ཉེ་ཆར། ཀྲུང་གོའི་ནན་ཏིང་ཀེར་དང་བླངས་ནད་ཞབས་སྤྱི་ཁྱབ་རུ་ཁག་གི་དང་བླངས་པའི་ལོ་ཚོགས་སྐབས་བཅུ་བཞི་པ་ཧྲན་ཤིས་ཐའེ་ཡོན་དུ་འཚོགས་པ་རེད། ལོ་ཚོགས་ལ་ཞུགས་ཐེངས་དང་པོ་ཡིན་པའི་ནག་ཆུ་གྲོང་ཁྱེར་མི་དམངས་སྨན་ཁང་གི་དང་བླངས་ནད་ཞབས་རུ་ཁག་ལ་གྲུབ་འབྲས་བཟང་པོ་ཐོབ་ཅིང་། གསོན་ཉམས་དོད་པའི་ས་མཐོའི་ནད་ཞབས་དང་བླངས་གཏམ་རྒྱུད་དང་ཟོལ་མེད་ཡིད་དབང་འཕྲོག་པའི་སྒྲོག་འགྲེལ་ལ་བརྟེན་ནས་རུ་མི་ཀྲང་ཅིང་ཅིང་ལ“ཀྲུང་གོའི་ནན་ཏིང་ཀེར་དང་བླངས་ནད་ཞབས་སྤྱི་ཁྱབ་རུ་ཁག་གི་2026ལོའི་ལོ་འཁོར་གྱི་དང་བླངས་ནད་ཞབས་ཉམས་འགྱུར་ཡག་ཤོས་མངོན་པའི་མི་སྒེར”གྱི་མཚན་སྙན་ཐོབ་སྟེ། ས་མཐོའི་དང་བླངས་ནད་ཞབས་ཀྱི་ཉམས་འགྱུར་གང་ལེགས་མངོན་ཡོད་པ་རེད།

2023ལོའི་ཟླ་7པར། ནག་ཆུ་གྲོང་ཁྱེར་མི་དམངས་སྨན་ཁང་གི་དང་བླངས་ནད་ཞབས་རུ་ཁག་བཙུགས་ཚུན། རུ་མི་ཡོངས་ཀྱིས“གསོ་རླུང་དཀོན་ཡང་སྙིང་སྟོབས་མི་ཉམས་པ་དང་། དཀའ་ཚེགས་ཆེ་ཡང་ཚད་གཞི་མི་ཆག་པའི”གངས་ལྗོངས་སྨན་པའི་ཐོག་མའི་བསམ་འདུན་ཐོག་མཐའ་བར་གསུམ་དུ་རྒྱུན་འཛིན་བྱས་ནས། དམངས་ཕན་གྱི་བྱ་བ་དངོས་ཏན་ཏིག་བསྒྲུབས་ཏེ་དུས་རབས་གསར་པའི་ས་མཐོའི་ནད་ཞབས་པའི་འགན་འཁྲི་འཁུར་སེམས་དང་ལས་འགན་སྒྲུབ་སེམས་མངོན་པར་བྱས་ཡོད་པ་རེད།

བསྡོམས་རྩིས་ལ་གཞིགས་ན། རུ་ཁག་བཙུགས་ནས་ལོ་3སོང་རིང་། དང་བླངས་རུ་ཁག་གིས་རིམ་རྩིས་བརྒྱབ་ན་སྤྱི་ཕན་ཞབས་འདེགས་སྣ་ཚོགས་ཐེངས་36ཞུས་པར་འབྲོག་ཁུལ་གྱི་མང་ཚོགས་མི་ཐེངས་14740ལ་ཕན་པ་ཐོབ་པ་དང་། ཞབས་ཞུའི་ཁྱབ་ཁོངས་དེ་སློབ་གྲྭ་དང་། སྡེ་ཁུལ། གྲོང་གསེབ་དང་འབྲོག་ཁུལ་བཅས་སུ་ཁྱབ་ནས་མང་ཚོགས་ཀྱི་ཉེ་འགྲམ་དུ་སྤུས་ལེགས་ནད་ཞབས་བསྒྲུབས་པས། བྱང་ཐང་ས་གཞི་ཆེན་པོར་བདེ་ཐང་གི་འདུ་ཤེས་བརྟན་པོ་ཟུག་ཡོད་པ་རེད།