ཏང་འཛུགས་སྐྱོང་གིས་གནད་སྨིན་བཅོས་སྒྲིག་ལ་སྣེ་ཁྲིད་བྱས། སྟབས་བསྟུན་ཁྲིམས་སྒྱུར་གྱིས་སྒྲིག་ལམ་སྲུང་སྐྱོང་ཧུར་ཐག་བྱས།
ཆབ་མདོ་གྲོང་ཁྱེར་ཁ་རུབ་ཆུས་གྲོང་ཁྱེར་དོ་དམ་སྡེ་ཚན་གྱིས་སེམས་རྩ་འཁོལ་པོས་གྲོང་ཁྱེར་བཅོས་སྒྲིག་བྱས་པའི་མཐོང་ཐོས།
མཚན་མོར་ཆབ་མདོ་གྲོང་ཁྱེར་གྱི་ཇ་རྟའི་ཐང་ཆེན་དུ་འཆམ་འཆམ་དུ་ཡོང་མཁན་མང་ཚོགས་རྒྱུན་ཆད་རྒྱུ་མེད། གྲོང་ཁྱེར་དེའི་འདུ་འཛི་ཆེ་ཤོས་ཀྱི་ལྟེ་བའི་ས་ཁོངས་ཤིག་ཡིན་པས་འཁྲུག་ཆ་ཧ་ཅང་དོད་པོ་ཡོད། འོན་ཀྱང་སྐོར་སྐྱོད་ཁྲོམ་ཚོང་བས་ལམ་བཟུང་ཚོང་གཉེར་དང་ཁྲོམ་བཀྱག་གང་བྱུང་དུ་བཏོན་པས་གྲོང་ཁྱེར་དོ་དམ་ལ་དཀའ་ངལ་ཆེན་པོ་བཟོས་ཡོད།
གྲོང་ཁྱེར་དེའི་སྣང་ཚུལ་ངན་པ་རྦད་དེ་མེད་པ་བཟོ་ཆེད། ཆབ་མདོ་གྲོང་ཁྱེར་ཁ་རུབ་ཆུས་གྲོང་ཁྱེར་དོ་དམ་ཅུས་ཀྱི་ཏང་ཀྲི་པུའུ་ཡིས་ཆད་པ་གཅོད་པ་དང་ཁ་ཏ་བསླབ་བྱ་ཁོ་ན་བྱས་ནས་མ་བཞག་པར། ཏང་འཛུགས་སྐྱོང་ལ་བརྟེན་ནས་གཞི་རིམ་བཅོས་སྐྱོང་ལ་མཐུན་རྐྱེན་སྦྱར་ནས། ལས་སྒོའི་རྐང་འཛིན་པ་མགྱོགས་མྱུར་སྐོང་འཐེན་དང་ཏང་ཡོན་གདོང་ལེན་པའི་ཁྲིམས་སྒྱུར་གདོང་ལེན་རུ་ཁག་བཙུགས་ཏེ། སྤྱི་བདེ་སྡེ་ཚན་དང་མཉམ་དུ་ལས་སྒྲུབ་བྱས་ནས་བཅོས་སྒྲིག་གི་འཐབ་ས་དང་པོར་ཏང་ཡོན་གྱི་དར་ཆ་བཙུགས་ཡོད།
དེ་སྔའི་སྐོར་ཞིབ་བྱེད་སྟངས་དང་མི་འདྲ་བར་ད་ཐེངས་ཀྱི་བཅོས་སྒྲིག་ཐད“མཁའ་དབྱིངས་དང་ས་ངོས”ཀྱི་ཕྱོགས་བསྡུས་སྐོར་ཞིབ་བྱེད་སྟངས་སྤྱད་ཅིང་། མཁའ་དབྱིངས་སུ་མི་མེད་གནམ་གྲུ་བཏང་ནས་ཐང་ཆེན་ཉེ་འཁོར་གྱི་ཁུག་ཀྱོག་ཚང་མར་བཤར་འབེབས་བྱས་ཏེ་ལམ་བཟུང་ངེས་གནས་གནད་སྨིན་གཏན་འཁེལ་བྱས་པ་རེད། ས་ངོས་སུ་ཏང་ཡོན་གྱི་ཁྲིམས་སྒྱུར་རུ་མི་ཚོགས་ཆུང་ཁག་བགོས་ཀྱིས་རྐང་ཐང་མར་ཞིབ་བཤེར་དང་ས་ཚིགས་རེ་རེ་བཞིན་ཐོ་འགོད་བྱས་ཏེ། སྐོར་སྐྱོད་ཁྲོམ་བཀྱག་གི་གནས་ས་དང་གཉེར་སྐྱོང་གནས་ཚུལ་གྲལ་བཤེར་ཞིབ་ཚགས་བྱས་པ་རེད། ཉིན་ཕྱེད་མ་སོང་བར་སྐོར་སྐྱོད་ལམ་བཟུང་གཉེར་སྐྱོང་ས་ཚིགས་21ཚང་མའི་གནས་ཚུལ་མཐིལ་རྟོགས་དང་ཡིག་ཚགས་བཟོས་ནས། གནད་སྨིན་བཅོས་སྒྲིག་བྱེད་པར་རྨང་གཞི་བརྟན་པོ་བཏིང་ཡོད།
བཅོས་སྒྲིག་བྱ་ཡུལ་དུ་ཁ་ཏ་བསླབ་བྱ་བྱེད་པ་དང་ཆད་པ་ནན་པོ་གཅོད་པའི་བྱེད་སྟངས་དོར་ནས་ངང་རྒྱུད་རིང་པོས་སྤེལ་རེས་དང་སེམས་རྩ་འཁོལ་པོས་ཁྲིད་སྟོན་བྱེད་ཀྱི་ཡོད།
ཁྲོམ་ཚོང་བ་མི་ཉུང་བ་ཞིག་གིས་ལོ་འཁོར་མོར་དེ་གར་ཚོང་བརྒྱབ་ནས་བསྡད་པས་ཚད་ལྡན་དོ་དམ་བྱས་རྗེས་ཚོང་ལ་སྐྱོན་བརྒྱབ་ཡོང་སྙམ་སེམས་ཁྲལ་བྱེད་ཀྱི་ཡོད། ཚང་མའི་དོགས་གནད་དེར་དམིགས་ནས་ཏང་ཡོན་རུ་མིས་ངང་རྒྱུད་རིང་པོས་སྲིད་ཇུས་འགྲེལ་བཤད་རྒྱག་པ་དང་ཁྲིད་སྟོན་ཞིབ་ཚགས་བྱས་ཏེ། ཁྲིམས་ལུགས་ལ་འགྲེལ་བཤད་བརྒྱབ་པ་མ་ཟད་གནས་ལུགས་ཀྱང་དེ་བས་བཤད་ཡོད། ས་ཡུལ་དངོས་སུ་ཁྲོམ་ཚོང་བ་ཚང་མར་ཁྲིམས་སྒྱུར་གྱི་གསལ་བརྡའི་ཡི་གེ་དང་ཤ་ཚའི་དྲན་སྐུལ་ཡི་གེ་ཁག་21སྤྲད་པ་དང་། གོ་བདེ་ཤེས་སླའི་སྐད་ཆའི་ཐོག་ནས་དག་ཐེར་གྱི་བླང་བྱ་དང་ཚད་གཞི་གསལ་བཤད་བྱས་ཏེ་ཁྲོམ་ཚོང་བས་གོ་ཐུབ་པ་དང་། དང་ལེན་ཐུབ་པ། གཞོགས་འདེགས་བྱེད་འདོད་པ་བཅས་བྱས་ཡོད།
“དེ་སྔོན་གྲོང་ཁྱེར་དོ་དམ་བཅོས་སྒྲིག་ནི་སྟབས་བདེའི་ངང་ཁྲོམ་ཚོང་བ་མཐར་སྐྲོད་བཏང་བའི་བྱ་སྤྱོད་ཙམ་རེད་སྙམ་གྱི་ཡོད། འོན་ཀྱང་ད་ཐེངས་རུ་མི་ཚོས་ངང་རྒྱུད་རིང་པོས་ང་ཚོར་སྲིད་ཇུས་དང་མངོན་མེད་རྐྱེན་ངན་སྐོར་བཤད་པ་མ་ཟད། ད་དུང་ང་ཚོའི་འཚོ་བ་དཀའ་ལས་ཁག་པོ་ཡོད་པར་བསམ་གཞིགས་བྱས་པས་ཁོང་ཚོའི་བྱེད་སྟངས་དེ་རིགས་ང་ཚོའི་བློ་ལ་བབས་པོ་བྱུང”ཞེས་སྐོར་སྐྱོད་ཁྲོམ་ཚོང་བ་བློ་བཟང་གིས་བཤད། སེམས་རྩ་འཁོལ་བའི་ཁྲིམས་སྒྱུར་བྱེད་སྟངས་དེ་ཁྲོམ་ཚོང་བའི་བློ་ལ་བབས་ནས་ཚང་མས་གཅིག་རྗེས་གཉིས་མཐུད་ངང་ཁྲོམ་བཀྱག་དང་ཅ་ལག་བསྡུ་གསོག་རྒྱག་པ་དང་རང་རྟོགས་ངང་དག་ཐེར་ལ་གཞོགས་འདེགས་བྱས་པས། བཅོས་སྒྲིག་གི་བརྒྱུད་རིམ་ཧྲིལ་པོ་བརྟན་ལ་གོ་རིམ་ལྡན་པ་དང་ཤེས་དཔལ་ནུས་ཆེ་ལྡན་ནས“གདོང་ཐུག་མེད་པ་དང་། འགལ་ཟླ་མེད་པ། ཚང་མ་དག་ཐེར་ཐུབ་པ”བཅས་མངོན་འགྱུར་ཐུབ་ཡོད།
ཁ་རུབ་ཆུས་གྲོང་ཁྱེར་དོ་དམ་ཅུས་ཀྱི་ཏང་ཀྲི་པུའུ་ཡིས་ཟང་ཟིང་གི་རྣམ་པ་བཅོས་སྒྲིག་བྱེད་པ་མ་ཟད། ཕུགས་ཕན་ལམ་སྲོལ་དེ་བས་འཛུགས་རྒྱུ་མཐའ་འཁྱོངས་བྱས་ནས། ཏང་འཛུགས་སྐྱོང་གིས་གཞི་རིམ་བཅོས་སྐྱོང་ལ་སྣེ་ཁྲིད་བྱེད་སྟངས་མུ་མཐུད་གཏིང་ཟབ་ཏུ་བཏང་སྟེ་ཏང་ཡོན་གྱི་སྟོབས་ཤུགས་རྒྱུན་རྣམ་ཅན་གྱི་སྒོ་ནས་གྲོང་ཁྱེར་གྱི་འཐབ་ས་དང་པོར་གཤམ་སྐྱོད་བྱེད་པར་སྐུལ་འདེད་བཏང་ཡོད། རྒྱུན་རྣམ་ཅན་གྱི་སྐོར་ཞིབ་དང་། འགུལ་རྣམ་ཅན་གྱི་དོ་དམ་ཚོད་འཛིན། ཞིབ་ཚགས་ཅན་གྱི་ཞབས་ཞུ་བཅས་བྱས་པ་བརྒྱུད་བཅོས་སྒྲིག་གི་གྲུབ་འབྲས་མུ་མཐུད་སྲ་བརྟན་དུ་བཏང་ནས་གནད་དོན་བསྐྱར་དུ་ཐོན་རྒྱུ་ནན་འགོག་བྱས་པ་རེད།
འབྲེལ་ཡོད་གསར་འགྱུར།