སྟོན་རླུང་བསིལ་བུ་གཞིས་རྩེ་གྲོང་ཁྱེར་རྒྱལ་རྩེ་རྫོང་རྩེ་ཆེན་ཤང་ནུབ་སྟོད་གྲོང་ཚོར་ལྡང་བ་དང་བསྟུན་ནས་མཁའ་རླུང་ཁྲོད་དུ་ལོ་ལེགས་ཀྱི་དྲི་བསུང་ངང་གིས་འཐུལ།

ལྡིར་སྒྲ་གྲགས་པའི་བརྔ་བསྡུ་འཕྲུལ་འཁོར་གྱི་འགྲམ་དུ་ཤ་རྩི་ཅུང་ནག་པའི་སྐྱེས་པ་ཞིག་གིས་བརྔས་མ་ཐག་པའི་བཙས་མ་ནས་སྙེ་མ་ཞིག་བཀོག་སྟེ་ལག་པ་གཉིས་ཀྱིས་འཕུར་འཕུར་བཏང་རྗེས། འབྲུ་རྡོག་ཆེན་པོ་ཡོད་པ་མཐོང་སྐབས་ངོ་གདོང་ལས་དགའ་བའི་འཛུམ་མདངས་འཕྱུར།

ཁོང་ནི་ནུབ་སྟོད་གྲོང་ཚོའི་ཏང་ཀྲི་པུའི་ཧྲུའུ་ཅི་དང་གྲོང་ཚོའི་མཉམ་སྡེབ་དཔལ་འབྱོར་གྱི་འགན་འཁུར་བ་ཕུར་རྒོད་ཡིན་ཞིང་། ཡུལ་མི་ཚོས་ཁོང་ལ་སེམས་ནུས་ཡོད་རྒུ་ས་ཞིང་ལ་འདོན་མཁན“འབྲུ་འདེབས་འཇོན་ཐང་ཅན”ཞེས་འབོད་བཞིན་ཡོད།

2014ལོའི་ཟླ་7པར། ནུབ་སྟོད་གྲོང་ཚོའི་མྱང་ཆུ་དར་རྒྱས་ཞིང་འཕྲུལ་ཞིང་པའི་ཆེད་ལས་མཉམ་ལས་ཁང་བཙུགས་ཤིང་། སྐབས་དེ་དུས་ཀྱི་ནས་སོན་ནི་སྔར་བཞིན“བོད་ནས་ཨང་320པ”ཡིན་པས། མུའུ་རེ་ནས་ཐོན་འབབ་རྒྱ་མ་600ལྷག་ཙམ་ཟིན་ཚེ། ལོ་ལེགས་བྱུང་བར་བརྩི་ཆོག་གི་ཡོད།

ལོ་གཉིས་པར་གཞིས་རྩེ་ཞིང་འབྲོག་ཚན་རིག་སུའོ་ཡི་ལས་དོན་མི་སྣས་ཕུར་རྒོད་ལ་ནས་སོན་གསར་པ“ཧི་མ་ལ་ཡ་ཨང་22པ”སྤྲད། “ཐོན་འབབ་དེ་བས་མཐོ་བ་མ་ཟད། ལོ་ཏོག་ཉལ་གྱི་མེད་པས། ཁྱེད་ཚོས་ཚོད་ལྟ་དང་བཅས་ཐོབས་དང་གསུང་གི་འདུག”ཅེས་ཕུར་རྒོད་ཀྱིས་ཕྱིར་དྲན་བྱེད་བཞིན་བཤད་པ་དང་། སྐབས་དེར་ཁོང་ལ་སེམས་ཁྲལ་བྱུང་མོད། འོན་ཀྱང་ཁོང་ནི་བསམ་ཕོད་ཅིང་སྒྲུབ་ཕོད་པ་ཞིག་ཡིན་པས། ནུབ་སྟོད་གྲོང་ཚོའི་ས་ཞིང་མུའུ་250ཚོད་ལྟའི་ཞིང་ཁར་འདེམས་སྐབས། ཁོང་གིས་སྔོན་ལ་སོན་གསར་པ་ཚོད་ལྟ་དང་བཅས་བཏབ།

སྤྲོ་སྣང་གི་ཞོར་ལ་ཚོད་བགམ་གསར་པ་ཞིག་འཕྲད།

བ་ཕྱུགས་ལ་གཟན་པ་སྟེར་ཚར་མ་ཐག་པའི་ཡུལ་མི་ཞིག་གིས་སེམས་ཁྲལ་ཆེན་པོས་ཁོང་འཚོལ་བར་ཡོང་ཞིང་། “ཧྲུའུ་ཅི་ལགས། ནས་སོན་གསར་པའི་གཟན་པ་བ་ཕྱུགས་ལ་སྟེར་ན་ཡོང་གི་མི་འདུག”ཅེས་བ་ཚང་གི་ཕྱོགས་སུ་མཛུབ་མོ་འཛུགས་ཀྱིན་འདི་ལྟར་བཤད། ད་བྱེད་དུས“ཧི་མ་ལ་ཡ་ཨང་22པའི”ཐོན་འབབ་མཐོ་ཡང་་གྲ་མ་ཧ་ཅང་རྩུབ་པས། བ་ཕྱུགས་ཀྱི་ཁ་ནང་དུ་རྨ་བཟོ་གི་ཡོད། ཐོན་འབབ་མཐོ་རུ་ཕྱིན་རུང་གཟན་ཆག་ཡོང་གི་མེད་པས་ཡུལ་མི་ཚོས་སེམས་ཁྲལ་ཆེན་པོ་བྱེད་ཀྱི་ཡོད། དེས་ན། སོན་གསར་འདེབས་པའི་ཧུར་སེམས་ཀྱང་ཤུགས་ཆེན་ཆག་ཡོད།

དེ་ཕུར་རྒོད་ཀྱིས་མཐོང་བས་སེམས་ཁྲལ་ཆེན་པོ་ལངས་ཤིང་། ཁོང་གིས་གྲོང་ཚོའི་ལས་བྱེད་པའི་སྣེ་ཁྲིད་དེ་ཞིང་དུད་ཀྱི་ཁྱིམ་དུ་མཉམ་དུ་ཐབས་ཤེས་འཚོལ་བར་བསྐྱོད། མང་ཚོགས་ལ་ཐབས་དང་ཇུས་རྫོགས་རྒྱུ་མེད་པ་ཞིག་འདོན་རྒྱུ་ཡོད་ཅིང་། མི་ཞིག་གིས་གཟན་པ་སྔོན་ལ་ཞག་གཅིག་ཆུའི་ནང་དུ་སྦངས་ནས་མཉེན་དུ་འགྲོ་ཐུབ་མིན་ལྟོས་དང་ཞེས་གྲོས་འགོ་བཏོན་པས་ཐབས་དེས་གནད་དོན་གསར་པ་དེ་ཐག་གཅོད་ཐུབ་ཡོད།

ས་བོན་རྒྱུ་གཙང་སྤུས་གཙང་ཞིག་ཡོང་ཆེད། ཕུར་རྒོད་ཀྱིས་ཡུལ་མི་སྤུན་ཟླ་ཚོའི་སྣེ་ཁྲིད་དེ་དཀའ་ལས་མང་པོ་བརྒྱབ་ཡོད་ཅིང་། དེ་ཡང་རྩྭ་ངན་འཐུ་སྐབས། སྔོན་ལ་མི་མེད་གནམ་གྲུས་ཞིང་སྨན་གཏོར་ནས་རྩྭ་ངན་མེད་པ་བཟོས་པ་དང་། དེ་རྗེས་ཚ་གདུག་ཆེ་བའི་ཉི་མའི་འོག་ཞིང་ནང་དུ་མི་ཐབས་ལ་བརྟེན་ནས་རྩྭ་ངན་རྐང་རེ་རེ་བཞིན་འཐུ་ཡི་ཡོད། སྟོན་ཁ་བཙས་མ་བརྔ་དུས། ད་དུང་བརྔ་བསྡུ་འཕྲུལ་འཁོར་ཆེ་གྲས་ཀྱིས་ཟང་ཟིང་བཟོས་དོགས་ཀྱིས་འཕྲུལ་ཆས་ཆུང་གྲས་ཀྱིས་བརྔས་པ་མ་ཟད་ད་དུང་ལག་གཉིས་ལ་བརྟེན་ནས་བརྔ་རོགས་བྱས་ཡོད། ཕུར་རྒོད་ཀྱིས་གྲོང་ཚོའི་ཚན་རྩལ་ཆེད་མངགས་པ་དང་མཉམ་དུ་ཉིན་ལྟར་ཞིང་ནང་དུ་ནས་ཀྱི་སྐྱེ་ཚུལ་དང་ནད་འབུའི་གནོད་འཚེ་ཡོད་མེད་ལྟ་བར་འགྲོ་གི་ཡོད།

ས་ཞིང་དང་སོན་བཟང་ཁྱབ་སྤེལ་ལ་བློ་ཐབས་མཁས་པོས་གཞོལ་བས་སྤུས་ཀ་ཧ་ཅང་དག་པའི་ནས་ཀྱི་སོན་བཟང་བྱུང་ཡོད། དེ་ཡང་ནུབ་སྟོད་གྲོང་ཚོའི་སྐད་གྲགས་ཕྱོགས་བཅུར་ཁྱབ་པ་དང་བསྟུན་ནས་མངགས་ཉོ་བྱས་པའི་སོན་བཟང་དག་ཆབ་མདོ་དང་། ཉིང་ཁྲི། ལྷོ་ཁ་སོགས་སུ་ཁྱབ་ཡོད།

ས་ཞིང་བཏབ་ན་མདུན་ལམ་ཆེན་པོ་ལྡན་པ་མཐོང་སྐབས། ཕུར་རྒོད་ཀྱིས་མཉམ་ལས་ཁང་གི་སྣེ་ཁྲིད་དེ“ས་ཞིང་གི་དོ་དམ་པ”དང་“ཞིང་ལས་གཡོག་བྱེད་མཁན”སོགས་ཞིང་འཕྲུལ་སྤྱི་ཚོགས་ཅན་གྱི་ལས་སྒྲུབ་ཞབས་འདེགས་ཞུས་ནས་གཅིག་གྱུར་ཐོག་ས་བོན་མཁོ་སྤྲོད་དང་། གཅིག་གྱུར་ཐོག་ས་བོན་ལ་སྨན་ཐུམ་རྒྱག་པ་དང་འདེབས་པ། གཅིག་གྱུར་ཐོག་འཕྲུལ་ཆས་ཀྱིས་བརྔ་བསྡུ་བྱེད་པ་བཅས་བྱས་ཏེ། ཉེ་འཁོར་གྱི་ཡུལ་མི་སྤུན་ཟླ་ཚོའང་དེང་རབས་ཞིང་ལས་ཀྱི་མགྱོགས་ལམ་ཐོག་སྐྱོད་པར་སྐུལ་ཁྲིད་བྱས་ཡོད།

ཡུལ་མི་ཚོ་ཧ་ཅང་དགའ་འོས་པ་ཞིག་ནི་ལོ་མཇུག་གི་བགོ་འགྲེམས་ལྗིད་ཏིག་ཏིག་རྒྱག་པ་དེ་རེད། ས་བོན་ལེགས་འདེམས་དང་། ས་བོན་ལ་སྨན་ཐུམ་རྒྱག་པ། ཕྱིར་ཚོང་དང་། ཞིང་འཕྲུལ་གྱི་སོན་འདེབས། བརྔ་བསྡུའི་ཚབ་གཉེར་ཞབས་ཞུ་སྒྲུབ་པ། ནོར་ལུག་གསོ་ཚགས་དང་གླ་ཚེར་མྱུག་གསོ་སོགས་སྣ་མང་ཐོན་ལས་ལ་བརྟེན་ནས་ལོ་མང་རིང་མཉམ་ལས་ཁང་གི་ཕན་འབྲས་ལོ་རེ་ལས་ལོ་རེ་མ་འདས་པར་ལེགས་སུ་ཕྱིན་ཡོད། 2025ལོར་མཉམ་ལས་ཁང་གི་སྤྱིའི་ཡོང་འབབ་སྒོར་ཁྲི་1400ལྷག་ཙམ་ཟིན་པ་དང་། ཡོང་འབབ་ཁེ་གཙང་སྒོར་ཁྲི་370ལྷག་ཙམ་ཟིན་ཡོད། ཉེ་བའི་ལོ་བཞིའི་རིང་། རིམ་རྩིས་བརྒྱབ་ན་ཡུལ་མིར་སྒོར་ཁྲི་600ལྷག་ཙམ་བགོ་འགྲེམས་བརྒྱབ་ཡོད་པ་རེད།

“སྔོན་ཆད་ས་ཞིང་འདེབས་སྐབས་གནམ་ཆུ་སྒུག་དགོས་པས། ལོ་མཇུག་ཏུ་དངུལ་མང་པོ་འདི་འདྲ་བགོ་ཐུབ་པ་བསམ་པའི་ཡུལ་ལའང་འཁོར་གྱི་མེད”ཅེས་ཡུལ་མིས་ལག་ཏུ་འབྱོར་བའི་དངུལ་རྩིས་རྒྱག་བཞིན་དུ་བཤད་དེ་གདོང་ལས་དགའ་བའི་འཛུམ་མདངས་འཕྱུར་ཞིང་། འབྲུ་རིགས་འདེབས་པའི་གདེང་ཚོད་སྔར་བས་ཆེ་རུ་ཕྱིན་པ་མ་ཟད། ཧུར་བརྩོན་ཡང་དེ་བས་ཆེ་རུ་ཕྱིན་ཡོད།

དཔྱིད་ཀར་ས་བོན་བཏབ་གྱུར་ན། སྟོན་ཀ་འབྲས་བུ་ལས་ཀྱིས་སྨིན། གསེར་མདོག་གི་སྟོན་ཁ་འདིར་ནུབ་སྟོད་གྲོང་ཚོར་སླར་ཡང་ལོ་ལེགས་བྱུང་ཡོད།