འདི་ནི་ཀོང་ཤིས་ཀུའེ་ལིན་གྲོང་ཁྱེར་ཆོན་ཀྲོའུ་རྫོང་མའོ་ཀྲུའུ་ཧྲན་གྲོང་ཚོའི་རྒུན་འབྲུམ་ར་བ་དང་འབྲས་ཞིང་ཡིན་པ།

འབྲས་ལྡན་སྟོན་གྱི་དུས་སུ་ཤང་ཅང་གཙང་པོ་ཀུའེ་ལིན་གྲོང་ཁྱེར་ཆོན་ཀྲོའུ་རྫོང་ཏ་ཕིང་གྲུ་ཁ་ནས་ཤང་ཤང་དུ་རྒྱུག ལོ་90ལྷག་ཙམ་གྱི་གོང་དུ། འདི་ག་ནི་ཀྲུང་དབྱང་དམར་དམག་གིས་ཤང་ཅང་གཙང་པོ་མྱུར་དུ་སྒྲོལ་བའི་གྲུ་ཁ་གལ་ཆེ་ཤོས་དེ་རེད།

1934ལོར། ཀྲུང་གུང་ཀྲུང་དབྱང་དང་ཀྲུང་དབྱང་དམར་དམག་གི་གཙོ་ཤུགས་དམག་དཔུང་ཤང་ཅང་གཙང་པོ་སྒྲོལ་ཐུབ་སྟེ། དགྲ་བོས་ཤང་ཅང་གཙང་པོའི་ཤར་ཕྱོགས་སུ་དམར་དམག་གི་མཐའ་བསྐོར་ནས་ཚར་གཅོད་རྩིས་བྱེད་པའི་རེ་ངན་ཐལ་བའི་རྡུལ་དུ་བརླགས་པར་འགན་ལེན་ཏན་ཏིག་བྱ་ཆེད། དམར་དམག་གི་དཔོན་དམག་ཁྲི་འགའ་ཤས་ཀྱིས་ཤང་ཅང་གཙང་པོའི་ངོགས་གཉིས་སུ་དམར་འཛིང་དྲག་པོ་བྱས། དམག་འཁྲུག་དེ་ཀྲུང་གོའི་གསར་བརྗེ་ཤི་གསོན་ཆགས་འཇིགས་དང་འབྲེལ་བའི་ལོ་རྒྱུས་ཀྱི་དོན་རྐྱེན་གལ་ཆེན་ཞིག་ཏུ་གྱུར་ཡོད།

2021ལོའི་ཟླ་4པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཀོང་ཤིས་སུ་རྟོག་ཞིབ་གནང་བར་ཕེབས་སྐབས། དང་ཐོག་ཆོན་ཀྲོའུ་རྫོང་ཚའེ་དབན་གྲོང་རྡལ་དུ་ཡོད་པའི་དམར་དམག་རྒྱང་སྐྱོད་ཀྱི་ཤང་ཅང་གཙང་པོའི་གཡུལ་འགྱེད་དྲན་གསོ་གླིང་དུ་ཕེབས་ཏེ། “གུང་ཁྲན་ཏང་མིའི་སྙིང་སྟོབས་དང་ཁྲག་རྒྱུན་རྒྱུན་འཛིན་བྱེད་དགོས”ཞེས་དང་། ང་ཚོས“ལོ་བརྒྱ་གཉིས་པའི་འབད་འཐབ་དམིགས་ཚད་མངོན་འགྱུར་བྱེད་པའི་རྒྱང་ལམ་གསར་པར་རྒྱལ་ཁ་ཐོབ་ངེས་ཡིན་པའི་དད་སེམས་བརྟན་པོ་བཅངས་ཏེ། རྒྱལ་ཁབ་ཕྱི་ནང་གི་ཉེན་ཁ་དང་འགྲན་སློང་ཚབས་ཆེན་སྣ་ཚོགས་ལས་རྣམ་པར་རྒྱལ་ཕོད་པར་བྱས་ནས། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་དམིགས་ཚད་ཕྱོགས་སུ་དཔའ་ངར་ཆེན་པོས་མདུན་སྐྱོད་བྱེད་དགོས”ཞེས་བཀའ་མངགས་ནན་པོ་གནང་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱེད་པའི་ཐད། ཀུའེ་ལིན་གྱིས་ཤང་ཅང་གཙང་པོའི་གཡུལ་འགྱེད་ཀྱི་གསར་བརྗེའི་ཐོན་ཁུངས་རྒྱུན་ཆད་མེད་པར་སྔོག་འདོན་དང་སྲུང་སྐྱོང་བྱས་ཏེ། རྒྱང་སྐྱོད་ཀྱི་གཏམ་རྒྱུད་ཡག་པོ་བཤད་པ་དང་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་བཏང་ནས་དུས་རབས་གསར་པའི་རྒྱང་སྐྱོད་ལམ་བུར་ཡག་པོ་བསྐྱོད་ཡོད།

གསར་བརྗེའི་སྙིང་སྟོབས་མི་རབས་ནས་མི་རབས་བར་རྒྱུན་འཛིན་བྱས་པ།

དམར་དམག་རྒྱང་སྐྱོད་ཀྱི་ཤང་ཅང་གཙང་པོའི་གཡུལ་འགྱེད་དྲན་གསོ་ཁང་དུ་སྐྱོད་སྐབས། “ཛ་དྲག་ཆེ་བ”དང“ཛ་དྲག་ཤིན་ཏུ་ཆེ་བ”ཞེས་པའི་དམག་འཁྲུག་སྐབས་ཀྱི་ཏར་འཕྲིན་མིག་ལམ་དུ་མངོན་པ་དང་བཙའ་བརྒྱབ་པའི་གོ་མཚོན་དང་སྒྲིག་ཆས་སྣ་ཚོགས་བཤམས་ཡོད། ཡུལ་སྐོར་བས་དེའི་ཁྲོད་ནས་ཕར་འགྲོ་ཚུར་འོང་བྱེད་པ་དང་སྐབས་རེ་འགྲོ་མཚམས་བཞག་ནས་ཞིབ་པར་ལྟ་བ། སློབ་གྲྭ་འབྲིང་ཆུང་གི་སློབ་མའི་ལྟ་སྦྱོང་ཚོགས་པས་བང་བསྒྲིགས་ནས་ཉན་པ་དང་འགྲེལ་བཤད་པས་འགྲེམས་རྫས་དང་ཟུང་འབྲེལ་བྱས་ནས་གསར་བརྗེའི་ལོ་རྒྱུས་ངོ་སྤྲོད་བྱེད་བཞིན་མཆིས།

“གླིང་དེས་དྲན་གསོ་ཁང་གི་ཆེད་དོན་འགྲེམས་སྟོན་དང་གསར་བརྗེའི་སྙིང་སྟོབས་ལྟ་སྦྱོང་སོགས་ཀྱི་རྣམ་པར་བརྟེན་ནས་གཡུལ་སའི་རྗེས་ཤུལ་དང་། ལོ་རྒྱུས་ཀྱི་རིག་དངོས། གསར་བརྗེའི་གཏམ་རྒྱུད་བཅས་མཉམ་དུ་སྦྲེལ་ཏེ་གསར་བརྗེའི་རིག་གནས་རྒྱུན་འཛིན་དང་དར་སྤེལ་གཏོང་གི་ཡོད”2026ལོའི་ཟླ་6པའི་བར། དྲན་གསོ་གླིང་གིས་རིམ་རྩིས་བརྒྱབ་ན་ཡུལ་སྐོར་བ་མི་ཐེངས་ཁྲི་1100ལྷག་ཙམ་ལ་སྣེ་ལེན་ཞུས་ཡོད་ཅེས་ཆོན་ཀྲོའུ་དམར་དམག་རྒྱང་སྐྱོད་ཀྱི་ཤང་ཅང་གཙང་པོའི་གཡུལ་འགྱེད་རིག་གནས་སྲུང་སྐྱོང་རྒྱུན་འཛིན་ལྟེ་གནས་ཀྱི་ཀྲུའུ་རེན་ཀྲོའུ་ཡུན་ལེང་གིས་ངོ་སྤྲོད་བྱས་པ་རེད།

གསར་བརྗེའི་ལམ་ཐིག་གིས་ས་གནས་ཕན་ཚུན་གཅིག་ཏུ་སྦྲེལ་བ།

2025ལོའི་ཟླ་4ཚེས་27ཉིན། “ཀུའེ་ལིན་གྱི་གསར་བརྗེའི་ཤང་ཅང་གཙང་པོ”ཞེས་པའི་གསར་བརྗེའི་ཡུལ་སྐོར་སྤྱི་སྤྱོད་རླངས་འཁོར་སྤྱོད་འགོ་ཚུགས་ཏེ། སྐབས་དེ་དུས་ཀྱི་དམར་དམག་རྒྱང་སྐྱོད་ཀྱི་རྗེས་ཤུལ་དེད་ནས་ཀུའེ་ལིན་བྱང་རྒྱུད་ཀྱི་ས་གནས་ཁག་ཏུ་བསྐྱོད་ཡོད།

ལམ་ཐིག་གཅིག་གིས་ལོ་རྒྱུས་དུམ་བུ་གཅིག་སྦྲེལ་བ།

གསར་བརྗེའི་ཡུལ་སྐོར་སྤྱི་སྤྱོད་རླངས་འཁོར་གྱི“ལྗོངས་རྣམ་ཧྲིལ་པོ”ཡི་ཡུལ་སྐོར་ལ་བརྟེན་ནས་ཆོན་ཀྲོའུ་རུ་ཡུལ་སྐོར་བས་དམར་དམག་རྒྱང་སྐྱོད་ཀྱི་ཤང་ཅང་གཙང་པོའི་གཡུལ་འགྱེད་དྲན་གསོ་གླིང་དུ་སྐྱོད་ཆོག་ལ། རྒྱང་སྐྱོད་འཕྲང་ལམ་དུའང་བསྐྱར་དུ་སྐྱོད་ཆོག་པ་དང་། ཤིང་ཨན་དུ་དམར་དམག་རྒྱང་སྐྱོད་བྱས་ནས་ཤང་ཅང་གཙང་པོ་བརྒལ་བའི་སྔོན་གཤེགས་དཔའ་བོའི་དྲན་གསོའི་རྡོ་རིང་ཁང་ལ་གུས་མཇལ་ཞུ་ཆོག་པ། ཀོན་དབྱང་དུ་ཤང་ཅང་གཙང་པོའི་གཡུལ་འགྱེད་ཀྱི་ཤིན་ཞུས་འགོག་རྒོལ་དམག་འཐབ་ཀྱི་ཅིའུ་ཧའེ་ཅིང་དམར་དམག་དྲན་གསོ་གླིང་དུ་ལྟ་སྐོར་བྱེད་ཆོག་པ། ལུང་ཧྲེང་དུ་ཏུང་རིགས་ཀྱི་དམངས་སྲོལ་གནས་ཚང་དུ་སྡོད་ཆོག་ལ་པི་ཝང་ཡང་ཉན་ཆོག་པ་བཅས་རེད།

ལོ་རྒྱུས་དུམ་བུ་གཅིག་གིས་འདས་ཟིན་པ་དང་འབྱུང་འགྱུར་མཉམ་དུ་འབྲེལ་བ།

ལུང་ཧྲེང་མི་རིགས་ཁག་རང་སྐྱོང་རྫོང་ལེ་ཅང་གྲོང་རྡལ་ཅང་ཁོའུ་གྲོང་ཚོར་འབྱོར་སྐབས་མཐོ་ཚད་སྨི་38.8ཟིན་པའི་ཏུང་རིགས་ཀྱི་རྔ་ཁང་ཞིག་འགྱིང་ངེར་གནས་ཡོད། “དམར་དམག་གི་རྔ་ཁང”དེ་ནི་མང་ཚོགས་ཀྱིས་རང་འགུལ་ངང་མ་དངུལ་གྲབས་གསོག་བྱས་ནས་བསྐྲུན་པ་འདི་ཉིད་སྐབས་དེ་དུས་འདི་གར་བཅའ་སྡོད་བྱས་པའི་དམར་དམག་ལ་དྲན་གསོ་ཞུ་ཆེད་རེད།

རྔ་ཁང་འགྲམ་གྱི་རི་ལྡེབས་སུ་ཟུར་ལྔའི་སྐར་དམར་བཀལ་བའི་འབྲུ་མཛོད་ཆུང་ངུའི་གནའ་ཤུལ་དེས་དམག་དམངས་ཀྱི་ཉ་ཆུ་ལྟ་བུའི་བརྩེ་སེམས་དག་ཟིན་ཐོར་བཀོད་ཡོད་པ་སྟེ། སྐབས་དེ་དུས་གྲོང་ཚོར་མེ་ཤོར་སྐབས་དམར་དམག་གི་འཐབ་འཛིང་པ་ཚོས་ཉེན་ཁར་མི་འཛེམ་པར་མེ་གསོད་པ་དང་འབྲུ་མཛོད་མྱུར་སྐྱོབ་བྱས་ཡོད། དེ་རྗེས་ཡུལ་མི་ཚོས་དམར་དམག་ལ་འབྲུ་རིགས་སྤྲད་ཀྱང་དམར་དམག་གི་འཐབ་འཛིང་པ་ཚོས“འབྲས་དེ་དག་ལོ་རྗེས་མའི་སོན་བྱེད་རོགས”ཞེས་བརྗོད་ནས་འབྲུ་རིགས་ལེན་མེད་པའི་གནས་ཚུལ་དེ་ཡུལ་མི་ཚོས་ད་བར་བརྗེད་མེད།

ཁྱད་ལྡན་ཐོན་ལས་འཕེལ་རྒྱས་བྱུང་ནས་མི་ཚོགས་མང་དུ་ཕྱིན་པ།

ཆོན་ཀྲོའུ་རྫོང་ཚའེ་དབན་གྲོང་རྡལ་མའོ་ཀྲུའུ་ཧྲན་གྲོང་ཚོར་སྐྱོད་སྐབས་རྒུན་འབྲུམ་སྡོང་པོ་གཅིག་ལ་གཅིག་ཏུ་སྦྲེལ། “ཅའོ་ཧྲན་ཕུའུ་འགོག་རྒོལ་དམག་འཐབ་དེ་ང་ཚོའི་གྲོང་ཚོའི་བྱང་ཕྱོགས་ཀྱི་ཅའོ་ཧྲན་ཕུའུ་གྲོང་ཚོར་བྱུང་བ་རེད། སྐབས་དེར་དམར་དམག་འབུམ་ཤོག་ཆེ་མོ་དང་པོས་ཚད་ཡོད་ཀྱི་དམག་ཤུགས་ལ་བརྟེན་ཏེ་དགྲ་བོའི་ཚུར་རྒོལ་ཁ་གཏད་བཅག་ནས་ཀྲུང་དབྱང་དམར་དམག་གིས་ཤང་ཅང་གཙང་པོ་བརྒལ་བར་རམ་འདེགས་བྱས་ཡོད” གྲོང་ཚོའི་ལས་བྱེད་པ་ཝང་ཅུན་རུང་གིས་གསར་བརྗེའི་ལྟ་སྦྱོང་ཚོགས་པ་ཁྲིད་དེ་རྒུན་འབྲུམ་ར་བ་དང་ཞིང་ཁྱིམ་གྱི་སྒོ་རར་བསྐྱོད་ཅིང་། རྒུན་འབྲུམ་འདེབས་སྟངས་ཤོད་ཞོར་དུ་གྲོང་ཚོ་དང་དམར་དམག་གི་གཏམ་རྒྱུད་གླེང་བ་རེད། “གསར་བརྗེའི་ཡུལ་སྐོར་དང་རྒུན་འབྲུམ་ཐོན་ལས་ཀྱིས་ཡུལ་སྐོར་བ་དང་ལྟ་སྐོར་བའི་ཡིད་དབང་བཀུག་ཡོད”

དེ་སྔོན་གྲོང་ཚོའི་རྒུན་འབྲུམ་གྱི་སྣ་ཁ་ཉུང་བ་དང་ཚོང་ལམ་མང་པོ་མེད། 2022ལོར་དབྱང་ཀོང་མེ་ཀུའེ་སོགས་རྒུན་འབྲུམ་གྱི་སྣ་ཁ་གསར་པ་ནང་འདྲེན་བྱས་རྗེས་ད་ཆ་སྣ་ཁ་10ལྷག་ཙམ་ཡོད་ལ། ཞིང་ནང་དུ་རིག་ལྡན་ཞིང་ལས་སྒྲིག་ཆས་སྒྲིག་སྦྱོར་བྱས་པས་ས་རྒྱུའི་དྲོད་ཚད་དང་བརླན་ཚད་ཁ་པར་ནས་ཤེས་ཐུབ། རྒུན་འབྲུམ་མུའུ་གཅིག་གི་ཡོང་འབབ་སྒོར་སྟོང་ཕྲག་ཁ་ཤས་ནས་སྒོར་ཁྲི་ལྷག་ཙམ་བར་འཕར་བ་དང་གྲོང་ཚོས་ལོ་ལྟར་ཡུལ་སྐོར་བ་མི་ཐེངས་ཁྲི་30ལྷག་ཙམ་ལ་སྣེ་ལེན་ཞུ་གི་ཡོད་པ་རེད།