ཚེས་28ཉིན་གྱི་སྔ་དྲོར། ལྗོངས་ཡོངས་ཀྱི་ཤང་དང་གྲོང་རྡལ་གྱི་མི་དམངས་འཐུས་ཚོགས་ཀྱི་ཀྲུའུ་ཞིའི་གསོ་སྦྱོང་འཛིན་གྲྭ་སློབ་འགོ་ཚུགས་པའི་མཛད་སྒོ་ལྷ་སར་འཚོགས་པ་རེད།

རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ་ལི་ཝུན་ཀེ་ཚོགས་འདུར་ཕེབས་ནས་གསུང་བཤད་གནང་བ་རེད།

ལི་ཝུན་ཀེ་ཡིས་ནན་བཤད་གནང་དོན། ད་ཐེངས་གསོ་སྦྱོང་འཛིན་གྲྭ་གཉེར་བའི་དམིགས་ཡུལ་ནི་མི་དམངས་འཐུས་མི་ཚོགས་ཆེན་ལམ་ལུགས་མཐའ་འཁྱོངས་དང་འཐུས་སྒོ་ཚང་དུ་གཏོང་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གལ་ཆེན་ལག་བསྟར་གཏིང་ཟབ་བྱ་རྒྱུ་དེ་ཡིན་ལ། གཞི་རིམ་མི་དམངས་འཐུས་ཚོགས་ཀྱི་ལས་བྱེད་པའི་འགན་སྒྲུབ་ནུས་པ་ཆེ་རུ་གཏོང་བ་དང་དུས་རབས་གསར་པར་མི་དམངས་འཐུས་ཚོགས་ཀྱི་ལས་དོན་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ཞིབ་ཕྲའི་བྱ་སྤྱོད་ཅིག་ཀྱང་རེད། དེར་བརྟེན་ཚུགས་གནས་མཐོ་རུ་དང་ངོས་འཛིན་ཟབ་ཏུ་བཏང་སྟེ་ཤང་དང་གྲོང་རྡལ་གྱི་མི་དམངས་འཐུས་ཚོགས་ལས་དོན་ཡག་པོ་སྒྲུབ་པའི་དོན་སྙིང་གལ་ཆེན་ལ་གོ་བ་གཏིང་ཟབ་ལེན་དགོས། ཚུགས་གནས་སྟངས་འཛིན་ཡག་པོ་དང་འགན་འཁྲི་གསལ་པོ་ཤེས་པར་བྱས་ཏེ་ཤང་དང་གྲོང་རྡལ་གྱི་མི་དམངས་འཐུས་ཚོགས་ཀྱི་ཀྲུའུ་ཞིའི་འགན་འཁྲིའི་ངེས་གནས་གསལ་པོ་ཤེས་པ་དང་གནད་ལ་འཁེལ་པོ་འཚོལ་དགོས། ལས་ཀ་གཙོ་བོར་དམིགས་པ་དང་རང་འགན་གཙང་སྒྲུབ་བྱས་ཏེ་ཤང་དང་གྲོང་རྡལ་གྱི་མི་དམངས་འཐུས་ཚོགས་ཀྱི་འགན་འཁྲི་གཙོ་བོ་དང་ལས་སྒོ་གཙོ་བོ་དོན་འཁྱོལ་ལ་དམ་འཛིན་བྱེད་དགོས། གོ་སྐབས་ལ་གཅེས་སྤྲས་དང་སློབ་སྲོལ་ཡོ་བསྲང་བྱས་ཏེ་གསོ་སྦྱོང་གི་ཕན་འབྲས་སྲ་བརྟན་གཞན་འགྱུར་གྱིས་བེད་སྤྱོད་ཡག་པོ་དང་ཏན་ཏིག་བྱས་ནས་སྤྱི་ཚོགས་རིང་ལུགས་ཀྱི་དེང་རབས་ཅན་གྱི་བོད་གསར་འཛུགས་སྐྲུན་བྱ་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་དགོས།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་གསོ་སྦྱོང་དུས་ཡུན་ཉིན་3ཡིན་ཞིང་། འབྲེལ་ཡོད་བཅའ་ཁྲིམས་དང་ཁྲིམས་སྲོལ་དང་མི་དམངས་འཐུས་ཚོགས་ཀྱི་ལས་སྒོའི་ཤེས་བྱ་སོགས་ཀྱི་ནང་དོན་ལ་དམིགས་ནས་ཆེད་དོན་ཟུར་ཁྲིད་དང་སྤེལ་རེས་བགྲོ་གླེང་བྱ་རྒྱུ་རེད། ལྗོངས་ཡོངས་ཀྱི་ཤང་དང་གྲོང་རྡལ་གྱི་མི་དམངས་འཐུས་ཚོགས་ཀྱི་ཀྲུའུ་ཞི་112གསོ་སྦྱོང་ནང་ཞུགས་ཡོད་པ་རེད།