“རྩེ་གྲ་བྱུང་སོང་། དངོས་གནས་སྤོ་ལོ་ཡག་པོ་བཞུས་སོང”

ནང་སོག་ཨེར་ཏུའོ་སི་གྲོང་ཁྱེར་ཨེ་ཐུའོ་ཁེ་ཆན་ཆི་ཨང་སུའུ་གྲོང་རྡལ་གྱི་ཕའེ་ཆིའུ་སྤོ་ལོའི་ཐང་དུ། ཞིང་འབྲོག་པའི་རུ་ཁག་ཁག་གིས“རྩྭ་ཐང་གི་གྲོང་ཚོའི་ཕའེ་ཆིའུ་སྤོ་ལོ”ཞེས་པའི་འགྲན་བསྡུར་ནང་རང་ནུས་ཡོད་རྒུ་རྩལ་སྤྲུགས་བཏོན་ནས་འགྲན་བསྡུར་དྲག་པོ་བྱས་ཤིང་། ཕའེ་ཆིའུ་སྤོ་ལོ་ཐང་ནས་སྐད་གསངས་མཐོན་པོའི་དགའ་འབོད་སྒྲ་ཡང་ཡང་གྲགས་འོང་།

“ལོ་ཤས་གོང་ངས་རང་ཁྱིམ་གྱི་སྒོ་རྩར་སྤོ་ལོའི་དྲ་བ་ཞིག་འཐེན་ཏེ། ཉེ་འཁོར་གྱི་ཞིང་འབྲོག་པ་བོས་ནས‘ཁྱིམ་མཚེས་ཡག་པོ’ཞེས་པའི་ཕའེ་ཆིའུ་སྤོ་ལོ་རུ་ཁག་ཅིག་བཙུགས་པ་ཡིན། ཞིང་དལ་གྱི་དུས་སུ་ང་ཚོ་མཉམ་དུ་འཛོམས་ནས་སྤོ་ལོ་བརྒྱབ་པས་ལུས་སྦྱོང་ཐུབ་ལ་སྣང་བའང་སྐྱིད་པོ་འདུག བསམ་ཡུལ་ལས་འདས་པར་གནས་ཚུལ་དེ་གང་སར་ཁྱབ་ནས་ཕྱིས་སུ་སྤོ་ལོ་རུ་ཁག་ནང་ཞུགས་མཁན་མང་པོ་བྱུང་སོང”ཞེས“རྩྭ་ཐང་གི་གྲོང་ཚོའི་ཕའེ་ཆིའུ་སྤོ་ལོ”ཞེས་པའི་དར་སྲོལ་གཏོད་མཁན་ལོ་60ལ་སླེབས་པའི་འབྲོག་པ་མཱ་·ཧུའུ་ཀེ་ཅི་ལ་ཐུའུ་ཡིས་བཤད།

ད་ཆ་སྤོ་ལོའི་འགྲན་བསྡུར་ནང་ཞུགས་པ་དེ་ཞིང་འབྲོག་ཁུལ་གྱི་དར་སྲོལ་གསར་པ་ཞིག་ཏུ་གྱུར་ཞིང་། མི་རིགས་ཁག་གི་མང་ཚོགས་ཀྱིས“རྩྭ་ཐང་གི་གྲོང་ཚོའི་ཕའེ་ཆིའུ་སྤོ་ལོའི”འགྲན་རའི་ཐོག་ཕན་ཚུན་གཡས་གཞོགས་གཡོན་འདེགས་ཀྱིས་འགྲན་བསྡུར་བྱས་པས་མི་རིགས་ཁག་དབར་གྱི་མཐུན་སྒྲིལ་སྔར་བས་ཇེ་ཟབ་ཏུ་སོང་། ས་གནས་དེ་གས་ཀྱང་འགྲན་ར་སྔར་བས་འཐུས་སྒོ་ཚང་དུ་བཏང་ནས་འགྲན་བསྡུར་སྣ་ཚོགས་གཉེར་བའི་ཞོར་ལ་རིག་གནས་བསམ་བཀོད་མགྲོན་བསུ་ཚོམས་ཆེན་བསྐྲུན་ཏེ། མངོན་མིན་རིག་གནས་ཤུལ་བཞག་ཐོན་རྫས་དང་ཁྱད་ལྡན་ཡུལ་ཟོག་སྣ་ཚོགས་གཅིག་སྡུད་ཐོག་འགྲེམས་ཚོང་བྱས་ནས་འགྲན་རའི་མི་ཚོགས་ཆེན་པོ་དེ་དམངས་ཕྱུག་གི་སྒུལ་ཤུགས་ཆེན་པོར་སྒྱུར་ཐབས་བྱེད་ཀྱི་ཡོད།

“སྐུ་མགྲོན་མང་དུ་ཕྱིན་ནས་ཞིང་འབྲོག་པའི་ཚགས་ཤ་དང་། ལུག་ཤ། འོ་མའི་ཐོན་རྫས་ལ་སོགས་བྲིན་ཁ་རྒྱུག་པོ་བྱུང་བ་མ་ཟད། བཟའ་བཏུང་དང་། ཞག་སྡོད། འགྲིམ་འགྲུལ་སོགས་ཀྱི་རྟ་སྒ་ཆ་སྒྲིག་བྱས་པའི་སྒྲིག་བཀོད་ཀྱི་སྤུས་རིམ་ཡང་མཐོ་རུ་ཕྱིན་ཡོད”ཅེས་ཨང་སུའུ་གྲོང་རྡལ་ཏང་ཨུད་ཀྱི་ཧྲུའུ་ཅི་ཝང་ཝུའེ་ཡིས་བཤད། ན་ནིང་ཁོ་ནར་ཨེ་ཐུའོ་ཁེ་ཆན་ཆིས་ཡུལ་སྐོར་བ་མི་ཐེངས་ཁྲི་165ལ་སྣེ་ལེན་ཞུས་པ་དང་ཡུལ་སྐོར་གྱི་ཕྱོགས་བསྡུས་ཡོང་འབབ་སྒོར་དུང་ཕྱུར་29ཟིན་ཡོད།

མང་ཚོགས་ཀྱི་རིག་གནས་ལུས་རྩལ་བྱེད་སྒོ་ཡང་ཡང་སྤེལ་བ་ལས་གྲོང་གསེབ་ཀྱི་རིག་གནས་ཡུལ་སྐོར་འཕེལ་རྒྱས་བྱུང་བ་དང་། འབབ་འཕར་གྱི་ཐབས་ལམ་ཆེ་རུ་ཕྱིན་པ་མ་ཟད། མི་རིགས་ཁག་གི་མང་ཚོགས་དབར་གྱི་བརྩེ་དུང་ཡང་དེ་བས་ཟབ་ཏུ་ཕྱིན་ཡོད།

ཧྥུའུ་ཨན་སྡེ་ཁུལ་ནི་མི་རིགས་མང་པོ་འདུས་སྡོད་ཀྱི་སྒར་རེས་རྣམ་པའི་སྡེ་ཁུལ་ཞིག་ཡིན་ཞིང་། དེ་གར་མི་རིགས་ཁག་གི་གྲོང་པ་ཁྱིམ་མཚེས་ཀྱིས་རྟག་ཏུ་ཕན་ཚུན་ལྟ་སྐྱོང་བྱེད་རེས་བྱེད་ཀྱི་ཡོད། ཉེ་བའི་ལོ་ཤས་རིང་། སྡེ་ཁུལ་གྱིས་ཕྱོགས་བསྡུས་རང་བཞིན་གྱི་དམངས་ཕན་སྒར་རེས་རྣམ་པའི་གཡུལ་ས་བཏོད་དེ། མི་རིགས་ཁག་གི་མང་ཚོགས་ལ་ལུས་སྦྱོང་སྤྲོ་འཕེལ་དང་། མིག་མངས་མཉམ་འགུལ། ལས་ཞོར་ལྟ་ཀློག་སོགས་ཀྱི་བྱེད་ནུས་སྣ་ཚོགས་ལྡན་པའི་བྱེད་སྒོ་སྤེལ་ཡུལ་ཞིག་མཁོ་འདོན་བྱས་ཡོད།

“ང་ཚོས་བར་མཐོངས་མཉམ་འདྲེས་དང་། རིག་གནས་གཅིག་མཐུན། རྒན་གཞོན་མཉམ་སྐྱོང་། དམངས་ཡོངས་མཉམ་འགུལ་བཅས་ཀྱི་རྣམ་པའི་ཐོག་ནས་མི་རིགས་ཁག་གི་མང་ཚོགས་ཀྱིས་མཉམ་སྡོད་མཉམ་སྦྱོང་དང་། མཉམ་སྐྲུན་མཉམ་སྤྱོད། མཉམ་ལས་མཉམ་སྤྲོ་བཅས་ལ་ཆ་རྐྱེན་མུ་མཐུད་བཏོད་དེ། མི་རིགས་ཁག་སེ་འབྲུ་ལྟར་རྡོག་རྩ་གཅིག་ཏུ་བསྒྲིལ་རྒྱུར་སྐུལ་འདེད་གཏོང་གི་ཡོད”ཅེས་སྡེ་ཁུལ་གྱི་ཏང་ཀྲི་པུའི་ཧྲུའུ་ཅི་ཀྲང་རུའེ་ཤིན་གྱིས་བཤད།

མི་རིགས་ཁག་གི་ཡུལ་མིས་རྒྱུན་གཏན་གྱི་འཚོ་བའི་ཁྲོད་དུ་ཕན་ཚུན་གྱི་འབྲེལ་བ་ཉེ་རུ་གཏོང་བ་དང་སྡེ་ཁུལ་གྱི་གོང་བུ་འགྲིལ་ཤུགས་ཆེ་རུ་བཏང་སྟེ། གཡུལ་ས་ཆུང་ངུས་དམངས་འཚོ་ཆེན་པོ་འདེགས་པ་དང་བར་མཐོངས་ཆུང་ངུས་མཉམ་འདྲེས་ཆེན་པོར་སྐུལ་རྒྱུའི་དམིགས་ཡུལ་སྒྲུབ་ཐབས་བྱེད་བཞིན་ཡོད།

ཉེ་བའི་ལོ་ཤས་རིང་། ནང་སོག་གིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཟབ་ཏུ་གཏོང་རྒྱུ་གཙོ་རྐང་དུ་བྱས་ནས་མི་རིགས་ཁག་གི་སྒར་རེས་རྣམ་པའི་འཕེལ་རྒྱས་གཏིང་ཟབ་ཏུ་བཏང་ཞིང་། “ལོ་ལྔ་ཚན་བཅུ་བཞི་པའི”རིང་མི་རིགས་ཁག་གི་མང་ཚོགས་ཀྱི་སྒར་རེས་རྣམ་པའི་འཕེལ་རྒྱས་འཆར་གཞིའི་དཔེ་སྟོན་364སྐྱེད་སྲིང་བྱས་པ་དང་། “སེ་འབྲུ་དམར་པོ+”དང“སེ་འབྲུའི་མུ་འབྲེལ”སོགས་མི་རིགས་ཁག་གི་སྒར་རེས་རྣམ་པའི་འཕེལ་རྒྱས་ལས་སྟེགས་ཀྱི་གཞི་རྟེན་2057བཏོད་དེ་སྤེལ་རེས་མཉམ་འགུལ་གྱི་བར་མཐོངས་གཞི་རྟེན་ཧུར་ཐག་བཏོད་ཡོད།

ཁྱད་ལྡན་ཐོན་ལས་སྟོབས་ཆེར་གཏོང་ཆེད། གྲོང་ཚོའི་ཏང་ཀྲི་པུས་སྣེ་ཁྲིད་དེ་འབྲུ་རིགས་འདེབས་འཛུགས་མཉམ་ལས་ཁང་བཙུགས་པ་དང་། ས་ཞིང་མུའུ་5300ལྷག་ཙམ་བརྒྱུད་བཤུག་བཏང་བ། མི་རིགས་ཁག་གི་མང་ཚོགས་དུད་ཚང་303མ་རྐང་ནང་ཞུགས་སུ་བཅུག་ནས་གཞི་ཁྱོན་ཅན་གྱི་འདེབས་འཛུགས་ལམ་བུར་བསྐྱོད་ཡོད། ཞིང་ལས་ཐོན་རྫས་ཀྱི་ཟུར་སྣོན་རིན་ཐང་ཆེ་རུ་གཏོང་ཆེད། གྲོང་ཚོས་ད་དུང་གྲོང་གཉེར་ཁེ་ལས་བཙུགས་པ་དང་། ཁྲེ་ལས་སྣོན་སྒྲིག་ཆས་ནང་འདྲེན་བྱས་པ། འབྲུ་རིགས་ལས་སྣོན་གྱི་བརྒྱུད་རིམ་ཧྲིལ་པོ་འཕྲུལ་ཆས་ཅན་དུ་བསྒྱུར་བ། རང་བདག་སྤུས་རྟགས་བཏོད་ནས་ཐོན་ལས་འཁོར་འབྲེལ་སྣུར་སྲིང་བྱས་ཡོད།

མི་རིགས་ཁག་གི་མང་ཚོགས་ཀྱིས་སེམས་ནུས་གཅིག་ཏུ་བསྒྲིལ་ཏེ་ཐོན་ལས་དར་རྒྱས་གཏོང་བ་དེ“གསེར་གྱི་ལྡེ་མིག”ཏུ་བརྩིས་ནས་ཧུར་བརྩོན་ཆེན་པོས་ཐུན་མོང་འབྱོར་ཕྱུག་དང་བདེ་སྐྱིད་ཀྱི་སྒོ་མོ་ཕྱེ་ཡོད།

འཚེམ་འཁོར་གྱི་སྒྲ་ཚག་ཚག་ཏུ་གྲགས་པ་དང་ཆབས་ཅིག མི་རིགས་མཐུན་སྒྲིལ་གྱི་གོ་དོན་མཚོན་པའི་ལག་ཤེས་བཟོ་རྩལ་སྟེ་ཕྱིང་པའི་ཐོན་རྫས་སྣ་ཚོགས་གཅིག་རྗེས་གཉིས་མཐུད་ངང་འཚེམ་མཇུག་འགྲིལ། ཨེར་ཏུའོ་སི་གྲོང་ཁྱེར་ཁེམ་པ་ཧྲི་ཆུས་ཧ་པ་ཀེ་ཤིས་ཁྲོམ་གཞུང་གི“ལི་ཀྲིའི་མེ་ཏོག་བཞད”ཅེས་པའི་ལས་གཏོད་ལས་ཞུགས་བཟོ་ཁང་དུ་ཡུལ་མི་ཚོ་མངགས་ཐོའི་ཐོན་རྫས་བཟོ་བའི་ལས་ལ་བྲེལ།

ཧ་པ་ཀེ་ཤིས་ཁྲོམ་གཞུང་དུ་གནས་སྤོས་ཞིང་འབྲོག་པ་མང་ཞིང་། ཉེ་བའི་ལོ་ཤས་རིང་། ས་གནས་དེ་གས་འཚོ་རྟེན་ལས་སྤྲོད་སྲིད་ཇུས་ལ་བརྟེན་ནས“ལི་ཀྲིའི་མེ་ཏོག་བཞད”ཅེས་པའི་ལས་གཏོད་སྤུས་རྟགས་བཏོད་ཡོད། “ང་ཚོས་གནས་སྤོས་ཞིང་འབྲོག་པ་དང་། དབང་པོ་སྐྱོན་ཅན། རྒན་རྒོན། གྲོང་མི་གསར་པ། སློབ་སྐྱོང་ཨ་མ་བཅས་ཚོགས་སྤྱི་རིགས་ལྔར་དམིགས་ཏེ། ལས་གཏོད་རྟེན་གཞི་3དང་ལས་གཏོད་དཔུང་ཁག་10བཙུགས་པ་དང་། ལག་ཤེས་བཟོ་རྩལ་ཐོན་རྫས་སྣ་ཁ་180ལྷག་ཙམ་གསར་སྤེལ་བྱས་པ། དྲ་ཐོག་དང་དྲ་ཕྱི་ནས་དུས་གཅིག་ཏུ་ཕྱིར་ཚོང་། ཐོན་ཚོང་གཞི་གཅིག་ཅན་གྱི་འབབ་འཕར་ཐབས་ལམ་བཏོད་ཡོད”ཅེས་ཁྲོམ་གཞུང་དོན་གཅོད་ཁང་གི་ཀྲུའུ་རེན་གཞོན་པ་ལིའུ་ཤང་ཧུང་གིས་བཤད།

“ང་ཚོས་ཐག་ཉེ་སར་ལས་ཞུགས་དང་། རྩལ་ནུས་གསོ་སྦྱོང་། ཁེ་སྤོགས་སློག་པ་བཅས་ལ་བརྟེན་ནས་མི་རིགས་ཁག་གི་མང་ཚོགས་མཉམ་དུ་ཕྱུག་པོ་ཆགས་པའི་ལས་སྟེགས་བཏོད་ཡོད། ཁྲོམ་གཞུང་གིས་ཏང་འཛུགས་སྐྱོང་གིས་ཁྲིད་སྟོན་དང་འཚོ་རྟེན་ལས་སྤྲོད་རྒྱུན་མཐུད་ཟབ་ཏུ་བཏང་ནས་མི་རིགས་ཁག་གི་མང་ཚོགས་གནས་སྤོ་ཐུབ་པ་དང་། གཞིས་ཆགས་ཐུབ་པ། ཕྱུག་པོ་ཆགས་ཐུབ་པ་བཅས་བྱས་ཡོད”ཅེས་ལིའུ་ཤང་ཧུང་གིས་བཤད། ལོ་3རིང་། ཁེམ་པ་ཧྲེན་ཆུས་ཀྱིས་འཚོ་རྟེན་ལས་སྤྲོད་ཀྱི་རྣམ་གྲངས་408དོན་འཁྱོལ་བྱས་ཏེ། ངལ་ནུས་གླ་ཆ་སྒོར་ཁྲི་5500ལྷག་ཙམ་སྤྲད་ནས་མི་རིགས་ཁག་གི་མང་ཚོགས་1500ལྷག་ཙམ་ལ་འབབ་འཕར་བརྟན་པོ་ཡོང་བར་སྐུལ་ཁྲིད་བྱས་ཡོད།

ད་ཆ་ནང་སོག་ཏུ་མི་རིགས་ཁག་གི་མང་ཚོགས་ཚོས་གླུ་ལེན་གར་འཁྲབ་དང་ལག་གདང་སྦྲེལ་ནས་འབད་འཐབ་བྱས་ཏེ། འགྲོ་འོང་དང་། སྤེལ་རེས། མཉམ་འདྲེས་བཅས་བྱེད་རིང་འཕེལ་རྒྱས་དོན་གཉེར་དང་བདེ་སྐྱིད་མཉམ་སྤྱོད་ཀྱིས་སེ་འབྲུའི་གོང་བུ་བཞིན་རྡོག་རྩ་གཅིག་ཏུ་སྒྲིལ་བཞིན་མཆིས།