ཉེ་ཆར། 2026ལོའི་རྒྱལ་ཡོངས་ཚན་རིག་ཁྱབ་གདལ་ཟླ་བའི་བོད་ལྗོངས་ཀྱི་ཚོགས་ར་གཙོ་བོའི་བྱེད་སྒོ་ཉིང་ཁྲི་གྲོང་ཁྱེར་མེ་ཏོག་རྫོང་དུ་སྤེལ་བ་རེད། བྱེད་སྒོ་དེས“ཚན་རྩལ་གྱིས་འཚོ་བར་འགྱུར་ལྡོག་གཏོང་བ་དང་གསར་གཏོད་ཀྱིས་འབྱུང་འགྱུར་གཏོད་པ”བརྗོད་དོན་གཙོ་བོར་བྱས་ནས་གཞི་རིམ་གྱི་ཚན་རིག་ཁྱབ་གདལ་ཞབས་ཞུའི་བཀག་རྒྱ་གཏོར་བ་དང་ཚན་རིག་ཁྱབ་གདལ་བརྒྱུད་དམངས་ལ་ཕན་པ་འདོགས་པའི་མཐའ་མའི་འགག་གནད་སེལ་ཡོད་པ་རེད།

བྱེད་སྒོ་སྤེལ་རིང་། བོད་ལྗོངས་ཞིང་འབྲོག་སློབ་ཆེན་གྱི་དགེ་སློབ་ཚོས《ས་བབ་མཐོ་སའི་ཁ་ཆད》《འདབ་ལོ་གཅིག་གི་འགྱུར་ལྡོག》སོགས་ཚན་རྩལ་གྲུབ་འབྲས་འགྲེམས་འཁྲབ་བྱས་པ་མ་ཟད། ཚན་རིག་རང་བཞིན་དང་། སྤྲོ་སྣང་རང་བཞིན། ས་ཁོངས་ཀྱི་ཁྱད་ཆོས་བཅས་ལ་བསམ་གཞིགས་བྱས་ཏེ་ལྗོངས་ཡོངས་ཀྱི་ཚན་རྩལ་གྲུབ་འབྲས་གཞན་སྒྱུར་བེད་སྤྱོད་ཀྱི་གྲུབ་འབྲས་གཅིག་སྡུད་ཐོག་མངོན་པར་བྱས་པ་རེད།

ས་གནས་ས་ཐོག་ཏུ་རང་སྐྱོང་ལྗོངས་དང་། ཉིང་ཁྲི་གྲོང་ཁྱེར། དེ་བཞིན་མེ་ཏོག་རྫོང་བཅས་ཀྱི་འབྲེལ་ཡོད་ཚན་པས་ཚན་རིག་ཁྱབ་གདལ་གྱི་དྲིལ་བསྒྲགས་བྱེད་སྒོ་དུས་གཅིག་ཏུ་མཉམ་སྤེལ་བྱས་ཤིང་། རིམ་རྩིས་བརྒྱབ་ན། ཚན་རིག་ཁྱབ་གདལ་གྱི་དཔྱད་ཡིག་600ལྷག་ཙམ་སྤྲད་པ་དང་། ཚན་རིག་ཁྱབ་གདལ་གྱི་འགྲེམས་པང་5འགྲེམས་སྟོན་བྱས་པ། འཕྲེད་འགེལ་སྦྱར་ཡིག་8བཀལ་བ། རིགས་ཁག་གི་ཚན་རིག་ཁྱབ་གདལ་གྱི་དྲིལ་བསྒྲགས་དངོས་པོ་1100ལྷག་ཙམ་སྤྲད་པ་བཅས་ལས་མང་ཚོགས་མི་ཐེངས་300ལྷག་ཙམ་ལ་ཕན་པ་ཐོབ་ཡོད་པ་རེད།