“ཀྲུའུ་ཞི་ཞི་ཅིན་ཕིང་གིས་འབོ་གསེར་རྒྱལ་ཁབ་ཀྱིས་ཤེས་དཔལ་ཕན་ཚུན་དཔྱད་གཞིར་འཛིན་པར་སྐུལ་འདེད་གཏོང་མཁན་གྱི་གདོང་ལེན་པ་ཞིག་བྱེད་དགོས་པའི་ནན་བཤད་གནང་ཡོད། འབོ་གསེར་བརྙན་འཕྲིན་ལས་ཁུངས་ཀྱི་ཨ་ཧྥེ་རི་ཁའི་འཕྲིན་ལམ་གྱིས་མི་ཆོས་རིག་གནས་སྤེལ་རེས་ཀྱི་འདུན་པ་དེ་ཞིབ་ཕྲའི་ལག་ལེན་ལ་རྒྱུན་ཆད་མེད་པར་བསྒྱུར་ནས། འབོ་གསེར་རྒྱལ་ཁབ་ཀྱི་དམངས་ཚོགས་ཕན་ཚུན་རྒྱུས་མངའ་དང་མཛའ་མཐུན་ཡོང་བར་སྐུལ་འདེད་གཏོང་ཆེད་སྟོབས་ཤུགས་ལེགས་སྐྱེས་འབུལ་འདོད་ཡོད”ཅེས་འབོ་གསེར་བརྙན་འཕྲིན་ལས་ཁུངས་ཀྱི་ཨ་ཧྥེ་རི་ཁའི་འཕྲིན་ལམ་གྱི་འགན་འཁུར་བ་ཨ་དབྱང་ཏ·ཧོ་ལུའོ་ཡིས་ཉིན་ཤས་གོང་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས་དེ་ལྟར་བརྗོད།

“འབོ་གསེར་མཉམ་ལས་ལམ་སྲོལ་བཙུགས་ཚུན། སྒོ་དབྱེ་བསྟུན་མཁས་དང་མཉམ་ལས་གཉིས་ཁེའི་སྙིང་སྟོབས་ཐོག་མཐའ་བར་གསུམ་དུ་རྒྱུན་འཁྱོངས་བྱས་པས། མཉམ་ལས་ལམ་སྲོལ་དེ་དེང་སྐབས་འཛམ་གླིང་ཐོག་ཤུགས་རྐྱེན་ཆེ་ཤོས་ལྡན་པའི་གསར་དར་ཁྲོམ་ར་དང་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་མཉམ་ལས་ཀྱི་ལས་སྟེགས་ཞིག་ཏུ་གྱུར་ཡོད”ཅེས་ཧོ་ལུའོ་ཡིས་བརྗོད་པ་དང་། ཁོང་གིས་ཀྲུང་གོས་འབོ་གསེར་གྱི་དངོས་སྒྲུབ་མཉམ་ལས་སྤུས་ཚད་དེ་བས་མཐོ་བའི་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་བཏང་ནས་འབོ་གསེར་གྱི་མཉམ་ལས་ལམ་སྲོལ་གྱི་མཉེན་ཤུགས་དང་གསོན་ཤུགས་རྒྱུན་ཆད་མེད་པར་ཆེ་རུ་གཏོང་བཞིན་ཡོད། ཀྲུང་གོ་ནི་འབོ་གསེར་མཉམ་ལས་ནང་ཞུགས་མཁན་དང་། འཛུགས་སྐྲུན་བྱེད་མཁན། སྐུལ་འདེད་གཏོང་མཁན་བཅས་ཡིན་པ་དང་རྨང་གཞིའི་སྒྲིག་བཀོད་དང་། དཔལ་འབྱོར་ཚོང་དོན་མ་འཇོག གྲངས་འཛིན་དཔལ་འབྱོར་སོགས་ཁྱབ་ཁོངས་སུ་འབད་འབུངས་ཟམ་མི་ཆད་པར་བྱེད་པ་མ་ཟད། ནུས་པ་འཛུགས་སྐྱོང་དང་མི་ཆོས་སྤེལ་རེས་སོགས་ཀྱི་ཐད་ལའང་རྒྱུན་ཆད་མེད་པར་རྒྱ་ཆེར་གཏོང་བཞིན་ཡོད་པས་འབོ་གསེར་རྒྱལ་ཁབ་ཐུན་མོང་ཐོག་འཕེལ་རྒྱས་འགྲོ་བར་ཡིད་ཆེས་དང་སྒུལ་ཤུགས་ཆེན་ པོ་བསྣན་ཡོད”ཅེས་བརྗོད།

ཧོ་ལུའོ་ཡིས། འབོ་གསེར་རྒྱལ་ཁབ་ཀྱིས་རེས་སྐོར་གསར་པའི་ཚན་རྩལ་འཕོ་འགྱུར་ཁྲོད་རང་འགུལ་ངང་རྗེས་ལུས་མི་ཐེབས་པ་བྱས་ཏེ་མི་ཐབས་རིག་ནུས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་ཧུར་ཐག་བརྒྱབ་ནས་ལག་རྩལ་སྒོ་དབྱེ་དང་གྲུབ་འབྲས་མཉམ་སྤྱོད་ལ་སྐུལ་འདེད་གཏོང་དགོས། “ཀྲུང་གོ་ཕྱོགས་ཀྱིས་ཕྱོགས་ཁག་དང་མཉམ་དུ་འཛམ་གླིང་གི་མི་ཐབས་རིག་ནུས་མཉམ་ལས་རྩ་འཛུགས་འཛུགས་རྒྱུར་སྐུལ་འདེད་བཏང་བ་དང་འབྲེལ། འབོ་གསེར་རྒྱལ་ཁབ་སོགས་ལ་ཕྱོགས་ནས་རྒྱལ་སྤྱིའི་མི་ཐབས་རིག་ནུས་བཀོལ་སྤྱོད་མཉམ་ལས་ལྟེ་གནས་བཙུགས་ཏེ་གོ་ལ་ཧྲིལ་པོའི་ལྷོ་ཕྱོགས་ཀྱིས་མི་ཐབས་རིག་ནུས་མཉམ་ལས་གཏིང་ཟབ་བྱེད་པར་ལས་སྟེགས་གལ་ཆེན་མཁོ་འདོན་བྱས་ཡོད་པའི”ངོས་འཛིན་བྱེད་ཀྱི་ཡོད། ཁོང་གིས“ཀྲུང་གོ་ཕྱོགས་ཀྱིས་བཏོན་པའི་འབོ་གསེར་རྒྱལ་ཁབ་ཀྱི་མི་ཐབས་རིག་ནུས་ཀྱིས་བཟོ་ལས་ཅན་གསར་པར་མཐུན་རྐྱེན་སྦྱོར་དགོས་པའི་གྲོས་འགོར་དོ་ཁུར་བྱེད་རིན་ཡོད་པ་ཞིག་རེད། རྒྱལ་ཁབ་ཁག་གིས་ཞིབ་འཇུག་གསར་སྤེལ་དང་ཉེར་སྤྱོད་མཉམ་ལས་བྱས་ནས་དེའི་གྲུབ་འབྲས་ཀྱིས་འཕེལ་རྒྱས་དང་དམངས་འཚོར་ཕན་པ་ཐོབ་པའི་རེ་བ་ཡོད”ཅེས་བརྗོད།

ཉེ་བའི་ལོ་ཤས་རིང་། འབོ་གསེར་རྒྱལ་ཁབ་ཀྱིས་འབོ་གསེར་རྒྱལ་ཁབ་ཀྱི་རྒྱལ་སྐྱོང་སྲིད་འཛིན་གྱི་བགྲོ་གླེང་ཚོགས་འདུ་དང་། འབོ་གསེར་རྒྱལ་ཁབ་ཀྱི་མི་ཆོས་རིག་གནས་སྤེལ་རེས་གླེང་སྟེགས། བུད་མེད་ཀྱི་གསར་གཏོད་འགྲན་བསྡུར་ཆེ་མོ་སོགས་ཀྱི་ལམ་སྲོལ་གང་ལེགས་སྤྱད་དེ་མི་ཆོས་སྤེལ་རེས་གཏིང་ཟབ་བྱས་ཡོད། ཧོ་ལུའོ་ཡིས། མི་ཆོས་རིག་གནས་སྤེལ་རེས་ནི་འབོ་གསེར་རྒྱལ་ཁབ་ཀྱི་དངོས་སྒྲུབ་མཉམ་ལས་ཀྱི་གྲུབ་ཆ་གལ་ཆེན་ཞིག་ཡིན་པས། རྒྱལ་ཁབ་དབར་གྱི་འབྲེལ་བ་བརྟན་པོའི་ངང་འཕེལ་རྒྱས་ཡོང་བར་དྲང་ནུས་གཅིག་ཏུ་བསྡུ་ཐུབ་པ་དང་། འབོ་གསེར་རྒྱལ་ཁབ་ཀྱི་དམངས་ཚོགས་ཀྱིས་ཕན་ཚུན་གྱི་དངོས་ཡོད་གཏམ་རྒྱུད་ཤེས་རྟོགས་བྱེད་ཐུབ། “ཀྲུང་གོ་ཕྱོགས་ཀྱིས་འབོ་གསེར་རྒྱལ་ཁབ་ཀྱི་བཟོ་བཀོད་པ་གསོ་སྐྱོང་མནའ་འབྲེལ་བཙུགས་ནས་བཟོ་བཀོད་པ་མཉམ་འབྲེལ་གསོ་སྐྱོང་དང་འཇོན་ཐང་གི་ཚད་གཞི་ཕན་ཚུན་ཁས་ལེན་བྱེད་པ་མ་ཟད། ད་དུང་འབོ་གསེར་རྒྱལ་ཁབ་ཀྱི་གཞོན་ནུའི་ཚན་རྩལ་གསར་གཏོད་ཀྱི་སྤེལ་རེས་འཆར་གཞི་ལག་བསྟར་བྱ་རྒྱུའི་གྲོས་འགོ་བཏོན་པ་དེས་འབོ་གསེར་རྒྱལ་ཁབ་འཕེལ་རྒྱས་ཀྱི་ནང་གནས་སྒུལ་ཤུགས་སྔར་བས་ཆེ་རུ་འགྲོ་རྒྱུ་ཡིན་པའི”ངོས་འཛིན་བྱེད་ཀྱི་ཡོད།

འབོ་གསེར་བརྙན་འཕྲིན་ལས་ཁུངས་ནི་2017ལོར་བཙུགས་པ་དང་འབོ་གསེར་རྒྱལ་ཁབ་ཀྱི་ཁོངས་མིའི་རྒྱལ་ཁབ་དང་རོགས་ཟླའི་རྒྱལ་ཁབ་ཀྱི་མི་ཆོས་རིག་གནས་དང་དཔལ་འབྱོར་སོགས་ཁྱབ་ཁོངས་ཀྱི་ཆ་འཕྲིན་བརྒྱུད་བསྒྲགས་བྱེད་པར་གཞོལ་བཞིན་ཡོད། “ང་ཚོས་ཀྲུང་གོའི་སྨྱན་སྦྱོར་དང་ཟོལ་མེད་མཉམ་ལས་ལ་མུ་མཐུད་ཤུགས་སྣོན་བརྒྱབ་ནས་སྤྱི་ཚོགས་དང་རིག་གནས་མི་འདྲ་བ་མཉམ་འདྲེས་ཡོང་བར་སྐུལ་འདེད་བཏང་སྟེ་རྒྱལ་ཁབ་གཉིས་པོའི་མི་དམངས་ཀྱི་སེམས་ཐག་དེ་བས་ཉེ་རུ་འགྲོ་ཐུབ་པ་བྱེད་འདོད་ཡོད། ང་ཚོས་པེ་ཅིང་དུ་འཁྲབ་གཏོང་ཁང་བཙུགས་ནས་ཨ་ཧྥེ་རི་ཁའི་གསར་འགོད་པ་ཀྲུང་གོར་བཅའ་སྡོད་བྱེད་པར་གཏོང་རྩིས་ཡོད། ང་ཚོས་ད་དུང་ཀྲུང་གོ་ཕྱོགས་དང་མཉམ་དུ་ལེ་ཚན་བཟོ་བ་དང་མཉམ་དུ་ཕན་ཚུན་འཕེལ་རྒྱས་ཀྱི་གཏམ་རྒྱུད་གླེང་རྒྱུ་ཡིན། ཕུགས་ལ་གཞི་ཚུགས་པ་མ་ཟད་མི་དམངས་ཀྱི་སེམས་ལ་ཟུག་པའི་མི་ཆོས་རིག་གནས་སྤེལ་རེས་ལས་འབོ་གསེར་རྒྱལ་ཁབ་ནང་ཁུལ་གྱི་གོང་བུ་འགྲིལ་ཤུགས་རྒྱུན་ཆད་མེད་པར་ཆེ་རུ་བཏང་ནས་གོ་ལ་ཧྲིལ་པོའི་ལྷོ་ཕྱོགས་ཀྱི་འབོད་སྒྲ་དེ་བས་ཤུགས་ཆེ་བ་སྒྲོག་གི་ཡིན”ཞེས་ཧོ་ལུའོ་ཡིས་བརྗོད།