྒྱལ་ཁབ་ཀྱི“གཞུང་བརྒྱད་འཕྲེད་བརྒྱད”ཀྱི་མྱུར་བགྲོད་ལྕགས་ལམ་དྲ་བའི་ལྟེ་བའི་གཞུང་ཕྱོགས་ཀྱི་མ་ལམ་ཡིན་པའི་ཅིང་ཀང་མྱུར་བགྲོད་ལྕགས་ལམ་གྱི་ཞུང་ཧྲང་དུམ་བུར་མེ་འཁོར་ཤར་གཏོང་ཐུབ་པ་དེས་ཅིང་ཀང་མྱུར་བགྲོད་ལྕགས་ལམ་གྱི་བྱང་ཕྱོགས་དུམ་བུའི་ཞན་ཆ་བསལ་ནས་ཧྭ་བྱང་དང་ཀྲུང་ཡོན་དང་དེ་བཞིན་ཧྭ་ཏུང་འབྲེལ་མཐུད་བྱེད་པའི་མྱུར་བགྲོད་ལམ་བུ་བཏོད་ཡོད་པ་རེད།

ལམ་ཐིག་དེ་བྱང་ཞུང་ཨན་འབབ་ཚུགས་ནས་ལྷོ་ཧྲང་ཆིའུ་འབབ་ཚུགས་བར་ཡིན་པ་དང་། ལམ་ཐིག་ཧྲིལ་པོར་རིང་ཚད་སྤྱི་ལེ་552ཡོད་པ་དང་ཆུ་ཚོད་རེའི་མྱུར་ཚད་སྤྱི་ལེ་350ཇུས་འགོད་བྱས་ཡོད། ལམ་ཐིག་ཧྲིལ་པོར་མེ་འཁོར་འབབ་ཚུགས་16བཀོད་སྒྲིག་བྱས་ཡོད་པ་དང་གསར་དུ་བསྐྲུན་པའི་འབབ་ཚུགས་10ལྷག་ཙམ་རྫོང་ཁོངས་སུ་བཙུགས་པས་རེན་ཆིའུ་དང་། སུའུ་ཉིང་། ཡུན་ཁྲེང་སོགས་རྫོང་དང་གྲོང་ཁྱེར་ལ་མྱུར་བགྲོད་ལྕགས་ལམ་མེད་པའི་ལོ་རྒྱུས་མཇུག་འགྲིལ་བ་རེད། མེ་འཁོར་ཤར་གཏོང་ཐུབ་རྗེས་ཞུང་ཨན་ནས་ཧྲང་ཆིའུ་བར་མགྱོགས་ཤོས་ལ་ཆུ་ཚོད་2དང་སྐར་མ་27ལ་འབྱོར་གྱི་ཡོད་པ་རེད།

ཧ་དབྱི་མྱུར་བགྲོད་ལྕགས་ལམ་ནི་རང་རྒྱལ་གྱི་ཆེས་བྱང་སྣེའི་མྱུར་བགྲོད་ལྕགས་ལམ་ཡིན་ཞིང་། ལམ་ཐིག་ཧྲིལ་པོར་རིང་ཚད་སྤྱི་ལེ་318ཡོད་པ་དང་། ཆུ་ཚོད་རེའི་མྱུར་ཚད་སྤྱི་ལེ་250ཇུས་འགོད་བྱས་པ། ལམ་ཐིག་ཧྲིལ་པོར་མེ་འཁོར་འབབ་ཚུགས་9བཀོད་སྒྲིག་བྱས་ཡོད་པ་རེད།

ཤིས་ཡུས་མྱུར་བགྲོད་ལྕགས་ལམ་གྱི་ཤིས་ཨན་ནས་ཨན་ཁང་བར་གྱི་དུམ་བུར་མེ་འཁོར་ཤར་གཏོང་ཐུབ་ནས་ཀོན་ཀྲུང་དང་ཧྲའན་ལྷོའི་མྱུར་བགྲོད་བར་ཁྱམས་བསྐྲུན་ཡོད། ལམ་ཐིག་ཧྲིལ་པོར་སྤྱི་ལེ་171ཡོད་པ་དང་ཆུ་ཚོད་རེར་མྱུར་ཚད་སྤྱི་ལེ་350ཇུས་འགོད་བྱས་ཡོད། ལམ་ཐིག་ཧྲིལ་པོར་རི་ཁུལ་གྱི་འབབ་ཚུགས་མང་པོ་གསར་སྐྲུན་བྱས་ནས་ཀྲ་ཧྲུའེ་དང་། ཀྲེན་ཨན། ཨན་ཁང་སོགས་ས་ཆ་རྣམས་མྱུར་བགྲོད་ལྕགས་ལམ་གྱི་དུས་རབས་སུ་སླེབས་ཡོད་པ་རེད།

མེ་འཁོར་ཤར་གཏོང་ཐུབ་རྗེས་ཤིས་ཨན་ནས་ཨན་ཁང་བར་མགྱོགས་ཤོས་ལ་སྐར་མ་45ལས་འགོར་གྱི་མེད། ཀོན་ཀྲུང་ཐང་གཤོངས་དང་ཆིན་པ་རི་ཁུལ་དབར་ནུས་ཆེའི་འབྲེལ་མཐུད་ཐུབ་ནས་ཆིན་པ་རི་ཁུལ་གྱི་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བ་དང་ཧྲའན་ལྷོའི་ས་ཁོངས་ཀྱི་དཔལ་འབྱོར་འཕེལ་རྒྱས་ལ་འགྲིམ་འགྲུལ་གྱི་སྒྲོམ་གཞི་གསར་རྐྱང་ཞིག་བསྐྲུན་ཡོད་པ་རེད།