བོད་ཀྱིས“ལོ་ལྔ་ཚན་བཅོ་ལྔ་པའི”རིང་གི་དབང་སྐྱོན་བྱ་གཞག་སྤུས་འབྲས་ལེཌ་གཉེར་ཡོང་བར་སྐུལ་འདེད་ཤུགས་ཆེན་བཏང་བ།
ཉེ་ཆར། གསར་འགོད་པར་བོད་རང་སྐྱོང་ལྗོངས་དབང་པོ་སྐྱོན་ཅན་མཉམ་འབྲེལ་ལྷན་ཚོགས་ནས་ཤེས་རྟོགས་བྱུང་བར། “ལོ་ལྔ་ཚན་བཅོ་ལྔ་པའི”རིང་གི་དབང་སྐྱོན་བྱ་གཞག་འཕེལ་རྒྱས་ཀྱི་འགོ་འཛུགས་ས་གསར་པར་གཞི་ཚུགས་ཏེ། རང་ལྗོངས་ཀྱི་དབང་པོ་སྐྱོན་ཅན་མཉམ་འབྲེལ་ལྷན་ཚོགས་ཁོངས་གཏོགས་ཀྱིས་རིག་གནས་སྤེལ་རེས་དང་། དམངས་འཚོ་འགན་ལེན། ཞབས་ཞུའི་ནུས་པ་འཛུགས་སྐྱོང་བཅས་ལ་དམིགས་ནས་དངོས་སྒྲུབ་ཀྱི་བྱ་ཐབས་རབ་དང་རིམ་པ་དོན་འཁྱོལ་བྱས་ཏེ། བོད་ཀྱི་དབང་པོ་སྐྱོན་ཅན་བྱ་གཞག་སྤུས་འབྲས་ལེགས་གཉེར་ཡོང་བར་སྐུལ་འདེད་ཤུགས་ཆེན་བཏང་བ་རེད།
རིག་གནས་སྤེལ་རེས་དང་མཉམ་འདྲེས་ཐད། རང་ལྗོངས་ཀྱིས་དབང་པོ་སྐྱོན་ཅན་ལ་བསམ་བློའི་སློབ་གསོ་ཁྲིད་སྟོན་བྱེར་པར་རྒྱུན་མཐུད་སྐུལ་འདེད་བཏང་ནས“གཅིག་རེ་ལྔའི”རིག་གནས་རྣམ་གྲངས་ལག་བསྟར་བྱས་པ་རེད། རིག་གནས་ལུས་རྩལ་བྱེད་སྒོ་དང་མངོན་མིན་རིག་གནས་ཤུལ་བཞག་སྲུང་སྐྱོང་དང་རྒྱུན་འཛིན་སོགས་ཀྱི་གཞི་རྟེན་ལ་བརྟེན་ནས་དབང་པོ་སྐྱོན་ཅན་འགྲེམས་སྟོན་དང་སྤེལ་རེས་ཀྱི་བྱེད་སྒོ་སྣ་ཚོགས་ནང་ཞུགས་སུ་བཅུག་སྟེ། ལྗོངས་ཕྱིའི་དབང་པོ་སྐྱོན་ཅན་མཉམ་འབྲེལ་ལྷན་ཚོགས་དང་དབང་པོ་སྐྱོན་ཅན་རོགས་སྐྱོར་སྒྲིག་གཞིའི་དབར་ཕྱོགས་གཉིས་མཉམ་འགུལ་གྱི་ལས་སྟེགས་བཏོད་ནས་མི་རིགས་ཁག་གི་དབང་པོ་སྐྱོན་ཅན་འགྲོ་འོང་དང་། སྤེལ་རེས། མཉམ་འདྲེས་བཅས་ལ་སྐུལ་འདེད་བཏང་བ་རེད།
དམངས་འཚོ་འགན་ལེན་ཁྱབ་ཁོངས་སུ་དྲག་སྐྱེད་དང་། སློབ་གསོ། ལས་ཞུགས། སྤྱི་ཚོགས་འགན་སྲུང་བཅས་ལ་གནས་པའི་ཞན་ཆ་ཁག་ཡག་པོ་བསལ་ཡོད། དྲག་སྐྱེད་ཞབས་ཞུ་མཁོ་སྤྲོད་ལེགས་སུ་བཏང་ནས་འབྲོག་ཁུལ་གྱི་སྒོ་རྩར་སྐོར་སྐྱོད་སྨན་བཅོས་དང་རྒྱང་བསྟེན་དྲག་སྐྱེད་མཛུབ་ཁྲིད་ཞབས་ཞུ་གཙོ་གནད་ཐོག་མང་དུ་བཏང་སྟེ། མང་ཚོགས་རང་བཞིན་གྱི་དྲག་སྐྱེད་ལུས་རྩལ་གྱི་བྱེད་སྒོ་རྒྱ་ཁྱབ་ངང་སྤེལ་བ་རེད། དབང་པོ་སྐྱོན་ཅན་གྱི་རམ་འདེགས་ཡོ་བྱད་འོས་འཚམ་བཀོད་སྒྲིག་དང་དཔལ་འབྱོར་ལ་དཀའ་ངལ་ཡོད་པའི་དབང་པོ་སྐྱོན་ཅན་ཚབས་ཆེན་གྱི་ཁྱིམ་ཚང་ལ་འགོག་མེད་སྒྱུར་བཀོད་བྱ་རྒྱུ་ཟུང་འབྲེལ་བྱས་ནས། དབང་པོ་སྐྱོན་ཅན་གྱི་འཚོ་སྐྱོང་ནུས་པ་ལེགས་སུ་གཏོང་བར་རམ་འདེགས་དང་། འགྲོ་སྐྱོད་སྟབས་བདེ་ཡོང་བར་བྱས་ཡོད། དབང་པོ་སྐྱོན་ཅན་གྱི་ལོ་ཆུང་བྱིས་པའི་འོས་འགན་སློབ་གསོའི་ཆུ་ཚད་མཐོ་རུ་རྒྱུན་མཐུད་གཏོང་བ་དང་། དབང་པོ་སྐྱོན་ཅན་གྱི་ལས་རིགས་སློབ་གསོ་དང་མཐོ་རིམ་སློབ་གསོའི་སློབ་ཞུགས་ཐབས་ལམ་རྒྱ་ཆེར་གཏོང་བ། རྒྱལ་ཁབ་ཀྱི་སྤྱི་སྤྱོད་ལོང་ཡིག་གི་ལག་བརྡ་ཁྱབ་གདལ་གཏོང་བ་བཅས་བྱས་ཏེ། མི་རིགས་ཁག་གི་དབང་པོ་སྐྱོན་ཅན་གྱི་སྤེལ་རེས་ཟབ་ཏུ་གཏོང་བར་ཆ་རྐྱེན་གཏོད་དགོས། དབང་པོ་སྐྱོན་ཅན་གྱི་སྤྱི་ཚོགས་འགན་སྲུང་སྲིད་ཇུས་ཁག་དོན་འཁྱོལ་བྱས་ཏེ། བོད་བཟོའི་ལག་ཤེས་བཟོ་རྩལ་དང་། ཁྱད་ལྡན་ཞིང་འབྲོག་ཐོན་ལས། ས་མཐོའི་རིག་གནས་དང་ཡུལ་སྐོར་སོགས་ས་གནས་དེ་གའི་ཐོན་ཁུངས་ལ་བརྟེན་ནས་དབང་པོ་སྐྱོན་ཅན་གྱི་ལས་ཞུགས་ལས་གཏོད་ཀྱི་ལས་སྟེགས་བཏོད་ཡོད།
ཞབས་ཞུའི་ནུས་པ་འཛུགས་སྐྱོང་ཐད། ཕྱོགས་མང་པོས་མཉམ་དུ་དབང་པོ་སྐྱོན་ཅན་ལ་རོགས་རམ་བྱེད་པའི་ལས་ཀའི་རྨང་གཞི་བརྟན་དུ་བཏང་ཞིང་། དབང་པོ་སྐྱོན་ཅན་གྱི་ཞབས་ཞུའི་སྒྲིག་བཀོད་འཐུས་སྒོ་ཚང་དུ་གཏོང་བ་དང་། དབང་པོ་སྐྱོན་ཅན་གྱི་ཞབས་ཞུའི་ཁྱབ་ཁོངས་སུ་གྲངས་འཛིན་ལག་རྩལ་དང་རིག་ནུས་སྒྲིག་ཆས་སྤྱོད་མགྱོགས་སུ་གཏོང་བ། ཚན་རྩལ་གསར་གཏོད་ཁེ་ལས་དང་ཚན་ཞིབ་སྒྲིག་གཞི་དང་མཉམ་དུ་དབང་པོ་སྐྱོན་ཅན་ལ་རོགས་རམ་བྱེད་པའི་ལག་རྩལ་གསར་པ་དང་། ཐོན་རྫས་གསར་པ། ཞབས་ཞུ་གསར་པ་བཅས་ཁྱབ་གདལ་དང་ཉམས་ལེན་བཅས་བྱས་ནས། ཚན་རྩལ་གསར་གཏོད་ཀྱི་གྲུབ་འབྲས་དེ་དབང་པོ་སྐྱོན་ཅན་ལ་རོགས་རམ་བྱེད་པའི་ཕན་འབྲས་དངོས་སུ་འགྱུར་བར་སྐུལ་འདེད་བཏང་ཡོད། ལྗོངས་ཕྱིའི་དབང་པོ་སྐྱོན་ཅན་མཉམ་འབྲེལ་ལྷན་ཚོགས་ཀྱི་སྒྲིག་གཞི་དང་མཉམ་ལས་མཉམ་སྐྲུན་གཏིང་ཟབ་བྱས་ཏེ། ལས་བྱེད་པ་དང་ཤེས་ལྡན་མི་སྣ་ཕན་ཚུན་སྤེལ་རེས་དང་ཆེད་ལས་སྟོབས་ཤུགས་ལ་བརྟེན་ནས་བརྒྱུད་རོགས་ཁྲིད་གསུམ་བྱས་ཏེ་ས་གནས་དེ་གའི་དབང་པོ་སྐྱོན་ཅན་གྱི་ལས་དོན་དཔུང་ཁག་སྐྱེད་སྲིང་བྱས་ཡོད།
འབྲེལ་ཡོད་གསར་འགྱུར།